Pathian Chawimawitu Thu Tlûkna Siam Rawh

“Mi remhria . . . chuan a kalna a en ṭha ṭhîn.”—THUF. 14:15.

1, 2. (a) Thu tlûkna kan siam rêng rênga kan ngaih pawimawh ber tûr chu eng nge ni? (b) Eng zawhnate nge kan ngaihtuah ang?

NI TIN mai hian thu tlûkna kan siam deuh ṭeuh a rinawm a. Tam tak chuan kan nunah nghawng a nei thui lêm lo va; ṭhenkhat erawh chuan a nei thui hle thung a ni. Kan thu tlûkna siamte chu a lian emaw, a tê emaw pawh ni se, kan ngaih pawimawh ber chu Pathian chawimawi hi a ni.—1 Korinth 10:31 chhiar rawh.

² Thu tlûkna siam chu awlsam i ti nge, harsa i ti zâwk? Kristian puitling ni tûr chuan, chhia leh ṭha fiah dân kan zir a, mi dang ngaih dân ṭanchhan lo va, mahni ngaih dân ṭanchhan thu tlûkna kan siam a ngai a ni. (Rom 12:1, 2; Heb. 5:14) Thu tlûkna dik siam dân kan zir ngei a ngaih chhan dang ṭhenkhat chu engte nge ni? Engvângin thu tlûkna dik siam a harsat hle châng a awm ṭhin? Kan thu tlûkna siamin Pathian a chawimawi ngei theih nân eng nge kan tih theih?

Engah Nge Thu Tlûkna Siam A Ngaih Rêng Rêng?

3. Thu tlûkna siam kan ngaih hunah eng nge kan intihbuaitîr loh vang?

³ Bible tehnate nêna inkûngkaih thila thu tlûkna kan siam hleih theih loh chuan, kan school kalpuite emaw, kan hna thawhpuite emaw chuan kan thurinte ring nghet vak lo leh chu mi avânga awlsam taka thunun theihah  min ngai mai ang. Anni chuan dâwt an sawiin, mi an bum a ni thei a, a nih loh leh thil an ru pawh a ni thei; an tih ang tih vena emaw, an thiltih zêppuina emaw hmanga ‘mipui zui’ tûra min hmin chu an tum thei a ni. (Ex. 23:2) Mahse, Pathian chawimawitu thu tlûkna siam ṭhîn chuan hlauhna emaw, tlâktlum duhna emaw avânga Bible ṭanchhan a chhia leh ṭha hriatna kalh thilte chu a ti lo vang.—Rom 13:5.

4. Engvângin nge mi dangte’n thu tlûkna min siamsak an duh mai theih?

⁴ Kan tâna thu tlûkna siam duhtute chuan kan chhiatna tûr an duh kher lo. Min duhsaktu ṭhian ṭhate chuan an thurâwn zâwm tûrin min nawr thei a. Ina khawsa tawh lo kan nih pawhin, kan chhûngte chuan kan ṭhatna tûr an la duh reng avângin, thu tlûkna siam tûr pawimawh kan hmachhawn huna lo inrawlh chu an tum thei a ni. Entîr nân, damdawia inenkawlna chungchâng hi han ngaihtuah teh. Bible chuan dik lo taka thisen hman chu a dem tih a chiang hle a. (Tirh. 15:28, 29) Mahse, inenkawlna chungchânga thu dangte chu Bible-in a sawi thlap thlap loh avângin mi tinin mahni tân thu tlûkna kan siam ṭheuh a ngai a ni. * Min hmangaihtute chuan hêng thilte chungchângah hian ngaih dân nghet tak an nei mai thei. Mahse, baptisma chang tawh Kristian tinte chuan hêng thilte chungchângah thu tlûkna siamin, “mahni phur an phur ṭheuh” tûr a ni. (Gal. 6:4, 5) Kan tum ber chu mihringte hma ni lovin, Pathian hmaa chhia leh ṭha hriatna thiang neih reng chu a ni.—1 Tim. 1:5.

5. Engtin nge rinna lawng kehchhiatna chu kan pumpelh theih?

⁵ Thu tlûkna siam hleih theih lohna chuan dinhmun hlauhawm takah min dah thei a. Tirhkoh Jakoba chuan chutiang mi chu “a thil tih zawng zawnga nghet lo mi” tiin a sawi a ni. (Jak. 1:7) Chutiang mi chu tuipui phûl but buta lawng karfung nei lova chuangtu ang maiin, mihringte ngaihtuahna rin tlâk loh vawrh leh len lenin a awm ang. A tân chuan rinna lawng kehchhiatna tawn a, chu a thiltawn avânga mi dangte dem mai chu a va awlsam dâwn êm! (1 Tim. 1:19) Chutiang dinhmun chu engtin nge kan pumpelh theih ang? ‘Rinnaah chuan nghet taka kan awm’ a ngai a ni. (Kolossa 2:6, 7 chhiar rawh.) Chutianga awm tûr chuan Pathian thâwk khum Thu kan rinzia târ lang thei zâwng thu tlûkna siam dân kan zir a ngai a ni. (2 Tim. 3:14-17) Mahse, engin nge thu tlûkna ṭha siam thei lo tûra min dang thei?

Thu Tlûkna Siam A Harsat Theih Chhan

6. Engtin nge hlauhna chuan min nghawng theih?

⁶ Hlauhna—thu tlûkna dik lo siam palh te, hlawhchham te, a nih loh leh mite ngaiha mi â anga lante hlauhna—hian engmah ti thei lovin min siam thei a. Chûng hlauhnate chu hriat thiamawm tak a ni. Tumah hian buaina leh zahthlâk taka min siamtu thu tlûkna dik lo siam chu kan duh si lo va. Chuti chung pawhin, Pathian leh a Thu hmangaihna chuan kan hlauhna tikiam tûrin min ṭanpui thei a ni. Eng kawngin nge min ṭanpui theih? Pathian hmangaihna chuan thu tlûkna pawimawhte kan siam hmaa Pathian Thu leh Bible ṭanchhan thu leh hla chhuahte râwn ṭhîn tûrin min chêttîr ang. Chutiang chuan thu tlûkna siam sual kan nei tlêm sawt ang. Engvângin nge? Bible chuan ‘mi mâwlte remhriatna neihtîrin, tlangvâlte hriatna leh ngaihruat thiamna a neihtîr’ theih avângin.—Thuf. 1:4.

7. Lal Davida entîrna chuan eng nge min zirtîr theih?

⁷ Thu tlûkna fing kan siam reng ang em? Siam reng lo vang. Kan zain thil kan tisual ṭheuh si a. (Rom 3:23) Entîr nân, Lal Davida chu mi fing leh rinawm tak a ni a. Mahse, amah leh mi dangte chunga hrehawm tawrhna thlentu thu tlûkna âtthlâkte pawh siam châng a nei ve ṭhîn. (2 Sam. 12:9-12) Nimahsela, a thil tihsualte chu Pathian duhsak tûr thu tlûknate siam loh phah nân a hmang chuang lo. (1 Lal. 15:4, 5) Tûn hmain thil lo tisual tawh mah ila, Davida anga Jehova’n kan thil tihsualte leh kan sualte a  ngaidam a ni tih kan hriat chuan thu tlûkna dik kan siam thei a ni. Ani chuan amah hmangaihtute leh a thuâwihte chu a ṭanpui zêl dâwn si a.—Sâm 51:1-4, 7-10.

8. Inneihna chungchâng tirhkoh Paula thusawi aṭangin eng nge kan hriat theih?

⁸ Thu tlûkna siam hrehna kan neih chu kan tikiam thei a ni. Engtin nge? A châng chuan kawng dik thlan tûr a awm ṭeuh thei tih hriatna hmangin. Inneih chungchânga tirhkoh Paula chhût dân hi ngaihtuah ta ila. Pathian thlarauva thâwk khuma awmin, ani chuan heti hian a ziak a ni: “Nimahsela lêngṭûlte leh hmeithaite hnênah chuan heti hian ka ti a ni: Keimah ang tak hian awm sela an tân a ṭha ang. Insûm theihna an neih loh erawh chuan innei rawh se; hur aiin inneih chu a ṭha zâwk si,” tiin. (1 Kor. 7:8, 9) Paula chuan kawppui neih loh chu thil ṭha ber angin a sawi a; mahse, chu chu kawng dik thlan tûr awmchhun a ni lo.

9. Mi dangin kan thu tlûkna siam an thlîr dân chu kan ngai pawimawh tûr a ni em? Hrilhfiah rawh.

⁹ Mi dangin kan thu tlûkna siam an thlîr dân tûr chu kan ngai pawimawh tûr a ni em? Engemaw chen chu kan ngai pawimawh tûr a ni. Tirhkoh Paula’n milem laka inthawina thil ei chungchâng a sawi hi lo chhinchhiah ta ila. Ani chuan chu mi chungchânga thu tlûkna engpawh chu a sual lo thei a; mahse, chhia leh ṭha hriatna chak lote a titlu thei tih a pawm a ni. Paula chuan eng nge tih a tum? “Ei tûr hian ka unau a tihtlûk chuan, ka unau ka tihtlûk lohna tûrin kumkhuain sa rêng ka ei tawh lo vang,” tiin a ziak a ni. (1 Kor. 8:4-13) Keini pawhin kan thu tlûkna siamin mi dangte chhia leh ṭha hriatna a nghawng dân tûr kan ngaihtuah tûr a ni. Mahse, kan ngaih pawimawh ber tûr chu, kan duhthlanna siamin Jehova nêna kan inṭhianna a nghawng dân tûr hi a ni. (Rom 14:1-4 chhiar rawh.) Eng Bible thu bulte hian nge Pathian chawimawitu thu tlûknate siam tûrin min ṭanpui ang?

Thu Tlûkna Ṭha Siam Nâna Pawimawh Rahbi Parukte

10, 11. (a) Engtin nge chhûngkuaah chapona kan pumpelh theih? (b) Upate chuan kohhran nghawngtu thu tlûknate an siam hunah eng nge an hriat reng ang?

¹⁰ Chapona pumpelh rawh. Thil engpawh kan tih hmain heti hian kan inzâwt tûr a ni, ‘Hei hi keimah thu tlûkna siam tûr a ni em?’ tiin. Lal Solomona chuan: “Chapona a lo awmin mualphona a lo awm a, inngaitlâwmte hnênah chuan finna a awm,” tiin a ziak a ni.—Thuf. 11:2.

¹¹ Nu leh pate chuan an fate chu thu tlûkna ṭhenkhat an siamtîr mai thei a; mahse, naupangte chuan chutiang thuneihna nei angah an inngai ngawt tûr a ni lo. (Kol. 3:20) Nupuite leh nute chuan chhûngkuaah thuneihna engemaw chen an nei a; mahse, an pasalte lû nihna an pawm tûr a ni. (Thuf. 1:8; 31:10-18; Eph. 5:23) Chutiang bawkin, pasalte chuan Krista hnuaia awm an ni tih hriain, an thuneihnain chin tâwk a neihzia an pawm tûr a ni bawk. (1 Kor. 11:3) Upate chuan kohhran nghawngtu thu tlûknate an siam ṭhîn a. Amaherawhchu, Pathian Thu-a ‘thu ziakte khûm lo tûrin’ an fîmkhur a ni. (1 Kor. 4:6) Tin, bâwih rinawm leh fing hnên aṭanga an dawn kaihhruainate chu an zâwm tlat bawk tûr a ni. (Mt. 24:45-47) Thuneihna kan neih hun chauhva inngaitlâwm taka thu tlûkna  kan siam chuan, manganna leh lungngaihna tam tak kan pumpelh thei a ni.

12. (a) Engvângin nge zir bingna kan neih ang? (b) Chutiang zir bingna neih theih dân sawi rawh.

¹² Zir bingna nei rawh. “Mi taima ngaihtuahna chuan neihnunna lam chauh a pan a, mi thatchhia erawh chuan tlâkchhamna lam chauh a pan a ni,” tiin Solomona chuan a ziak a. (Thuf. 21:5) Entîr nân, sumdâwng tûra sâwmna i dawn chu pawm tûr nge pawm loh tûr tih i ngaihtuah em? I rilru veizâwng chuan thunun che suh se. A kaihhnawih thil zawng zawng la khâwm la, chutiang thil lama mi thiamte râwn bawk la; tin, chu mi nêna inkûngkaihna nei Bible thu bulte chu zawng chhuak rawh. (Thuf. 20:18) Ṭha taka zir bingna nei thei tûrin list pahnih siam rawh—pakhat chu a hlâwkna lam ni sela, a dang chu chân mai theih lam ni rawh se. Thu tlûkna i siam hmain, “a man tûr chin . . . chhût” ang che. (Lk. 14:28) I thu tlûkna siamin sum leh pai lama nghawng a neih dân tûr bâkah, i thlarau lam nun a nghawng dân tûr pawh ngaihtuah bawk rawh. Zir bingna nei tûr chuan thawh rim a ngai a. Mahse, zir bingna i neih chuan lungngaihna thlen thei thu tlûknate chu i siam thawt thawt ṭhîn lo vang.

13. (a) Jakoba 1:5-ah hian eng thutiam nge kan hmuh? (b) Finna dîl chuan engtin nge min ṭanpui theih?

¹³ Finna dîl rawh. A ṭanpuina kan dîl chauhvin, kan thu tlûkna siam chuan Pathian a chawimawi ang. Zirtîr Jakoba chuan: “In zîngah tupawhin finna a tlâkchham chuan mi zawng zawng hnêna hau lo leh ui lova pe ṭhîntu Pathian chu dîl rawh se, chutichuan a hnênah pêk a ni ang,” tiin a ziak a. (Jak. 1:5) Thu tlûkna siam tûrin Pathian finna kan mamawh tih pawm chu a zahthlâk lo. (Thuf. 3:5, 6) Mahni hriatnaa innghahna chuan awlsam takin min hruai sual thei si a. Finna kan dîl a, Pathian Thu aṭanga thu bulte kan zawn hian, thil engemaw kan tih duh chhan tak hre thei tûrin thlarau thianghlim ṭanpuina kan zawng tihna a ni.—Heb. 4:12; Jakoba 1:22-25 chhiar rawh.

14. Engvângin nge thu tlûkna siamna kawngah kan vuaicha loh vang?

¹⁴ Thu tlûkna siam rawh. Zir bingna leh finna i dîl hma chuan he thil hi ti nghâl mai suh. Mi fing chuan “a kalna a en ṭha ṭhîn” si a. (Thuf. 14:15) Kawng lehlamah chuan, i vuaicha tûr tihna erawh a ni lo. Mi vuaicha chuan thil a tih loh chhan hrilhfiah nân chhuanlam maksak tak tak a siam ang. (Thuf. 22:13) Mahse, thu tlûkna chu a siam lo chuang lo—a nihna takah chuan, mi dang inthununtîr tûrin thu tlûkna a siam a ni.

15, 16. Thu tlûkna bawhzuinaah eng nge tel?

¹⁵ I thu tlûkna siam chu bawhzui rawh. Tih tak zeta kan bawhzui loh chuan thu tlûkna ṭha tak siam tûra ṭan kan lâkna chu a thlâwn mai a ni thei. Solomona chuan: “I kutin tih tûr a hmuh apiang chu theihtâwpin ti rawh,” tiin a ziak a ni. (Thur. 9:10) Hlawhtling tûr chuan, kan thu tlûkna siam bawhzui nâna kan mamawh thilte chu kan hmang phal tûr a ni. Entîr nân, kohhrana thuchhuahtu pakhat chuan pioneer  thawk tûrin thu tlûkna a siam a. A hlawhtling ang em? Rawngbâwlna atâna a mamawh tha leh zung leh hun chu a hnathawh leh intihhlimnain a lâk pênsak loh chuan a hlawhtlin ngei a rinawm a ni.

¹⁶ Thu tlûkna ṭha berte chu bawhzui awlsam tak a ni ṭhîn lo. Engvângin nge? ‘Khawvêl pumhlûm hi mi sual thu thua a awm’ avângin. (1 Joh. 5:19) “He thim chunga khawvêl rorêltute leh, vân hmunahte thlarau sualho awmte” chu kan buan a ngai a. (Eph. 6:12) Tirhkoh Paula leh zirtîr Juda chuan Pathian chawimawi tûra thu tlûkna siamtute’n beih tûr an nei a ni tih an târ lang a ni.—1 Tim. 6:12; Jud. 3.

17. Thu tlûkna kan siamte chungchângah Jehova chuan kan lakah eng nge min beisei?

¹⁷ Thu tlûkna siam chu thlîr lêtin a ṭûl ang angin siam rem rawh. Thu tlûkna apiang chu tum ang chiahin a kal thei ṭhîn lo. “Hunin a rawn herchhuahpui hriat lâwk loh thilthleng” chuan min dêng ṭheuh va. (Thur. 9:11, New World Translation.) Chuti chung pawhin, Pathian Jehova chuan fiahna tâwk reng chung pawha kan thu tlûkna ṭhenkhat bawhzui tûrin min beisei a ni. Entîr nân, Pathian Jehova hnêna inpumpêkna emaw, inneihna thutiam emaw chu siam danglam theih a ni lo. Pathian chuan chutiang thu tlûkna kan siamte hlen chhuak tûrin min beisei a ni. (Sâm 15:1, 2, 4 chhiar rawh.) Thu tlûkna tam tak chu a pawimawh nêp deuh va. Mi fing chuan a thu tlûkna siam tawhte chu a khât tâwkin a ennawn ṭhîn ang a. A chapona leh a luhlulna avângin thu tlûkna siam rem ngai emaw, thlâkthleng ngai emaw awmte chu a tih loh phah lo vang. (Thuf. 16:18) A ngaih pawimawh ber chu a nun kawngin Pathian a chawimawi chhunzawm zêl hi a ni.

Pathian Chawimawitu Thu Tlûkna Siam Tûrin Mi Dangte Zirtîr Rawh

18. Engtin nge nu leh pate’n an fate chu thu tlûkna ṭha siam tûra an zirtîr theih?

¹⁸ Nu leh pate chuan Pathian chawimawitu thu tlûkna siam dân an fate zirtîr tûrin tih theih tam tak an nei a. Zirtîrtu ṭha ber pakhat chu entawn tûr ṭha siam hi a ni. (Lk. 6:40) A remchân hunah nu leh pate chuan thu tlûkna engemaw tak siam tûra an hma lâk dânte chu an fate hnênah an hrilh thei a. Tin, an fate chu mahnia thu tlûkna siamtîrin, thu tlûkna ṭha an siam chânga fak chu an duh thei bawk ang. A nih leh, an fate zînga pakhatin thu tlûkna ṭha lo siam ta se engtin nge ni ang? Nu leh pate rilruah chuan a rah chhuah ṭha lo aṭanga an fa hum chu a lo lang nghâl mai thei a; mahse, chu chu naupang tâna ṭha ber a ni reng lo thei. Entîr nân, nu leh pa chuan an fa chu driving license a neih an phal thei a. Mahse, ani chu traffic dân a zawm loh avângin chawitîr a ni ta a ni. Nu leh pate chuan an chawisak thei ngei mai. Mahse, a chawi tûr thawk chhuak tûra an tih chuan, a thiltih chungah mawhphurhna a nei a ni tih a hriat phah ngei a rinawm.—Rom 13:4.

19. Kan Bible zirpuite chu eng nge kan zirtîr ang a, engtin nge kan zirtîr ang?

¹⁹ Isua chuan a hnungzuitute chu mi dangte zirtîr tûrin a hrilh a. (Mt. 28:20) Bible zirpuite hnêna kan zirtîr theihte zînga pawimawh ber pakhat chu thu tlûkna ṭha siam dân zirtîr hi a ni a. Hlawhtling taka zirtîr thei tûr chuan an thil tih dân tûr kan hrilh tûr a ni lo. Thil tih dân tûr chungchânga thu tlûkna an siam theih nâna Bible thu bulte ṭanchhana chhût dân tûr zirtîr chu a ṭha zâwk hle. Tihah chuan, “kan zain Pathian hnênah mahni chanchin kan sawi ṭheuh tûr” a ni si a. (Rom 14:12) Chuvângin, kan za hian Pathian chawimawitu thu tlûkna siam chhan tûr ṭha kan nei ṭheuh a ni. (w11-E 04/15)

[Footnote]

Engtin Nge Kan Chhân Ang?

• Engvângin nge thu tlûkna siam dân kan zir a ngaih?

• Engtin nge hlauhna chuan min nghawng theih a, chu chu engtin nge kan hneh theih ang?

• Pathian chawimawitu thu tlûkna siam ngei tûrin eng rahbi paruk nge kan rah ngai?

[Zirlai Atâna Zawhnate]

[Phêk 20-naa bâwm/milem]

Thu Tlûkna Ṭha Min Siamtîrtu Rahbite

1 Chapona Neih Loh

2 Zir Bingna Neih

3 Finna Dîla Ṭawngṭai

4 Thu Tlûkna Siam

5 Thu Tlûkna Siam Bawhzui

6 Thlîr Lêtna leh Siam Remna Neih

[Phêk 19-naa milem]

Thu tlûkna siam hlei thei lo mi chu tuipui phûl but buta lawng karfung nei lova chuangtu ang a ni