Pawisa Khelh Bible-in A Dem Em?

FILM lâr takte leh TV-te chuan pawisa khelh—a bîk takin pawisa khelhna hmunpui casino-a khelh—chu mi hmêlṭha, hausa, leh changkâng tak takte hun hman dân angin a lantîr a. A thlîrtute erawh chuan chûng chu phuahchawp leh ngaihruat thil mai a ni tih an hre tho mai.

Mahse, a tak takah chuan lottery ticket te, inkhelhnaa lo inthâp te, leh computer hmanga pawisa khelhna te chuan casino chu elin pawisa khêltute hîp an tum a ni. Pawisa khelh chu “hmun tin deuhthawa kan hmuh theih thil chîn ṭha lo, mi kângkai chak tak” niin Internet Gambling lehkhabu chuan a sawi. Entîr nân, lehkhaden khelh dân chi khat poker an tih chu TV leh Internet-a infiamna hriat hlawh tak a lo ni ta a. Mi thiamte chuan United States-ah hian thla 18 liam ta chhûngin a khêltute chu a lêtin an pung nia an chhût thu chanchinbu pakhat chuan a sawi a ni.

Pawisa khelhna tih chu a rah chhuah tûr hriat loh thila pawisa inthâpna tia sawi a ni ṭhîn. Mi tam tak chuan a khêltuin mahni pawisaa a khelh a, a zawngchhang loh phawt chuan pawisa khelh a pawina a awm lo tih ngaih dân an nei a ni. A nihna takah chuan, New Catholic Encyclopedia chuan pawisa khelh hi “miin a mawhphurhna tih loh phah nâna a hman loh chuan suala ngaih a ni hran lo” tiin a sawi. Amaherawhchu, chu thu tâwp thlâwptu tûr Bible châng engmah târ lan a ni lo. Chuti chu, engtin nge Kristian dik chuan he mi chungchâng hi a thlîr ang? Bible-in pawisa khelh hi a phal nge a sawisêl zâwk?

Bible-ah chuan pawisa khelh chungchâng tlang taka sawi fakna a awm lo tih kan hre tûr a ni a. Amaherawhchu, he mi chungchângah hian kaihhruaina nei lo kan ni lo. Bible chuan thiltih leh dinhmun tinrêng atâna zawm tûr dân pêk aiin, “Lalpa duhzâwng engnge ni tih lo hre” tûrin min fuih zâwk a ni. (Ephesi 5:17) Bible scholar E. W. Bullinger-a sawi dân chuan, ‘lo hria’ tia lehlin Grik thu mal chu “rilrua ngaihtuahna, ngun taka thu ngaihtuahna aṭanga hriatna” hmanga thu pakhat nih phung sâwm khâwmna a ni a. Chutiang chuan, Kristian chuan pawisa khelhna nêna inkûngkaihna nei Bible thu bulte sâwm khâwm a, ngun taka ngaihtuahna aṭangin chu mi chungchânga Pathian duhzâwng chu a hre thei a ni. A hnuaia thute aṭanga Bible châng lâk chhuahte i chhiar hian heti hian inzâwt ang che: ‘Pawisa khelh hi he Bible châng nên hian a inrem em? Bible-in he mi chungchânga Pathian duhzâwng eng nge a târ lan?’ tiin.

Vânneihna Thlêmna

Pawisa khelhnaah chuan a rah chhuah tûr hriat loh thil chunga inthâpna a tel avângin, a bîk takin sum leh pai inthâp a nih chuan vânneihna—thil awm dân thununtu chakna mak tak—rinna chuan hmun pawimawh tak a chang a ni. Entîr nan, lottery ticket tân number ṭha, man ngei tûra ngaihte chu thlan a ni a; China  ram aṭanga bul inṭan mah-jongg inkhelhnaa tel puithuna âtthlâk pawmtute chuan ṭawngkam engemaw bîkte hman chu an duh lo va; tin, ṭhum vâwr lung chu an vawrh hmain zâwi têin an chhêm ṭhîn bawk. Engvângin nge? Pawisa khêltute chuan vânneihnain a rah chhuah tûr a thunun emaw, a lo thunun mial emaw an rin vâng a ni fo.

Vânneihna rin chu thil hlauhawm lo infiamna mai a ni em? Hmân lai Israel rama mi ṭhenkhat chuan chutiang chuan an thlîr a. Anni chuan vânneihnain hausakna a thlen theih an ring a ni. Pathian Jehova’n chu mi chungchâng chu engtin nge a ngaih? Zâwlnei Isaia kal tlangin, Pathian chuan anni chu: “Nangni LALPA kalsana, ka tlâng thianghlim theihnghilha, Vânneihna Siamtua tân dawhkân buatsaiha, Chantâwka Khawrêlsaktui tân uain chawhpawlh sa chhûng khat ṭhînte,” tiin a ko a ni. (Isaia 65:11) Pathian mitah chuan vânneihna rin chu milem biakna chi khat a ni a, biakna dik nên a inrem lo. Pathian dik rinna aiin, ngaihruatnaa awm chakna rinna a târ lang si a. Pathianin chu a thlîr dân thlâk tûra rin nachhan tûr kan nei lo.

Lâwmman Man A Nih Dân

Internet hmangin an inthâp emaw, lottery ticket an lei emaw, infiamnaah chak zâwk tûr lo inthâp emaw, a nih loh leh casino-ah an inkhêl emaw pawh ni se, pawisa khelh chîngtute chuan man an tum an duh tak lâwmman lo chhuahna chu an hmuh hmaih fo ṭhîn. Pawisa khelh chu dân ang taka sumdâwnna thila indâwrna emaw, mi dangte sum chân neih tuma thil lei emaw nên a inang lo. * “Lottery aṭanga hausa an awm apiangin mi maktaduai tam takin an sum an chân ṭhîn!” tiin Canada rama thil ngawlveina leh rilru lam hrisêlna zirna hmunpui, Centre for Addiction and Mental Health chuan a sawi. He mi chungchânga Pathian ngaih dân hre tûrin Kristian dik chu eng Bible thu bulte’n nge ṭanpui thei?

Israelte hnêna pêk Thupêk Sâwmte zînga a hnuhnûng ber chu: “I vêngte nupui chu i awt tûr a ni lo, a bâwihpa emaw, a bâwihnu emaw, a bâwngpa emaw, a sabengtung emaw, i vêngte ta rêng rêng chu engmah i awt tûr a ni lo,” tih a ni. (Exodus 20:17) Vêngte ta—a thil neih te, a hausakna te, leh a sum te—awh chu sual pawi tak, a nupui awhna sual nêna thuhmun anga târ lan a  ni a. Kum zabi tam tak a liam hnuah, tirhkoh Paula chuan he thupêk hi Kristiante tân a sawi nawn a ni: “Awt suh,” tiin. (Rom 7:7) Mi dangte thil chân hmuh tum Kristian chuan chutiang awhna sual a nei a ni thei ang em?

Chanchinbu mi J. Phillip Vogel-a chuan: “Anni’n [pawisa khêltute’n] an pawm emaw, pawm lo emaw pawh ni se, an khelh tak tak hmain an pawsa thâp chu—eng anga tlêm pawh ni se—sum tam taka chantîr tumin duhthu an sâm ru ṭhîn,” tiin a ziak a. Chutiang pawisa khêltute chuan rei lo te chhûnga awlsam taka hausak thûr thûr mai chu ngaihtuahin duhthu an sâm ṭhîn a ni. Hei hi ‘tlachham hnêna pêk tûr a neih theih nâna a kuta thil ṭha thawka rim zâwk’ tûra Bible-in Kristiante a fuihna nên chuan a inkalh tih a chiang hle. (Ephesi 4:28) Tin, tirhkoh Paula chuan: “Tupawhin hna a thawh duh loh chuan ei pawh ei suh se,” tia chiang taka a sawi hnuah, an thawh chhuah “anmahni chhang [ngei] ei tûrin” a sawi zawm bawk a ni. (2 Thessalonika 3:10, 12) Mahse, pawisa khelh hi hna pakhat anga sawi theih a ni ngei em?

Pawisa khelh chu ṭan ngai hle thei mah se, an lâwmman chu an thawh chhuah emaw, an thiltih avânga an dawn emaw anga sawi ni lovin, lâwmman man anga sawi a ni ṭhîn. Pawisa khelhnaah chuan, thil lo thleng hlauh thei ṭanchhana sum thâp a ni a, chu chu hlawhtlin nî awm ngei tûra beiseina ṭanchhana thâp a ni. A tâwi zâwnga sawi chuan, pawisa khêltu chuan engmah sêng lova thil engemaw neih tumna a ni. Kawng lehlamah chuan, Kristian dikte chu rinawm taka hnathawhna aṭanga sum thawk chhuak tûra fuih an ni. Lal fing Solomona chuan: “Mihring tân chuan ei leh in te leh a thawhrimnaa a rilru tihnawm te aliama ṭha a lo awm lo,” tiin a ziak a. Tichuan, heti hian a belhchhah a ni: “Hei pawh hi Pathian kuta mi a ni,” tiin. (Thuhriltu 2:24) Ni e, Pathian chhiahhlawh chuan a beiseina chu suangtuahna ramah emaw, awlsam tama sum hmuh theihnaah emaw nghat lovin, hlimna leh malsâwmna atâna Pathian beisei zâwk a ni.

Pumpelh Tûr ‘Thang’ Chu

Pawisa khêltu chuan lâwmman a man hlauh a nih pawhin, a thil man avânga rei lo te chhûng a hlimna ni lovin, pawisa khelhnain a thlen theih nghawng thui takte chu a ngaihtuah tûr a ni. Thufingte 20:21 chuan: “Awlsam taka sum leh pai neih mai theihte hi a tâwpah chuan a hlâwk lem lo,” tiin a sawi. (C.L. Re-edited) Lottery mantute leh pawisa khêltu mi tam takte chuan hausaknain hlimna a thlen lo tih lungchhiatthlâk takin an hre chhuak châwk ṭhîn. Bible-in ‘sum rinawm lova bieiseina nghat lova, thil zawng zawng lâwmna tûra tam taka petu Pathian chunga nghat zâwk’ tûra min zilhna pawm chu a ṭha zâwk hle.—1 Timothea 6:17.

Pawisa khelhna pumpelh chhan tûr pawimawh zâwk dang pakhat a awm a. Pathian Thu chuan: “Hausak tumte chu thlêmnaah te, thangah te, âtthlâk leh tikhawlo thei duhna tam takah te an tlu lût ṭhîn, chûng duhnate chuan chhiatna leh boralnaah chuan mite a tipil ṭhîn,” a ti. (1 Timothea 6:9) Thang chu sa man tum awh nâna siam a ni ṭhîn a. Sum tlêm tê chauh thâp tum emaw, vawi hnih thum bâk khelh tum emaw mi tam takte chu pawisa khelhna thangah âwkin, a ngawl an vei a. Chu chuan an hnathawh a chântîrin, an hmangaih takte a tihnat bâkah, chhûngkuate a tichhe vek a ni.

Pawisa khelhna nêna inkûngkaihna nei Bible châng tam tak kan ngaihtuah hnu hian, he mi chungchânga Pathian duhzâwng chu i hre thei em? Tirhkoh Paula chuan a Kristian unaute chu: “He khawvêl dân ang hian awm suh ula; Pathian duhzâwng, a ṭha leh lawn tlâk leh, ṭhat famkin chu in hriatfiah theih nân, in rilru athara awmin lo danglam zâwk tawh rawh u,” tiin a fuih a ni. (Rom 12:2) Kristian nun chu mite ngaih dân ni lovin, Pathian duhzâwng chuan a kaihruai tûr a ni a. “Pathian hlim” a nih angin, Jehova chuan pawisa khelhna aṭanga lo awm rah ṭha lo takte tâwk lova nun hlimawm tak kan neih chu a duh a ni.—1 Timothea 1:11, New World Translation. (w11-E 03/01)

[Footnote]

[Phêk 12-naa thu lâk chhuah]

Pathian mite chuan rinawm taka hna thawkin sum an thawk chhuak

[Phêk 11-naa bâwm]

Lâwmman Man Avânga Phûrna

Pawisa khelh hi awlsam têa a ngawl vei theih, thil chîn dawklak theih a ni em? Pawisa khêltute’n lâwmman an man emaw, an chân emaw an chhân lêt dân a zir chian hnuah, Dr. Hans Breiter-a chuan “pawisa khelhnaa lâwmman mantu thluak hnathawh dân leh cocaine ngawlvei thisen zâma cocaine chiu luh hnua a thluak hnathawh dân chu a inang hle” tih a hmu chhuak a ni.

[Phêk 11-naa milem]

Pawisa khêltute chuan tu sum nge man an inbeisei?