Hrilh Lâwkna 3. Natna
Hrilh Lâwkna 3. Natna
“Mite chuan . . . natna ṭihbaiawm tak tak an tuar ang.”—LUKA 21:11, Contemporary English Version.
● Tualchhûng indonain a tihchhiat Africa ram pakhata mipui hrisêlna lam enkawltu officer Bonzali-a chuan Marburg virus hlauhawm tak avânga thih ngama nâ a khuaa thil hlu lai chhuaktute chu theih tâwp chhuahin a enkawl a. * Khawpui lian zâwka hotute hnêna ṭanpui a dîlna chu a hlawhchham a ni. Thla li hnuah chuan ṭanpuina chu a lo thleng ta hrâm a; mahse, chhan chhuah a tum thil lai chhuaktute hnên aṭangin Marburg natna a kai a, Bonzali-a chu a lo thi hman tawh a ni.
THU DIK CHUAN ENG NGE A TAR LAN? Thâwk harsatna (khawsik âwmnâ ang chi te), kawṭhalo te, HIV/AIDS te, TB te, leh sikserh te hi mihringte thihna thlentu natna hlauhawm berte zînga mi an ni a. Kum 2004 chhûng khân, hêng natna panga ringawt pawh hian mi maktaduai 10.7 vêl lai a tihlum anga chhût a ni. Kawng danga sawi chuan, hêng natnate hian kum tluanin second thum zêla mi pakhat nunna la zêl ang a ni.
HNIAL KALHNA TLANGPUI CHU EN NGE NI? Khawvêl mihring hi a pung chho zêl a, chuvângin natna pawh a tam chho mai a ni. Natna kai chhâwng thei mihring an tam chho zêl si a.
CHU HNIALKALHNA CHU A PAWM TLAK EM? Khawvêl mihring hi nasa takin a pung chho ngei mai. Mahse, natna hmu chhuak tûr te, a darh zêl tûr dang tûr te, leh enkawl dam tûr te-a mihring thiamna pawh a sâng chho ve zêl bawk. Chu ti a nih chuan, natna hian mihringte hi a tlâk buak nêp telh telh tûr a ni lâwm ni? Mahse, chu mi kalh chiah chu a thleng mêk a ni.
ENG NGE I NGAIH DAN? Bible hrilh lâwk ang ngeiin, mite chuan natna ṭihbaiawm tak takte an vei em?
Lîrnghîng te, ṭâm te, leh natna te chuan mi maktaduai tam takte chungah chhiatna nasa tak a thlen a. Maktaduai tam tak dangte chuan anmahni vênghim tûra ngaih an mihringpuite kut an tuar a ni. Bible hrilh lâwknain lo thleng tûra a sawite hi lo ngaihtuah ang che. (w11-E 05/01)
[Footnote]
^ par. 3 Marburg Hemorrhagic Fever chu Ebola ang chi virus hlauhawm tak awmtîr a ni.
[Phêk 6-naa thu lâk chhuah]
“Sakeibaknei emaw, thil dang emaw sehhluma awm chu a râpawm hle a; mahse, natna hrik hlauhawm takin chhûng lam aṭanga min ei chhiat leh kan kianga awmte a ei chhia hmuh chu chutiang bawkin a râpawm a ni.”—HRILENG CHANCHIN ZIRTU MICHAEL OSTERHOLM-A.
[Phêk 6-naa Milem Hawhtîrtu]
© William Daniels/Panos Pictures
