Isua A Lo Chhuahna

“[Pilata chu] a inah a lût leh a, Isua hnênah, ‘Khawi lama mi nge i nih?’ a ti a. Nimahsela Isuan a chhâng lo.”—JOHANA 19:9.

ROM Ram Awptu Pontia Pilata’n Isua chungthu a rêl lai khân he zawhna hi a zâwt a. * Pilata chuan Israel rama Isua lo pian chhuahna hmun chu a hria a. (Luka 23:6, 7) Ani chu mi mai mai a ni lo tih pawh a hre bawk. Pilata chuan Isua chu tûn hmaa lo nung tawh a nih leh nih loh a ngaihtuah em? Chu milem bia rorêltu chuan thutak chu pawmin, chu mi mila nun chu a inhuam tak zet em? A enga pawh chu ni se, Isua chuan a chhâng lo va; Pilata chuan thutak leh rorêl dikna aiin, a hnathawh a ngai pawimawh zâwk tih a lo lang chiang ta thuai a ni.—Matthaia 27:11-26.

Isua lo chhuahna hre duh tak zette tân awlsam taka hriat theih a ni chu a lâwmawm hle a. Bible chuan Isua Krista ṭobul chu chiang takin a târ lang a ni. A hnuaia mite hi lo ngaihtuah ta ila.

▪ A lo pianna hmun Isua chu Judai ram Nazaret khua, dinhmun tlâwm tak kârah a lo piang a. Kaisara Awgusta chuan hming ziak tûra thu a pêk avângin, “rai ṭeuh” chungin Isua nu Mari chu a pasal Josefa nên Josefa thlahtute khua Bethlehem-a an zin a ngai a ni. Chu khuaah chuan khualbûk an chan ve loh avângin, ran inah an awm a ngai ta a, chutah chuan Isua a lo piang a, ran chaw pêkna thlêngah an muttîr a ni.—Luka 2:1-7.

A hma kum zabi engemaw zât kal ta khân, Bible hrilh lâwkna chuan Isua pianna tûr hmun chungchângah: “Nang Bethehem Ephratha, Juda rama sâng tam tak zînga telah tê hle mah la, nangma lak aṭang hian Israelho rorêltu tûr chu ka tân a lo chhuak ang,” * tiin a lo sawi lâwk a ni. (Mika 5:2) Bethlehem chu Judai ram khawpuite zînga telh tham a ni lêm lo niin a lang. Mahse, he khaw tê hi danglam bîk taka chawimawi a ni dâwn. Thutiam Messia, a nih loh leh Krista chu Bethlehem aṭangin a lo chhuak dâwn a ni.—Matthaia 2:3-6; Johana 7:40-42.

▪ A sei lenna Aigupta rama rei vak lo an awm hnu chuan, Isua leh a chhûngte chu Nazareth-ah an insawn a, chu chu Galili ram bial, Jerusalem hmâr lam mêl 60 (96 km) vêla awm khawpui a ni. Chutih lai chuan Isua chu kum thum pawh a la tling lo va. Lo neitute, berâm vêngtute, leh sanga mantute’n ei an zawnna chu hmun mawi takah chuan chhûngkaw hung tak leh khawsa thei vak lo kârah a lo sei lian a ni.—Matthaia 13:55, 56.

Bible chuan a hma kum zabi tam takah Messia chu “Nazaret mi” a ni ang tih a lo sawi lâwk tawh a. Chanchin Ṭha ziaktu Matthaia chuan Isua chhûngkua chu “Nazaret an tihah  chuan [an] va awm ta a: ‘Ani chu “Nazaret mi” an ti ang,’ tia, zâwlneite kaa an sawi kha a lo thlen theih nân,” tih a sawi a ni. (Matthaia 2:19-23) Nazaret mi tih hming leh Hebrai thu mal “chawrno” tihna hi a inkûngkaih niin a lang. Matthaia sawi chu, Messia chu Jesaia aṭanga lo chhuak “chawrno” tia kotu Isaia hrilh lâwkna a nih ngei a rinawm a, chu mi awmzia chu Messia chu Lal Davida pa, Jesaia thlah a ni dâwn tihna a ni. (Isaia 11:1) Isua chu Davida kal tlanga Jesaia thlah a ni tak zet a ni.—Matthaia 1:6, 16; Luka 3:23, 31, 32.

▪ A lo chhuahna dik tak Bible chuan Isua nunna chu Bethlehem ran ina a pian hma daih aṭang khân a inṭan daih tawh tih a zirtîr a. A hmaa kan târ lan tâk, Mika hrilh lâwkna chuan “A lo chhuahna chu hmasâng ata, chatuan aṭangin a ni,” tih a sawi zawm a ni. (Mika 5:2) Pathian Fatîr a nih angin, Isua chu leia mihringa a lo pian hmain, vânah thlarau thil siam a ni a. Amah ngei chuan: “Vân aṭanga lo chhuk ka ni,” tiin a sawi a ni. (Johana 6:38; 8:23) Chu chu engtin nge a nih theih?

Pathian Jehova chuan thlarau thianghlim hmangin, a Fapa vâna mi nunna chu mihring ṭha famkim anga a lo pian theih nân Juda nula thianghlim Mari chhûla sawnin thilmak a ti a. * Chutianga thilmak tih chu Pathian Engkimtitheia tân chuan thil harsa a ni lo. Mari hnêna thil hrilhfiahtu vântirhkoh sawi angin, “Pathian thu chhuak rêng rêng thil tithei lovin a awm lo vang.”—Luka 1:30-35, 37.

Bible chuan Isua a lo chhuahna mai aia tam min hrilh a. Chanchin Ṭha Ziak pali—Matthaia, Marka, Luka, leh Johana te—chuan a nun dân chanchin tam tak min hrilh a ni. (w11-E 04/01)

[Footnote-te]