Pathian Ram Chu Eng Nge Ni?

“He ram chanchin ṭha hi . . . ”—MATTHAIA 24:14.

TLANG Chunga Thusawi hmingthang takah Isua chuan ṭawngṭai dân tûr a sawi a, chutah chuan: “I ram lo thleng rawh se,” tia Pathian hnêna dîlna a tel a ni. Mi tam tak chuan chu ṭawngṭaina chu an hre hneh hlein, an chham ngun hle a. Encyclopedia pakhat sawi dân chuan, chu chu “Kristian zawng zawngte hman ṭhin ṭawngṭaina ber a ni.” Chuti chung pawhin, a chhamtu tam tak chuan Lalram awmzia an hre lo va, a lo thlen huna a tih tûr pawh an hre hek lo.—Matthaia 6:9, 10.

Kristianna ram sakhaw hruaitute’n Lalram chungchâng hrilhfiah dân inkalh tak tak, buaithlâk tak tak, leh hriatthiam harsa tak takte an pêk avângin chutianga an hre lo chu a mak hran lo. Ziaktu pakhat chuan Pathian Ram chu “tisa lam thil a ni lo, . . . Pathian nung nêna chhûngrila inzawmna . . . , mite’n chhandamna an hmuh theihna Pathian nêna inhriatna” a ni tiin a ziak a. Ziaktu dang chuan Lalram chanchin ṭha hi “church (kohhran) chungchâng inzirtîrna” niin a sawi bawk. Tin, Catechism of the Catholic Church chuan: “Pathian ram [chu] Thlarau Thianghlima felna te, remna te, leh hlimna te hi a ni,” a ti thung.

He magazine phêk 2-naah hian hrilhfiahna chiang zâwk i hmu ang: “Vâna sawrkârna tak tak, Pathian Ram chuan suahsualna zawng zawng chu a titâwp thuai ang a, leilung hi paradis-ah a chantîr thuai dâwn,” tiin. Bible-in he hriatthiamna a thlâwp dân i lo en ang u.

Leilung Zawng Zawnga Rorêltu Tûrte

Lalram kan tih hi lal rorêlna hnuaia awm sawrkârna a ni a. Pathian Rama Lalber chu tho leh Isua Krista a ni. Vân lalṭhutthlênga a ṭhutna chu zâwlnei Daniela hnênah inlârna hmanga pêk a ni a, ani chuan: “Zân inlârnaahte chuan, Ngai teh, vân chhûmte nêna lo kal, mi pakhat, mihring fapa ang hi ka hmu a, Hmakhawsânga hnênah chuan a lo kal a, a hmaah chuan ani chu an rawn hruai hnai a. Tin, rorêlna te, ropuina te, ram te a hnênah pêk a ni a, mi tin te, hnam tin te leh ṭawng tinte zawng zawng chuan a rawng an bâwl nân: a rorêlna chu rorêlna hlun, ral ngai lo tûr a ni a, a ram chu tihchhiat rual a ni lo vang,” tiin a ziak a ni.—Daniela 7:13, 14.

Daniela lehkhabu pawhin chu Lalram chu Pathianin nghet takin a din ang a, mihring sawrkârna zawng zawngte a tihtâwp vek bâkah, paih chhuah a ni ngai lo vang. Bung 2-na chuan Pathian pêk Babulon lal mumang a târ lang a, khawvêl ram thu neihna indawt dân tûr entîrtu milim hrawl tak a hmu a ni. Zâwlnei  Daniela chuan chu mumang chu a hrilhfiah a. “Tûn hnua thil lo la awm tûrte” chungchângah heti hian a ziak a ni: “Vân Pathianin ram a rawn din ang a, chu chu a chhe ngai tawh lo vang a, a lalna pawh mi dangte tân hnutchhiah a ni hek lo vang; hêng ram zawng zawngte hi a tikeh sawmin a tiral zâwk ang a, kumkhuain a ding reng ang,” tiin.—Daniela 2:28, 44.

Pathian Rama Lalber chuan amah chauhvin ro a rêl lo vang. Leia a rawngbâwl chhûngin Isua chuan a tirhkoh rinawmte hnênah mi dangte rualin anni chu vân nuna kaihthawh an ni ang a, lalṭhutthlêngah an ṭhu ang tih a tiam a ni. (Luka 22:28-30) A sawi chu lalṭhutthlêng tak tak a ni lo, Isua sawi angin Lalram chu vâna awm tûr a ni si a. Bible chuan hêng a rorêlpui tûrte hi “chi tina mi te, ṭawng tina mi te, mi tina mi te, hnam tina mi te” aṭanga lâk niin a sawi a. Anni chu “kan Pathian tân . . . puithiamahte” an ṭang ang a, “leiah chuan ro an rêl” ang.—Thu Puan 5:9, 10.

Lalram Chanchin Chu Chanchin Ṭha A Nih Chhan

Krista chu “mi tin te, hnam tin te leh ṭawng tinte” chunga rorêlna pêk a ni a, a hnêna awmte chuan “leiah chuan ro an rêl” ang tih chhinchhiah ang che. Chuti chu, tute nge chu Lalram khua leh tui tûrte chu ni ta ang? Tûn laia chanchin ṭha hrilhna ṭha taka chhâng lêttute hi an ni ang a. Tin, leia kaihthawh leh tûr chatuana nun beiseina neite pawh an tel bawk ang.

Bible chuan Lalram hnuaia mite dawn tûr malsâwmnate chu rilru hneh thei takin a sawi a. Chûng zînga ṭhenkhat chu han târ lang ta ila:

“Ani chuan indonate chu kâwlkil thlengin a tireh ṭhîn a; thal ngul chu a titliak a, fei chu a sât bung ṭhîn a; tawlailîrte chu meiah a rawh ral ṭhîn.”—Sâm 46:9.

“Inte an sa ang a, chûngah chuan an awm reng bawk ang; grêp huante an siam ang a, a rah an ei bawk ang. Mi dang awmna tûrin in an sa tawh lo vang a, mi dang eiah grêp huan an siam tawh lo vang.”—Isaia 65:21, 22.

“[Pathianin] an mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta.”—Thu Puan 21:3, 4.

“Chumi hnuah chuan mitdelte mit chu tihmenin a awm ang a, bengngawngte beng chu tihvârin a awm ang. Chumi hunah chuan ke baite chu sakhi angin an zuang ang a, ṭawngtheilote lei chu hlim takin a zai ang.”—Isaia 35:5, 6.

“Hêng hi mak ti suh u, a hun a thleng dâwn ta, chutih hunah chuan thlâna awm zawng zawngin [Isua] aw an hria ang a, an chhuak vek ang; thil ṭha titute chu nunna changin an tho leh ang a, thil sual titute chu thiam loh changin an tho leh ang.”—Johana 5:28, 29.

“Thuhnuairawlhte erawh chuan ram hi an luah ang a: remna chênin an hmuingîl ang.”—Sâm 37:11.

Hêng hi chanchin ṭha a va ni tak êm! Chu bâkah, Bible hrilh lâwkna thleng famkim tawhte chuan leilung zawng zawng chunga Lalram rorêlna fel a lo thlen hun a hnai tawh tih a târ lang bawk a ni. (w11-E 03/01)