Jeremia Angin Inring Rengin Awm Rawh
Jeremia Angin Inring Rengin Awm Rawh
“Ka thu hlen tûrin ka inrâlring reng a ni.”—JER. 1:12.
1, 2. Engvângin nge Jehova ‘inrâlrin rengna’ chu vai umkhal thing nêna thlunzawm a nih?
LEBANON leh Israel ram tlânga thing pâr hmasa ber ṭhîn pakhat chu vai umkhal thing a ni a. A pâr sendâng leh vâr mawi takte chu January thla tâwpah emaw, February thla tîr lamah emaw a hmuh theih tawh a ni. Hebrai ṭawnga a hming awmzia chu “harh chhuak hma” tihna a ni.
2 Jehova’n a zâwlnei atâna Jeremia a ruat khân, he vai umkhal thing nihna hi thil pawimawh tak pakhat khaikhin nân inchawih taka hman a ni a. Rawng a bâwl ṭan khân, zâwlnei chu vai umkhal thing aṭanga ṭang thar lo chhuak chu hmuhtîr a ni. A awmzia chu eng nge ni? Jehova chuan heti hian a hrilhfiah a ni: “Ka thu hlen tûrin ka inrâlring reng a ni,” tiin. (Jer. 1:11, 12) Vai umkhal thing a ‘harh chhuah hma’ ang bawkin, Jehova chu thuâwih lohna rah chhuah ṭha lo tak laka a mite vaukhân tûra a zâwlneite tîr chhuak tûrin ‘zîng tak taka tho’ anga sawi theih a ni. (Jer. 7:25) Tin, ani chu a hrilh lâwk thu sawi a thlen famkim hma loh chuan a châwl lo vang—a “inrâlring reng,” a nih loh leh a harh reng ang. A hun ruat tak, B.C.E. 607 a lo thlen chuan kal pêng Judai ram chunga Jehova rorêlna chu a lo thleng ta a ni.
3. Jehova chungchângah eng nge kan rin tlat theih?
3 Chutiang bawkin, tûn laiah pawh Jehova chu a duhzâwng ti tûrin a inrâlring reng a ni. A tân chuan a thu thlen famkimna tûr ngaihthah chu thil theih a ni lo. Jehova inrâlrinna chuan engtin nge a nghawng che? Kumin 2011-ah pawh hian Jehova chu a thutiamte thlen famkimna ngaihvenin a “inrâlring” tih i ring em? Jehova thutiam rin tlâk takte rinhlelhna chhe tê pawh kan nei a nih chuan, kan tân tûn hi thlarau lam mutthlûkna ata harh chhuah hun a ni. (Rom 13:11) Jehova zâwlnei a nih angin Jeremia chu inring rengin a awm a. Pathian pêk a rawngbâwlna atâna inring renga a awm chhan leh a awm dân bih chianna chuan Pathian hna min pêk kan thawh ṭâng ṭâng theih dân hmu thiam tûrin min ṭanpui ang.
Thuchah Hmanhmawhthlâk Chu
4. Jeremia chuan thuchah puan chhuahna kawngah eng harsatna nge a tawh a, engin nge chu thuchah chu hmanhmawhthlâk tak nihtîr?
4 Jehova hnên ata râlvêngtu hna a dawn khân Jeremia chu kum 25 mi vêl a nih a rinawm a. (Jer. 1:1, 2) Mahse, kum lama upa tawh leh thu neihna sâng tak chelh hnam hruaitute be tûra tling lo hle nia inhriain, naupang maiah a inngai a ni. (Jer. 1:6) Ani chuan demna thu khauh tak leh rorêlna râpawm tak chanchin puan tûr a nei a, chu chu a bîk takin puithiam te, zâwlnei der te, rorêltu te, leh ‘mahni kawng ṭheuhva hawi’ a, ‘kumkhuaa hnungtawlh tûra tawlhthlute’ hnêna puan tûr a ni. (Jer. 6:13; 8:5, 6) Lal Solomona biak in ropui, kum zabi li dâwn lai biakna dik hmunpui lo ni tawh ṭhîn chu tihchhiat a ni ang a. Jerusalem leh Judai ram pawh tihṭiau a ni ang a, a chhûnga chêngte pawh sala hruai an ni bawk ang. Jeremia puan chhuah tûr thuchah chu a hmanhmawhthlâk tih a chiang hle!
5, 6. (a) Engtin nge Jehova chuan Jeremia pâwl chu tûn laiah a hman? (b) Eng nge kan bih chian dâwn?
5 Tûn lai hunah hian, Jehova chuan he khawvêl chunga lo thleng tûr rorêlna chungchâng min vaukhân tûrin râlvêngtu anga ṭang tûr hriak thih Kristian ho khat chu mihringte hnênah a pe a. Kum sâwmbi tam tak chhûng chu he Jeremia pâwl chuan mite chu kan hun hmâwr tawhzia ngaihsak tûrin an fuih reng tawh a ni. (Jer. 6:17) Bible chuan Hun Vawng Diktu Ropui, Pathian Jehova chu a muang lo tih a târ lang a. A nî chu mihringte beisei loh hun, a hun ruatah tak a lo thleng ang.—Zep. 3:8; Mk. 13:33; 2 Pet. 3:9, 10.
6 Jehova chu a inrâlring reng a, a hun ruatah tak khawvêl thar a lo thlentîr dâwn tih rilrua hriatna chuan Jeremia pâwl leh an ṭhian inpumpêk takte chu hmanhmawh taka thu hril tûrin a chêttîr tûr a ni. Chu chuan engtin nge a nghawng che? Isua chuan mi tinin Pathian Ram an ṭan a ngai tih a târ lang a ni. A rawngbâwlnaa inring renga awm tûra Jeremia ṭanpuitu mize pathumte kan bih chiang ang a, chu chuan inring renga awm tûrin min ṭanpui ang.
Mite Hmangaihna
7. Dinhmun khirh tak hnuaia hmangaihnain thu hril tûra Jeremia a chêttîr dân hrilhfiah rawh.
7 Engin nge Jeremia chu hun khirh tak hnuaiah pawh thu hril tûra chêttîr? Ani chuan mite hmangaihna a nei a. Jeremia chuan mipuite hrehawmna tam tak chu berâm vêngtu derte awmtîr a ni tih a hria a. (Jer. 23:1, 2) Chu chuan hmangaihna leh lainatna nêna rawngbâwl tûrin a ṭanpui a ni. Ani chuan a chipuite chu Pathian thu hriaa nung tûrin a duh a. A ngaihtuah êm avângin an chunga chhiatna lo thleng tûr chu a ṭahpui hial a ni. (Jeremia 8:21; 9:1 chhiar rawh.) Jeremia Ṭah Hla chuan Jehova hming leh a mite a hmangaihna leh a ngaihtuahna nasa tak chu chiang takin a târ lang a ni. (ṬH. 4:6, 9) Tûn laia mite chu “vêngtu nei lo berâmte anga hrehawm leh darha an awm” i hmuh hian, Pathian Ram chanchin thlamuanthlâk tak hrilhhriat châkna i nei a ni lâwm ni?—Mt. 9:36.
8. Engin nge hrehawm tawrhna chuan Jeremia chu huatna thinlung a neihtîr lo tih târ lang?
8 Jeremia chuan ṭanpui a duh tak mite kut ngei chu a tuar a; mahse, a thungrûl lo va, huatna thinlung lah a pu hek lo. Lal sual tak Zedekia pawh tiamin, Jeremia chu mite chungah a dawhtheiin, ngil a nei bawk a ni. Zedekia’n tihhlum tûra thu a pêk hnuah pawh, Jeremia chuan Jehova thu âwih tûrin a la ngên cheu a ni. (Jer. 38:4, 5, 19, 20) Jeremia ang tlukin mite kan hmangaih ve em?
Pathian Pêk Huaisenna
9. Engtin nge Jeremia huaisenna chu Pathian pêk a ni tih kan hriat theih?
9 Jehova’n a biak hmasak ber ṭum chuan, Jeremia chuan hnial thlâk a tum a. Chu chuan a huaisenna leh nghehna lantîrte chu a pianpui a nih lohzia min hriattîr a ni. Chutih ahnêkin, zâwlnei anga rawng a bâwl chhûnga a lantîr chakna namai lo chu Pathiana a innghah tlatna aṭanga a neih a ni a. Jehova chu zâwlnei hnênah chuan “mi huaisen hlauhawm tak angin” a awm tak zet a, ani chu a mawhphurhna hlen thei tûrin chakna a pe a ni. (Jer. 20:11) Jeremia huaisenna chu a nasat êm avângin, Isua’n leia rawng a bâwl laiin ani chu Jeremia lo tho leh nia ngai tâwk an awm hial a nih chu!—Mt. 16:13, 14.
10. Engvângin nge hriak thih a la bângte chu ‘hnamte leh lal ram te’ chunga thu neitu an ni kan tih theih?
10 “Hnamte Lal” a nih angin, Jehova chuan hnamte leh ramte chunga rorêlna thu puang tûrin Jeremia chu a tîr a. (Jer. 10:6, 7) Mahse, eng kawngin nge hriak thih la bângte chu “hnamte leh lal ram chungah te” thu neitu an nih? (Jer. 1:10) Hmân laia zâwlnei ang bawkin, tûn laia Jeremia pâwl hnênah lei leh vâna Lalchungnungber chuan thawh tûr a pe a. Hriak thih Pathian chhiahhlawhte chu khawvêl puma hnamte leh lalramte chunga rorêlna thu puang tûra thu neihna pêk a ni tak zet a ni. Chungnungbera pêk thu neihna leh a thlarauva thâwk khum a Thu chiang tak hmangin, Jeremia pâwl chuan tûn laia hnamte leh lalramte chu Pathian hun ruatah a thlante hmangin a pawt chhuak ang a, a tiboral ang tih a puang a ni. (Jer. 18:7-10; Thup. 11:18) Jeremia pâwl chuan Pathian rorêlna thuchah khawvêl zawng zawnga puan chhuah hna a neih chu taima taka thawh reng a tum tlat a ni.
11. Dinhmun khirh tak kan hmachhawn hunah engin nge bâng lova thu hril zêl tûrin min ṭanpui ang?
11 Dodâlna te, ngaihsak lohna te, a nih loh leh dinhmun khirh tak te tawh huna lunghnual châng neih chu thil thar a ni lo. (2 Kor. 1:8) Mahse, Jeremia angin thawk zêl ila, i lunghnual suh ang u. Kan za hian Pathian ṭanpuina dîl zêlin, amahah innghat ila; tin, a ṭanpuina beisei reng chungin i lo ‘huaisen’ ṭheuh bawk ang u. (1 Thes. 2:2) Kristian dik kan nih angin, Pathian min pêk mawhphurhna hlen tûrin inring rengin kan awm tûr a ni. Jerusalem rinawm lovin a lo entîr Kristianna ram tihchhiatna chungchâng bâng lova hrilh zêl kan tum tlat a ngai a ni. Jeremia pâwl chuan “LALPA lungawi kum thu” chauh ni lovin, “kan Pathian phuba lâk nî” chanchin pawh an puang chhuak zêl ang.—Is. 61:1, 2; 2 Kor. 6:2.
Thinlung Taka Hlimna
12. Engvângin nge Jeremia chuan hlimna a nei reng a ni kan tih theih a, engin nge neih rengtîr?
12 Jeremia chuan rawngbâwlnaah hlimna a hmu a. Jehova hnênah chuan: “I thute chu tihlan a ni a, ka ei a, i thute chu ka tân lâwmna leh ka thinlung hlimna a ni; Aw LALPA, . . . i hming ka pu ta si a,” tiin a sawi a ni. (Jer. 15:16) Jeremia tân chuan Pathian dik aiawh nih leh a thu hrilh chu chanvo hlu tak a ni a. Jeremia’n amah nuih zattute lama a rilru a pêk hian a hlimna a hloh va, chu chu ngaihven awm tak a ni. Mahse, a thuchah ken mawina leh pawimawhna lam a ngaihtuah hian hlimna a nei leh a ni.—Jer. 20:8, 9.
13. Engvângin nge hlimna neih reng nâna thlarau lam thu rilte hmanga inchâwm a ngaih?
13 Kan hun laia thu hrilhnaa hlimna nei reng tûr chuan, Pathian Thu ril tak, “chaw rum” hmanga kan inchâwm a ngai a. (Heb. 5:14) Thu rilte zirna chuan rinna a sawh nghet a. (Kol. 2:6, 7) Chu chuan kan thiltihin Jehova a nghawng dân rilruah a tuh nghet a ni. Bible chhiar nân leh zir nâna hun neih harsa kan tih chuan kan hun hman dân kan bih chiang tûr a ni. Nî tina rei lo te chhûng tal pawh Bible zir nân leh chhût ngun nâna hun hman chuan Jeremia ang bawkin Jehova min hnaihtîr lehzual ang a, ‘lâwmna leh thinlunga hlimna’ min neihtîr ang.
14, 15. (a) Jeremia’n a hna rinawm taka a thawhna chuan eng nge a rah chhuah? (b) Tûn laia Pathian mite chuan thu hrilhna chungchângah eng nge an hriatthiam?
14 Jeremia chuan Jehova vaukhânna leh rorêlna thute bâng lovin hril ngei mah se, ‘siam ṭha tûr leh din tûra’ a hna neih pawh a hre reng a. (Jer. 1:10) Siam ṭhatna leh a dinna hna chuan rah ṭha a chhuah a ni. Juda ṭhenkhat leh Israel mi ni lo ṭhenkhat chu B.C.E. 607-a Jerusalem chhiatnaah an dam khawchhuak a. Rekaba, Ebedmeleka, leh Baruka te chu an dam khawchhuak tih kan hria a ni. (Jer. 35:18, 19; 39:15-18; 43:5-7) Hêng mi rinawm leh Pathian ṭihtu Jeremia ṭhiante chuan Jeremia pâwl zînga mite ṭhiana neitu lei lam beiseina neite a entîr a ni. Jeremia pâwl chuan he “mipui tam tak” te thlarau lama ṭanpuina aṭangin hlimna nasa tak an nei a ni. (Thup. 7:9) Chutiang bawkin, hêng hriak thih-ho ṭhian rinawmte chuan mi rilru ṭhate thutak hre tûra ṭanpuina aṭangin lungawina nasa tak an hmu bawk.
15 Pathian mite chuan chanchin ṭha hrilh hi a ngaithlatute rawngbâwlsakna mai ni lovin, Pathian kan biakna thiltih a ni tih an hria a. A ngaithla duh kan hmu emaw, hmu lo emaw pawh ni ila, thu hrilhna hmanga Jehova hnêna rawngbâwlna thianghlim hlan chuan nasa takin min tihlim a ni.—Sâm 71:23; Rom 1:9, 10 chhiar rawh.
I Hnaah ‘Inring Rengin’ Awm Rawh!
16, 17. Engtin nge Thu Puan 17:10 leh Habakuka 2:3 chuan kan hun hmâwr tawhzia a târ lan?
16 Kan hun hmâwr tawhzia chu thlarauva thâwk khum hrilh lâwkna, Thu Puan 17:10 thu kan ngaihtuah hian a lo lang chiang hle a. Lal pasarihna, Anglo-American Khawvêl Thuneitu chu a lo lang a. A chungchângah heti hian kan chhiar a ni: “[Khawvêl thuneitu pasarihna] a lo awm hunah chuan rei lo tê a awm tûr a ni,” tiin. Chu hun “rei lo tê” chu tûnah chuan a zo ṭêp tawh ang. Zâwlnei Habakuka chuan khawvêl tâwp chungchângah he thutiam hi min pe a ni: “Inlârna hi hun ruat chhûng atân mai a ni . . . Nghâk rawh; a lo thlen ngei dâwn avângin a tlai chuang lo vang,” tiin.—Hab. 2:3.
17 Heti hian inzâwt rawh: ‘Ka nun hian kan hun hmâwr tawhzia a târ lang em? Ka nun dân hian tâwpna a lo thleng thuai dâwn tih ka beiseizia a târ lang em? Nge ni a, ka thu tlûkna siamte leh ka thil ngaih pawimawhte hian tâwpna a lo thlen thuai ka beisei lo emaw, lo thleng ngai dâwn lova ngaihna ka nei emaw tih a târ lang zâwk?’ tiin.
18, 19. Engvângin nge tûn hi inthlahdul hun a nih loh?
18 Râl vêngtu pâwl chuan an hna chu an la thawk zo lo va. (Jeremia 1:17-19 chhiar rawh.) Hriak thih a la bângte chu tihchêt rual loh “thîr ban” leh “khawpui kulh nei” ang anni chu a va lâwmawm tak êm! Anni chuan an hna an thawh zawh hma loh zawng Pathian Thu hmanga intichak zêlin, an ‘kâwng chu thutakin an hrêng’ a ni. (Eph. 6:14) Mipui tam tak zînga mite pawhin chutiang tum ruhna nên chuan Jeremia pâwl chu Pathian pêk hna an thawhnaah an ṭanpui tlat a ni.
19 Tûn hi Lalram rawngbâwlnaa inthlahdul hun a ni lo va, Jeremia 12:5 thu pawimawhna ngaihtuah hun a ni. (Chhiar rawh.) Kan zain harsatna tawh tûr kan nei ṭheuh va. Chutiang rinna fiahnate chu kan intlânsiakpui tûr “kea kal mite” nêna khaikhin theih a ni a. Nimahsela, “hrehawm nasa tak” kan hnaih rual hian harsatna a pun chhoh zêl kan beisei thei a ni. (Mt. 24:21) Harsatna khirh zâwk hmachhawn chu ‘sakawrte tlânsiakpui’ nêna tehkhin theih a ni ang. Sakawr tlân chak tak tlânpui tûr chuan chhelna nasa tak neih a ngai ngei ang. Chuvângin, nakina kan la tawh tûrte atâna min buatsaih theih avângin, tûna harsatna kan tawhte chhel taka tawrh chu a sâwt hle thei a ni.
20. Eng nge tih tlat i tum?
20 Kan za hian Jeremia entawnin, thu hril tûra kan mawhphurhna chu kan hlen ṭheuh thei a ni. Hmangaihna te, huaisenna te, leh hlimna te ang chi miziate chuan Jeremia chu kum 67 chhûng rinawm takin rawng a bâwltîr thei a. Vai umkhal pâr mawi tak chuan Jehova chu a thu hlen tûrin a “inrâlring” reng dâwn tih min hriat chhuahtîr a ni. Chu chu, kan tân pawha inring renga awm chhan tûr ṭha tak a ni a. Jeremia chu ‘inring renga’ a awm theih avângin, keini pawh kan awm ve thei a ni. (w11-E 03/15)
Kan Hre Chhuak Thei Em?
• Engtin nge hmangaihna chuan Jeremia chu a hnathawh tûr atâna ‘inring renga’ awm tûrin a ṭanpui?
• Engvângin nge Pathian pêk huaisenna kan mamawh?
• Engin nge Jeremia chu hlimna nei reng tûra ṭanpui?
• Engvângin nge ‘inring renga’ awm chu i duh?
[Zirlai Atâna Zawhnate]
[Phêk 31-naa milemte]
Dodâlna kârah pawh thu i hril zêl ang em?