Khawvêl Thlarau Ni Lovin, Pathian Thlarau Dawng Rawh
Khawvêl Thlarau Ni Lovin, Pathian Thlarau Dawng Rawh
“Athlâwna Pathianin thil min pêkte chu kan hriat theihna tûrin, keini zawngin khawvêl thlarau ni lovin, thlarau, Pathian hnêna mi chu kan hmu zâwk a ni.”—1 KOR. 2:12.
1, 2. (a) Eng kawngin nge Kristian dikte chuan do an neih? (b) Eng zawhnate nge kan ngaihtuah ang?
KRISTIAN dikte chuan do an nei tlat! Kan hmêlma chu thiltithei tak, vervêk tak, leh râl hrât khawkhêng a ni. Ani chuan mihring zînga a tam zâwkte hnehtu râlthuam ṭha tak pakhat a nei a. Mahse, tihtheih rêng nei lo emaw, tlâwm ngei ngei tûra ruat emaw angah kan inngai tûr a ni lo. (Is. 41:10) Eng ang beihna hnuai pawha tlâwm ngai lo tûr invênna kan nei a ni.
2 Kan indona chu tisa lam ni lovin thlarau lam a ni zâwk. Kan hmêlma chu Diabol-Setana a ni a, a râlthuam hman ber chu “khawvêl thlarau” a ni. (1 Kor. 2:12) Min beihna laka kan invênna ber chu Pathian thlarau a ni a. He indonaa dam khawchhuak tûr leh thlarau lama chak reng tûr chuan, Pathian thlarau kan dîl a, kan nuna a rah kan lan chhuahtîr a ngai a ni. (Gal. 5:22, 23) Mahse, eng nge khawvêl thlarau chu ni a, engtin nge thil a tihtheih êm êm? Khawvêl thlarauvin min thunun leh nun loh engtin nge kan hriat theih ang? Isua hnên aṭangin Pathian thlarau dawn leh khawvêl thlarau do chungchâng eng nge kan zir theih?
Khawvêl Thlarau—Engvângin Nge Mi A Fan Hneh?
3. Eng nge khawvêl thlarau chu?
3 He khawvêl thlarau lo chhuahna chu Setana, “khawvêl lal” hi a ni a, chu chu Pathian thlarau thianghlim kalh chiah a ni. (Joh. 12:31; 14:30; 1 Joh. 5:19) Chu chu khawvêla langsâr tak rilru put hmang, mite thil ti tûra chêttîrtu a ni a. Hei hian mite chu Pathian duhzâwng leh thiltum kalhin thil a tihtîr a ni.
4, 5. Engtin nge Setana awmtîr thlarau chuan mi a fan hneh êm êm?
4 Engtin nge Setana awmtîr thlarau chuan mi a fan hneh êm êm? A hmasa berin, Setana chuan Eden huanah Evi a bum a. Pathian laka inlâk hran chu nun hmasâwnna tûr a ni tih a rintîr thlap a ni. (Gen. 3:13) Dâwt sawitu a va ni tak êm! (Joh. 8:44) Tichuan, hmeichhia kal tlangin Adama chu Jehova chunga rinawm lo tûrin a hruai kawi leh a. Adama duhthlanna siam avângin mihringte hi suala hralh an lo ni ta a, chuvângin thuâwih lohna Setana rilru put hmang zui duhna an nei ta a ni.—Ephesi 2:1-3 chhiar rawh.
5 Setana chuan vântirhkoh ṭhahnem tâwk tak chu a thunun thei bawk a, anni chu ramhuaihote an lo ni a. (Thup. 12:3, 4) Chutianga Pathian phatsanna chu Nova hun laia Tuilêt hma lawka thilthleng a ni. Chûng vântirhkohte chuan vâna an mawhphurhna kalsana leia nuam chen chu an tâna ṭha zâwk tûrah an ngai a. (Jud. 6) Thlarau khawvêla kîr leh ta chûng ramhuaihote ṭanpuinain, Setana chuan ‘khawvêl zawng zawng a bum’ a ni. (Thup. 12:9) Leia mi tam zâwkte’n chûng ramhuaihote thununna hnuaia awm an ni tih an hre lo chu a lungchhiatthlâk hle.—2 Kor. 4:4.
Khawvêl Thlarauvin A Thunun Che Em?
6. Khawvêl thlarau chuan eng hunah chauh nge min thunun theih?
6 Mi tam takte chu Setana thununnaa an mit tihdelsakin an awm a, mahse Kristian dikte chuan a ngamthlêmnate chu an hai lo. (2 Kor. 2:11) A nihna takah chuan khawvêl thlarau chuan kan remti a nih chauh loh chuan min thunun lui thei lo. Pathian thlarauvin nge min thunun a, khawvêl thlarau zâwkin tih kan inhriatna tûra min ṭanpuitu tûr zawhna palite i lo bih chiang ang u.
7. Setana’n Pathian Jehova hnên ata min lâk hran a tum dân kawng khat chu eng nge ni?
7 Ka intihhlimna thlan chuan ka chungchâng eng nge a târ lan? (Jakoba 3:14-18 chhiar rawh.) Setana chuan tharum thawhna ngaina tûra min thlêmin Pathian hnên ata min lâk hran chu a tum a. Ani chuan nunrâwnna ngainatu chu Jehova’n a hua tih a hria a ni. (Sâm 11:5) Chuvângin, Setana chuan thu leh hla chhuah te, film te, rimawi te, leh a khêltute nungchang bawlhhlawhna leh nunrâwn châkna neihtîr thei electronic games te chu kan tisa châkna leh duhzâwng chawktho thei tûr zâwnga hman a tum a ni. Setana chuan kan thinlungah ama tihchhuah thil ṭha lo ngainatna chhe tê kan neih phawt chuan, thil ṭha ngainatna kan neih reng chu pawi a ti lo.—Sâm 97:10.
8, 9. Intihhlimna chungchângah eng zawhnate nge kan inzawh ang?
8 Kawng lehlamah chuan, Pathian thlarau chuan a dawngtute chu thianghlim tûr te, inrem duh tûr te, leh khawngaihnaa khat tûr tein a chêttîr a. Heti hian kan inzâwt tûr a ni, ‘Ka intihhlimna thlan chuan mize ṭha nei tûrin min ṭanpui em?’ tiin. Chung lam aṭanga finna lo chhuak chu “a vervêk lo.” Pathian thlarau thununa awmte chuan an vêngte hnêna thianghlimna leh remna thu hril reng chungin, in lamah tharum thawhna leh nungchang bawlhhlawhnate chu tui takin an en lo.
9 Pathian Jehova chuan inpêkna pumhlûm min beisei a. Setana erawh chuan Isua hnêna a lo tih tawh angin vawi khat chibai bûka inrem siam mai chu a duh a ni. (Lk. 4:7, 8) Heti hian kan inzâwt thei ang: ‘Ka intihhlimna thlan hian Pathian hnênah inpêkna pumhlûm min hlantîr thei em? Ka duhthlanna siam chuan khawvêl thlarau do a tiawlsam nge ni a, a tiharsa zâwk? Intihhlimna thlan chungchânga ka insiam ṭhat a ngai em?’ tiin.
10, 11. (a) Neihnunna chungchângah, khawvêl thlarau chuan eng ang rilru put hmang nge a awmtîr? (b) Pathian thlarauva thâwk khum Thu chuan eng ang rilru put hmang nge nei tûra min fuih?
10 Neihnunna chungchâng ka thlîr dân chu eng nge ni? (Luka 18:24-30 chhiar rawh.) Khawvêl thlarau zîngah chuan duhâmna te, hausak âtchilhna te, leh “mit châkna” te a tel a ni. (1 Joh. 2:16) Chu chuan mi tam tak chu hausak tumna a neihtîr a. (1 Tim. 6:9, 10) Chu thlarau chuan sum leh pai leh thil neih ṭeuh mai chu inhumhimna nghet min petu anga ngaihna min neihtîr thei a ni. (Thuf. 18:11) Amaherawhchu, tangka sum ngainatnain Pathian kan hmangaihna a luah lan kan phal chuan Setana chuan hnehna a chang ang. Heti hian kan inzâwt tûr a ni, ‘Ka nunah hian hausakna leh hlimhlawp bâwl chu ka dah pawimawh ber ta em ni?’ tiin.
11 Chu mi nêna inkalh takin, Pathian thlarauva thâwk khum Thu chuan sum leh pai thlîr dân inbûk tâwk nei tûr leh mahni leh chhûngte tâna mamawh phuhru thei tûra thawk rim tûrin min fuih a. (1 Tim. 5:8) Pathian Jehova thlarau chuan a dawngtute chu Ama thil phalna mizia entawn tûrin a ṭanpui a ni. Chutiang mite chu dawngtu ni lovin pe chhuaktu an ni. Thilte aiin a mihringte an hlut zâwk hle a, an theih phawt chuan an thil neihte chu lâwm takin an sem ve ṭhîn a. (Thuf. 3:27, 28) Tin, sum leh pai ûm chu Pathian rawngbâwlna aiin an dah pawimawh ngai lo bawk.
12, 13. Khawvêl thlarau nêna inkalh takin engtin nge Pathian thlarau chuan a ṭha lama min thunun theih?
12 Ka mizia hian eng thlarau nge a târ lan? (Kolossa 3:8-10, 13 chhiar rawh.) Khawvêl thlarau chuan tisa hnathawhte a punluntîr a. (Gal. 5:19-21) Eng thlarauvin nge min thunun tih fiahna chu thil engkim a kal tluan hunah ni lovin, Kristian unau tuemawin min ngaihthah emaw, min tihlungnih loh hunah emaw, a nih loh leh kan chunga thil sual an tih emaw ang chi thil a kal tluan loh hunah a lo thleng ṭhîn. Chu bâkah, ina mahni chauhva kan awm hian eng thlarauvin nge min thunun tih a lo lang chiang thei bawk ang. Mahni inen fiahna ṭhenkhat neih chu a âwm hle ang. Heti hian inzâwt rawh, ‘Thla ruk kalta chhûng khân, ka mizia hian Krista mizia a hnaih tawlh tawlh nge ni a, ṭawngkam leh nungchang lama ka thil chîn ṭha lo lamah ka tlu lût leh zâwk?’ tiin.
13 Pathian thlarau chuan ‘mihring hlui chu a thiltihte chawpa hlîp’ tûr leh “mihring thar chuan” inthuam tûrin min ṭanpui thei a. Chu chuan hmangaihna leh ngilneihna ngah zâwk tûrin min ṭanpui ang. Thu pawi anga langte kan neih hunah pawh Pathian min ngaihdam anga inngaihdam chu kan duh ang. Miin kan chunga thil dik lo ti nia kan hriatte chu ‘khâkna te, thinurna te, tauhna te, ânna te, sawichhiatna tein’ kan chhâng lêt tawh ngai lo vang. Chu mi ai chuan, “lainatna” nei tûrin ṭan kan la zâwk ang.—Eph. 4:31, 32.
14. Khawvêla mi tam takte chuan Pathian Thu chu eng angin nge an thlîr?
14 Bible nungchang tehnate chu ka zahin ka ngaina em? (Thufingte 3:5, 6 chhiar rawh.) Khawvêl thlarau chuan Pathian Thu laka helna a lantîr a. He thlarau thununa awmte chuan Bible chhûnga zawm harsa an tihna laite ngaihthahin, a aiah mihring thurochhiah leh finna chu an zui zâwk a ni. (2 Tim. 4:3, 4) Ṭhenkhat chuan Pathian Thu an ngaihthah hulhual a. Chutiang mite chuan Bible pawimawhna leh rin tlâkna chu an chhovin, mahni mitah fing an inti a ni. Anni chuan uirêna te, mawngkawhurna te, leh nupa inṭhenna te chungchânga Bible tehna chu an pawlh dal a. ‘Thil ṭha lo chu thil ṭha angin’ an zirtîr a ni. (Is. 5:20) He thlarau hian min nghawng em? Harsatnate kan tawh hunah mahni ngaih dân pawh tiamin mihring finnaah kan innghat em? Nge ni a, Bible thurâwnte zawm chu kan tum hrâm hrâm zâwk?
15. Mahni finnaa innghah mai aiin, eng nge kan tih ang?
15 Pathian thlarau chuan keimahniah Bible zahna min neihtîr a. Fakna hla phuahtu angin, Pathian thu chu kan ke atâna khâwnvâr leh kan kawng atâna êng angin kan thlîr a ni. (Sâm 119:105) Mahni finnaa innghah aiin, thil dik leh dik lo hre thei tûra min ṭanpui tûrin Pathian Thu-ah kan innghat tlat zâwk a ni. Bible zah dân kan zir mai ni lovin, Pathian dân ngainat dân pawh kan zir bawk.—Sâm 119:97.
Isua Entîrna Aṭangin Inzir Rawh
16. “Krista rilru” neihnaah chuan eng nge tel?
16 Pathian thlarau dawng tûr chuan “Krista rilru” ang kan neih a ngai a. (1 Kor. 2:16) ‘Krista rilru put hmang ang nei’ tûr chuan a thil ngaihtuah dân leh tih dân kan hriat a, chuta amah kan entawn a ngai a ni. (Rom 15:5; 1 Pet. 2:21) Chutianga kan tih theih dân kawng ṭhenkhat lo ngaihtuah ta ila.
17, 18. (a) Isua hnên aṭangin ṭawngṭaina chungchângah eng nge kan zir? (b) Engvângin nge kan ‘dîl reng’ ang?
17 Pathian thlarau dîlin ṭawngṭawi rawh. Fiahna a tawh hmain Isua chuan Pathian thlarau ṭanpuina a dîl a. (Lk. 22:40, 41) Kan tân pawh Pathian hnêna a thlarau thianghim kan dîl chu a ngai a ni; Jehova chuan rinnaa a dîltu apiangte hnênah ui lo leh phal takin a pe si a. (Lk. 11:13) Isua chuan: “Dîl [reng] rawh u, tichuan an pe ang che u; zawng rawh u, tichuan in hmu ang; kik rawh u, tichuan an hawnsak ang che u; tupawh a dîl apiang chuan an hmu ṭhîn a; tupawh a zawng chuan an hmu ṭhîn a; tupawh a kik chu an hawnsak dâwn a ni,” tiin a sawi.—Mt. 7:7, 8.
18 Jehova thlarau leh a ṭanpuina i dîl hian, dîl duhtâwk hma lutuk suh ang che. Dîl zin zâwk leh ṭawngṭai nâna hun hman rei zâwk pawh a ngai mai thei. A châng chuan, Jehova chuan a chhân hmain a dîltuin an thil dîl an vei nasatzia leh an rinna a takzia an lantîr hrih chu a phal thei a ni. *
19. Isua’n eng nge a tih reng ṭhin a, engvângin nge amah kan entawn ang?
19 Jehova thu âwih pumhlûm rawh. Isua chuan a Pa lâwmzâwng thil a ti reng ṭhîn. Mahse, a lo berah pawh ṭum khat dinhmun hmachhawn a duh dân leh a Pa’n hmachhawntîr a duh dân chu a inang lo va. Chuti chung pawhin, rinna nên a Pa hnênah chuan: “Keia thu ni lovin, nangma thu ni zâwk rawh se,” a ti a ni. (Lk. 22:42) Heti hian inzâwt rawh, ‘Pathian thuâwih harsa ka tih hunah pawh ka zâwm tlat tho vem?’ tiin. Pathian thuâwih chu kan nun atân a pawimawh a. Min Siamtu, kan nunna Hnâr leh Chhawmdâwltu a nih angin a thuâwih chu kan bâ a ni. (Sâm 95:6, 7) Thuâwih chu tih mâkmawh a ni. A tel lo chuan Pathian duhsak kan hlawh thei si lo va.
20. Isua nun pumhlûm chu engah nge a innghah a, engtin nge amah kan entawn theih?
20 Bible hre chiang rawh. Isua chuan hmaichhana Setana beihna a tawh khân, Pathian Lehkha Thute la chhuakin a hmang ṭhîn a. (Lk. 4:1-13) Amah dodâltu sakhaw hruaitute a hmachhawn pawh khân, Pathian Thu chu thuneitu angin a hmang a ni. (Mt. 15:3-6) Isua nun pumhlûm chu Pathian dân hriatna leh tihfamkimnaah a innghat a. (Mt. 5:17) Keini pawhin kan rilru chu mi tichak thei tak Pathian Thu-a châwm reng kan duh a ni. (Phil. 4:8, 9) Mahni leh chhûngkuaa zirna neih nâna hun neih theih chu mi ṭhenkhat tân a harsa mai thei a. Mahse, chûng atâna hun neih nghah ai chuan, kan insiam chawp a ngai a ni.—Eph. 5:15-17.
21. Pathian Thu hre bel lehzual tûr leh nunpui thei tûrin eng ruahmannain nge min ṭanpui thei?
21 “Bawi rinawm, fing tak” chuan chawlhkâr tina Chhûngkuaa Pathian Biakna neih zân ruahmanin, mi mal leh chhûngkua anga zirna hun kan neih theih nân min ṭanpui a. (Mt. 24:45) Chu ruahmanna chu i hmang ṭangkai em? Krista rilru ang i neih theih nân, in zirnaah chuan i thil hriat châk zâwng chungchânga Isua zirtîrnate awmze nei taka ngaihtuahna in telh thei ang em? Vênnainsâng June 1, 2010 chhuaka “Isua Hnên Aṭanga Kan Thil Zir” tih thuziak ang chite chu in hmang thei ang. * Hetiang chi thuziakte hi Chhûngkuaa Pathian Biakna neih zânah engah nge sawiho châng in neih loh vang?
Khawvêl Kan Ngam Thei
22, 23. Khawvêl ngam tûrin eng nge kan tih ngai?
22 Pathian thlarau hruaia awm tûr chuan khawvêl thlarau kan do ngei tûr a ni. Chutianga do chu a awlsam lo. A beiha beih tak tak a ngai thei a ni. (Jud. 3) Mahse hnehna kan chang thei! Isua chuan a zirtîrte hnênah: “Khawvêlah hian hrehawmin in awm ṭhîn; nimahsela thlamuang takin awm rawh u, keiin khawvêl ka ngam ta,” a ti a.—Joh. 16:33.
23 Khawvêl thlarau kan do va, Pathian thlarau dawng tûra theih tâwp kan chhuah bawk hian, khawvêl kan ngam ve thei a ni. Dik takin, “Pathian kan lama a ṭan chuan tuin nge min do thei ang?” (Rom 8:31) Pathian thlarau dawng a, Bible-a kan hmuh a kaihhruaina kan zui chuan, lungâwina te, remna te, hlimna te, leh lo thleng mai tawh tûr khawvêl thara chatuana nun tiamna te kan nei ang. (w11-E 03/15)
[Footnote-te]
^ par. 18 Chanchin hriat belh nân, Bible Zirtîrna Dik Tak Chu Eng Nge Ni? tih lehkhabu phêk 170-173-na en rawh.
^ par. 21 Hetiang chi thuziakte hi kum 2008 aṭanga 2010 chhûnga Sâpṭawnga chhuak public edition Vênnainsâng-ah 12 lai a chuang a ni.
Kan La Hria Em?
• Engvângin nge khawvêl thlarau chuan mi a hneh theih êm êm?
• Eng zawhna palite nge kan inzawh ang?
• Pathian thlarau dawn theih dân chungchânga Isua hnên aṭanga kan thil zir pathumte chu engte nge ni?
[Zirlai Atâna Zawhnate]
[Phêk 14-naa milem]
Engtin nge vântirhkoh ṭhenkhat chu ramhuai an lo nih?
[Phêk 16-naa milem]
Setana chuan khawvêl thlarau hmangin mite thunun mah se, a thununna ata kan tlân chhuak thei