Jehova Rinchhan Pumhlûmna Chuan Rilrua Thlamuanna A Awmtîr
Jehova Rinchhan Pumhlûmna Chuan Rilrua Thlamuanna A Awmtîr
“LALPA chuan, ka koh apiangin a lo ngaithla ang.”—SAM 4:3.
1, 2. (a) Davida chuan eng dinhmun khirh tak nge a tawh? (b) Eng fakna hlate nge kan sawiho dâwn?
LAL Davida chuan Israel ramah kum engemaw chhûng ro a rêl tawh a; mahse, tûnah chuan dinhmun khirh tak a tâwk mêk a ni. Phiarrûk hmang a fapa Absaloma chu lala a inpuan avângin, Davida chu Jerusalem chhuahsan lo thei a ni ta lo. A mi rin tak mai chuan a phatsan bawk avângin, a chunga rinawm mi tlêm tê nên ṭap chung zêlin Oliv Tlângah ke lâwngin an chho va. A hnuah, Lal Saula chhûngkaw zînga mi Simeia chuan Davida chu ânchhe lawh pahin lungin a dêng a, vaivutin a theh bawk a ni.—2 Sam. 15:30, 21; 16:5-14.
2 He fiahna khirh tak hian Davida chu lungngai tak leh mualpho takin Seol-ah a kaltîr ang em? Kaltîr lo ve, Jehova a ring tlat si a. Chu chu a tlân chhiat chungchâng amah Davida ngeiin a phuah Sâm 3-naah hian a lang a ni. Sâm 4-na pawh ama ziah a ni bawk a. Hêng hla pahnihte hian Pathianin ṭawngṭaina a ngaithlain, a chhâng ṭhîn tih a rin nghehzia a târ lang ve ve a ni. (Sâm 3:4; 4:3) Hêng fakna hlate hian Jehova chuan a mi rinawmte a chhûn a zânin a awmpui a, anni chu a ṭanpui bâkah himna leh rilrua thlamuanna a pe ṭhîn tih min tiam a ni. (Sâm 3:5; 4:8) Chuvângin, hêng fakna hlate ngaihtuahin rilru thlamuanna leh Pathian rinna a awmtîr dân i lo en ang u.
‘Min Beitute An Tam’ Hian
3. Sâm 3:1, 2-a târ lan angin, Davida chu eng dinhmun hnuaiah nge a awm?
3 “Israel mite rilru chu Absaloma lamah a thle hle mai,” tiin thuchah kengtu chuan a rawn hrilh a. (2 Sam. 15:13) Absaloma’n mi tam tak a hmin theih dân ngaihtuahin, Davida chuan: “LALPA, mi dotute hi an va pung ta êm! Mi beitute hi tam tak an ni. Ka chungchâng thu an sawi a, ‘Pathianin a pui lo vang’ an ti a,” tiin a zâwt a ni. (Sâm 3:1, 2) Israel mi tam tak chuan Pathian Jehova’n Davida chu Absaloma leh a ṭhuihhruaite kut ata chhan chhuak lo tûrah an ngai a ni.
4, 5. (a) Davida chuan eng nge a hriat chian? (b) “Ka lu dawm kângtu” tih chu eng tihna nge ni?
4 Mahse, Davida chuan Pathian a rin tlat avângin a thla a muang tlat a. Heti hian a zai a ni: “Nimahsela, aw LALPA, nang chu ka vêlin ka phaw i ni a; ka ropuina leh ka lu dawm kângtu i ni e,” tiin. (Sâm 3:3) Phawin sipai a humhim angin, Jehova chuan Davida chu a humhim ang. Lal upa tawh tak chu tlân chhiain, zah avânga a lû khumin, a kun ngawih ngawih ngei mai. Mahse, Chungnungbera chuan Davida dinhmun chu ropuinain a la thlâk dâwn. Ani chuan Davida chu tungding lehin, a lû a dawm kânsak leh ang. Davida chuan Pathianin a chhâng dâwn tih hre reng chungin a au a ni. Chutiangin Jehova chu i rinchhan ve em?
5 “Ka lu dawm kângtu” tih ṭawngkam hmangin, Davida chuan a ṭanpuina dawn tûr chu Jehova hnêna mi a nihzia a sawi lang a. Today’s English Version Bible chuan: “Mahse, Aw LALPA, nang chu hlauhawm ata min humtu ka phaw i ni reng ṭhîn a; hnehna min petu leh huaisenna min neih lêttîrtu i ni,” a ti a. “Ka lu dawm kângtu” tih ṭawngkam chungchângah, lehkhabu pakhat chuan: “Pathianin tuemaw ‘lû’ a dawm kân hian, ani chu beiseina leh rilrua thlamuanna a pe ṭhîn,” a ti a. Israel lal ṭhutthlêng loh theih lohva a tlânchhiatsan a ngaih avângin, Davida chuan nasa taka lunghnual chhan tûr a nei ngei a ni. Mahse, ‘a lu dawm kânna’ chuan huaisenna thar, rilrua thlamuanna thar, leh Pathian rinchhanna thar a neihtîr ang.
‘Jehova Chuan Mi Chhâng Ang!’
6. Engvângin nge Davida’n a ṭawngṭaina chu Jehova tlâng thianghlim aṭanga chhân anga a sawi?
6 Pathian Jehova rinchhanna leh rilrua thlamuanna neiin, Davida chuan: “Ka awin LALPA chu ka au va, A tlâng thianghlim aṭangin mi chhâng ṭhîn,” tiin a sawi zawm a ni. (Sâm 3:4) Davida thupêk angin, Pathian awmpuina târ langtu thuthlung bâwm chu Zion Tlâng-ah lâk chhoh a ni a. (2 Samuela 15:23-25 chhiar rawh.) Chuvângin, Davida’n a ṭawngṭaina Jehova tlâng thianghlim aṭanga chhâng anga a sawi chu a inâwm hle a ni.
7. Engvângin nge Davida chu a thlabâr loh?
7 Pathian hnêna a ṭawngṭaina chu a thlâwn dâwn lo tih a hriat chian êm avângin, Davida chu a thlabâr lo. Chu ai mahin, heti hian a zai zâwk a ni: “Kei zawng ka mu chu ka lo muhîl ta a; ka han harh leh a; LALPA chuan mi lo chelh reng ṭhîn a ni,” tiin. (Sâm 3:5) Beisei loh taka beih thut a hlauhawm hun lai ber zânah pawh Davida chu a muhîl ngam lo chuang lo. Hun kal tawha a thiltawnte avângin, Pathian ṭanpuina tâwp ngai lo chu a rinchhan tlat a, dam takin a harh leh dâwn tih a hre chiang a ni. Keini pawhin “LALPA kawngte” kan zawh a, kan kal bosan ngai loh chuan, Pathian ṭanpuina kan rinchhan tlat thei a ni.—2 Samuela 22:21, 22 chhiar rawh.
8. Engtin nge Sâm 27:1-4 thu chuan Davida’n Pathian a rinchhanzia a târ lan?
8 Davida’n Pathian a rinna leh a rinchhan pumhlûmna chu a fakna hla phuah dangah a lang a, chutah chuan thlarauva thâwk khum hêng hla thute hi a tel a ni: “LALPA chu ka êng leh mi chhandamtu a ni; tunge ka ṭih ang? LALPA chu ka nunna kulhbîng a ni; tunge ka hlauh vang? . . . Sipai pâwlhovin mi bei tumin mi ep reng mah sela, ka thinlung hian a hlau lovang. . . . LALPA hnênah thil pakhat ka dîl a, chu mawlh chu ka zawng ang; LALPA mawizia hmu tûr leh, a biak ina thu zâwt tûrin ka dam chhûng zawnga LALPA ina ka awm reng theihna tûr chu,” tih hi. (Sâm 27:1-4) Chûng thute i ṭâwmpui a, i dinhmunin azir chuan, Jehova betu i unaute nêna inhmuhkhâwmnaah i tel ziah ang.—Heb. 10:23-25.
9, 10. Sâm 3:6, 7-a thute hi ziak mah se, Davida chuan phuba lâk duhna rilru a nei lo tih engvângin nge kan sawi theih?
9 Davida chuan Absaloma phatsanna leh mi dang tam takte rinawm lohna tâwk mah se, heti hian a zai a ni: “Mi dova, mi hual vêltu, mi sîngkhat pawh hi ka hlau lo vang. Aw LALPA, tho la; aw ka Pathian, mi chhandam rawh; mi dotute zawng zawng chu an biang ruhah i vaw si a; mi suaksualte ha chu i tibal a,” tiin.—Sâm 3:6, 7.
10 Davida chuan phuba lâk duhna rilru a nei lo. A hmêlmate an ‘biang ruha vuak’ an nih pawhin, chu chu Pathian tih a ni ang. Lal Davida chuan Dân thu ama ziak chhuah chu a nei a, chutah Jehova chuan: “Phuba lâk leh thungrulh chu keima tih tûr a ni,” tiin a puang tih a hria a ni. (Deut. 17:14, 15, 18; 32:35) Tin, ‘mi suaksualte ha tihbal’ pawh chu Pathian thu thu a ni. An ha tibal tih awmzia chu mi dangte tina thei lo tûra thiltihtheihna nei lova siam tihna a ni a. Jehova chuan “thinlung lam a en” avângin mi suaksualte chu a hre thei a ni. (1 Sam. 16:7) Pathianin he mi sual hotu ber Setana do thei tûra chakna min pêk avângin kan va lâwm tak êm! Ani chu thih chauh hmabâk tawh ha nei si lova rûm ṭhîn sakeibaknei ang a ni a, lei lâwtah khung a ni thuai ang.—1 Pet. 5:8, 9; Thup. 20:1, 2, 7-10.
“Chhandamna Hi LALPA Ta A Ni”
11. Engvângin nge kan unaute tâna kan ṭawngṭai ang?
11 Davida chuan a mamawh êm êm chhandamna chu Pathian Jehova chauhvin a pe thei tih a hria a. Mahse, fakna hla phuahtu chu amah chauh a inngaihtuah lo. Pathian Jehova duhsakna dawng a mite ho chungchâng pawh a ngaihtuah a ni. Chuvângin, Davida chuan Pathian thâwk khum a thuziak chu: “Chhandamna hi LALPA ta a ni: i malsâwmna chu i mite chungah awm rawh se,” tiin inâwm takin a titâwp a ni. (Sâm 3:8) Davida chuan harsatna lian tak a tâwk chung pawhin Jehova mi nâwlpuite chu a rilruin a hre reng a, anni chu Pathianin mal a sâwm ang tih a ring tlat a ni. Keini pawhin kan unaute chu kan hre ve reng tûr a ni lâwm ni? Kan ṭawngṭainaa anmahni hre rengin, huaisenna an neih a, inring tâwk taka chanchin ṭha an hrilh theih nân Pathian hnênah thlarau thianghlim i dîlsak ang u.—Eph. 6:17-20.
12, 13. Absaloma chungah eng nge thleng a, engtin nge Davida’n chu dinhmun chu a chhân lêt?
12 Absaloma nun chu zahthlâk takin a tâwp a—chu chu mi dang cheibâwl ṭhat loh chîng, a bîk takin Davida ang Pathian hriak thih chei bâwl ṭha lotute tân vaukhânna a ni. (Thufingte 3:31-35 chhiar rawh.) Indona a chhuak a, Absaloma sipaite chu an tlâwm a. Ani chu sabengtung chunga chuanga a tlân chhiatna lamah a sam buk ṭha tak chu thing zâr buk takah chuan a inbât hnawk a. Lei si lo vân si lovin a uai ta reng a, a hnuah Joaba’n fei pathumin a thinhnûn takah a chhun hlum ta a ni.—2 Sam. 18:6-17.
13 Davida chu a fapa chunga thilthleng a hriatin a lâwm em? Lâwm lo. Lâwm ahnêkin, vei tawn chhênin a ṭap a: “Aw, ka fapa Absalom, ka fapa, ka fapa Absalom, i aiah han thi teh zâwk ila aw, aw Absalom, ka fapa, ka fapa!” tiin. (2 Sam. 18:24-33) Joaba thusawi chuan Davida chu lungchhiatna khur ata a hnêm ta hrâm a ni. Tumsân lutuk avânga mahni pa—Pathian Jehova hriak thih—ngei pawh do va, chhiatna inthlentu Absaloma nun tâwp dân chu a va lungchhiatthlâk tak êm!—2 Sam. 19:1-8; Thuf. 12:21; 24:21, 22.
Davida’n Pathian A Rinchhanzia A Lantîr Leh
14. Sâm 4-na chungchângah eng nge kan sawi theih?
14 Sâm 3-na ang bawkin 4-na pawh Davida’n Pathian Jehova a rin pumhlûmzia târ langtu tih tak zeta a ṭawngṭaina a ni a. (Sâm 3:4; 4:3) He hla hi Absaloma’n lalna chuh a tumna a hlawhchham hnua a thawvenzia leh Pathian chunga a lâwmzia sawi chhuahna Davida hla phuah a nih a rinawm a. A nih loh leh Levia zai mite ngaihtuaha phuah pawh a ni thei ang. A eng pawh chu ni se, a thu ngaihtuahna chuan Jehova kan rinchhanna a tinghet sauh thei a ni.
15. Engvângin nge Jehova hnênah a Fapa kal tlangin rin tlatna nên kan ṭawngṭai theih?
15 Davida chuan Pathian rinchhanna pumhlûm leh a ṭawngṭaina Pathianin a chhâng ngei dâwn tih a rinzia a lantîr leh a. Heti hian a zai a ni: “Aw ka felna Pathian, ka koh hun che chuan mi chhâng ang che; ka manganin nangin mi tithawveng ṭhîn a: mi khawngaih la, ka ṭawngṭaina hi mi ngaihthlâksak ang che,” tiin. (Sâm 4:1) Keini pawhin felna kan nunpui chuan chutiang bawk rinna chu kan nei ve thei a ni. “Felna Pathian” Jehova chuan a mi felte mal a sâwm ṭhîn tih hriain, Isua tlanna inthawina rinna nên a Fapa kal tlangin a hnênah kan ṭawngṭai thei a. (Joh. 3:16, 36) Chu chuan thlamuanna min va pe tak êm!
16. Davida lunghnual chhan chu eng nge ni thei ang?
16 A châng chuan, kan rilru thlamuanna la bo thei dinhmun lungchhiatthlâk tak kan tâwk pawh a ni thei. Chutiang chu Davida chungah rei lo te chhûng a thleng a ni ve ngei ang: “Aw mihring fate u, ka ropuina hi eng chen nge mualphonaa in chantîr dâwn? Eng chen nge thil engmah lo hi in ngainat ang a, dâwt thu in zawn dâwn?” tiin a sawi si a. (Sâm 4:2) Heta “mihring fate” tih ṭawngkam hi mihringte a duhawm lo zâwnga sawina niin a lang. Davida hmêlmate chuan ‘thil engmah lote an ngaina a.’ New International Version Bible chuan heti hian a letling a ni: “Eng chen nge bumna in ngainat ang a, pathian dik lote in zawn dâwn?” tiin. Mi dangte thiltih avânga kan lunghnual a nih pawhin, rilru tih tak zetin ṭawngṭai zêl ila, Pathian dik awmchhun kan rinchhan pumhlûmzia i lantîr zêl ang u.
17. Sâm 4:3 nêna inmila thil kan tih theih dân hrilhfiah rawh.
17 Davida’n Pathian a rinchhanzia chu hêng thute aṭangin a lang a ni: “LALPA chuan Pathian ngaihsak mi chu ama tân a dah hrang tih hi hre zâwk rawh u: LALPA chuan, ka koh apiangin a lo ngaithla ang.” (Sâm 4:3) Pathian ngaihsak a, a laka rinawm reng tûr chuan huaisenna leh amah rinchhan pumhlûmna neih a ngai a ni. Entîr nân, Kristian chhûngkaw zînga mi tuemaw hnawhchhuah a nih hian hêng miziate hi neih a ngai a. Pathianin amah leh a kawngte chunga rinawmte chu mal a sâwm ṭhîn. Tin, Jehova laka rinawmna leh amah rinchhan pumhlûmna chuan a mite zîngah hlimna a awmtîr a ni.—Sâm 84:11, 12.
18. Sâm 4:4 nêna inremin, miin kan chunga ṭawngkam ṭha lo an hman a, thil ṭha lo an tih chuan eng nge kan tih ang?
18 A nih leh, tuemawin min tilungni lotu thil sawiin, ti ta se, engtin nge ni ang? Davida sawi anga kan tih chuan kan hlim reng thei ang, ani chuan: “Hlau ula, thil tisual suh u: in khumlaizâwlah chuan in thinlungah inngaihtuah ula, ngawi ṭhiap rawh u,” a ti. (Sâm 4:4) Mite’n kan chunga ṭawngkam ṭha lo an hman a, thil ṭha lo an tih chuan, anni chu thungrûlin thil i tisual lo vang u. (Rom 12:17-19) Khumlaizâwlah inngaihtuahin thinlungah kan ṭawngṭai thei a. Chutianga kan ṭawngṭai chuan chu mi thil kan thlîr dân chu a inthlâkin, hmangaihna avânga ngaidam tûra chêttîrin kan awm thei a ni. (1 Pet. 4:8) He mi chungchânga chhinchhiah tlâk tak mai chu, Sâm 4:4 aṭanga lâk ni âwm tak tirhkoh Paula fuihna thu: “Thinrim ula, sual erawh chu sual suh u; in thinur chu niin tlâkpui suh se; Diabola chu hmun kian hek suh u.” tih hi a ni.—Eph. 4:26, 27.
19. Engtin nge Sâm 4:5 chuan thlarau lama kan inthawina chungchângah min ṭanpui theih?
19 Pathian rinchhan a ngaihzia sawi uarin, Davida chu: “Felna inthawinate chu hlân ula, LALPA chu ring rawh u,” tiin a zai a. (Sâm 4:5) Israelte hlan inthawina chuan rilru put hmang dik an neih chauhvin hlutna a nei a ni. (Is. 1:11-17) Thlarau lama kan inthawina pawm tlâk ni tûr chuan, keini pawhin rilru put hmang dik kan neiin, ani chu kan rinchhan pumhlûm tûr a ni.—Thufingte 3:5, 6; Hebrai 13:15, 16 chhiar rawh.
20. ‘LALPA hmêl êng’ tih hian eng nge a entîr?
20 Davida chuan: “‘Ṭhatna rêng rêng tuin nge mi hmuhtîr ta ang le?’ titute chu tam tak an awm. LALPA, nang ngeiin i hmêl êng khân min han ên ang che,” tiin a sawi zawm a. (Sâm 4:6) ‘LALPA hmêl êng’ tih chuan A duhsakna a entîr a. (Sâm 89:15) Chuvângin, Davida chu: “I hmêl êng khân min han ên ang che,” tia a ṭawngṭai khân, ‘min duhsak ang che’ a tihna a ni. Jehova kan rinchhan avângin, a duhzâwng inring tâwk taka kan tih avângin a duhsakna leh hlimna nasa tak kan nei a ni.
21. Tûn laia thlarau lam buh sengnaah theih tâwpa kan tel chuan eng nge kan hmuh ngei ang?
21 Buh seng lai aia hlimna nasa zâwk Pathian pêk hlimna beisei tlat chungin, Davida chuan Jehova hnênah: “An buh leh an uain lo hlâwk chânga an lâwmna aia, lâwmna nasa zâwk ka thinlungah hian i awmtîr a,” tiin fakna hla a sa a. (Sâm 4:7) Tûn laia thlarau lam buh sengnaa kan tel ṭhat chuan hlimna dik tak kan tawng ang tih kan chiang thei a ni. (Lk. 10:2) Hriak thihte sawina ‘hnam tamte’ kaihhruaina hnuaiah, buh seng ‘hna thawktu’ a pun zêl avângin kan lâwm hle. (Is. 9:3) He buh sengna hlimawm takah hian lungawithlâk takin i tel em?
Pathian Rinchhanna Pumhlûm Nên Inring Tâwk Takin Hma Lam Pan Rawh
22. Sâm 4:8 nêna inremin, Pathian Dân an zawmin Israelte chu engtin nge an awm?
22 Davida chuan he fakna hla hi: “Thlamuang takin ka mu ang a, ka muhîl bawk ang: LALPA, nangmah ngei hi a ni, mahni chauh pawha him taka mi awmtîr ṭhîn hi ni,” tiin a titâwp a ni. (Sâm 4:8) Israelte’n Jehova Dân an zawm khân thlamuang tak leh him takin an awm a. Entîr nân, Solomona rorêl hun chhûng khân ‘Judaho leh Israel-ho chu thlamuang takin an awm ṭheuh’ a ni. (1 Lal. 4:25) Pathian rinchhantute chuan ṭhenawm ramte an buai hle chung pawhin thlamuanna an nei a. Davida angin, Pathianin him taka min awmtîr avângin thlamuang takin kan mu thei a ni.
23. Pathian rinchhanna pumhlûm kan neih chuan engtin nge kan awm ang?
23 Inring tâwk takin Jehova rawngbâwlnaah hma lam i pan zêl ang u. Rinnaa ṭawngṭaiin, “Pathian thlamuanna, rilru rêng rênga hriat sên loh” chu i nei bawk ang u. (Phil. 4:6, 7) Chu chuan hlimna min va pe tak êm! Pathian Jehova kan rinchhan pumhlûm reng phawt chuan nakin hun chu rilru thlamuang takin kan hmachhawn thei ngei ang. (w11-E 05/15)
Engtin Nge I Chhân Dâwn?
• Davida chuan Absaloma avângin eng harsatnate nge a tawh?
• Engtin nge Sâm 3-na chuan rilru thlamuanna min pêk?
• Eng kawngin nge Sâm 4-na chuan Jehova kan rinchhanna a tihngheh?
• Engtin nge Pathian rinchhan pumhlûm chu kan hlâwkpui theih?
[Zirlai Atâna Zawhnate]
[Phêk 29-naa milem]
Absaloma avânga a tlân chhiat lai pawhin Davida chuan Jehova a ring tlat
[Phêk 32-naa milemte]
Jehova chu i rinchhan pumhlûm em?