Kristian Chhûngkuate U—“Ngaihven” Reng Rawh U
Kristian Chhûngkuate U—“Ngaihven” Reng Rawh U
“I mengin i ngaihven . . . ang u.”—1 THES. 5:6.
1, 2. Chhûngkaw tân thlarau lam thil ngaihven reng tûrin eng nge ngai?
TIRHKOH Paula chuan “LALPA ni ropui tak leh râpthlâk tak” chungchângah, Thessalonika khuaa Kristiante chu: “Unaute u, nangni zawng chu mi Nî chuan rûkru anga a nanna tûr che uin thimah in awm lo ve; êng fate leh ni fate in ni vek si a; zâna mi kan ni lo va, thima mi kan ni hek lo,” tiin lehkha a thawn a. “Chuvângin mi dangte angin i muhîl suh ang u khai, i mengin i ngaihven zâwk ang u,” tiin a sawi belh a ni.—Joel. 2:31; 1 Thes. 5:4-6.
2 Thessalonika mite hnêna Paula fuihna chu he ‘tâwpna huna’ awm Kristiante tân a inhmeh bîk hle a. (Dan. 12:4) Setana khawvêl suaksual tâwpna a hnaih rual hian, ani chuan betu dik a tam thei ang berte chu Pathian rawng bâwl lohtîr a tum tlat a. Chuvângin, thlarau lama kan harhvân reng theih nân Paula fuihna thu kan zawm chu a finthlâk a ni. Kristian chhûngkua tân thlarau lam thil ngaihven renga awm tûr chuan chhûngkaw zînga mi tinin Pathian Lehkha Thu-a târ lan an mawhphurhna ṭheuh an hlen a ngai a ni. Chuti chu, pasalte, nupuite, leh fate chuan an chhûngkua thlarau lam thil “ngaihven” reng tûra ṭanpuina kawngah eng mawhphurhna nge an neih ṭheuh?
Pasalte U—“Berâm Vêngtu Ṭha” Entawn Rawh U
3. Timothea thawn khat 5:8 sawi angin, chhûngkaw lû nihnaa mipa mawhphurhnaah eng nge tel?
3 Bible chuan “hmeichhe lû chu mipa a ni,” tiin a sawi a. (1 Kor. 11:3) Chhûngkaw lû nihnaa mipa mawhphurhnaah hian eng nge tel? Bible chuan: “Tupawh mahni chhûngkhat lainate ngaihsak lo va, mahni chênpui chhûngte ngei pawh ngaihsak lo chuan rinna an phatsan a ni, ring lo mi aiin an sual zâwk,” tiin a sawi a. (1 Tim. 5:8) Mipa chuan a chhûngte tân tisa lam thil a pêk chu a ngai ngei mai. Mahse, thlarau lam thil ngaihven tûra a chhûngkua ṭanpui tûr chuan, tisa lama chhûngkaw châwmtu nih mai a tâwk lo. A chhûngte thlarau lamah tichakin, Pathian nêna an inlaichînna tinghet sauh tûrin a ṭanpui ṭheuh tûr a ni. (Thuf. 24:3, 4) Chu chu engtin nge a tih theih?
4. Engin nge mi chu a chhûngkua thlarau lama tihnghehna kawnga hlawhtling tûrin ṭanpui thei?
4 “Krista chu . . . kohhranho lû a ni ang bawk hian, pasal chu nupui lû a ni si a,” chuvângin, nupui neite chuan kohhran tâna Isua’n lû nihna a hman dân chu bih chiangin, an entawn tûr a ni. (Eph. 5:23) A hnungzuitute nêna an inlaichînna chungchâng Isua sawi hi han ngaihtuah teh. (Johana 10:14, 15 chhiar rawh.) Thlarau lama a chhûngkua tihngheh tum mipa tân hlawhtlinna thurûk chu eng nge ni? “Berâm vêngtu ṭha” anga Isua thusawi leh thiltihte zir a, ‘a hniaka zui’ hi a ni.—1 Pet. 2:21.
5. Berâm Vêngtu Ṭha chuan kohhran chungchâng eng nge a hriat?
5 Berâm vêngtu leh a berâmte inlaichînna chu hriatna leh inrinchhannaah a innghat a. Berâm vêngtu chuan a berâmte chu a hre chiang a, a berâmte pawhin amah an hriain, an rinchhan tlat a ni. Anni chuan an pu aw an hre hrang theiin, an zâwm bawk. Isua chuan a berâmte chungchângah: “Ka ta ka hria a, ka ta pawhin mi hria,” tiin a sawi a. Ani chuan kohhran chu a pâwnlâng maiin a hre lo. Heta “hria” tia lehlin Grik thu mal hian “mi mal taka inhriat belna” a kâwk a ni. Ni e, Berâm Vêngtu Ṭha chuan a berâm tinte chu a mal malin a hria a. An mamawhte, an chak lohnate, leh chaknate pawh a hre vek a ni. Kan Entawn tûra chuan a berâmte chungchângah hmuh hmaih engmah a nei lo. Berâmte pawhin ani chu an hre chiang a, a hruaina chu an ring thlap a ni.
6. Engtin nge pasal chuan Berâm Vêngtu Ṭha a entawn theih?
6 Krista entawna a lû nihna hmang tûr chuan, pasal chuan berâm vêngtu anga mahni inchan a, a enkawlna hnuaia awmte chu berâm anga chan dân a zir tûr a ni a. A chhûngte hriat bel chu a tum tlat tûr a ni. Pasal chuan chutiangin a hre bel thei tak zet ang em? A chhûngte zawng zawng a biak pawh ṭhat a, an thil veite a ngaihthlâksak a, chhûngkaw thiltiha hma a hruai bawk a; tin, chhûngkuaa Pathian biakna te, inkhâwm te, thlawhhma rawngbâwl te, infiamna te, leh intihhlimna te chungchânga thutlûkna ṭha siam tûra taihmâk a chhuah phawt chuan a hre bel thei a ni. Kristian pasalin, Pathian Thu leh a chhûngte hriat belna nêna hma a hruai hian, a chhûngte chuan a kaihhruaina chu an rin leh biakna dika an inpumkhat hmuhna aṭanga lo awm lungâwina a neih chu a rinawm hle.
7, 8. Engtin nge pasal chuan a enkawlna hnuaia awmte chunga ngainatna lantîrna kawngah Berâm Vêngtu Ṭha a entawn theih?
7 Berâm vêngtu ṭha chuan a berâmte chu a ngaina bawk a. Isua nun leh rawngbâwlna chungchâng Chanchin Ṭha ziak aṭanga kan zir hian, zirtîrte chunga Isua lantîr ngainatna chu hlut lo thei kan ni lo. Ani chuan ‘berâmte tân a nun a pe hial a ni.’ Pasalte chuan an enkawlna hnuaia awmte chunga ngainatna lantîrin Isua an entawn tûr a ni a. Pathian duhsakna dawng duh pasal chuan a nupui râwng taka thunun tlat aiin, “Kristan kohhranho a hmangaih” angin a hmangaih zêl zâwk tûr a ni. (Eph. 5:25) A nupui chuan chawimawi a phû avângin, pasal ṭawngkam chhuak chu ngilnei tak leh ngaihtuahna nei tak a ni tûr a ni.—1 Pet. 3:7.
8 Naupangte zirtîrna kawngah, chhûngkaw lû chuan Pathian thu bulte chu a zâwm tlat tûr a ni a. Mahse, a fate chungah ngainatna lantîr lovin a awm tûr a ni lo. Thunun a ngaih hunah pawh hmangaih taka pêk tûr a ni. Naupang ṭhenkhat chuan an laka thil beiseite hriat thiam nân hun an duh rei zâwk mai thei a. Chutiang a nih chuan, pa ber chuan an chungah dawhtheihna a lantîr lehzual tûr a ni. Pate’n Isua entawn tûr an zui reng hian, in chhûng boruak nuam leh him tak an siam a. An chhûngkua chuan fakna hla phuahtu sak ang thlarau lam himna chu an nei ṭhîn a ni.—Sâm 23:1-6 chhiar rawh.
9. Thlahtu Nova angin, Kristian pasalte chuan eng mawhphurhna nge an neih a, engin nge chu mi hlen tûra ṭanpui ang?
9 Thlahtu Nova chu a hun laia khawvêl tâwpna hunah a nung a. Mahse, Pathian Jehova’n ‘amah ngaihsak lote awmna khawvêla tui a tihlêt khân, mi dang pasarih nên a chhandam a ni.’ (2 Pet. 2:5) Nova chuan Tuilêta a chhûngte chhan chhuak tûrin mawhphurhna a nei a. Hêng tâwpna huna Kristian chhûngkaw lûte pawhin chutiang mawhphurhna chu an nei a ni. (Mt. 24:37) “Berâm vêngtu ṭha” entîrna an zir leh amah entawn tlat an tum chu a va pawimawh tak êm!
Nupuite U—‘In Chhûngkua Sa Ṭha Rawh U’
10. Nupui tân pasal laka intulût tih awmzia chu eng nge ni?
10 “Nupuite u, Lalpa hnêna in intulût ang hian mahni pasalte hnênah intulût rawh u,” tiin tirhkoh Paula chuan a ziak a. (Eph. 5:22) Hei hian hmeichhiate chu dinhmun zahawm lo takah an awm tih a kâwk lo rêng rêng. Hmeichhe hmasa ber Evi a siam hma khân, Pathian dik chuan: “Mihring amah chauhva awm hi a ṭha lo ve: amah ṭanpuitu tûr a kawppui âwm mi ka siamsak teh ang,” tiin a sawi a. (Gen. 2:18) “Ṭanpuitu” leh “kawppui” nihna chanvo—a pasalin chhûngkaw mawhphurhna a hlenna kawnga thlâwptu nihna—chu dinhmun chawimawi tlâk a ni tak zet a ni.
11. Engtin nge nupui entawn tlâk chuan ‘a chhûngkua a sak ṭhat’?
11 Nupui entawn tlâk chuan a chhûngkaw tâna ṭha tûrin thil a ti a. (Thufingte 14:1 chhiar rawh.) Lû nihna ruahmanna zah lo hmeichhe â nêna inkalh takin, hmeichhe fing chuan chu ruahmanna chu a zah hle a ni. Thuâwih loh leh zalên duhna khawvêl rilru put hmang târ lan ai chuan, a pasal lakah a intulût bawk. (Eph. 2:2) Nupui â chuan a pasal chanchin a ṭha lo zâwnga sawi chu a hreh lo va, hmeichhe fing erawh chuan a fate leh mi dangte’n a pasal an zahna tizual tûr zâwngin thil a ti thung a ni. Chutiang nupui chuan a pasal lû nihna chu sawisêlna emaw, hnialna emaw hmanga a zah lohzia lantîr lo tûrin a fîmkhur hle a ni. Tin, inren thiam pawh a pawimawh bawk. Hmeichhe â chuan harsa taka lâk luh a chhûngkaw sum leh pai chu a kawh ral mai ṭhîn. A pasal thlâwptu nupui chu chutiang a ni ve lo. Sum leh pai chungchângah a pasal chu a thlâwp tlat a. A thil tih dânah chuan a finzia leh a inren thiamzia a lang a ni. A pasal chu hun bi pângngai aia tam hna thawk tûrin a tur ngai lo bawk.
12. Nupui chuan thlarau lam thil “ngaihven” reng tûra a chhûngte ṭanpui tûrin eng nge a tih theih?
12 Nupui entawn tlâk chuan a pasalin an fate thlarau lama a zirtîrnaah lo ṭanpuiin an chhûngkua chu thlarau lam thil “ngaihven” tûrin a ṭanpui a. (Thuf. 1:8) Chhûngkuaa Pathian Biakna hun ruahmanna chu a thlâwp tlat a ni. Chu bâkah, a pasalin an fate zilhna leh thununna a pêk hunah pawh a lo thlâwp ve ṭhîn bawk. Tisa lam leh thlarau lama an fate tawrhtîrtu a pasal thlâwp lo nupui lakah chuan a va danglam tak êm!
13. Engvângin nge nupui tân theocratic thiltiha a pasal inhmanna chu a thlâwp a pawimawh?
13 Pasal thlâwptu nupui chuan Kristian kohhrana a pasal phûr taka a inhmang chu engtin nge a ngaih? A hlimpui hle a ni. A pasal chu kohhranho rawngbâwltu a ni emaw, upa a ni emaw, a nih loh leh Hospital Liaison Committee emaw, Regional Building Committee emawa tel pawh ni se, a pasal chanvo avângin a lâwm a. Ṭawngkam leh thiltiha pasal thlâwp tûr chuan ama lama inpêkna neih a ngai ngei ang. Mahse, theocratic thiltiha a pasal inhmanna chuan an chhûngkua chu thlarau lam thil ngaihven reng tûrin a ṭanpui tih a hria a ni.
14. (a) Pasal thlâwptu nupui tân eng nge harsa mai thei? (b) Engtin nge nupui chuan chhûngkaw pum ṭhat nân thil a tih?
14 Pasalin a pawmpui loh thu tlûkna a siam hunah chuan nupui tân a pasal lû nihna thlâwpna kawnga entawn tlâk nih chu a harsa thei a. Chutiang hunah pawh, ‘thuhnuairawlhna leh nunnêmna’ lantîrin, a pasal thu tlûkna siam hlawhtling tûrin a ṭawiâwm a ni. (1 Pet. 3:4) Nupui ṭha chuan Sari te, Ruthi te, Abigaili te, leh Isua nu Mari ang chi hmân laia Pathian ngaihsak hmeichhiate entawn chu a tum tlat bawk a. (1 Pet. 3:5, 6) Tin, tûn laia hmeichhe upa lam, “awm dân rênga Pathian zah mite” chu a entawn bawk. (Tit. 2:3-5) Nupui entawn tlâk tak chuan ṭawngkam leh thiltiha a pasal hmangaihna leh zahna lantîrin, an inneihna tihngheh nân leh an chhûngkaw pum ṭhat nân a thawh hnem hle a ni. A in chu hmun nuam tak leh him tak a ni a. Thlarau lam ngaihsak mipa tân chuan chutianga pasal thlâwptu nupui neih chu a hlu hle!—Thuf. 18:22.
Ṭhalaite U—‘Thil Hmuh Theih Loh Chu Thlîr Rawh U’
15. Engtin nge ṭhalaite chuan chhûngkuaa thlarau lam thil an “ngaihven” reng theih nân an nu leh pate chu an ṭanpui theih?
15 Ṭhalaite u, in chhûngkuaa thlarau lam thil in “ngaihven” reng theih nân engtin nge in nu leh pate in ṭanpui theih? Pathian Jehova’n in hmaa lâwmman a dah chu ngaihtuah rawh u. In naupan lai aṭangin, in nu leh pate chuan Paradis-a nun dân tûr târ langtu milemte an hmuh che u pawh a ni thei a. In lo ṭhan len deuh chuan, Bible leh Kristian thu leh hla chhuahte hmangin, khawvêl thara chatuana nun awm dân tûr in mitthla theih nân an ṭanpui che u pawh a ni thei bawk. Pathian Jehova rawng bâwl tum tlat a, chu mi mila nun dân tûr inruahmanna chuan thlarau lam thil “ngaihven” reng tûrin a ṭanpui ang che u.
16, 17. Nunna atâna intlânsiaknaah hlawhtling taka tlân tûrin ṭhalaite’n eng nge an tih theih?
16 Tirhkoh Paula thu, 1 Korinth 9:24-a kan hmuh hi ngaihsak rawh u. (Chhiar rawh.) Ani chuan Pathian Jehova rawng kan bâwlna chu chatuan nunna lâwmman nei intlânsiakna nên a tehkhin a. Nunna atâna intlânsiaknaah chuan hnehna chan ngei tumin tlân ula. Chatuan nunna lâwmman hmuhtîr thei nun kawng chu thlang rawh u. Mi tam tak chuan sum leh pai lam thil an ûm avângin lâwmman an thlîr reng loh phah a. Chu chu a va âtthlâk tak êm! Hausak ûmna nun kawng chuan hlimna tak tak a thlen si lo. Sum leh paiin a lei theih thilte chuan a daih rei lo hle. Chuvângin, “thil hmuh theih lohte” chu en zâwk rawh u. Engvângin nge? “Thil hmuh theih lohte erawh chu chatuan atân a ni si a.”—2 Kor. 4:18.
17 “Thil hmuh theih lohte” zîngah chuan Lalram malsâwmnate a tel a. Chûng malsâwmnate dawng thei ngei tûrin nun tum rawh u. Hlimna dik tak chu Pathian Jehova rawngbâwlnaa inhmanna aṭanga neih theih a ni si a. Pathian dik rawngbâwlna chuan thiltum tê naute leh lian tham kan neihte hlen theihna hun remchâng min pe a ni. * Thlarau lam thiltum hlawhtling ngei tûrte insiamna chuan chatuan nunna lâwmman dawn ngei tuma Pathian rawng bâwl reng tûrin a ṭanpui thei che u a ni.—1 Joh. 2:17.
18, 19. Engtin nge ṭhalai chuan Pathian nêna inlaichînna a neih leh neih loh a hriat theih?
18 Ṭhalaite u, nunna kawng in zawh ṭan theih dân chu Jehova nêna mi mal inlaichînna neih phawt hi a ni a. Chu chu in nei tawh em? Heti hian inzâwt rawh u: ‘Thlarau mi ka ni nge ka nu leh pate avângin thlarau lam thiltihah ka tel mai mai zâwk? Pathian tilâwmtu miziate neih tumin ka bei em? Biakna dik nêna inkûngkaih thiltih, ṭawngṭai te, zirna neih te, inkhâwm te, leh thu hrilh rawngbâwlnate-a inhmang ziah tûrin theih tâwp ka chhuah em? Pathian nêna mi mal inlaichînna neiin amah ka hnaih em?’ tiin.—Jak. 4:8.
19 Mosia entawn tûr siam chu ngaihtuah rawh u. Hnam dang chîn dân hnuaia a awm chung pawhin, Mosia chuan Pharaoa fanua fapaa vuah nih ai chuan Pathian Jehova betu nia hriat chu a thlang zâwk a ni. (Hebrai 11:24-27 chhiar rawh.) Kristian ṭhalaite u, in tân pawh Pathian Jehova rawng rinawm taka bâwl tum tlat chu a ngai a ni. Chutianga in tih chuan, hlimna dik tak leh tûna nun ṭha ber chu in nei ang a, ‘nunna taktak vawn’ pawh in beisei thei dâwn a ni.—1 Tim. 6:19.
20. Nunna atâna intlânsiaknaah chuan tuin nge lâwmman dawng ang?
20 Hmân lai intlânsiaknaah chuan, mi pakhat chauhvin lâwmman a dawng ṭhîn a. Nunna atâna intlânsiakna chu chutiang a ni ve lo. Pathian chuan “mi zawng zawng chhandama awmah leh thutak hriaah a duh” si a. (1 Tim. 2:3, 4) I hmaah mi tam tak chu hlawhtling takin an lo tlân tawh a, i rualin mi tam tak an tlân mêk bawk. (Heb. 12:1, 2) A tâwp thlenga tlân peihte hnênah lâwmman chu pêk a ni ang. Chuvângin, lâwmman dawn ngei chu tum tlat ang che u!
21. A dawta thuziakah eng nge kan ngaihtuah ang?
21 “LALPA ni ropui leh râpthlâk tak” lo thleng tûr chu pumpelh theih rual a ni lo. (Mal. 4:5) Chu nî chuan Kristian chhûngkuate chu an inpeih loh lai a nangching tûr a ni lo. Chhûngkuaa mi tinte chuan Pathian Lehkha Thua târ lan an mawhphurhna ṭheuh an hlen chu a pawimawh hle. Thlarau lama harhvâng reng tûr leh Pathian nêna in inlaichînna tinghet reng tûrin eng thil dang nge in la tih theih? A dawta thuziakah chuan thlarau lama chhûngkuate siam ṭhatu thil pathum sawiho a ni ang. (w11-E 05/15)
[Footnote]
^ par. 17 Vênnainsâng, November 1, 2010, phêk 19-23-na en rawh.
Eng Nge Kan Zir?
• Engvângin nge Kristian chhûngkua tân thlarau lam thil “ngaihven” reng a pawimawh?
• Engtin nge pasal chuan Berâm Vêngtu Ṭha a entawn theih?
• Nupui entawn tlâk tak chuan a pasal thlâwp tûrin eng nge a tih theih?
• Engtin nge ṭhalaite chuan an chhûngkua thlarau lam thil ngaihven reng tûra an ṭanpui theih?
[Zirlai Atâna Zawhnate]
[Phêk 12-naa milem]
Thlarau lam ngaihsak mipa tân chuan pasal thlâwptu nupui neih chu a hlu hle