Sawisêlna Tlânglâwn Takte Tihvenna

BIBLE chuan inneih hi thil awlsam tak angin a sawi lo. Tirhkoh Paula chu nupate’n “nî tin buaina” an tâwk ang tih ziak tûrin Pathianin a thlarauvin a thâwk khum a ni. (1 Korinth 7:28, Today’s English Version) Mahse, nupate chuan an buaina tawhte titlêm tûr leh an hlimna tizual tûrin tihtheih tam tak an nei a ni. A hnuaia târ lan nupuite leh pasalte insawisêl tawnna parukte hi ngaihtuahin, Bible thu bulte nunpuinain a ṭanpui theih dân ilo en ang u.

1

SAWISELNA:

“Ka kawppui nên chuan kan inhlat tawlh tawlh.”

BIBLE THU BUL:

“Thil pawimawh zâwkte chu fiah rawh u.”—PHILIPPI 1:10, New World Translation.

In inneihna hi i nuna thil pawimawh berte zînga mi a ni a, i ngaih pawimawh a phu a ni. Chuvângin, chutiang sawisêlna awmtîrtu chu i hun hman dân a nih leh nih loh fiah ang che. Nî tin nuna thiltih hian i kawppui nên awm hrantîr che u suh se. Hnathawh leh pumpelh theih loh thil dangte avângin rei lo te chhûng awm hran a ngaih châng pawh a awm thei ngei ang. Mahse, i thunun theih, i tuizâwng ûm nân emaw, ṭhian kawm nân emawa hun hman ang  chite thilah chuan bituk chin i insiam thei a, i insiam ngei bawk tûr a ni.

Amaherawhchu, nupa ṭhenkhat chuan an kawppuite nêna hun an hman tlêm theih nân hna emaw, an tuizâwng thiltihte emaw an ûm belh a. Chutiang mite chuan zawi zawiin an kawppuite an ‘hlat’ a ni mai lo. Thil pawimawh lova an hun khawh ralin, an kawppuite an tlânchiatsan a ni zâwk. I kawppui nêna chutiang dinhmuna ding in nih chuan, a chhan zawng chhuak a, in chinfel a ngai a ni. I kawppui nêna hun inhman dun chauhvin, in inhnaih thei ang a, ‘tisa pum khat in lo ni’ tak zet thei ang.—Genesis 2:24.

Ṭhenkhatin he thurâwn an nunpui dân: Australia mi Andrew-a * leh Tanji-i te chu kum sâwm lai an innei tawh a. Andrew-a chuan: “Hna thawh nasat leh thil danga inhman tam lutuk chu nupa tân a hlauhawm thei tih ka hre ta. Chuvângin ka nupui nên chuan inbiak nân leh ngaihtuahna inhrilh tawn nân hun kan insiam a ni,” tiin a sawi.

United States-a awm kum 22 chhûng innei tawh Dave-a leh Jane-i te chuan tlai tin thil dang an tih hmain an thiltawn leh ngaihtuahnate inhrilh tawn nân dârkâr chanve hun an hmang ṭhîn a. Jane-i chuan: “Chu chu hun pawimawh tak a nih avângin engmahin a tihbuai kan phal lo,” tiin a sawi.

2

SAWISELNA:

“He inlaichînna aṭang hian ka duh ang ka hmu tawh lo.”

BIBLE THU BUL:

“Tupawhin mahni ṭhatna tûr zawng lovin mi dang ṭhatna tûr zawng zâwk rawh se.”—1 KORINTH 10:24.

Inneihna aṭanga a hmuh tûr ringawt ngaihtuahtu chuan vawi tam tak pawh nei nawn mah se, hlimna tak tak a hmu ngai lo vang. Nupate’n lâk aia pêk an ngaihtuah ve ve hian inneihna chu a hlawhtling ṭhîn. Isua chuan a chhan chu heti hian a sawi a ni: “Englo lâk aiin pêkin lukhâwng a nei zâwk,” tiin.—Tirhkohte 20:35.

Ṭhenkhatin he thurâwn an nunpui dân: Mexico rama awm Maria-i leh Martin-a chu kum  39 an innei tawh a. Mahse, an inneihna chu a tluang reng lo. An hun harsat lai bîk tak pakhat chu an hre reng a. Maria-i chuan: “Nasa taka kan inhnial lai chuan Martin-a zah lohna ṭawngkam engemaw tak ka hmang a. Chu chuan ani chu a tithinur hle a. Ka thinrim avânga sawi mai mai ka nihzia hrilhfiah tum ṭhîn mah ila, a ngaithla duh tawh lo,” tiin. Martin-a ve thung chuan, “Chutianga kan inhnial lai chuan, awm dun zêl theihna kawng a kaw tawh hlawl lo nia ngaiin, innei zêl tûra ṭan lâk pawh ka tum tawh lo vang, tiin ka inngaihtuah ṭan a ni,” tiin a sawi.

Martin-a chuan zahna dawn a duh a, Maria-i erawh chuan hriatthiam nih a châk thung a ni. Atu amah chuan an duh chu an hmu lo.

Engtin nge an buaina chu an chinfel theih? Martin-a chuan: “Ka thinrim tihreh nân hun ka inpe a; tichuan, kan pahnih chuan inzah thiam a, ngilneihna inlantîr tawn tûra Bible fuihna fing tak nunpui chu kan tum ta a. Kumte a vei hnu chuan, buaina vawi engzât pawh chhuak mah se, Pathian ṭanpuina dîla kan ṭawngtai a, Bible-a a thurâwnte kan nunpui chuan buainate kan tiveng thei tih kan hre ta,” tiin a sawi.—Isaia 48:17, 18; Ephesi 4:31, 32.

3

SAWISELNA:

“Ka kawppui chuan a tih tûr a ti lo.”

BIBLE THU BUL:

“Kan zain Pathian hnênah mahni chanchin kan sawi ṭheuh tûr a ni.”—ROM 14:12.

Nupaa a pakhat chauhvin inneihna hlawhtling tûra hma a lâk chuan, chu inneihna chuan duhthu a sâm lo vang rinhlelh rual a ni lo. Mahse, an pahniha an tih tûr an ngaihthah ve ve a, an inmawhpuh tawn phei chuan dinhmun chu a che lehzual ang.

I kawppui tih tûr ringawt i ngaihtuah chuan i hlim thei ngai lo vang. A bîk takin, i kawppuiin a mawhphurhna a hlen lohna chu i mawhphurhna tih loh phah nâna i hman phei chuan i hlim lo lehzual ang. Kawng leh lamah chuan, nupui pasal ṭha nih in tum ve ve chuan in inneihna chuan ṭhat lam a pan ngei ang. (1 Petera 3:1-3) A pawimawh zâwk chu, Pathian hnênah a siam inneih ruahmanna i chawimawizia i tar lang a, i thiltih chuan amah a tilâwm hle ang.—1 Petera 2:19.

Ṭhenkhatin he thurâwn an nunpui dân: Korea rama awm Kim-i leh a pasal chu kum 38 lai an nei tawh a. Kim-i chuan heti hian a sawi: “A châng chuan kan pa chu a chhan pawh hriat lovin a lungni lo va, mi pawh a be peih ṭhîn lo. Chu chuan min hmangaih tawh lo nia inhriatna min neihtîr a. ‘Min hriatthiam pawh tum chhin eih si lo, engah nge ka hriatthiam a phût bîk?’ tia ngaihtuah châng ka nei ṭhîn,” tiin.

Kim-i chuan chu dinhmun leh a kawppui thiltih loh chu ngaihtuah thei reng a ni a. Mahse, chutianga tih loh chu a thlang ta zâwk a ni. Ani chuan: “Lunghnual taka awm reng aiin, remna siam tûra hma lâk chu a ṭha ber tih ka hre ta a. A tâwpah chuan kan thinrim a lo reh ve vein, kan harsatna chu ṭha takin kan sawi dûn thei ta a ni,” tiin a sawi.—Jakoba 3:18.

 4

SAWISELNA:

“Ka nupui a intulût lo.”

BIBLE THU BUL:

“Mipa tawh phawt lû chu Krista a ni.”—1 KORINTH 11:3.

A nupui intulût lo nia ngai pasal chuan a Lû, Isua Krista hnuaia intukluh a duh leh duh loh a inbih chiang hmasa phawt tûr a ni. Pasal chuan Isua entawn tûr siam zuiin, a lû hnuaia a intukluhzia a târ lang thei a ni.

Tirhkoh Paula chuan: “Pasalte u, in nupuite hmangaih rawh u, Kristan kohhranho a hmangaih a, an aia mahni a inpe ang khân,” tiin a ziak a ni. (Ephesi 5:25) Isua chu a zirtîrte chungah ‘a intilal lo.’ (Marka 10:42-44) A hnungzuitute hnênah kaihhruaina chiang tak a pe a, a ṭûl hunah a zilh bawk ṭhîn. Mahse, nasa takin a hau ngai lo. An chungah ngil a neiin, an tih theih bâk a beisei ngai lo. (Matthaia 11:29, 30; Marka 6:30, 31; 14:37, 38) An ṭhatna tûr chu ama ṭhatna tûr aiin a dah pawimawh zâwk ṭhîn.—Matthaia 20:25-28.

Pasal chuan he zawhna hi a inzâwt tûr a ni, ‘Lû nihna leh hmeichhiate ka thlîr dân chu Bible-a entîrna leh zilhna thute aiin tualchhûng hnam dânin a thunun zâwk em?’ tiin. Entîr nân, a pasal thlîr dân kalh a, a ngaih dân nghet tak zah thiam taka sawi chhuaktu nupui chu engtin nge i ngaih ang? Bible-ah hian Abrahama nupui Sari chu entawn tûr nupui intulût tak pakhat anga târ lan a ni a. (1 Petera 3:1, 6) Amaherawhchu, ani chuan a pasal Abrahama hmuh hmaih a chhûngkaw dinhmun tiderthâwngtu thil hlauhawm a hriat huna a tih angin, a ṭûl hunah chuan a ngaih dân a sawi chhuak a ni.—Genesis 16:5; 21:9-12.

Abrahama chuan Sari chu a ngaih dân pawh sawi chhuak ngam lo tûr khawpin a cheibâwl lo a ni tih a chiang hle. Ani chu mi nunrâwng tak a ni lo. Chutiang bawkin, Bible zilhna pawmtu pasal chuan a nupui chu a duhzâwng apiang zâwm tûra phûtin, a hrâwk hrep lo vang. Lû nihna chu khawngaihna nei taka hmangin a nupui zah a hlawh ang.

Ṭhenkhatin he thurâwn an nunpui dân: Kum riat chhûng nupui nei tawh, England rama awm James-a chuan: “Ka nupui râwn lova thu tlûkna pawimawh siam loh dân ka zir mêk a. Mahni chauh inngaihtuah lo va, ka nupui mamawh dah pawimawh zâwk chu ka tum a ni,” a ti.

United States rama awm George-a chuan kum 59 lai nupui a nei tawh a. Ani chuan: “Ka nupui chu keimah aia hnuaihnung zâwk ang ni lovin, kawppui fing leh fel tak anga cheibâwl ka tum a ni,” tin a sawi.—Thufingte 31:10.

 5

SAWISELNA:

“Ka pasalin hma a hruai lo.”

BIBLE THU BUL:

“Hmeichhe fing zawng zawngin in an sa a, a â erawh chuan anmahni kut ngeiin an ṭhiat ṭhîn.”—THUFINGTE 14:1.

I pasalin chhûngkaw enkawlnaah thu tlûkna a siam hreh emaw, hma a hruai hreh emaw a nih chuan, a lo berah pawh tih theih pathum i nei a ni. (1) A tlin lohnate chu i sawi chhuak reng thei a, (2) chhûngkaw lû a nihna chu i luahlân thei bawk a, a nih loh leh (3) a hma lâkna chhe tê pawh tih tak zetin i fak thei bawk a ni. A hmasa pahnihte zînga a engemaw zâwk i thlang a nih chuan, i in chu i kut ngeiin i ṭhiat ang. A pathumna thlanna erawh chuan i in sa ṭha tûr, a nih loh leh in inneihna tinghet tûrin a ṭanpui ang che.

Mipa tam tak chuan hmangaihna ai mahin, zahna lantîr chu an duh zâwk a. I pasal chu zahna dawng nia inhriatna—chhûngkuaa hma hruai tûra a thawhrimna chu a sâwtin, a hlu a ni tih inhriatna—i neihtîr chuan hma a hruai ṭha lehzual ngei ang. A ngaih dân pawmpui loh châng chu i nei ngei ang a. In pahnih chuan chûng buainate chu in sawi dun a ngai a ni. (Thufingte 18:13) Mahse, i ṭawngkam hman leh i awki chuan in inneihna ṭhiat tûr emaw, sa ṭha tûr emawin a ṭanpui ang. (Thufingte 21:9, 27:15) Zah thiam taka i ngaih dân i sawi chhuah ṭhin chuan i duh ang ngei—hma hruai hreh lotu pasal—chu i nei thei ang.

Ṭhenkhatin he thurâwn an nunpui dân: United States rama awm, kum 30 lai pasal nei tawh Michele-i chuan, heti hian a sawi: “Ka nu chuan pasal tel lova kei leh ka unaunu min enkawl sei len avângin, ani chu hmeichhe paukhauh tak leh mahni kut kea ding mi a lo ni a. Chûng a miziate chu ka chhawm deuh tlat mai a. Chuvângin, intukluhna dik lantîr ka tum ṭâng ṭâng a ngai a. Entîr nân, mahnia thu tlûkna siam mai lovin, ka pasal chu ka râwn zêl tawh a ni,” tiin.

Australia rama awm, Mark-a nêna kum 21 lai innei tawh Rachel-i pawh a sei lenna chuan a thunun hle a. Ani chuan: “Ka nu chu ka pa lakah a intulût ngai lo va. Kan in chhûngah chuan inhnial leh inzah lohna chu a thleng ṭhîn. Pasal ka neih tirh lam kumahte chuan ka nu mizia chu ka chhawm a. Mahse, kumte a lo liam zêl chuan zahna lantîr chungchânga Bible thurâwn zawm a hlutzia chu ka lo hre ta a. Mark-a nên chuan nupa hlim tak kan ni tawh,” tiin a sawi.

6

SAWISELNA:

“Ka kawppui thiltih ṭhin dân ninawm tak hi ka hmu peih tawh hlawl lo.”

BIBLE THU BUL:

“Tupawhin tu chungah pawh thupawi nei ang ula indawh tawnin inngaidam tawn ula; Lalpa chuan a ngaidam che u ang tak khân ngaidam ve rawh u.” —KOLOSSA 3:13.

 I kawppui nêna in inngaihzâwn tirh chuan a mize ṭha lai hlîr i hmuin, a ṭhat lohna laite chu i hmuh hmaih ṭhîn. Tûnah pawh chutiang chuan i ti zêl thei em? I kawppui sawisêl chhan tûr ṭha tak pawh i nei ngei ang. Mahse, ‘Ka kawppui mize ṭha laite nge ka en ang a, a chhe lai zâwk?’ tiin inzâwt ang che.

Isua chuan mi dangte tlin lohna kan en kân a ṭûlzia târ langtu tehkhin thu thiltithei tak a sawi a. “Engatinge mahni mita khanchhuk awm chu ngaihtuah si lovin, i unau mita hmawlh tê tak tê awm chu i hmuh ni?” tiin a zâwt a ni. (Matthaia 7:3) Hmawlh leh khanchhuk inan lohna chu a chiang hle a. Hmawlh chu khanchhuk ai chuan a tê zâwk fê a ni. Chuvângin, Isua chuan: “I mit ata khanchhuk kha la chhuak hmasa rawh; chutichuan i unau mit ata hmawlh tê tak tê lâk chhuah tûr chu fiah takin i hmu ang,” a ti a ni.—Matthaia 7:5.

Isua chuan chu tehkhin thu chu vaukhânna thu pawimawh takin a ṭan a ni: “Sawisêl suh u, sawisêla in awm loh nân. In sawisêl ang bawkin an sawisêl ang che u,” tiin. (Matthaia 7:1, 2) I tlin lohna—i mita khanchhuk—chu Pathianin a en kân i duh chuan, i kawppui tlin lohnate en kân ve chu i tâna ṭha ber tûr a ni.—Matthaia 6:14, 15.

Ṭhenkhatin he thurâwn an nunpui dân: England rama mi, Simon-a nêna kum kaw chhûng innei tawh Jenny-i chuan heti hian a sawi: “Ka pasal ka nin ṭhinna ber chu ruahman lâwk lova chawp leh chilha thil a ti ṭhîn hi a ni. Chu chu a intu lo hle; kan inngaihzâwn lai kha chuan a tla chawpa thil a ti thei zêl kha ka ngainat chhan a ni si a. Mahse, tûnah chuan kei pawhin mi dangte thunun lutuk ang chi tlin lohna ka nei ve tih ka inhre chhuak ta. Simon-a nên chuan ṭhat famkim lohna chhe tê tê inen liamsak dân kan zir a ni,” tiin.

Kan sawi tâk Michele-i pasal Curt-a chuan: “Kawppuite mize ninawmna lai ringawt kan en chuan, chûngte chu kan ngaimawh tawlh tawlh mai ang. Chuvângin, a bul ṭan nân Michele-i ka hmangaih chhan a miziate en chu ka tum ta zâwk a ni,” tiin a sawi.

Hlawhtlinna Thurûk

Hêng entîrna ṭhenkhatte hian harsatna awm lo inneihna chu a awm thei lo va, chinfel theih loh erawh a ni lo tih a târ lang. Eng nge hlawhtlinna thurûk chu? Pathian hmangaihna leh a Thu, Bible-a kan hmuh zilhna thute nunpui duhna neih hi a ni.

Kum 20 chuang innei tawh Nigeria rama mi Alex-a leh Itohan-i chuan chu thurûk chu an zir tawh a. Alex-a chuan: “Nupa inkâra buaina zawng zawng deuhthawte chu Bible thu bulte nunpuina aṭanga tihven theih a ni tih ka hmu chhuak ta,” a ti a. A nupui chuan: “Ṭawngṭai dun ziah leh inhmangaih tawn tûr leh indawh tawn zêl tûra Bible thurâwn min pêk nunpui a pawimawhzia kan hre ta. Tûnah chuan, kan inneih tirh lam aiin buaina kan nei tlêm tawh hle,” a ti ve bawk.

Pathian Thu, Bible-a zilhna thu ṭangkai takte chhûngkua anga in hlâwkpui theih dân hriat i duh em? I duh chuan, Jehova Thuhretute chu Bible Zirtîrna Dik Tak Chu Eng Nge Ni? * tih lehkhabu bung 14-na thu sawipui tûr chein sâwm ang che. (w11-E 02/01)

[Footnote-te]

[Phêk 4-naa milem]

Hun kan inpe tawn em?

[Phêk 5-naa milem]

Ka dawn aia tam pêk ka tum em?

[Phêk 6-naa milem]

Buainate chingfel tûrin hma ka la em?

[Phêk 7-naa milem]

Thu tlûkna ka siam hmain ka nupui ka râwn em?

[Phêk 9-naa milem]

Ka kawppui mize ṭhatna laite chu ka en em?