Hrilh Lâwkna 6. Khawvêl Puma Thu Hrilhna
Hrilh Lâwkna 6. Khawvêl Puma Thu Hrilhna
“He ram chanchin ṭha hi hnam zawng zawng hriattîrna tûrin khawvêl zawng zawngah hrilhin a awm ang.”—MATTHAIA 24:14.
● Vaiatea-i chu Pacific thliarkâr hmun fianfial taka awm Tuamotu Thliarkâr hlâwmte zînga pakhatah a chêng a. Tuamotu chu thliarkâr te tak tê tê 80 dâwn lai awm khâwmna niin, mêl 3,10,000 biala zau (8,02,900 sq km) inzâr pharh duai mai ni mah se, mi 16,000 vêl chauh awmna hmun a ni. Chuti chung pawhin, Vaiatea-i leh a awmna thliarkâra mi dangte chu Jehova Thuhretute’n an va tlawh a ni. Engvângin nge? Thuhretute chuan mite chu khawi hmunah pawh awm se, an hnêna Pathian Ram chanchin ṭha hrilh ṭheuh an duh vâng a ni.
THU DIK CHUAN ENG NGE A TAR LAN? Lalram chanchin chuan khawvêl kilkhâwr thleng pawhin a dêng chhuak a. Kum 2010 chhûng chauh pawh khân, Jehova Thuhretute chuan ram 236-a chanchin ṭha hrilh nân dârkâr tlûklehdingâwn 1.6 lai an hmang a. Thuhretu mi tinin a chawhrualin nî khatah minute 30 zêl thu an hril tihna a ni. Kum sâwm bi kalta chhûngte khân Bible zirna ṭanpuitu thu leh hla chhuahte chu tlûklehdingâwn 20 chuang lai an siam chhuakin, an sem chhuak bawk.
HNIAL KALHNA TLANGPUI CHU ENG NGE NI? Bible thuchah te chu kum sâng tam tak chhûng hrilh a ni tawh.
CHU HNIALKALHNA CHU A PAWM TLAK EM? Ni e, mi tam tak chuan Bible thuchah chungchâng engemaw tak chu an hrilh ngei mai. Mahse, a tam zâwk chuan hun eng emawti chhûng chauh leh khawi emaw lai chauhvah an hril a ni. Jehova Thuhretute erawh chuan mumal taka ruahman khawvêl pum huap thu hrilhna beihpui an thlâk a, chu chuan mi maktaduai tam tak hnênah chanchin ṭha a thlen a ni. Mihring chanchina pâwl din tawh azawnga thunei ber leh nunrâwng berte dodâlna hnuaiah pawh Thuhretute chuan thu an hrilh ṭâng ṭâng a ni. * (Marka 13:13) Chu bâkah, Jehova Thuhretute chu thu hril tûra hlawh pêk an ni lo. Chutih ahnêkin, an hun an pêk bâkah, an thu leh hla chhuahte pawh man lovin an sem chhuak zâwk a. An rawngbâwlna chu mahni duh thua pêk thawhlâwm hmanga chhawmdâwl a ni.
ENG NGE I NGAIH DAN? “Ram chanchin ṭha hi” khawvêl zawng zawnga hrilh a ni tawh em? He hrilh lâwkna thlen famkimna hi kan hma lawkah thil ṭha zâwk a lo thleng dâwn tihna a ni thei ang em? (w11-E 05/01)
[Footnote]
^ par. 6 Hriat belh nân, Jehova Thuhretute sem chhuah thilthleng tak tak chungchâng târ lanna video pathum “Faithful Under Trials,” “Purple Triangles,” leh “Jehovah’s Witnesses Stand Firm Against Nazi Assault” tihte chu en rawh.
[Phêk 9-naa thu lâk chhuah]
“Pathian Jehova’n rem a tih chhûng chu mite hnênah kawng engkim hmangin Ram chanchin ṭha ṭhahnemngai takin kan hril zêl ang.”—2010 YEARBOOK OF JEHOVAH’S WITNESSES.
