Kristian Chhûngkuate U—“Inring Rengin Awm Rawh U”
Kristian Chhûngkuate U—“Inring Rengin Awm Rawh U”
“Inring rengin awm rawh u, in rin loh hunah Mihring Fapa a lo kal dâwn si a.”—LK. 12:40.
1, 2. Engvângin nge ‘inring renga awm’ tûra Isua fuihna chu kan zawm ang?
‘MIHRING Fapa hi ropuinaa inthuama a lo kal’ a, ‘hnam tina mite’ a hlîr hunah chuan nang leh i chhûngte chungah eng thil nge lo thleng dâwn? (Mt. 25:31, 32) Chu chu kan in rin loh huna lo thleng tûr a nih avângin, ‘inring renga awm’ tûra Isua fuihna kan zawm chu a va pawimawh tak êm!—Lk. 12:40.
2 Thuziak hmasaah khân chhûngkuaa mi tinte’n mahni mawhphurhna ṭheuh ngai pawimawha an chhûngkua thlarau lam thil ngaihven reng tûra an ṭanpui theih dân kan sawiho tawh a. Tûnah chuan, kan chhûngkua thlarau lama kan siam ṭhat theih dân kawng dangte i lo ngaihtuah ang u.
In Mit ‘Tifîm’ Rawh U
3, 4. (a) Kristian chhûngkuate chu eng lakah nge an invên ang? (b) Mit ‘tifîm’ tih awmzia chu eng nge ni?
3 Krista lo kal hun atâna inring renga awm tûr chuan, chhûngkuate chu biakna dik nêna inkûngkaih thilte aṭanga kal pêng lo tûrin an fîmkhur tûr a ni a. Chutiang rilru lapêng thei thilte lakah an invên a ngai a ni. Chhûngkaw tam tak chu hausak âtchilhna thanga an awh avângin, mit ‘tihfîm’ chungchânga Isua thusawi chu i ngaihtuah ang u. (Matthaia 6:22, 23 chhiar rawh.) Khâwnvârin kan kawngte a tihên a, tlu lova min kaltîr theih ang chiahin, entîr nei kan ‘thinlung mita’ kan thil hmuhte chuan min tibengvârin, tlu lo tûrin min ṭanpui thei a ni.—Eph. 1:18.
4 Kan mitin fiah taka khua hmu thei tûr chuan hna a thawk ṭhain, a thil en chu a thlîr bing thei tûr a ni a. Thinlung mit pawh chutiang bawk chu a ni. Entîr nei mit fîm kan nei tih awmzia chu thiltum pakhatah chauh ngaihtuahna kan pe tihna a ni a. Sum leh pai leh chhûngkaw tisa lam mamawh chauh ngaihsak reng ai chuan, thlarau lam thil kan ngaihsak tlat a ni. (Mt. 6:33) Chu chu tisa lama kan mamawh ang Pathian min pêkah lungâwiin, kan nunah a rawngbâwlna kan dah hmasa ber tihna a ni.—Heb. 13:5.
5. Engtin nge hmeichhe tleirâwl pakhat chuan a ‘mitin’ Pathian rawngbâwlna chauh a thlîrzia a târ lan?
5 Naupangte an mit tifîm tûra zirtîrna chuan rah ṭha a va chhuah tak êm! Ethiopia rama hmeichhe tleirâwl pakhat entîrna hi han ngaihtuah teh. School-a a tihṭhat êm avângin, pâwl sâwm a pass hnuah zirna sâng a zawm theih nân scholarship pêk tiam a ni a. Mahse, a mit chuan Pathian Jehova rawngbâwlna chauh a thlîr avângin, chu scholarship chu a hnâwl ta a ni. Chu mi hnu lawkah, an ram chhûnga mi tam takte hlawh nêna khaikhina sâng tak, euro 3,000 lai hlawh theihna hna thawk tûra sâwm a ni leh a. Mahse, a “mit” chuan pioneer rawngbâwlna chauh a thlîr tlat a. Chu sâwmna hnâwl tûr chuan a nu leh pate a rawn a ngai lo. An fanu thiltih an hriat chuan a nu leh pate chuan engtin nge an ngaih? An lâwm hlein, amah an chhuanzia an hrilh a ni.
6, 7. Eng hlauhawm lakah nge ‘kan fîmkhur ang’?
6 Matthaia 6:22, 23-a chhinchhiah Isua thusawi chu duhâmna chungchânga vaukhânna a ni deuh ber a. Isua chuan mit “fîm” chu a kalh chiah ‘fîm lo’ tih nên ni lovin, ‘chhia’ tih nên a khaikhin a. ‘Mit chhia’ chu “ṭha lo; awh hrât” tak a ni a, chu chu awh hmang emaw, duhâm emaw tihna a ni. (Mt. 6:23) Awhna emaw, duhâmna emaw chu Pathian Jehova’n engtin nge a ngaih? Bible chuan: “Inngaih leh bawlhhawh zawng zawng, duhâmna [a nih loh leh, “awhna”] nên in zîngan lam pawh lamin awm suh se,” tiin a sawi.—Eph. 5:3.
7 Mi dangte duhâmna chu awlsam taka kan hriat theih laiin, mahni inhriat erawh a harsa hle thung. Chuvângin, Isua thurâwn: “Fîmkhur ula, awhna rêng rêng lakah chuan invêng rawh u,” tih zawm chu a finthlâk a ni. (Lk. 12:15) Chu thurâwn zâwm tûr chuan thinlunga kan ngaih pawimawh ber hre tûra kan inbih chian a ngai a. Kristian chhûngkuate chuan intihhlim nân leh thil neih belh nâna hun leh sum an sên zât chu ngun takin an ngaihtuah tûr a ni.
8. Thil kan lei dâwnin, engtin nge ‘kan fîmkhur theih’?
8 Thil lei dâwnin, a leina tûr sum kan neih leh neih loh mai bâkah hêngte hi kan ngaihtuah tel tûr a ni: ‘He thil hi ka hmang rengin, a enkawl nân hun ka nei ang em? Thiam taka hmang thei tûrin engtia rei nge ka zir ngai ang?’ tihte hi. Ṭhalaite u, khawvêl thil fakmawi apiang ringin, thawmhnaw leh thil dang company lâr tihchhuah man to tak takte ngên suh ula, inthunun ang che u. Chu bâkah, in thil lei tum chuan mihring Fapa lo kalna hun atâna in chhûngkua inring renga awm tûra a ṭanpui dâwn leh dâwn loh ngaihtuah bawk ang che u. Pathian Jehova thutiam: “Engtikah mah ka thlahthlam tawp lo vang chia, kal pawh ka kalsan tawp lo vang che,” tih hi ring tlat ang che u.—Heb. 13:5.
Thlarau Lam Thiltumte Um Rawh
9. Thlarau lam thiltumte ûmna chuan chhûngkuate chu engtin nge a ṭanpui theih?
9 Chhûngkaw zînga mite’n an rinna an tihchak theih dân leh chhûngkaw pum thlarau lama an siam ṭhat theih dân kawng dang leh chu thlarau lam thiltumte insiam a, chûngte ûm chu a ni. Chutianga tihna chuan chhûngkuate chu Pathian Jehova tihlâwm an tumna kawnga hma an sâwn dân chin hre tûr leh an thil ngaih pawimawh hmasak tûrte thlang tûrin a ṭanpui thei ang.—Philippi 1:10, 11 chhiar rawh.
10, 11. Chhûngkua angin eng thlarau lam thiltum nge in ûm mêk a, nakin hun atân eng thiltum nge insiam in duh?
10 Chhûngkaw zînga mi tin deuhthawte tihhlawhtlin theih tûr thiltum tênaute insiam pawhin hlâwkna nasa tak a nei a. Entîr nân, nî tina ni châng chhiar chungchâng lo ngaihtuah ta ila. Chhûngkaw zînga mite ngaih dân sawi chhuah chuan thlarau lama an puitlin dân hre tûrin chhûngkaw lû chu a ṭanpui thei a ni. Chhûngkuaa Bible chhiar tlâng ziah tûra thiltum insiamna chuan naupangte chu lehkha chhiar thiam lehzual theihna leh Bible thute hriatthiam lehzual theihna hun remchâng ṭha tak a pe a ni. (Sâm 1:1, 2) Tin, ṭawngṭaina kawnga hmasâwn chu kan duh tûr a ni lâwm ni? Thlarau rah hmêlhmangte neih tam lehzual pawh chu ûm phu thiltum ṭha tak a ni bawk. (Gal. 5:22, 23) A nih loh leh, rawngbâwlnaa kan hmuh mite chunga lainatna lantîr theih dân kawng zawn chungchâng hi eng nge ni ve? Chhûngkuaa chutiang tih tum tlatna chuan naupangte chu mi khawngaih thei tak ni tûrin a ṭanpui thei a, regular pioneer emaw, missionary emaw thawh duhna a neih chhohtîr pawh a rinawm hle a ni.
11 Chhûngkua anga in ûm tûr thiltum ṭhenkhat chu engvângin nge in ngaihtuah loh vang? Rawngbâwlnaa hun tam zâwk hman chu in tum thei ang em? Telephone hmang te, kawtthlêr leh office hmun tea thu hrilh hrehna tibo tûrin hma in la thei ang em? A nih loh leh Lalram thu hriltu mamawh zualna hmuna rawngbâwl chu in thei ang em? Chhûngkaw zînga tuemaw ber chuan hnam dangte hnêna thu a hrilh theih nân ṭawng dang a zir thei ang em?
12. Chhûngkaw lûte chuan an chhûngkuain thlarau lama hma a sâwnna tûrin eng nge an tih theih?
12 Chhûngkaw lû i nih angin, chhûngkua anga thlarau lama hma sâwn in ngaihna lai hriat tum la. Tichuan, chutianga hma sâwn tûrin thiltum insiam rawh. Chhûngkua anga in thiltum siam chu in dinhmun leh theihna ang mil zêla in tihhlawhtlin theih tûr a ni ngei tûr a ni. (Thuf. 13:12) Thiltum manhla tak tihlawhtling tûr chuan hun a duh rei ṭhîn ngei mai a. Chuvângin, TV en nâna in hun hmante chu leiin, thlarau lam thil ûm nân hmang ula. (Eph. 5:15, 16) Chhûngkaw tâna in thiltum siam tihlawhtling ngei tûrin thawk rim rawh. (Gal. 6:9) Thlarau lam thiltum ûmtu chhûngkua chuan hma an sâwnzia chu ‘mi zawng zawng hnênah’ an lan chhuahtîr ang.—1 Tim. 4:15.
Chhûngkuaa Pathian Biakna Neih Zân Hmang Zêl Rawh U
13. Chawlhkâr tina kohhran inkhâwm dânah eng inthlâkthlengna nge siam a nih a, eng zawhnate nge kan ngaihtuah ang?
13 Mihring Fapa lo kal hun atâna chhûngkuate ‘inring renga’ awm tûra ṭanpuitu ṭha tak pakhat chu January 1, 2009 aṭanga hman ṭan chawlhkâr tin inkhâwm kan neih ṭhin dân siam danglamna lian tham tak hi a ni a. Kohhrana Lehkhabu Zirna inkhâwm kan neih ṭhin kha Theocratic Rawngbâwlna School leh Rawngbâwlna Inkhâwm ruala nei ta zâwkin, zan khat dang inkhâwm ngai ṭhîn kha a ngai ta lo va. Chu siam remna neih a nih chhan chu Kristian chhûngkuate’n chawlhkâr tina zân khat tal chhûngkuaa Pathian biakna hun an neih a, chu mi aṭanga thlarau lama intihchak theihna hun remchâng an neih nân a ni. Chu inthlâkthlengna kan neihna pawh a rei ta bawk a, heti hian kan inzâwt thei ang: ‘Chhûngkuaa Pathian Biakna neih zân atân emaw, mi mala zirna hun neih nân emawa ruat chu hun chu kan hmang ngei em? Chu ruahmannain a tum tak chu ka tihlawhtling em?
14. (a) Chhûngkuaa Pathian Biakna neih zân emaw, mi mala zirna emaw kan neih chhan ber chu eng nge ni? (b) Engvângin nge zirna atâna zan khat dah âwl chu thil pawimawh tak a nih?
14 Chhûngkuaa Pathian Biakna neih zân emaw, mi mala inzirna hun emawin a tum ber chu Pathian hnaih lehzual hi a ni a. (Jak. 4:8) Hunbi neia Bible kan zir ṭhin a, Siamtu chanchin kan hriat belh hian amah nêna kan inlaichînna chu a nghet sauh ṭhîn. Jehova chu kan hnaih poh leh ‘kan thinlung zawng zawng, thlarau zawng zawng, rilru zawng zawng, leh chakna zawng zawnga’ amah hmangaih kan duhna chu a zual sauh va. (Mk. 12:30) Pathian thu âwih a, a awm dân latute nih chu kan duh ngei mai. (Eph. 5:1) Chuti chu, hunbi neia Chhûngkuaa Pathian Biakna neih zân hman zêl hi, lo thleng tûra sawi lâwk “hrehawm nasa tak” kan nghah laia chhûngkaw zînga mite thlarau lama ‘inring renga awm’ tûra ṭanpui theih dân kawng pawimawh ber a ni a. (Mt. 24:21) Chu chu dam khawchhuah nâna thil pawimawh tak a ni.
15. Chhûngkuaa Pathian Biakna neih zân chuan chhûngkaw zînga mite inkârah eng nghawng nge a neih theih?
15 Chhûngkuaa Pathian Biakna ruahmanna chuan tum dang pawh a nei a—chu chu, chhûngkaw zînga mite inhnaih lehzualtîr hi a ni. Chawlhkâr tina thlarau lam thil sawihona chuan chhûngkaw zînga mite inkârah nghawng ṭha tak a nei a. Nupate’n Bible an zir dun a, thlarau lam thil hlu an hmuh chhuahte an inhrilh tawn hian, chu chuan anni chu a va inpumkhattîr lehzual tak êm! (Thuhriltu 4:12 chhiar rawh.) Pathian be tlâng nu leh pate leh fate chu hmangaihna ‘phuar famkimnaah’ chuan an inpumkhat ngei a rinawm a ni.—Kol. 3:14.
16. Kohhrana unaunu pathumte’n chawlhkâr khata tlai khat Bible zir nâna hman an hlâwkpui dân sawi rawh.
16 Kohhrana unaunu pathum chuan chawlhkâr khata tlai khat Bible zir nâna ruahman chu an hlâwkpui a. Chhûngkhat ni lo mah se, hêng hmeithai upa lam tawhte hi khaw pakhata awm an nih bâkah, kum tam tak chhûng lo inṭhian ṭha tawh an ni. Inkawm tam lehzual an duh a, chutih rual chuan inkawmna satliah mai ni lova thlarau lama intihsâwtna nihtîr an duh avângin, chawlhkâr khata tlai khat chu Bible zirho an titlu ta a. Kum zabi khatnaa Kristiante rawngbâwlna chanchin ziakna, “Bearing Thorough Witness” About God’s Kingdom tih lehkhabu hmangin an zirho ta a ni. An zînga pakhat chuan, “Kan hun hman hi nuam kan tih êm avângin dârkâr khat aia rei kan zir tlângpui ṭhîn. Kum zabi khatnaa kan unaute thil tawn chu mitthlaa hmuh kan tum a, chutiang dinhmunah ding ta ila eng nge kan tih dâwn tihte kan sawiho va. Tichuan, kan thu sawihona aṭanga kan thil zirte chu rawngbâwlnaah kan hmang chhin a. Chu chuan kan Lalram thu hrilh leh zirtîr siam rawngbâwlna chu tûn hma zawng aiin a tihlimawm sawt a, rah pawh a chhuah ṭha zâwk bawk a ni,” tiin a sawi. Chu chuan thlarau lama a tihsâwt bâkah, an inkârah inṭhian ṭhatna a awmtîr lehzual bawk a ni. Anni chuan, “He ruahmanna hi kan hlut hle mai,” an ti.
17. Eng thilte’n nge Chhûngkuaa Pathian Biakna neih zân chu hlawhtlintîr?
17 Chawlhkâr khata tlai khat chhûngkuaa Pathian biakna neih nân emaw, mi mala zirna neih nân emawa hman chu i hlâwkpui ve em? Mumal taka tih zat zat a nih loh chuan, chu ruahmanna chuan a tum ang a rah chhuak lo vang. Chhûngkaw zînga mi tinte chu an hun ruatah tak zirna ṭan thei tûrin an lo inpeih vek tûr a ni. Chu mi tlai chu thil pawimawh lêm lote tihsukuktîr suh. Chu bâkah, chhûngkua anga nî tina in hman theih tûr thute chu thlang bawk rawh. Chutiang zirna chu hun hlimawm tak nihtîr tûrin eng nge i tih theih? Zirtîr thiamna hmang la, boruak zahawm tak leh muanawm tak nihtîr bawk rawh.—Jak. 3:18. *
“Ngaihven” leh “Inring Rengin Awm Rawh U”
18, 19. Mihring Fapa lo kalna a hnai tih hriatna chuan nang leh i chhûngte chungah eng nghawng nge a neih ang?
18 Kan khawvêl dinhmun chhe zêl hian kum 1914 aṭang khân Setana khawvêl suaksualin a ni hnuhnûng a hmang ṭan tawh tih a târ lang chiang hle. Armageddon chu a lo thleng ṭêp tawh a. Mihring Fapain Pathian ngaihsak lote chunga Jehova rorêlna a thlentîr hun a hnai tawh hle a ni. (Sâm 37:10; Thuf. 2:21, 22) Chu mi hriatna chuan nang leh i chhûngte chungah nghawng a nei tûr a ni lâwm ni?
19 Mit ‘tifîm’ tûra Isua thurâwn pêk chu i zâwm em? Khawvêla mite’n hausakna te, hmingthanna te, a nih loh leh thiltihtheihna te an ûm laiin, nang leh i chhûngte chuan thlarau lam thiltumte in ûm em? Chhûngkuaa Pathian Biakna neih zân emaw, mahnia zirna neih hun emaw chu in hmang thei em? A tum ang takin Pathian Jehova in hnaih phahin, chhûngkua in inhnaih phah sawt em? Thuziak hmasaa sawiho tawh angin, pasal emaw, nupui emaw, a nih loh leh fa emaw i nih angin, Pathian Lehkha Thu anga i mawhphurhna chu hlenin, chhûngkua chu thlarau lam thil “ngaihven” reng tûrin i ṭanpui em? (1 Thes. 5:6) Chutianga i tih chuan mihring Fapa lo kal hun atân ‘inring rengin i awm’ ang. (w11-E 05/15)
[Footnote]
^ par. 17 Chhûngkuaa Pathian Biakna neih zâna zir tûr leh hlimawm tak leh ṭangkai tak nihtîr theih nân June 1, 2010 chhuak Vênnainsâng, phêk 31 par. 11-13 leh January 2011 chhuak Kan Lalram Rawngbâwlna kârzeh, phêk 3-6 en rawh.
Eng Nge Kan Zir?
• Hêng thilte tihna aṭanga Kristian chhûngkuate ‘inring renga an awm’ theih dân hrilhfiah rawh—
mit “fîm” neihna aṭangin.
thlarau lam thiltumte insiam leh ûmna aṭangin.
Chhûngkuaa Pathian Biakna neih zân hman zêlna aṭangin.
[Zirlai Atâna Zawhnate]
[Phêk 15-naa milem]
Mit “fîm” chuan rilru la pêng thei khawvêl thilte do tûrin min chêttîr ang