Hrilh Lâwkna 1. Lîrnghîng

“Lîr nasa takin a nghîng a nghîng ang.”—LUKA 21:11.

● TV chanchin thar la khâwmtu-in naute ṭap thâwm a hriat avângin, thla 16 mi Winnie-i chu Haiti ram in chim nuaih kâra chhan chhuah a ni a. Mahse, a nu leh pa erawh an boral a ni.

THU DIK CHUAN ENG NGE A TAR LAN? January 2010-a Haiti rama lîrnghîng magnitude 7.0 laia chak chuan mi 3,00,000 aia tamte nunna a la a. Mi maktaduai 1.3 lai chuan thâwk lehkhatah an in leh lo an chân bawk a ni. Chu lîrnghîng chu râpthlâk hle mah se, chutiang lîrnghîng thleng awmchhun a ni lo. April 2009 leh April 2010 inkârah ringawt pawh a lo berah lîrnghîng lian tham tak tak khawvêl hmun hrang hrangah 18 lai a thleng a ni.

HNIALKALHNA TLANGPUI CHU ENG NGE NI? Tûn lai hian lîrnghîng kan tawng tam zâwk chuang lo; khâwl lam thiamna a sân tawh avângin, tûn hma aiin kan hre tam zâwk mai a ni.

CHU HNIALKHALNA CHU A PAWM TLAK EM? Hei hi ngaihtuah rawh: Bible chuan ni hnuhnûng chhûnga lîrnghîng thleng zât tûr lam a sawi uar lo va. Mahse, “hmun hrang hrangah” “lîr nasa takin a nghîng a nghîng ang a,” chu chu mihring chanchina hun pawimawh tak chhinchhiahnate zînga pakhat a nih tûr thu erawh a sawi a ni.—Marka 13:8; Luka 21:11.

ENG NGE I NGAIH DAN? Bible hrilh lâwk ang chiahin, lîrnghîng nasa takte kan hmu tawh em?

Lîrnghîng ringawt hi ni hnuhnûnga kan awm tawhzia fiah nân a ṭha tâwk lo pawh a ni thei. Mahse, lîrnghîng chu hrilh lâwkna thleng famkim mêk tam takte zînga pakhat mai a ni. A pahnihna i lo en ang u. (w11-E 05/01)

[Phêk 4-naa thu lâk chhuah]

“Keini [leilung chêt dân zir mite] chuan lîrnghîng nasa tak, kan ti a. Mi dang zawngte erawh chuan chhiatna râpthlâk an ti thung.”—KEN HUDNUT-A, U.S. GEOLOGICAL SURVEY

[Phêk 4-naa Milem Hawhtîrtu]

© William Daniels/Panos Pictures