Tâwpna A Hnaih Avângin Jehova Ring Rawh
Tâwpna A Hnaih Avângin Jehova Ring Rawh
“LALPA chu kumkhuain ring rawh u.”—IS. 26:4.
1. Pathian chhiahhlawhte leh khawvêl mite inan lohna chu eng nge ni?
VAWI tam tak tihnat emaw, tihlunghnual emaw an nih avânga mi tam takin rin ber tûr pawh an hriat lohna khawvelah hian kan awm a. Pathian Jehova chhiahhlawhte nên chuan an va inang lo tak êm! Pathian finnain a kaihhruai avângin he khawvêl emaw, a “mi liante” emaw aia rin zâwk tûr an hria a. (Sâm 146:8) Chutiang mite rin ai chuan, anni chuan Pathian Jehova’n a hmangaih a, engtik lai pawhin a Thu a hlen ṭhîn tih hriain, an nun leh an nakin hun tûr chu A kutah an dah tlat a ni.—Rom 3:4; 8:38, 39.
2. Engtin nge Josua chuan Pathian rin tlâkzia a lo hmuh tawh?
2 Hmân laia Josua chuan Pathian rin tlâkzia a lo hmu tawh a. A thih dâwn hnaih lamah ani chuan a chipui Israelte hnênah: “LALPA in Pathianin in chungchâng a ṭha lam a lo sawi tawh zawng zawngte kha thlâwn pakhat mah a awm lo tih chu in thinlung zawng zawng leh in rilru zawng zawngin in hria e; in chungah a lo thleng ta vek a, pakhat mah thlâwn a awm lo ve,” tiin a sawi a ni.—Jos. 23:14.
3. Pathian hming chuan a chungchâng eng nge a târ lan?
3 Pathian Jehova’n a thutiamte a hlen chhan chu a chhiahhlawhte a hmangaih vâng a nih mai bâkah, ama hming vâng a ni deuh ber a, a hming awmzia chu, “Ka nih duh ang apiang chu ka ni ang,” tihna a ni. (Ex. 3:14, NW; 1 Sam. 12:22) Pathian hming chungchângah J. B. Rotherham lehlin The Emphasized Bible thuhmahruai chuan: “[Chu chu] thutiam duhawm ber mai a lo ni; lo awm thei dinhmun engpawh, harsatna engpawh, leh thil ṭûl engpawh atâna Pathian insiam rem theihna chu . . . [Chu chu] thutiam, . . . inpuanna, hriatrengna, leh intiamna a ni. He hming chungah hian Pathian chu a rinawm reng dâwn; chu chu A zahpui ngai lo vang,” tiin a sawi.
4. (a) Isaia 26:4 hian eng ti tûrin nge min fuih? (b) He thuziakah hian eng nge kan ngaihtuah dâwn?
4 Heti hian inzâwt rawh: ‘Jehova chu amaha rinna nghat tlat ngam tûr khawpin ka hre chiang em? Pathianin engkim a thunun tih hriain, nakin hun chu huaisen takin ka hmachhawn em?’ tiin. Isaia 26:4 chuan: “LALPA chu kumkhuain ring rawh u: LALPA JEHOVA-ah chuan kumkhaw lungpui a awm si a,” a ti. Pathian chu Bible hun laia tih châng a neih angin tûnah chuan mite nunah a thilmak tihtheihna hmangin a inrawlh tawh lo ngei mai. Mahse, “kumkhaw lungpui” a nih angin, ani chu “kumkhuain” kan ring thei a ni. Engtin nge kan Pathian rinawm tak hian tûn laia a mi rinawmte a ṭanpui? A ṭanpui dân kawng thum i lo ngaihtuah ang u: Thlêmna do tûra a ṭanpuina kan dîl huna min tihchak dân te, ngaihsak lohna leh dodâlna kan hmachhawn huna min ṭanpui dân te, leh lungkhamna nasa tak kan tawh huna min chhâwk dân te chu. Hêng kawngte kan bih chian lai hian Jehova i rinna i tihngheh theih dân tûr ngaihtuah hmaih suh ang che.
Thlêmna Tawh Hunah Pathian Ring Rawh
5. Pathian kan rinna chungchânga fiahna lian tak chu eng nge ni?
5 Kan thil nghahhlelh tak Paradis emaw, thawhlehna emaw te chungchânga Pathian thutiam rin chu thil harsa a ni hauh lo va. Mahse, nungchang lam thila amah rin—Pathian kawng leh a tehnate zui chu thil dik leh hlimna nasa ber hmuhna a ni tih thinlung tak zeta pawm tlat—chu a harsa hle thei a ni. Lal Solomona chuan he fuihna thu hi a ziak a ni: “I thinlung zawng zawngin LALPA ring la, nangma hriatnaah innghat suh; i kawng zawng zawngah amah hre reng la, i kawngte chu a kawhhmuh zêl ang che,” tiin. (Thuf. 3:5, 6) Kan “kawngte” chungchâng a sawi hi lo chhinchhiah rawh. A ni, kan Kristian beiseina chauh ni lovin, kan nun kawng pum pui chuan Pathian kan rinzia a târ lang tûr a ni. Chu rinna chu thlêmna kan tawh huna engtin nge kan lantîr theih?
6. Engtin nge ngaihtuahna ṭha lo hnâwl kan tum sauh theih?
6 Sual kalsan chu ngaihtuahna aṭangin a inṭan a. (Rom 8:5; Ephesi 2:3 chhiar rawh.) Chuti chu, engtin nge ngaihtuahna ṭha lo hnâwl i tum sauh theih? Hêng kawng pangate hi ngaihtuah rawh: 1. Ṭawngṭaiin Pathian ṭanpuina dîl rawh. (Mt. 6:9, 13) 2. Jehova thu âwihtute leh âwih lotute chungchâng Bible-a entîrna chu ngaihtuah ngun la. Tichuan, a tâwpa an thiltawn chu chhinchhiah rawh. (1 Kor. 10:8-11) 3. Sualnain i chung leh i hmangaihte chunga rilru hrehawmna a thlen dân tûr ngaihtuah rawh. 4. A chhiahhlawh pakhatin thil sual pawi tak a tih huna Pathianin hrehawm a tih dân tûr ngaihtuah rawh. (Sâm 78:40, 41 chhiar rawh.) 5. Amah betu rinawmin mi dang hmaah emaw, a fâla a awm hunah emaw thil sual hnâwla thil dik a tih huna Jehova lâwm dân tûr ngaihtuah rawh. (Sâm 15:1, 2; Thuf. 27:11) Chutianga i tih chuan Jehova i rinzia i lantîr ve thei a ni.
Ngaihsak Lohna leh Dodâlna Tawh Hunah Pathian Ring Rawh
7. Jeremia chuan eng fiahna nge a tawh a, a châng chuan engtin nge a awm?
7 Unau tam tak chuan thu hrilh harsat êm êmna hmunah rawng an bâwl a. Zâwlnei Jeremia chuan chutiang hmunah—Judai ram tâna a ni hnuhnûng, an buai mup hunah—rawng a bâwl a ni. Thuâwih taka Pathian rorêlna thu a puan chhuah avângin nî tin mai hian a rinna chu fiah a ni a. Ṭum khat phei chu, a secretary rinawm tak, Baruka ngei pawh lunghnualin a phunnawi a ni. (Jer. 45:2, 3) Jeremia chu a lunghnual ve em? Nasa taka lungngaih châng zawng a nei ngei mai. “Ka pian chhuah nî chu ânchhe dawngin awm rawh se, . . . Engah kher nge chhûl ata ka lo chhuah le, thawkrim leh lungngaia awm tûra mualpho rêng rênga ka dam chhûng nîte hmang tûr hian?” tiin a sawi hial a ni.—Jer. 20:14, 15, 18.
8, 9. Jeremia 17:7, 8 leh Sâm 1:1-3 thute nêna inmilin, rah ṭha chhuah zêl thei tûrin eng nge kan tih ngai?
8 Mahse, Jeremia chu a tlâwm mai lo. Jehova chu a ring chhunzawm zêl a ni. Chuvângin he zâwlnei rinawm hian Jeremia 17:7, 8-a chhinchhiah Jehova thu: “LALPA ringtu, a rinchhan LALPA ni erawh chu a eng a thâwl e. Tui kianga thingphun, lui kama zungkai, khaw lum lo thleng pawh hlau lo, a hnahte hring reng sî, khawkhen kum pawisa lo, rah chhuah ṭhulh chuang si lo ang hi a ni ang,” tih thlen famkimna chu a hmu a ni.
9 “Tui kianga thingphun” duah ṭha tak emaw, tuia ṭha taka châwm thei huan emaw ang maiin, Jeremia chuan ‘rah chhuah a ṭhulh’ ngai lo. A hual vêla awm mi suaksual mi nuihzat chîngte thununa awm chu a duh lo va. Nunna châwmtu “tui” Hnâr chu bêl tlatin, Jehova sawi apiang chu a rilruah a vawng reng zâwk a ni. (Sâm 1:1-3 chhiar rawh; Jer. 20:9) Jeremia chu kan tân entawn tûr ṭha a niin, thu hrilh harsatna biala rawngbâwltute tân a va ni lehzual tak êm! Chutiang hmun khirha rawngbâwl i nih chuan, ‘a hming ṭanna faka inthâwina’ hlân thei tûra chhelna petu tûr che Pathian Jehova chu rinchhan tlat zêl ang che.—Heb. 13:15.
10. Eng malsâwmna nge kan dawn a, eng nge kan inzawh ang?
10 He ni hnuhnûng chhûnga harsatnate hmachhawn thei tûrin, Pathian Jehova chuan thil tam tak min pe a. Chûngte zînga pakhat chu ṭawng chi hrang tam lehzuala dik taka lehlin chhoh zêl, a bu puma kan neih Pathian Thu, Bible hi a ni. Ani chuan bâwih rinawm leh fing pâwl kal tlangin a hun apianga thlarau lam chaw hnianghnâr tak min buatsaihsak a. Tin, kohhran inkhâwmah leh inkhâwmpuinaah te chuan min ṭanpuitu ṭhian ṭha tam tak min pe bawk. Hêng inkhâwmte hi i hmang ṭangkai tak zet em? Hmang ṭangkaitu zawng zawngte chu “thinlunga an lâwm avângin hlim takin an zai ang.” Amaherawhchu, Pathian thu ngaithla lotute chu ‘thinlunga an lungngaih avângin an ṭap ang a, thlarauva an vui avângin an chiau vak vak ang.’—Is. 65:13, 14.
Lungkhamnate Hmachhawn Hunah Pathian Ring Rawh
11, 12. Khawvêl buainate ngaihtuah hian, eng tih nge finthlâk ber?
11 Sawi lâwk tawh angin, chungpikna chuan tui lian ang maiin mihringte chu a tuam nasa tawlh tawlh a. (Mt. 24:6-8; Thup. 12:12) Tui a len tak tak hun chuan, mite chu tlâng a ni emaw, in chung a ni emaw, hmun sâng zâwkah tawh phawt chuan an tlân chhe ṭhîn. Chutiang bawkin, khawvêl buaina a pun zawh poh leh, mi tam takte chuan hmun sâng zâwk anga lang sum leh pai lamah te, politics lamah te, a nih loh leh sakhaw lamah te, leh science leh khâwl lama thiamna lamah te chuan inhumhimna an zawng a ni. Mahse, hêng zînga a enga mah hian himna dik tak a pe lo. (Jer. 17:5, 6) Kawng lehlamah chuan, Jehova chhiahhlawhte chuan inhumhimna dik tak—“kumkhaw lungpui”—chu an nei a ni. (Is. 26:4) Fakna hla phuahtu chuan: “[Jehova] chauh chu ka lungpui leh ka chhandamna a ni: ka kulhbîng sâng a ni,” tiin a sawi. (Sâm 62:6-9 chhiar rawh.) Engtin nge he Lungpui hi kan inhumhimna kan nihtîr theih?
12 Mihring finna nêna inkalh ṭhîn Pathian Jehova Thu kan zawm hian, amah chu kan vuan tlat tihna a ni. (Sâm 73:23, 24) Entîr nân, mihring finna pawmtute chuan heti hian an ti mai thei: ‘Vawi khat dam manah, nuam chen tûr.’ ‘Engpawh huama hna ṭha thawh mai tûr.’ ‘Sumte pawh hui luh ṭeuh mai tûr.’ ‘Thilte pawh lei ṭeuh zêl mai tûr.’ ‘Zin chhuak vêl a, khawvêl nawmna chen mai tûr,’ tiin. Kawng lehlamah chuan, Pathian finna chu: “Khawvêl hmangtute chu hmang lutuk lova an awm theihna tûrin . . . he khawvêl awm dân hi a boral mêk a nih hi,” tih thurâwn nên a inrem a ni. (1 Kor. 7:29-31) Chutiang bawkin, Isua chuan Jehova kan biakna dah pawimawh ber a, hmun him ber ‘vânah rote’ khâwl khâwm tûrin min fuih a ni.—Mt. 6:19, 20.
13. Johana thawn khat 2:15-17 rilrua vawng rengin, eng nge kan inzawh ang?
13 “Khawvêl” leh “khawvêla thil awmte” lama i rilru put hmang chuan Jehova i rin tlatzia a târ lang em? (1 Joh. 2:15-17) Thlarau lama hausakna leh Lalram rawngbâwlnaa kan chanvote chu he khawvêla thilte ai chuan i duh zâwkin, i dah pawimawh zâwk em? (Phil. 3:8) ‘Mit fîm’ neih reng i tum tlat em? (Mt. 6:22) Pathian chuan âtthlâk tak emaw, thuhnudâwn lo tak emawa thil kan tih mai chu a duh lo va, a bîk takin chhûngkaw enkawl tûr nei i nih chuan chutianga i tih chu a duh lo lehzual a ni. (1 Tim. 5:8) Mahse, a chhiahhlawhte chu Setana khawvêl chhe mai tawh tûr hi ring lo va, amah ring tlat zâwk tûrin a beisei a ni.—Heb. 13:5.
14-16. Engtin nge ṭhenkhatin ‘mit fîm’ neih reng leh Pathian biakna dah pawimawh reng chu an hlâwkpui?
14 Fa pathum nei Richard-a leh Ruth-i entîrna hi han ngaihtuah teh. Richard-a chuan: “Chhûng rilah hian Jehova tân thawk tam thei zâwk nia inhriatna ka nei tlat a. Neih chu ka nei nung; mahse, Pathian hnênah a chuang bâng anga sawi theih tûrte chauh pe niin ka inhre tlat a ni. Chu mi chungchâng chu ṭawngṭaina nêna ka chhût chian hnuah, Ruth-i nên chuan ei leh bâr lama ram pum buai lai mah ni se, ka pu hnêna chawlhkâr khata ni li chauh hnathawh dîl chu kan rêl thlu ta a. Ka dîlna chu min pawmsak a, thla khat chhûngin hun duan thar angin hna ka thawk ta a ni,” tiin a sawi. Richard-a chu engtin nge a awm tâk zêl?
15 Ani chuan: “A hma aiin zâa 20-in hlawh ka hmu tlêm zâwk a; mahse, ka chhûngkaw tân leh ka fate zirtîr nân kum khatah ni 50 ka neih belh a. Rawngbâwlnaa hun ka hman zât chu a lêta pungin, Bible zirna ka kaihhruai zât pawh a lêt thumin a pung bawk a, kohhranah pawh hma ka hruai ṭha thei tawh zâwk a ni. Tin, naupang enkawlna kawnga Ruth-i ka puih theih tâkah chuan ani pawhin a khât tâwkin auxiliary pioneer a thawk ve thei ta. A theih chhûng chu tûn anga hun hman chhoh zêl ka tum tlat a ni,” tiin a sawi.
16 Fanu ina khawsa lai nei Roy-a leh Petina-i pawhin hun bikima rawng an bâwl theih nân an hnathawh hun chu an siam rem thei a ni. Roy-a chuan: “Chawlhkâr khatah ni thum hna ka thawk a, Petina-i pawhin ni hnih a thawk bawk a. Tin, enkawl a awlsam zâwk nân in tê zâwkah kan insawn bawk a ni. Fate kan neih hmaa lo pioneer tawh ṭhîn kan nih avângin, thawh leh châkna kan la nei reng a. Chuvângin, kan fate an lo puitlin chuan hun bikimin rawng kan bâwl leh ta a. Malsâwmna kan dawnte chu suma lei theih rual a ni lo,” tiin a sawi.
“Pathian Thlamuanna” Chuan I Thinlung Vêng Rawh Se
17. Nunah hian eng pawh lo thleng thut thei reng a nih avângin, engtin nge Pathian Lehkha Thu chuan a thlamuan che?
17 “Hunin a rawn her chhuahpui hriat lâwk loh thilthleng” a awm ṭhin avângin, tumahin nakina thil lo thleng tûr kan hre thei lo. (Thur. 9:11, NW) Mahse, nakina thil lo thleng tûr hriat loh avângin, Pathian nêna inlaichînna aṭanga lo awm himna nei ve lote tih fo ṭhin dân anga tûna rilru thlamuanna lo hloh phah a ngai lo. (Mt. 6:34) Tirhkoh Paula chuan: “Engahmah mangang suh u; engkimah ṭawngṭai leh dîlin, lâwmthu hril tel zêlin, in duhnate chu Pathian hnênah hriattîrin awm zâwk rawh se. Tichuan Pathian thlamuanna, rilru rêng rênga hriat sên loh khân, in thinlung leh in ngaihtuahnate chu . . . a vênsak ang che u,” tiin a ziak a ni.—Phil. 4:6, 7.
18, 19. Eng kawngtein nge Pathianin min thlamuan? Hrilhfiah rawh.
18 Hun khirh tak hnuaia awm unau tam takte chuan Jehova pêk chhûng lam aṭanga thlamuanna an nei a. Unaunu pakhat chuan: “Mi zai thiam doctor chuan thisen thun tûra min vau zâm a tum chhên a. ‘Thisen thunte i han duh lo veia maw?’ tih chu min ‘chibai’ ṭanna pakhat a ni. Tichuan, hun dangah ngawi rengin Jehova hnênah ka ṭawngṭai a, a thlamuanna chu ka chungah a lo thleng ta a. Nasa takin ka lo chak ta a ni. Ka thisen a hniam avânga ka chau hle chung pawhin, thisen thun ka duh loh chhan chu Bible hmangin chiang takin ka hrilhfiah thei a ni,” tiin a sawi.
19 Pathian chuan kan mamawh ṭanpuina chu min thlamuantu unaute emaw, a hun taka pêk chhuah thlarau lam chaw emaw hmangin min pe ṭhîn. Unau tuemaw chuan: “He thuziak zet hi chu ka mamawh tak a ni. Ka tân liau liauva ziak a nih hi!” tia an sawi i hriat tawh ngei a rinawm. Ni e, kan dinhmun leh mamawh chu eng pawh ni se, Jehova chuan amah kan rin phawt chuan min hmangaihzia a lantîr ngei ang. Tihah chuan, a “berâmhote” kan nih bâkah, a hming putute kan ni miau si a.—Sâm 100:3; Joh. 10:16; Tirh. 15:14, 17.
20. Engvângin nge Setana khawvêl a tâwp hunah Jehova chhiahhlawhte chu him taka an awm ang?
20 Lo thleng thuai tûr “LALPA thinurna nîah” chuan Setana khawvêlin a rinchhan zawng zawngte chu tihchhiat vek a ni a. Rangkachak te, tangkarua te, leh thil hlu dang eng pawh chuan himna a pe lo vang. (Zep. 1:18; Thuf. 11:4) Inhumhimna awmchhun chu kan “kumkhaw lungpui” chauh a ni ang. (Is. 26:4) Chuvângin, tûnah ngei hian thuâwih taka a kawng felte zawhin, ngaihsak lohna leh dodâlna tâwk chung pawha Lalram thuchah puang chhuakin, leh kan mangannate a chungah nghatin Jehova kan rin pumhlûmzia i lantîr ang u. Chûng thilte kan tih chuan ‘him takin kan awm ang a, thil ṭha lo hlau lovin kan awm hle hle ang.’—Thuf. 1:33. (w11-E 03/15)
Kan Hrilhfiah Thei Em?
Engtin nge Pathian kan rin theih?
• thlêmna kan tawh hunah?
• ngaihsak lohna leh dodâlna kan tawh hunah?
• lungkhamna kan hmachhawn hunah?
[Zirlai Atâna Zawhnate]
[Phêk 19-naa milem]
Pathian tehnate nunpuina chuan hlimna a thlen
[Phêk 21-naa milem]
“LALPA JEHOVA-ah chuan kumkhaw lungpui a awm”