I Nunah Tunge I Ngaih Pawimawh Ber?
I Nunah Tunge I Ngaih Pawimawh Ber?
“Leilung zawng zawng chunga Chungnungber i nih an hriat theih nân.”—SAM 83:18.
1, 2. Mi mal chhandamna atân engvângin nge Jehova hming hriat chu a tâwk loh?
JEHOVA hming i hmuh hmasak ber ṭum chu tuemawin Sâm 83:18 a kawhhmuh che khân a ni mai thei. Chuta thu chuang: “Nangmah chauh hi JEHOVA hming pu, leilung zawng zawng chunga Chungnungber i nih an hriat theih nân,” tih chhiar chu mak i ti hle mai thei a ni. Chuta ṭang chuan, hmangaihna Pathian Jehova hre tûra mi dangte ṭanpui nân chu mi Bible châng chu i lo hmang tawh ngei ang.—Rom 10:12, 13.
2 Mite’n Jehova hming an hriat chu pawimawh hle mah se, chu hriatna ringawt chu a tâwk lo. Fakna hla phuahtuin chhandam nih nâna thil ṭûl dang a târ lan hi lo chhinchhiah teh: “Leilung zawng zawng chunga Chungnungber i nih an hriat theih nân,” tih hi. Ni e, Jehova chu lei leh vân zawng zawnga Mi pawimawh ber a ni a. Thil engkim Siamtu a nih angin, a thil siamte hnêna intukluhna pumhlûm beisei tûrin dikna a nei a ni. (Thup. 4:10, 11) Chuti chu, ‘Tunge ka nuna ka ngaih pawimawh ber chu?’ tia kan inzawh a ngai a. Chu zawhna ngun taka kan ngaihtuah chu a pawimawh hle!
Eden Huana Thu Buai
3, 4. Engtin nge Setana chuan Evi a bum theih a, chu chuan eng nge a rah chhuah?
3 Chu zawhna pawimawhzia chu Eden huana thilthleng aṭangin chiang takin a hmuh theih a. A hnua Diabol-Setana tia hriat hlawh vântirhkoh hel hmang chuan hmeichhe hmasa ber Evi chu thing rah pakhat ei lo tûra Jehova thupêk aia ama duhzâwng ngai pawimawh zâwk tûrin a thlêm thlu a ni. (Gen. 2:17; 2 Kor. 11:3) Thlêmna laka tlâwmin, Evi chuan Jehova lalchungnunna a zah lohzia a lantîr a. Jehova chu a nuna Mi pawimawh ber angin a pawm lo a ni. Mahse, Setana chuan engtin nge Evi chu a bum theih?
4 Setana chuan Evi nêna an inbiaknaah tih dân dangdai chi hrang hrang a hmang a. (Genesis 3:1-5 chhiar rawh.) A hmasain, Setana chuan Jehova hming bil hmang lovin, ‘Pathian’ tiin a ko mai a. Chu mi nêna inkalh takin, Genesis bu ziaktu chuan bung thum châng hmasa berah chuan Pathian hming bil Jehova chu a hmang a ni. * A pahnihnaah, Pathian ‘thupêk’ chu Setana chuan Pathian ‘thusawi’ ang lekah a chhuah a. (Gen. 2:16, 17) Hetiang kawng hian Setana chuan chu thupêk pawimawhna chu sawi nêp a tum a ni thei ang. A pathumnaah, Evi chauh be mah se, mi pakhat aia tam bia ang maiin “in” tih ṭawngkam a hmang a. Chutiang chuan, a tân leh a pasal tâna thusawitu ang maia cheibâwlin, Setana chuan Evi chapona, a nih loh leh pawimawh hle nia inhriatna chu tihzualsak a tum a ni thei ang. Eng nge a rah chhuah? Evi chuan a pasal tân pawha thu sawisakin, rûl hnênah chuan: “Huana thing rahte hi kan ei thei asin,” tiin a chhâng a ni.
5. (a) Setana chuan Evi chu eng thil nge a ngaihtuahtîr theih? (b) Evi chuan thei ei phal loh chu eiin eng nge a lantîr?
5 Setana chuan thil nih dân dik tak pawh a herh danglam bawk a. Pathianin Adama leh Evi hnêna ‘huana thing rah rêng rêng ei phal lo’ anga lantîrin, Pathian chu thil dik ti lo angah a lantîr a ni. A dawtah, Setana chuan Evi chu mahni inngaihtuah tûr leh “Pathian ang” ni tûra a dinhmun tihhmasâwn dân tûr ngaihtuah tûrin a hmin leh a. A tâwpah chuan, engkim Petu nêna an inlaichînna lam ngaihtuah aia thing leh a rah lam ngaihtuah zâwk tûrin a hmin thei ta a ni. (Genesis 3:6 chhiar rawh.) Evi’n chu thei chu ei a, Pathian Jehova chu a nuna Mi pawimawh ber a nih lohzia a lantîr chu a pawi hle.
Joba Hun Laia Thu Buai
6. Engtin nge Setana chuan Joba rinawmna chungchângah rinhlelhna a siam a, chu chuan Joba hnênah eng hun remchâng nge a pêk?
6 A hnu kum zabi tam takah, mi rinawm Joba chuan a nuna a Mi ngaih pawimawh ber târ lan theihna hun remchâng a nei a. Jehova’n Joba rinawmna chungchâng a hrilh chuan, Setana chuan: “Joba chuan vâng awm lovin [Pathian] a ṭih em ni?” tiin a chhâng a. (Joba 1:7-10 chhiar rawh.) Setana chuan Joba’n Pathian thu a âwih tih a pha lo. A thiltih chhan chungchângah chauh rinhlelhna a siam a ni. Ani chuan Joba’n Jehova rawng a bâwl chhan chu hmangaihna vâng ni lovin, mahni hmasial vâng niin fing khermei takin a puh a. Chu puhna dik lohzia chu Joba chauhvin a chhâng thei a, chutiang chhânna hun remchâng chu pêk a ni ta rêng a ni.
7, 8. Joba chuan eng fiahna nge a tawh a, rinawm taka a chhelna hmangin eng nge a târ lan?
7 Jehova chuan Setana’n Joba chunga chhiatna râpthlâk a indawta a thlentîr chu a remti a. (Job. 1:12-19) Chu dinhmun inthlâkthleng chu Joba’n engtin nge a hmachhawn? A chungchângah chuan “Joba chu a sual lo va, Pathian chu a mawhchhiat hek lo” tih kan chhiar a ni. (Job. 1:22) Mahse, Setana chu a ngawi mai lo. Heti hian a sawisêl leh a ni: “Vun aiah vun tih a ni a, a ni, miin a neih zawng zawng a nunna atân a pe phal ang chu!” tiin. * (Job. 2:4) Setana chuan Joba’n amah ngeiin hrehawm a tawrh chuan Jehova chu a tân Mi pawimawh ber a nihtîr tawh lo vang a ti tlat a ni.
8 Joba chu pân tenawm tak chuan a tihmêlhem hle a, a nupui pawhin Pathian sawichhia a, thi mai tûrin a tur bawk a. A hnuah chuan, thlamuantu der pathum chuan nun khaw lovah an puh leh a ni. (Job. 2:11-13; 8:2-6; 22:2, 3) Amaherawhchu, a hrehawm tawrh chhûng zawng pawhin a rinawmna a hloh chuang lo. (Joba 2:9, 10 chhiar rawh.) Ani chuan rinawm taka chhelna hmangin, Pathian Jehova chu a nuna Mi pawimawh ber a nihzia a târ lang a ni. Joba chuan Diabola puhnate chu mi ṭha famkim lote tân pawh kawng engemaw tala chhân theih a nihzia a târ lang bawk.—Thufingte 27:11 nên khaikhin rawh.
Isua Chhânna Ṭha Famkim
9. (a) Tisa lam mamawh chungchângah engtin nge Setana chuan Isua thlêm a tum? (b) He thlêmna hi Isua’n engtin nge a chhân lêt?
9 Isua baptisma chan hnu lawkah, Setana chuan Isua chu a nuna Pathian Jehova Mi pawimawh ber nihtîr aia mahni hmasialna ûm zâwk tûrin thlêm a tum a. Thlêmna pathum a chhawp chhuak a ni. A hmasain, Isua tisa lam mamawh chu remchânga hmangin, lung chhanga chantîr tûrin a thlêm a ni. (Mt. 4:2, 3) Isua chuan ni 40 lai chaw a lo nghei tawh avângin a ril a ṭâm hle a. Chuvângin, Diabola chuan thilmak tihtheihna chu a rilṭâm tihreh nâna hmang khaw lo tûrin a fuih a ni. Engtin nge Isua’n a chhân lêt? Evi ang lo takin, Isua chuan Jehova Thu chu a ngaihtuah a, thlêmna chu a hnâwl nghâl a ni.—Matthaia 4:4 chhiar rawh.
10. Engvângin nge Setana chuan Isua chu biak in chhîp zum aṭanga zuang thla tûra a cho?
10 Setana chuan Isua chu mahni hmasial taka thil ti tûrin thlêm a tum bawk a. Isua chu biak in chhîp zum aṭanga zuang thla tûrin a cho a ni. (Mt. 4:5, 6) Setana tih tum chu eng nge ni? Setana chuan Isua a inhliam loh chuan, chu chuan “Pathian fapa” a nihzia a târ lang ang a ti tlat a ni. Diabola chuan Isua chu mi dang hmuh tûra inpho chhuak duh khawpa mahni hming ṭhatna ringawt ngaihtuah tûrin a duh a ni tih a chiang hle. Setana chuan miin a chapo vâng leh mi dang hmaa zahthlâk taka a awm loh nân thil hlauhawm tak ti tûra chona pawh a pawm duh ang tih a hre tlat a. Ani chuan Bible châng pakhat a dik lo zâwngin a la kawi a, mahse, Isua chuan Jehova Thu a hriat famkimzia a lantîr a ni. (Matthaia 4:7 chhiar rawh.) Chu chona chu hnâwlin, Isua chuan a nuna Mi pawimawh ber chu Pathian Jehova a nihzia a lantîr leh a ni.
11. Engvângin nge Isua chuan khawvêl ram zawng zawng pe tûra Diabola thlêmna chu a hnâwl?
11 Setana chuan thlêmna hnuhnûng ber atân Isua hnêna khawvêl ram zawng zawng pêk a tum leh a. (Mt. 4:8, 9) Mahse, Isua chuan a hnâwl nghâl a ni. Chu mi pawm chu Jehova lalchungnunna—Chungnungbera ni tûra Pathian neih dikna—hnâwlna a ni dâwn tih a hre si a. (Matthaia 4:10 chhiar rawh.) Isua’n chûng thlêmna apiang chu Hebrai Pathian Lehkha Thu hmanga a chhân avângin, Jehova hming a hmang a ni tih a chiang hle.
12. Isua chuan a lei lam nun tâwp dâwn lamah eng thu tlûkna siam tûr khirh tak nge a tawh a, chu mi a hmachhawn dân aṭangin eng nge kan zir theih?
12 Isua chuan a lei lam nun kawng tâwp dâwn lamah thu tlûkna siam tûr khirh tak mai a tâwk a. A rawngbâwl chhûng zawngin, a nun chu inthawi nâna pêk a inhuamzia a lo sawi tawh ṭhîn a. (Mt. 20:17-19, 28; Lk. 12:50; Joh. 16:28) Amaherawhchu, Isua chuan dik lo taka puh leh Judate dân anga thiam loh chantîr leh Pathian sawichhetu anga tihhlum a ni dâwn tih pawh a hre bawk a ni. Chutianga a thih dân tûr chuan a rilru a tibuai hle a. Heti hian a ṭawngṭai a ni: “Aw ka Pa, a theih chuan he no hian mi pêl lul rawh se,” tiin. “Nimahsela keima thu ni lovin, nangma thu thu ni zâwk rawh se,” tiin a sawi zawm a ni. (Mt. 26:39) Ni e, thih thlenga Isua rinawmna chuan a nuna a Mi ngaih pawimawh ber chu a târ lang chiang hle!
Thu Buai Kan Chhânna
13. Evi te, Joba te, leh Isua Krista te hnên aṭangin eng nge kan zir?
13 Eng nge kan zir tâk? Evi chungchâng aṭangin mahni duhzâwng ûmtute emaw, pawimawh intihna neitute emaw chuan Pathian Jehova chu an nuna Mi pawimawh ber a nih lohzia an târ lang tih kan zir a. Chu mi nêna inkalh takin, Joba rinawmna aṭangin mihring ṭha famkim lote pawhin a chhan leh vâng hre lo mah se, harsatnate rinawm taka tuar chhuakin an nunah Pathian Jehova an dah pawimawh ber thei tih kan zir thung. (Jak. 5:11) A tâwpah chuan, Isua entîrna chuan zahthlâk taka awm inhuam tûr leh mahni hming ṭhatna ngai pawimawh lutuk lo tûrin min zirtîr a ni. (Heb. 12:2) Mahse, hêng kan thil zirte hi engtin nge kan nunpui theih?
14, 15. Thlêmna chhân lêt dân chungchângah Isua leh Evi chu engtin nge a inan loh va, engtin nge Isua kan entawn theih? (Phêk 20-a milem chungchâng sawi rawh.)
14 Thlêmna chuan Pathian Jehova theihnghilhtîr ngai che suh se. Evi chuan a hmaa awm thlêmna lamah a ngaihsakna a pe nghâl vat a. Thing rah chu “ei mi a ni tih leh, mit la tak a ni tih leh, mi tifing tûrin thing rah îtawm tak a ni” tih a hmu a ni. (Gen. 3:6) Isua’n thlêmna pathumte a chhân lêt dân nên chuan a va inang lo tak êm! Ani chuan chutianga thlêm a nih apiangin, thlêmna piah lama a sawhkhâwk tûr pawh a hmuin, a ngaihtuah ṭhîn a. Pathian Thu a rinchhan bâkah, Jehova hming a hmang bawk a ni.
15 Jehova tilâwm lo thilte ti tûra thlêm kan nih hian, eng nge kan ngaihtuah ber ang? Thlêmna lam kan ngaihtuah tlat chuan thil sual tih châkna chu kan nei lian tual tual ang. (Jak. 1:14, 15) Chu châkna paih bo tûr chuan kan taksa pêng pakhat paih bo ang tluka nasaa hma kan lâk nghâl vat a ngai a ni. (Mt. 5:29, 30) Isua ang bawkin, kan thiltih sawhkhâwk tûr—Jehova nêna kan inlaichînna a nghawng dân tûr—chu kan ngaihtuah a ngai a. Pathian Thu, Bible thute chu kan hre chhuak tûr a ni. Chutianga kan tih chauhvin, Jehova chu kan nuna Mi pawimawh ber a nihzia kan târ lang thei ang.
16-18. (a) Engin nge rilru mangang taka min awmtîr mai thei? (b) Engin nge dinhmun lungngaihthlâk takte hmachhawn tûrin min ṭanpui ang?
16 Chhiatna i tawhte chu Jehova chunga vui nân hmang ngai suh. (Thuf. 19:3) He khawvêl suaksual tâwpna kan hnaih rual hian, Jehova mite chuan leilung chhiatna leh chhiatna dangte an tuar a. Tûn hunah hian chûng aṭanga mak taka vênhim kan inbeisei lo. Chuti chung pawhin, kan hmangaih takte an thih hunah emaw, anni’n harsatna an tawh hunah emaw Joba angin kan lunghnual mai thei a ni.
17 Joba chuan Pathian Jehova’n thil engemaw a thlen a phal chhan chu a hre lo va, keini pawhin thil ṭha lote a thlen chhan hriat thiam loh châng kan nei thei bawk a ni. Haiti rama thleng ang chi lîrnghîng emaw, leilung chhiatna emaw avângin unau rinawm takte thihna chanchin chu kan hria pawh a ni thei a. A nih loh leh unau rinawm tak pakhat, tharum thawhna tuar emaw, chêtsualna râpthlâk tak avânga nun chân emaw kan hre mai thei bawk. A nih loh vêk leh, keimahni ngei pawhin dinhmun khirh tak emaw, hleih neihna nia kan hriat emaw chu kan tâwk pawh a ni hial thei bawk. Kan rilru mangan lutuk avângin: ‘Aw Jehova, engah nge? Engah nge hetiang thil hi ka chunga a lo thlen? Eng sual nge ka tih tâk?’ tiin kan ngaihtuah mai thei. (Hab. 1:2, 3) Chutiang hunah chuan engin nge hmachhawn thei tûrin min ṭanpui ang?
18 Chutiang dinhmun kan tawh chhan chu Jehova duhsakna kan hloh vâng nia ngai lo tûrin kan fîmkhur a ngai a. Chu mi pawimawhzia chu Isua chuan a hun laia chhiatna thleng pahnih chungchâng sawiin a târ lang a ni. (Luka 13:1-5 chhiar rawh.) Chhiatna tam tak chu “hunin a rawn her chhuahpui hriat lâwk loh thilthleng” vânga lo awm a ni ṭhîn. (Thur. 9:11, New World Translation) Mahse, lungngaihna kan neih chhan chu eng pawh ni se, “thlamuanna zawng zawng Pathian” lam kan ngaihtuah tlat chuan kan hmachhawn thei ang. Ani chuan rinawm taka awm reng nâna kan mamawh chakna chu min pe dâwn si a.—2 Kor. 1:3-6.
19, 20. Engin nge Isua chu dinhmun zahthlâk takte tuar thei tûra ṭanpui a, engin nge chutianga ti ve tûra min ṭanpui thei?
19 Chapona emaw, zahthlâk taka awm hlauhna emaw chu ngai pawimawh ber ngai suh. Isua inngaihtlâwmna chuan ‘intitlâwm a, bâwih anga insiam’ tûrin a ṭanpui a ni. (Phil. 2:5-8) Jehova chunga a innghahna avângin dinhmun zahthlâk tam tak chu a tuar chhuak thei a ni. (1 Pet. 2:23, 24) Chutiang chuan, Isua’n Jehova duhzâwng chu a dah pawimawh hmasa ber a, chu chuan dinhmun sâng taka chawimawi a nihtîr ta a. (Phil. 2:9-11) Isua chuan a zirtîrte chu a nun kawng zawh ang zawh tûrin a kawhhmuh a ni.—Mt. 23:11, 12; Lk. 9:26.
20 A châng chuan rinna fiahna kan tawh ṭhenkhat chu a zahthlâk hle thei a. Chuti chung pawhin: “Chuvâng chuan a ni, hêng thil pawh hi ka tuar ni; nimahsela ka zak lo ve; ka rina chu ka hria, a hnêna ka kawltîr chu, chu mi ni atân chuan a vawng ṭha thei tih dik takin ka hre bawk,” titu Paula neih ang rinna kan nei tlat tûr a ni.—2 Tim. 1:12.
21. Khawvêlin mahni hmasialna rilru put hmang nei mah se, eng nge i tum ngheh tlat ang?
21 Bible chuan kan hun lai hian mite chu “mahni inhmangaihtu te” an ni dâwn tih a sawi lâwk a. (2 Tim. 3:2) Chuvângin, mahni inngai pawimawh takte’n min hual vêl pawh hi mak kan ti lo. Chutiang hmasialna rilru put hmang chu i nei hlek suh ang u! Chutiang neih ahnêkin, thlêmna te, chhiatna te, a nih loh leh min tizak thei thil te kan tawh hunah, Jehova chu kan nuna Mi pawimawh ber nihtîr chu i tum nghet ṭheuh vang u! (w11-E 05/15)
[Footnote-te]
^ par. 4 Genesis 3:1 leh Bible châng danga “LALPA” tih thu mal hawrawp puia ziak chu Jehova kohna a ni. Mizo Bible hnung lama Thu Har Hrilhfiahna hnuaia awm Jehova tih thupui tê chu en rawh.
^ par. 7 Bible lama mi thiam ṭhenkhat chuan “vun aiah vun” tih ṭawngkamin a sawi tum chu, Joba chuan mahni hmasial taka ama vun, a nih loh leh a nunna humhim nân a fate leh a rante vun, a nih loh leh nunna chân chu a phal ang tihna a nih an ring a. Mi dangte erawh chuan miin a nunna humhim nâna a vun ṭhenkhat hloh a phal tûrzia sawi uarna a nih an ring thung. Entîr nân, miin a lû vuak a nih dâwn hian a kutin a lo dang ṭhîn a, chutiang chuan a vun vênhim nân vun ṭhenkhat a hloh a ni. Chu ṭawngkauchheh awmzia chu eng pawh lo ni se, Joba chuan a nunna vênhimna tûr a nih phawt chuan engkim chân a inhuam ang a tihna a ni tih a chiang hle.
Hêng Aṭang Hian Eng Nge Kan Zir Theih?—
• Setana’n Evi a bum dân aṭangin.
• mi mal chhiat tawhna Joba chhân lêt dân aṭangin.
• Isua thil ngaih pawimawh ber aṭangin.
[Zirlai Atâna Zawhnate]
[Phêk 19-naa milem]
Evi chuan Jehova nêna an inlaichînna a ngaihtuah lo
[Phêk 20-naa milem]
Isua chuan Setana thlêmna hnâwlin, Jehova duhzâwng tih a ngaihsak tlat
[Phêk 22-naa milemte]
Haiti rama hlîrnghîn hnua neih puan ina thu hrilhna
Mangan laiin “thlamuanna zawng zawng Pathian” kan ngaihtuah thei