Takna Nên Jehova Rawng Bâwl Rawh
Takna Nên Jehova Rawng Bâwl Rawh
“I takzia . . . chu tilang rawh.”—TIT. 2:7, 8.
1, 2. Engin nge he khawvêla mi tam takte chu intihhlimna lam ringawt ngaihtuahtîr a, eng zawhnate nge a chawh chhuah?
MIHRING chanchina harsatna leh chhiatna râpthlâk berte a thlenna hunah kan awm a. Pathian Jehova nêna inlaichînna ṭha nei lote tân chuan hêng ‘hun khirh takte’ hmachhawn hi thil theih loh tluk a ni. (2 Tim. 3:1-5) Mahni chhelna ringawt chuan an hlawhtling hlei thei ṭhîn lo. Hlimna hloh khawpa nun an lâk thutak loh nân, mi tam tak chu intihhlimna chi hrang hrangah an inhmang a ni.
2 Nuna lungkhamnate hmachhawn tûrin mite chuan intihhlimna lam chu an dah pawimawh ber fo ṭhîn. An fîmkhur loh chuan Kristiante tân chutiang nun kawng ûm ve chu a awlsam hle ngei ang. Chu chu engtin nge kan pumpelh theih? Engtik lai pawha tak rûn reng mai a ngai ang em? Engtin nge intihhlimna leh mawhphurhna kan inbûk tâwktîr theih? Nuna thil pawimawhte kan ngaihsak rualin, tak rûn reng lo tûrin eng Bible thu bulte’n nge min kaihruai ang?
Intihhlim Ngainatna Khawvêla Takna
3, 4. Engtin nge Bible chângte chuan takna neih a ngaihzia ngaihlu tûra min ṭanpui?
3 He khawvêl hian “mahni lâwmna” zawn a dah pawimawh hle tih chu sawi lova lum a ni a. (2 Tim. 3:4) Hun hlimawm tak hman a dah pawimawhna chu Jehova nêna kan inlaichînna atân a hlauhawm thei a ni. (Thuf. 21:17) Chuvângin, Timothea leh Tita hnêna Paula lehkha thawnah takna chungchânga thurâwn a tel a ni. Chu thurâwn nunpuina chuan intihhlimna ringawt ngaihtuahna khawvêl thununna do tûrin min ṭanpui ang.—1 Timothea 2:1, 2; Tita 2:2-8 chhiar rawh. *
4 A hma kum zabi engemaw zâtah, Solomona chuan nuna thil pawimawhte ngaihtuah nâna intihhlimna thlahthlam châng neih a hlutzia a ziak a. (Thur. 3:4; 7:2-4) Kan dam chhûng nîte a tâwi avângin, chhandam nih kan “tum hrâm hrâm” a ngai a ni tih a chiang hle. (Lk. 13:24) Chutianga chhandam kan nih theih nân, ‘kan takzia kan lantîr’ a ngai a. (Tit. 2:7, 8) Chu mi atân Kristian nun pêng tinrêng chu fîmkhur taka kan ngaihsak a ngai a ni.
5. Nuna kan lâk thutak ngai thil pakhat chu eng nge ni?
5 Entîr nân, Jehova leh Isua entawnin, Kristiante chuan thawkrim tûra an mawhphurhna chu an la thutak hle a. (Joh. 5:17) Chuvângin, an thawh ṭhat vâng leh an rin tlâkna avângin fak an hlawh fo a ni. A bîk takin, chhûngkaw lûte chuan an chhûngkaw mamawh phuhrûk tûra hna thawhrim chu an ngai pawimawh hle. Tihah chuan, mahni chhûngte mamawh phuhrûk loh chu ‘rinna phatsanna’ a ni si a!—1 Tim. 5:8.
Takna Tel Chunga Pathian Kan Biakna Hlimawm Tak
6. Pathian Jehova kan biakna chu kan la thutak hle tûr a ni tih engtin nge kan hriat?
6 Pathian Jehova chuan biakna dik chu a ngai pawimawh lo ngai lo. Entîr nân, Mosia Dân hnuaiah chuan Israelte’n Jehova biakna an kal pênsan hian, a sawhkhâwk râpthlâk tak an tawng ṭhîn. (Jos. 23:12, 13) C.E. kum zabi pakhatna lai khân, biakna dik chu zirtîrna leh ngaihtuahna ṭha lote’n a chawhpawlh loh nân Krista hnungzuitute tân tih tak zeta an beih a ngai a. (2 Joh. 7-11; Thup. 2:14-16) Tûn laiah pawh Kristian dikte chuan an Pathian biakna chu an la thutak reng a ni.—1 Tim. 6:20.
7. Engtin nge Paula chu rawngbâwl tûra a inbuatsaih?
7 Thlawhhma rawngbâwlna hi hlimna min petu pakhat a ni a. Nimahsela, rawngbâwlnaa hlimna nei reng tûr chuan kan ngaihtuah mûkin kan inbuatsaih lâwk a ngai a ni. Paula chuan a zirtîrna dawngtute a ngaihtuah tel dân hrilhfiahin, heti hian a ziak a ni: “Eng emaw ti tala ṭhenkhatte tal ka chhandam theihna tûrin mi zawng zawng hnênah engkim ka ni tawh. Chanchin ṭha avângin engkim ka ti ṭhîn, chan ka neih ve theih nân,” tiin. (1 Kor. 9:22, 23) Paula chuan mite thlarau lama ṭanpuina kawngah hlimna a hmu a, a thu ngaithlatute mamawh tak a phuhrûk theih nân ngun takin a ngaihtuah a ni. Chuvângin, anni chu Jehova biakna lamah a fuihin, a thlêm thei a ni.
8. (a) Rawngbâwlnaa kan zirtîrte chunga kan rilru put hmang tûr chu eng nge ni? (b) Engtin nge Bible zirna kaihhruaina chuan rawngbâwlna hlimawm lehzual min neihtîr theih?
8 Paula chuan a rawngbâwlna chu eng ang khawpin nge a ngaih pawimawh? Jehova leh thutak ngaithla duhte tâna ‘bâwiha insiam’ chu a inhuam a ni. (Rom 12:11; 1 Kor. 9:19) In lama Bible zirnaah emaw, Kristian inkhâwmnaah emaw, a nih loh leh Chhûngkuaa Pathian Biaknaah emaw pawh ni se, mite hnêna Pathian Thu zirtîr tûra mawhphurhna kan lâk rêng rêng hian, kan mi zirtîrte chunga kan mawhphurhna chu kan hria em? Hun bi neia Bible zirna kaihhruai ziah chu phurrit lutukah kan ngai pawh a ni thei ang. Chutianga kaihruai tûr chuan kan mi mal thil tih tûrte dah ṭha a, mi dang ṭanpui nâna hman zawng a ngai ngei mai. Mahse, chu chu Isua sawi “englo lâk aiin pêkin lukhâwng a nei zâwk,” tih nên chuan a inrem a ni lâwm ni? (Tirh. 20:35) Mi dangte hnêna chhandamna kawng mi mal taka zirtîrna chuan thiltih dangte nêna khaikhin theih miah loh tûr hlimna min neihtîr ang.
9, 10. (a) Takna nei kan tih hian mite nên hahdam takin hun hlimawm kan hmang thei lo tihna a ni em? Hrilhfiah rawh. (b) Engin nge upa chu mi fuih thei leh pan nuam tak ni tûra ṭanpui ang?
9 Takna kan nei kan tih hian mi dangte nêna hun hlimawm tak hmanga intihhahdamna hun kan nei thei lo tihna a ni lo. Isua chuan mite zirtîr nân mai ni lovin, intihhahdamna leh mi dangte nêna inlaichînna awmze nei tak neih nâna hun pêkna kawngah entawn tûr ṭha famkim a siam a ni. (Lk. 5:27-29; Joh. 12:1, 2) Takna nei kan tih hian engtik lai mai pawhin kan thutak rûn reng tûr tihna a ni lo bawk. Isua chu engtik lai mai pawhin thutak reng ta se, mite chu a lama hîpin an awm lo vang. Chutianga a awm loh avângin naupangte takngial pawhin a kianga awm chu nuam an ti a ni. (Mk. 10:13-16) Engtin nge Isua inbûk tâwkna chu kan entawn theih?
10 Unaupa pakhat chuan upa pakhat chungchângah, “Mahni lakah beiseina nei sâng hle mah se, mi dangte lak aṭang chuan famkimna a beisei ngai lo,” tiin a sawi. Chutiang mi chu i ni ve em? Mi dangte hnên aṭanga a âwm tâwk beiseina neih chu a ṭha a. Entîr nân, nu leh pate’n an fate tâna thiltum inâwm tâwk siamsak a, chu mi thleng tûra an ṭanpui hian, an fate chuan an chhâng lêt ṭha ṭhîn. Chutiang bawkin, upate chuan kohhrana mite chu thlarau lama ṭhang chho tûra fuihin, an ṭhan theih dân tûr rawtna chu an pe thei a ni. Chu bâkah, upain mahni inthlîr dân tâwk a neih chuan ani chu mi tihahdam thei tak leh pan nuam tak a ni ang. (Rom 12:3) Unaunu pakhat chuan: “Upain engkim mai hi fiamthu anga a lâk chu ka duh lo. Mahse, engtik lai pawha a thutak reng erawh chuan pan a harsa ṭhîn,” tiin a sawi. Unaunu dang chuan upa ṭhenkhat chu “an thutak rûn reng avânga an hlauhawm” a tih thu a sawi ve bawk. Ringtu zawng zawngin “Pathian hlim,” Jehova an biak avânga an neih tûr hlimna tihkiamsak chu upa tumahin an duh ngai rêng rêng lo vang.—1 Tim. 1:11, NW.
Kohhranah Mawhphurhna Lain
11. Kohhran hotua “ṭan duh” tih awmzia chu eng nge ni?
11 Paula’n kohhrana unaupate chu mawhphurhna sâng zâwk chelh thei tûra a fuih khân, a tum chu an mi mal thiltumte hlen chhuak tûra fuih hi a ni lo. Chu ai mahin, heti hian a ziak zâwk a ni: “Tupawh kohhran hotua ṭan duh chuan hnathawh ṭha a duh a ni,” tiin. (1 Tim. 3:1, 4) Chutianga “ṭan duh” Kristian mipate chuan an unaute rawng bâwlsak nâna mamawh thlarau lam miziate nei tûra thawhrim châkna nasa tak an nei tûr a ni. Unaupa chu a lo berah baptisma a channa kum khat a tlin tawh a, kohhranho rawngbâwltute tlin ngai 1 Timothea 3:8-13-a târ lante engemaw chena a tlin chuan chutianga rawngbâwl tûra rawtna theh luh theih a ni a. Châng 8-na chuan: “Kohhranho rawngbâwltute chu mi zahawm [“mi tak,” NW] an ni tûr a ni,” tiin a sawi fak a ni.
12, 13. Unaupa la naupang zâwkte’n mawhphurhna an neih chhoh theih dân sawi rawh.
12 Kum 20 tling dâwn hnaih lam baptisma chang tawh unaupa mi tak cherhchawrh i ni em? Kohhranho rawngbâwltua ṭan chhoh theih dân kawng tam tak a awm a. Kawng khat chu thlawhhma rawngbâwlnaa tel tam lehzual hi a ni. Thlawhhma rawngbâwlnaa unau apui apangte thawhpui nuam ti mi i ni em? Kristian inkhâwma rawtna pêkte anga Bible zirna i kaihhruai chuan zirtîr thiamna lamah hma i sâwn ang. Chu bâkah, Jehova kawng zirtute chunga lainatna lantîr dân i zir bawk ang. I Bible zirpuiin insiamrem a ngaihzia a hriatthiam ṭan hian, dawhthei tak leh remhre taka Bible thu bulte nunpui tûra zirtîr dân i hre chho bawk ang.
13 Nangni unaupa la naupang zâwkte chuan kohhrana upa zâwkte tâna inpein, a theih ang apiangin in ṭanpui thei a ni. Kingdom Hall lan dân ngaihvenin, felfai taka lang tûra tihfaina kawngah in ṭanpui thei bawk. Chutianga in theih ang anga in ṭanpuina chuan in rawngbâwlna inlâk thutakzia a târ lang a. Timothea angin, kohhran mamawh tih tak zeta ngaihsak dân in zir thei a ni.—Philippi 2:19-22 chhiar rawh.
14. Engtin nge unaupa la naupang zâwkte chu kohhrana rawngbâwl tûra an tlin leh tlin loh ‘fiah’ theih a nih?
14 Upate u, ‘tleirâwl châknate tlânsan a,’ mize ṭha dangte ruala “felna te, rinna te, hmangaihna te, remna te” ûm tum ṭâng ṭâng unaupa la naupang zâwkte chu hriain, kohhranah an tih theih tûr chanvote pe ang che u. (2 Tim. 2:22) Chutiang chuan, ‘mi zawng zawng hnêna an sâwtna a lan theih nân,’ mawhphurhna chelh thei tûra an tlin leh tlin loh “fiahin” an awm thei ang.—1 Tim. 3:10; 4:15.
Kohhranah leh Chhûngkuaah Takna Lantîr Rawh
15. Timothea thawn khat 5:1, 2 sawi dân aṭangin, engtin nge mi dangte kan thlîr dânah takna kan lantîr theih?
15 Taknaah chuan kan unaute chunga zahna lantîr a tel a ni. Mi dangte chunga zahna lantîr a ngaihzia chungchâng Paula’n Timothea hnênah a hrilh a. (1 Timothea 5:1, 2 chhiar rawh.) Chu chu mipa leh hmeichhia te indâwr hunah a pawimawh lehzual a. Joba’n hmeichhiate, a bîk takin a nupui chunga a phu ang tâwka zahna a lantîr dân chu entawn tlâk tak a ni. Ani chuan hmeichhe dang ngaih châkna nêna melh loh chu a tum tlat a ni. (Job. 31:1) Kan unaute kan lâk thutak chuan anni chu kan chhai der lo vang a, kan kianga awm nuam ti lo khawpin kan siam hek lo vang. Mi dangte chunga zahna lantîr chu inneih tuma inngaizâwngte inkârah a pawimawh lehzual a ni. Takna nei Kristian chuan mi dang rilru tina tûr zâwngin tumah a chhai der ngai lo vang.—Thuf. 12:22.
16. Khawvêla mi ṭhenkhatin pasal leh pa ber chanvo an thlîr dân chu Bible-in a chanvo a sawi nên khaikhin rawh.
16 Pathian min pêk chhûngkuaa kan chanvo dawn pawh la thutak tûra kan fîmkhur a ngai a. Setana khawvêl chuan chhûngkuaa pasal leh pa ber chanvo chu a nuihzat a. Intihhlimna lam siam chhuaktute chuan chhûngkaw lû ber chu nuizat leh zahpah lo taka cheibâwl phu ang leka lantîr chu nuam an ti hle. Amaherawhchu, Bible chuan pasal chungah mawhphurhna lian tak a nghat a, “nupui lû” nihna a chelhtîr a ni.—Eph. 5:23; 1 Kor. 11:3.
17. Chhûngkuaa Pathian biakna kan neih dân chuan kan mawhphurhna kan ngai thutak tih a târ lan theih dân sawi rawh.
17 Pasal chuan a chhûngte tisa lam mamawh chu a pe ang a. Mahse, thlarau lam kaihhruaina a pêk loh chuan remhriatna leh finna a tla chham a ni ang. (Deut. 6:6, 7) Chuvângin, 1 Timothea 3:4 chuan chhûngkaw lû i nih a, kohhrana chanvo chelh belh i duh a nih chuan, “zahawm taka [“takna nêna,” NW] fate kilkawia mahni inchhûng khawsak rêl fel thiam mi” i ni tûr a ni, a ti tlat a ni. He mi chungchângah heti hian inzâwt ang che, ‘Ka in chhûngkhurah hian chhûngkuaa Pathian biakna hun neih nân ruahmanna ka siam thlap thlap êm?’ tiin. Kristian nupui ṭhenkhat chuan an pasalte chu thlarau lama hma hruai tûrin an ngen deuh hial a ngai a. Pasal tinte chuan he an mawhphurhna chungchâng an thlîr dân hi tih tak zetin an en chiang ṭheuh tûr a ni. Nupuite pawhin Chhûngkuaa Pathian Biakna ruahmanna chu an thlâwpin, hlawhtling taka an hman theih nân an pasalte an ṭanpui tûr a ni.
18. Engtin nge naupangte chuan takna an zir theih?
18 Naupangte pawh nun chu ngai thutak hle tûra fuih an ni a. (Thur. 12:1) Naupangte tân an kum leh theihna ang mil zêla in lama hna thawh rim chu a pawina a awm lo. (ṬH 3:27) Lal Davida chuan a naupan laiin berâm vêngtu ṭha nih dân a zir thiam a. Tin, rimawi tum leh hla phuah pawh a zir thiam bawk a, chu a thiamna chuan Israel rorêltu hmaa rawngbâwlna chanvo a neihtîr a ni. (1 Sam. 16:11, 12, 18-21) Davida chu a naupan lai chuan naupang dangte ang bawkin a infiam ve ngei ang a; mahse, a hnua Pathian Jehova fak nâna a hman theih tûr themthiamna hlu tak dang pawh a zir bawk a ni. Berâm vêngtu thiam tak a nihna chuan Israel ram chu dawhthei taka kaihruai tûrin a ṭanpui bawk. Nangni naupangte u, nakina nangmahni Siamtu che u rawngbâwlna kawnga ṭanpui thei tûr leh mawhphurhna dangte chelh thei tûra in mamawh themthiamna eng zât nge in zir le?
Thlîr Dân Inbûk Tâwk Nei Rawh
19, 20. Nangmah leh Pathian i biakna chungah eng ang rilru put hmang inbûk tâwk nge neih reng i tum tlat?
19 Kan za hian inngai pawimawh lutuk lovin, mahni inthlîr dân tâwk neih kan tum thei a. “Kherkhiap lutuk,” a nih loh leh, intihfel lutuk chu kan duh lo. (Thur. 7:16) Tlêma fiamthu duhna chuan inah emaw, hnathawhna hmunah emaw, a nih loh leh kan Kristian unaute nêna kan indâwrnaah emaw thinurna awmtîr thei boruakte a su kiang thei a ni. In chhûngkhur chu a nih tûr ang taka hmun him leh muang a nih theih nân chhûngkaw zînga mite chuan mi khirh lutuk nih loh chu an tum tlat duh ngei ang. Kohhran chhûnga mi tinte hian unaute nêna hlim taka inkawm dân kan zir theiin, kan titina leh zirtîr dân chu mi tichak thei leh siam ṭha thei kan nihtîr thei a ni.—2 Kor. 13:10; Eph. 4:29.
20 Jehova leh a dânte ngaih thutak lohna khawvêlah kan chêng a. Chu mi nêna inkalh takin, Jehova mite chuan Pathian thuâwihna leh a chunga an rinawmna chu an ngai pawimawh hle a ni. Chutiang “takna nêna” Jehova betu mi tam takte zînga tel chu a va nuam tak êm! Kan nun leh Pathian kan biakna lâk thutak reng chu i tum tlat ang u. (w11-E 04/15)
[Footnote]
^ par. 3 Hêng Bible châng leh he thuziaka Bible châng danga lang “zahawm” tih leh “zahawmna” tihte hi New World Translation-ah chuan “tak” tih leh “takna” tia lehlin a ni.
Engtin Nge Kan Chhân Ang?
• Engvângin nge khawvêla intihhlimna lam ringawt ngaihtuahna chu kan do vang?
• Engtin nge kan rawngbâwlna la thutak reng chunga kan hlim theih?
• Engtin nge mawhphurhna lâk chungchâng kan thlîr dân chuan ka tak leh tak loh a târ lan?
• Kan unaute leh chhûngkaw zînga mite zah chu thil pawimawh tak a nih chhan hrilhfiah rawh.
[Zirlai Atâna Zawhnate]
[Phêk 16-naa milemte]
Pasal chuan a chhûngte tisa lam leh thlarau lam mamawh chu a phuhru tûr a ni