Pathian Thlarau I Inhruaitîr Em?
Pathian Thlarau I Inhruaitîr Em?
“I thlarau chu a ṭha a ni; ram dik takah chuan mi hruai ang che.”—SAM 143:10.
1, 2. (a) Jehova’n a mite tâna thlarau thianghlim a hmanna ṭhenkhat chu sawi rawh. (b) Thlarau thianghlim chuan hun engemaw bîkah chauh hna a thawk em? Hrilhfiah rawh.
THLARAU thianghlim hnathawh i ngaihtuah hian eng nge i rilruah lo lang? Gideona leh Samsona thiltih ropui takte a lo lang em? (Ro. 6:33, 34; 15:14, 15) Kristian hmasate huaisenna emaw, Sanhedrin hmaa Stephana thlamuanna emaw a lo lang pawh a ni thei. (Tirh. 4:31; 6:15) Tûn lai hunah, international inkhâwmpuia hlimna kan neih te, an tualdâwihna avânga lung in tâng kan unaute rinawmna te, leh thu hrilh rawngbâwlnain hma a sâwnna te hi engvâng nge ni ta ang? Hêngte hian thlarau thianghlimin hna a thawhzia a târ lang a ni.
2 Thlarau thianghlim chuan hun engemaw bîkah emaw, dinhmun khirh tak emaw hnuaiah chauh emaw em ni, hna a thawh? Ni lo ve. Pathian Thu chuan Kristiante chu ‘thlarauva awm,’ ‘thlarauva hruai,’ leh “thlarauva nung” niin a sawi a. (Gal. 5:16, 18, 25) Hêng ṭawngkamte hian thlarau thianghlimin engtik lai pawhin min thunun reng thei tih a târ lang. Nî tin mai hian, Jehova hnênah a thlarau hmanga kan ngaihtuahna te, ṭawngkam te, leh thiltihte hruai tûrin kan ngên tûr a ni. (Sâm 143:10 chhiar rawh.) Kan nuna thlarau kan inhruaitîr hian, chu chuan keimahniah mi dangte tihahdamtu leh Pathian chawimawitu rah chu a chhuah ang.
3. (a) Engvângin nge thlarau thianghlim kan inhruaitîr a ngaih? (b) Eng zawhnate nge kan ngaihtuah ang?
3 Engvângin nge thlarau thianghlim inhruaitîr chu thil pawimawh tak a nih? Thlarau thianghlim hnathawh dotu chakna dangin min thunun a tum avângin. Chu chakna dang chu Bible chuan “tisa” tiin a ko va, chu chuan kan tisa ṭha famkim lo ngaihtuahna sual, Adama thlah kan nih anga kan rochun ṭhat famkim lohna a kâwk a ni. (Galatia 5:17 chhiar rawh.) A nih leh, Pathian thlarau inhruaitîrnaah chuan eng nge tel? Sual nei kan tisain a lama min hîpna do tûrin hma lâk dân tûr a awm em? Hêng zawhnate hi “thlarau rah” hmêlhmang a la bâng paruk, “dawhtheihna te, ngilneihna te, ṭhatna te, rinawmna te, thuhnuairawlhna te, insûmtheihna te,” te rualin i lo ngaihtuah ang u.—Gal. 5:22, 23.
Thuhnuairawlhna leh Dawhtheihna Chuan Kohhranah Remna A Awmtîr
4. Engtin nge thuhnuairawlhna leh dawhtheihna chuan kohhranah remna a awmtîr?
4 Kolossa 3:12, 13 chhiar rawh. Kohhranah remna awmtîr tûrin thuhnuairawlhna leh dawhtheihna chuan hna a thawk ve ve a. He thlarau rah hmêlhmangte hian mi dangte ngilnei taka dâwr tûr te, thinur lai pawha dam taka awm tûr te, leh mi dangin kan chunga thil ṭha lo an tih emaw, ṭawngkam ṭha lo an hman emaw huna thungrûl lo tûrtein min ṭanpui a ni. Kristian unaute nêna inrem lohna kan neih chuan, dawhtheihna chuan unaute chunga beidawng mai lo va, inrem leh tûra kan tihtheih apiang ti zâwk tûrin min ṭanpui ang. Thuhnuairawlhna leh dawhtheihna hi kohhranah hian neih a ngai tak zet em? Ngai e, ṭha famkim lo vek kan nih avângin.
5. Paula leh Barnaba inkârah eng nge thleng a, chu chuan eng nge a târ lan?
5 Paula leh Barnaba inkâra thilthleng kha han ngaihtuah teh. Chanchin ṭha thehdarhin kum tam tak chhûng an thawk dûn reng tawh a. Mize fakawm tak tak an nei ve ve a ni. Chuti chung pawhin, ṭum khat chu an inkârah ‘nasa taka inhnialna’ a chhuak thut a ni. (Tirh. 15:36-39) Chu chuan Pathian hnêna inpumpêk takte zîngah pawh inlungrual lohna chhuah châng a awm thei tih a târ lang chiang hle. Kristianin a unau nên inhriat thiam lohna a neih chuan, an inlaichînna chhiat hlentîr thei inhnialna nasa tak a chhuah loh nân eng nge a tih theih?
6, 7. (a) Kan unau nêna kan thu sawiho chu nasa taka inhnialnaa a chan chhoh hmain, Bible thurâwn eng nge kan zui theih? (b) ‘Ngaihthlâk chuh te, thusawi chuh loh te, leh thin tihnel te’ hlâwkna chu eng nge ni?
6 Paula leh Barnaba inkâra inrem lohna awm chu vawilehkhata thleng thut a ni a, chu chu ‘nasa taka inhnialnaah’ a chang chho a ni. Kristian pakhatin a unau nêna buaina an sawiho laia a thinur mai dâwn nia a inhriat chuan, Jakoba 1:19, 20-a kan hmuh thurâwn ngaihthlâk chu a finthlâk ang: “Mi tinin ngaihthlâk chuh sela, thusawi chuh lo sela, thin tinel rawh se: mihring thinurnain Pathian felna chu a siam si lo,” tih hi. Dinhmun azirin, an inbiakna chu inhnialna nasa taka a chan loh nân a thusawi lai thlâk a tum emaw, an thu sawiho lai tihtâwp hrih emaw, a nih loh leh chu mi hmun kalsan mai emaw chu a tum thei ang.—Thuf. 12:16; 17:14; 29:11.
7 Hêng thurâwnte zawm chuan eng hlâwkna nge a neih? A thinur reh hun nghâkin, an buaina chungchânga ṭawngṭaiin, leh a chhân dân tûr ṭha ber ngaihtuahin Kristian chu Pathian thlarau a inhruaitîr thei a ni. (Thuf. 15:1, 28) Thlarau thununna hnuaiah chuan thuhnuairawlhna leh dawhtheihna a lantîr thei a. Chutiang chuan Ephesi 4:26, 29-a kan hmuh thurâwn zâwm tûrin a inthuam ṭha ang: “Thinrim ula, sual erawh chu sual suh u . . . Thu ṭha lo rêng in kâan chhuak suh se, a ṭûlzia ang zêla siam ṭha tûrin thu ṭha apiang chhuak zâwk rawh se, a ngaithlatute tân khawngaihna a lo nih theih nân,” tih chu. Dik takin, thuhnuairawlhna leh dawhtheihnaa kan inthiam hian kohhrana remna leh inpumkhatna kan belhchhah a ni.
I Chhûngkua Chu Ngilneihna leh Ṭhatnain Tihahdam Rawh
8, 9. Ngilneihna leh ṭhatna hi eng nge ni a, chûng chuan chhûngkuaah eng ang boruak nge a awmtîr?
8 Ephesi 4:31, 32; 5:8-10 chhiar rawh. Khaw lum êm êm nîa thlifîm thaw heuh heuh dawn leh tui vâwt tak in ang maiin, ngilneihna leh ṭhatna chuan mi a tihahdam sawng sawng ṭhîn. Chûng miziate chuan chhûngkuaah boruak hlimawm an siam a ni. Ngilneihna chu mi dangte ngaihsakna tak tak aṭanga lo awm mize duhawm tak a ni a, thiltih ṭangkai tak leh ngaihtuahna ṭawngkam hmanga lantîr a ni ṭhîn. Ngilneihna ang bawkin ṭhatna chu mi dangte ṭhatna tûr thiltiha lantîr mize ṭha tak a ni a. Chu chu thilphalna rilru neihna aṭangin a hriat theih a ni. (Tirh. 9:36, 39; 16:14, 15) Mahse, ṭhatnaah chuan thil dang a la tel cheu a ni.
9 Ṭhatna chu khawsak mawina a ni a. Chutah chuan kan thiltih mai ni lovin, a aia pawimawh zâwk kan nihna pawh a tel a ni. Chu chu a chhûng leh pâwn lama hmêlhemna rêng nei lo, thei rah thlum tak ang a ni a. Chutiang bawkin, thlarau thianghlim rah chhuah ṭhatna pawh chuan Kristiante nun kawng zawng zawng a fan chhuak hneh hle a ni.
10. Chhûngkaw zînga mite’n thlarau rah an neih theih nân eng nge tih theih awm?
10 Kristian chhûngkuaah hian engin nge mi tinte chu ngilneihna leh ṭhatnaa incheibâwl tawn tûra ṭanpui thei? Pathian Thu hriatna chuan hmun pawimawh tak a chang a ni. (Kol. 3:9, 10) Chhûngkaw ṭhenkhat chuan chawlhkâr tina Chhûngkuaa Pathian Biakna neih zânah thlarau rah hmêlhmangte zirna chu an telh a. Chutianga telh chu thil harsa a ni lo. I ṭawng hriata hmuh theih zir bingna hmanruate hmangin, thlarau rah hmêlhmang tinte chungchâng awmna thuziak chu thlang chhuak la. Chawlhkâr khatah paragraph tlêm tê chauh ngaihtuahin, thlarau rah hmêlhmang pakhat chu chawlhkâr engemaw zât chhûng in sawiho thei ang. Chutianga in sawiho lai chuan, Bible châng târ lante chu chhiarin sawiho ang che u. In thil zirte nunpui theih dân kawng dapin, in ṭan lâkna chungah Jehova malsâwmna dîl ang che. (1 Tim. 4:15; 1 Joh. 5:14, 15) Chutianga zirna chuan chhûngkuaa mite indâwr dânah nghawng a nei tak zet thei ang em?
11, 12. Engtin nge Kristian nupa tuak hnih chuan ngilneihna chungchâng zir chu an hlâwkpui?
11 Inneihna hlawhtling tak neih duh innei hlim nupa tuak khat chuan thlarau rah chungchâng zir bingna neih an tum a. Chu chu engtin nge an hlâwkpui? A nupui zâwk chuan: “Ngilneihnaah chuan nupa kâra rinawmna leh nghehna a tel tih hriatna chuan tûn thlengin kan indâwr dân chungah nghawng ṭha a nei a. Mi tihnuam leh ngaihdam peih tak nih dân min zirtîr a ni. Tin, a ṭûl huna ‘ka lâwm e,’ tih leh ‘pawi ka ti khawp mai,’ tih dân min zirtîr bawk,” a ti.
12 Inneihna lama harsatna nei ṭhîn Kristian nupa tuak dang pakhat chuan an inlaichînnaah ngilneihna a tlachham tih an hria a. Tichuan, ngilneihna chungchâng zir dun chu a titlu ta a ni. Chu chuan eng nge a rah chhuah? A pasal chuan: “Ngilneihna chungchâng kan zirna chuan rilru chhia pua inpuh mai lo va, inngaihhnathiam a, ṭhatna lai inensak tawn a pawimawhzia hre tûrin min ṭanpui a. Kan mamawhte kan inngaihtuahsak tawn lehzual ṭan a. Ngilnei tak nihnaah chuan ka nupui chu a ngaih dân tîm miah lova sawi chhuahtîr leh a thusawi chhuahte lungnih loh nâna hman loh a tel a. Chutianga ti tûr chuan ka chapona paih bo a ngai a ni. Ngilneihna kan nunpui chhoh tâkah chuan, mahni thiam thu sawi kan chîn ṭhin pawh zawi zawiin kan bânsan ta a. A zalênthlâk khawp mai,” a ti. I chhûngkua chuan thlarau rah chanchin zir chu a hlâwkpui ve ang em?
Mahni Chauhva Awm Hunah Rinna Lantîr Rawh
13. Kan thlarau lam tâna hlauhawm eng lakah nge kan invên ang?
13 Kristiante tân vântlâng hmaah leh mi mal nunah Pathian thlarau an inhruaitîr a ngai a. Tûn lai Setana khawvêlah hian milem lepchiah tak tak leh intihhlimna ṭha lo tak takte a pung chak êm em a. Chûng chu kan thlarau lam nun atân a hlauhawm thei a ni. Kristian chuan eng nge a tih ang? Pathian Thu chuan: “Bawlhhlawh zawng zawng leh sual khat liam chu dah bo ula, thu tuh, in thlarau chhandam thei chu thuhnuairawlh takin pawm rawh u,” tiin thurâwn min pe a ni. (Jak. 1:21) Tûnah chuan, thlarau rah hmêlhmang chi dang, rinnain Jehova hmaa thianghlimna min vawntîr theih dân i lo ngaihtuah ang u.
14. Engtin nge rinna tlâkchhamna chuan thil sual tihna a thlen theih?
14 Rinna tih chu a bul berah chuan Pathian Jehova chu kan tân a tak tihna a ni. Pathian chu kan tâna a tak loh chuan, thil sual tihnaah awlsam takin kan tel mai ang. Hmân lai Pathian mite chunga thilthleng hi han ngaihtuah teh. Jehova chuan zâwlnei Ezekiela hnênah mahni in luma thil tenawm tak an tihte chu a hriattîr a ni: “Mihring fapa, Israel chhûng upate thim hnuaia thiltih chu i hmu em? Mi tinin milim pindana an tih chu? ‘LALPA chuan mi hmu lo va, LALPA chuan ram chu a kalsan tawh alâwm,’ an ti si a,” tiin. (Ezek. 8:12) An harsatna belhchhahtu chu i lo hria em? Anni chuan an thiltih chu Jehova’n a hria tih an ring lo va. An tân Jehova chu a tak lo a ni.
15. Engtin nge Jehova rinna nghet tak chuan min vênhim?
15 Chu mi nêna inkalh takin, Josefa entîrna hi han ngaihtuah teh. A chhûngte leh a chipuite kiangah awm lo mah se, ani chuan Potiphara nupui chu a mutpui duh lo. Engvângin nge? A chhan chu heti hian a sawi a ni: “Engtin nge he sual lian tak hi tiin Pathian chunga thil ka tihsual theih ang?” tiin. (Gen. 39:7-9) Ni e, a tân Jehova chu a tak a ni. Pathian kan tâna a tak chuan, intihhlimna bawlhhlawhte kan en lo vang a, Pathian tilâwm lo thil rêng rêng a rûkin kan ti lo vang. Kan tum chu: “Ka in chhûngah thinlung ṭha famkim puin ka awm ang. Thil ṭha lo rêng rêng ka mithmuhah chuan ka dah lo vang,” tia zaitu fakna hla phuahtu thiltum ang a ni ang.—Sâm 101:2, 3.
Insûmtheihna Neiin I Thinlung Vêng Ṭha Rawh
16, 17. (a) Thufingte lehkabua târ lan angin, engtin nge “tlangvâl hriatna nei lo” chu suala a tlûk luh? (b) He mi phêka târ lan angin, naupang kan ni emaw, puitling kan ni emaw engtin nge chutiang chu tûn laiah a thlen theih?
16 Thlarau rah hmêlhmang hnuhnûng ber insûmtheihna chuan Pathian duh lohzâwng thilte ti lo tûrin min ṭanpui a. Kan thinlung vêng ṭha tûrin min ṭanpui thei a ni. (Thuf. 4:23) Thufingte 7:6-23-a kan hmuh nawhchizuarin “tlangvâl hriatna nei lo” a bum dân vêl kha ngaihtuah ta ila. Ani chu nawhchizuar ‘awmna lam hnaih kawtthlêra a kal’ hnuah thlêmin a awm a ni. Chuta a va kal chhan chu thil chinchâng a hriat duh vâng pawh a ni thei ang. Mahse, nun chân theihna kawng sualah hruaiin a awm tih rêng a hre chhuak thei lo va, sual kawng chu a zawh ta thuai a ni.
17 Engtin nge chu tlangvâl chuan a chhiatpui tûr thil sual pawi tak chu a pumpelh theih? “A kawngahte chuan kal bo suh,” tih vaukhânna zâwmin a pumpelh thei a ni. (Thuf. 7:25) Kan tân zir tûr a awm: Pathian thlarau inhruaitîr kan duh chuan, thlêmna hnuaia min awmtîr thei dinhmunte kan pumpelh a ngai, tih hi. “Tlangvâl hriatna nei lo” anga kawng suala mi a kal palh theih dân kawng khat chu, tum nei lêm lova TV channel hmeh kual leh Internet hman vêl mai mai hi a ni. Tum rêng vâng a ni emaw, ni lo emaw pawh ni se, mipat hmeichhiatna lama châkna chawktho thei milemte a hmuh mai a rinawm hle a. Zawi zawiin a chhia leh ṭha hriatna leh Pathian nêna an inlaichînna nasa taka tichhe thei saruak lemte en chu a chîng ṭan thei a. A nun ngei pawh a chân phah thei a ni.—Rom 8:5-8 chhiar rawh.
18. Kristianin a thinlung vên ṭhat nân eng angin nge hma a lâk theih a, chûngah chuan engtin nge insûmtheihna neih a ngaih?
18 Châkna chawktho thei milem kan hmuh chuan hma la nghâl vatin insûmtheihna kan lantîr thei a, kan lantîr tûr a ni bawk. Mahse, atîr aṭanga chutiang dinhmun pumpelh chu a va ṭha zâwk dâwn êm! (Thuf. 22:3) A ṭûl anga invên dân tûr zawn leh chutianga invêng tûr chuan insûmtheihna neih a ngai a. Entîr nân, hmun ualau taka computer hûn chu invênhimna a ni thei. Ṭhenkhat chuan mi dang an awm lai chauhva computer hman leh TV en chu thil ṭha ber niin an hria a. Mi dangte chuan Internet neih loh mai chu an titlu bawk a ni. (Matthaia 5:27-30 chhiar rawh.) “Thinlung thianghlim leh chhia leh ṭha hriatna thiang leh rinna dik tak aṭanga lo chhuak hmangaihna” nêna Pathian Jehova kan biak theih nân, mahni leh kan chhûngte vênghim tûrin a ṭûl ang angin hma i la ang u.—1 Tim. 1:5.
19. Thlarau thianghlim inhruaitîr a hlâwkna chu engte nge ni?
19 Thlarau thianghlimin hna a thawh avânga a rah chhuahte chuan hlâwkna tam tak a thlen a. Thuhnuairawlhna leh dawhtheihna chuan kohhranah remna a awmtîr a. Ngilneihna leh ṭhatna chuan chhûngkuaah hlimna a awmtîr a ni. Rinna leh insûmtheihna chuan Jehova hnaih reng tûr leh a hmaa thianghlim tûrin min ṭanpui a. Chu bâkah, Galatia 6:8 chuan: “Thlarau lama thehtu . . . chuan Thlarauva mi chatuana nunna a seng dâwn a ni,” tih min tiam a ni. Ni e, Krista tlanna ṭanchhanin, Jehova chuan thlarau thianghlim chu thlarau inhruaitîrtute hnêna chatuana nunna pêk nân a hmang ang. (w11-E 04/15)
Engtin Nge Kan Chhân Ang?
• Engtin nge thuhnuairawlhna leh dawhtheihna chuan kohhranah remna a awmtîr?
• Engin nge Kristian chu in lama ngilneihna leh ṭhatna lantîr tûra ṭanpui thei?
• Engtin nge rinna leh insûmtheihna chuan Kristian chu a thinlung vêng ṭha tûra a ṭanpui theih?
[Zirlai Atâna Zawhnate]
[Phêk 29-naa milem]
Engtin nge thu sawihona chu thinurna tel lo i nihtîr theih?
[Phêk 30-naa milem]
Thlarau rah chungchâng zirna chu i chhûngkuain a hlâwkpui thei
[Phêk 31-naa milem]
Rinna leh insûmtheihna lantîrna aṭangin eng hlauhawmte nge kan pumpelh?