Hrilh Lâwkna Pawimawh Tak Chu

“He ram chanchin ṭha hi hnam zawng zawng hriattîrna tûrin khawvêl zawng zawngah hrilhin a awm ang; chu mi zawhah chuan tâwpna chu a lo thleng ang.”—MATTHAIA 24:14.

KHAWVELA mi thiamte chuan he Bible châng hi a pawimawh hle tih an pawm a. A pawimawh chhan chu khawvêl pum huap hna thawh tûr a sawi vâng a ni. Tin Isua’n “tâwpna” tia a sawi khawvêl dêng chhuak tûr thilthleng pawimawh tak a lo thlen hmaa Kristiante tih ngei tûr thu hrilhna chungchâng a sawi avânga pawimawh a ni bawk.

Chu hrilh lâwkna Bible châng chu tûn laiah hian a thleng famkim mêk a. Chanchin ṭha-ah chuan sâwmna leh vaukhânna a tel avângin, nang ngei pawh a nghawng tel che. Chu chuan Pathian Ram pawm tûr emaw, dodâl tûr emawin duh thlanna a pe che a. I duh thlanna siam chuan i nun ngei a nghawng a ni.

Han ngaihtuah teh. Isua khenbeh a nih hma ni engemaw zâtah a zirtîrte chu a hnênah lo kalin nakina thil lo thleng tûr chu an zâwt a. Isua sawi fo Pathian Ram din a nih dân tûr chu hriat an châk a ni. Tin, Bible lehlin ṭhenkhatin ‘hun tâwpna’ a tih “khawvêl tâwpna” chungchâng pawh hriat an duh bawk a ni.—Matthaia 24:3, Baptist Mid-Mission.

Chu chu chhâng lêtin, Isua chuan indo te, ṭâm te, hrilêng te, leh lîrnghîng nasa takte hmun tina a thlen tûr thu a sawi lâwk a. Tin, sualna a pung ang a, sakhaw hruaitu derte’n mi tam tak an hruai pêngin, Kristian dikte chu huat leh tihduhdah an ni ang. Hêng zawng zawngte hi chanchin ṭha lo tak a ni.—Matthaia 24:4-13; Luka 21:11.

Mahse, chanchin ṭha pawh a awm. Isua chuan a chunga kan lâk chhuah tâk, kum zabi tam tak chhûng mite ngaihven hlawh leh chêttîrtu thute chu a sawi a ni. Mite chuan Isua thusawi chu pawimawh ti ṭheuh mah se, a awmzia an hriat dân erawh a inang lo. He chanchin ṭha hi eng chiah nge a nih? Lalram chu eng nge ni? Eng huna thleng famkim tûr nge ni a, tuin nge tithleng famkim ang? “Tâwpna” a tih chu eng nge ni? I lo en ang u. (w11-E 03/01)

[Phêk 2, 3-naa milem]

 WASHINGTON KUT ZIAK LEHKHAA CHANCHIN ṬHA PALITE ANPUI CHIAH. MATTHAIA 24:14 CHU TIHLANSARH BIK A NI

[Milem Hawhtîrtu]

Facsimile of the Washington Manuscript of the Four Gospels in the Freer Collection 1912 tih lehkhabu aṭangin