‘In Zînga Thawkrimte Chu Ngaihlu Rawh U’
‘In Zînga Thawkrimte Chu Ngaihlu Rawh U’
“In zînga thawkrim leh, Lalpaa in hotua awm leh, zilhtute che u chu [ngaihlu] . . . rawh u.”—1 THES. 5:12, 13.
1, 2. (a) Paula’n Thessalonika khuaa mite hnêna a lehkha thawn hmasa zâwk a ziah lai khân anni chu eng dinhmunah nge an awm? (b) Paula chuan Thessalonika khuaa mite chu eng ti tûrin nge a fuih?
EUROPE khawmuala kohhran din hmasak berte zînga mi, kum zabi khatnaa Thessalonika kohhrana awm angah han inchan teh. Tirhkoh Paula chuan chuta unaute tihchak nân hun ṭhahnem tâwk tak a hmang tawh a. Hmun danga kohhran a din huna a tih ṭhin ang bawkin, chutah pawh upate a ruat ngei a rinawm hle a ni. (Tirh. 14:23) Mahse, kohhran a din hnuah, Judate chuan mipui an fuih pawrh avângin Paula leh Sila chuan khawpui an chhuahsan a. Chuta Kristian awmte chu thlahthlam nia inhriain, hlauh pawh an hlau hial mai thei a ni.
2 Paula’n Thessalonika a chhuahsan hnua chu kohhran din thar hlim a ngaihtuah hle pawh chu hriatthiam awm tak a ni. Kîr leh pawh a tum a; mahse, ‘Setanan a dâl a ni.’ Chuvângin, chu kohhran tinghet tûr chuan Timothea a tîr ta zâwk a. (1 Thes. 2:18; 3:2) Timothea’n an chungchâng thu ṭha a rawn thlen chuan, Paula chu Thessalonika khuaa mite hnêna lehkha thawn tûra chêttîrin a awm ta a. Thu dang tam tak bâkah, Paula chuan anni chu ‘an hotua awmte ngaihlu’ tûrin a fuih a ni.—1 Thessalonika 5:12, 13 chhiar rawh.
3. Thessalonika khuaa Kristiante’n upate ngaihhlut êm êm chhan tûr eng nge an neih?
3 Thessalonika Kristiante zînga hmahruaitute chu Paula leh a zinpuite anga thiltawn nei an ni lo va; Jerusalem khuaa upate angin thlarau lama puitling an ni hek lo. Chu kohhran dinna chu kum khat pawh a la tling si lo va! Chuti chung pawhin, kohhran chhûnga mite chuan an zînga “thawkrim,” kohhrana “hotua awm,” leh unaute ‘zilhtu,’ upate chunga lâwm nachhan tûr an nei a. Anmahni ‘hmangaiha ngaihhlut êm êm chhan tûr’ an nei a ni. Paula chuan chu ngenna chu: “Inremin awm rawh u,” tia zilhnain a chhunzawm a ni. Chutih laia Thessalonika khuaa awm ve chu ni ta la, upate hna thawh i hlutzia i lantîr ang em? Pathianin Krista kal tlanga in kohhrana a pêk “thilpêkte” chu engtin nge i thlîr?—Eph. 4:8.
‘Thawkrimte’
4, 5. Engvângin nge Paula hun laia upate tân kohhrana mite zirtîr tûrin thawhrim a ngaih a, engvângin nge tûn laiah pawh chutiang chu a nih?
4 Beroia khuaa Paula leh Sila an kaltîr hnu chuan, eng ang takin nge Thessalonika khuaa upate chuan an ‘thawhrim’? Paula entawnin, kohhran mite chu Pathian Lehkha Thu hmangin an zirtîr ngei ang. ‘Thessalonika khuaa Kristiante chuan Pathian Thu chu an hlut em?’ tiin i ngaihtuah mai thei. Bible chuan Beroia khuaa mite chu “Thessalonika khuaa mi ai chuan an lo ṭha zâwk a, . . . ni tin Pathian Lehkhaah an zawng ṭhîn,” tih a sawi. (Tirh. 17:11) Mahse, hei hi Thessalonika khuaa Kristiante nêna khaikhinna ni lovin, Juda mi nâwlpuite nêna khaikhinna a ni a. Ringtu lo ni tate chuan ‘Pathian thu chu mihring thu pawma pawm lovin, Pathian thu pawmin an pawm zâwk a ni.’ (1 Thes. 2:13) Chûng mite thlarau lama châwm tûrin upate chuan an thawkrim hle ngei ang.
5 Tûn laiah, bâwih rinawm leh fing tak pâwl chuan Pathian berâmte hnênah “a hun apianga an chaw chan tûr” chu a pe a. (Mt. 24:45) Chu bâwih pâwl kaihhruaina hnuaiah, tualchhûng upate chuan an unaute thlarau lama châwm tûrin an thawkrim hle a ni. Tûn laia kohhrana unaute chuan Bible ṭanchhan thu leh hla chhuahte chu an ngah hle pawh a ni thei a, ṭawng ṭhenkhat phei chuan Watch Tower Publications Index leh Watchtower Library chu CD-in an nei pawh a ni thei bawk. Mahse, upate chuan kohhrana mite thlarau lam mamawh phuhru tûr zâwnga thu an sawi theih nân dârkâr tam tak chhûng an inpuahchah ṭhîn a ni. Inkhâwm leh inkhâwmpuia an thusawi tûrte inpuahchah nâna upate hun hman ral zât chu i ngaihtuah ngai em?
6, 7. (a) Thessalonika khuaa upate chuan Paula hnên aṭangin entawn tûr eng nge an neih? (b) Engvângin nge tûn laia upate tân Paula entawn chu thil harsa tak a nih theih?
6 Thessalonika khuaa upate chuan berâmte enkawlna kawnga Paula entawn tûr siam ṭha tak chu an hre reng a. Ani chuan unaute chu dân pângngai angin a tlawh satliah mai lo. Thuziak hmasaa kan sawiho tawh angin, Paula chu ‘nu, nau pawmin ama fate a duat angin an zîngah nunnêm takin a awm a.’ (1 Thessalonika 2:7, 8 chhiar rawh.) An tân ‘a nun hial pawh pêk’ a inhuam a nih chu! Berâm enkawlnaah chûng upate chu amah ang an ni tûr a ni.
7 Tûn laia berâm vêngtute chuan berâmte duat taka enkawlin Paula an entawn a. Berâm ṭhenkhat chu fel leh kawm nuam tak an ni lo mai thei. Mahse, upate chuan remhriatna lantîrin, an ṭhatna lai hmuh chu an tum tlat a ni.(Thuf. 16:20) Upa chuan mi ṭha famkim lo a nih angin, mi tinte ṭhatna hmuh chu harsa a ti mai thei. Mahse, mi zawng zawng chunga nunnêm tuma theihtâwp a chhuah hian, Krista hnuaia berâm vêngtu ṭha nih a tumna avângin fak a phu a ni lâwm ni?
8, 9. Tûn laia upate’n ‘kan thlarau min vênsak’ dân kawng ṭhenkhat chu engte nge ni?
8 Kan za hian upate ‘thu thua awm’ chhan tûr kan nei a. Paula’n a ziah angin, anni chuan ‘kan thlarau min vênsak ṭhîn a ni.’ (Heb. 13:17) He ṭawngkam hian a berâm tak tak vênghim tûra mutmu pawh tuah lo, berâm vêngtu chu min hriat chhuahtîr a. Chutiang bawkin, tûn laia upate pawhin hrisêlna lam emaw, rilru lam emaw, a nih loh leh thlarau lam emawa harsatna neite an enkawlnaah mutmu pawh tuah loh châng an nei thei. Entîr nân, Hospital Liaison Committee-a tel unaupate chu ṭanpui ngaite ṭanpui tûrin zan laiah pawh an tho ṭhîn a. Chutiang dinhmun kan hmachhawn hian an thawhrimna chu kan va hlut tak êm!
9 Kingdom Hall sakna leh chhawmdâwlna lam ngaihtuahtu pâwla thawk upate pawh chuan unaute ṭanpui nân an thawkrim hle a. Anni chuan tih tak zeta kan thlâwp an va phû tak êm! Kum 2008-a Cyclone Nargis-in Myanmar ram a nuai hnua chhawmdâwl hna thawh a nih dân kha han ngaihtuah teh. Thlipui leh tui lianin a nuai nasatna Irrawaddy Lui leh tuipui inpawhna rama awm Bothingone Kohhran va thleng tûrin chhawmdâwlna hnathawktu pâwl chu mitthi ruang darh nuaih karah an va kal a. Tualchhûng unaute’n chhawmdâwlna thawktu pâwl Bothingone va thleng hmasa berte zîngah an bialkantu hlui an han hmuh chuan: “En teh u! Kan bial kantu te saw! Jehova’n min chhanhim ta!” tiin an au chhuak a ni. Achhûn azâna upate thawhrimna chu i hlut em? Upa ṭhenkhat chu buaina harsa zualte chingfel tûrin special committee atâna ruat an ni a. Chûng upate chuan an thiltihte chu an chapopui lo va; mahse, an thiltih hlâwkpuitute chu an chungah an lâwm hle.—Mt. 6:2-4.
10. Hriat hlawh vak lo eng ang hnate nge upate’n an thawh?
10 Tûn laia upa tam tak chuan ziak leh chhût ngai hnathawh tûr an nei bawk a. Entîr nân, upahote râwn khâwmtu chuan chawlhkâr tin inkhâwm atâna hun duan a buatsaih a. Kohhran secretary chuan thla tin leh kum tina thlawhhma rawngbâwlna report-te chu a la khâwm a. Tin, school enkawltu chuan school hun duan chu ngun taka ngaihtuahin a siam a ni. Thla thum dan zêlah kohhran sum dinhmun chu enfiah a ni a. Upate chuan branch office aṭanga an lehkha dawnte chu an chhiar a, ‘rinnaa thu khat vuaa’ awm zêl tûra ṭanpuitu chûng kaihhruainate chu an zâwm a ni. (Eph. 4:1-3, 11-13) Chutianga upate thawhrimna avâng chuan “engkim mawi tak leh fel taka tih” a ni thei ta a ni.—1 Kor. 14:40.
‘In Hotua Awmte’
11, 12. Tute nge kohhran hotua ṭang a, chutah chuan eng nge tel?
11 Paula chuan Thessalonika khuaa upate chu kohhran ‘hotu’ angin a sawi a. (1 Thes. 5:12, 13) Anni chu ‘thawkrimte’ tiin a sawi bawk. Chu chu kohhrana upa zawng zawngte a sawina a ni a. Tûn laia upa zawng zawng deuh thaw chuan kohhran hmaah dingin, inkhâwm an kaihruai a. Tûn hnaia “upahote râwn khâwmtu” tih hming thar hmanna chuan upa zawng zawng chu taksa inpumkhat anga thlîr tûrin min ṭanpui a ni.
12 Kohhran ‘hotu’ nihnaah chuan zirtîr mai aia tam a tel a. Timothea thawn khat 3:4-a “khawsak rêl fel thiam” tih ṭawngkam hian chutiang bawk awmzia chu a nei a ni. Paula chuan upa chu “zahawm taka fate kilkawia mahni inchhûng khawsak rêl fel thiam mi ni tûr a ni” a ti a. Heta “khawsak rêl fel thiam” tihah hian fate zirtîr mai bâkah, chhûngkuaa hmahruai a, ‘fate kilkawi’ a tel bawk. Ni e, upate chuan kohhranah hma an hruaiin, mi zawng zawng chu Jehova hnuaia intulût tûrin an ṭanpui a ni.—1 Tim. 3:5.
13. Engvângin nge upate thu rêl khâwmnaah thu tlûkna siam nân hun hman tam deuh a ngaih mai theih?
13 Berâmte ṭha taka an enkawl theih nân upate chuan kohhran mamawhte enkawl dân tûr chu an sawiho ṭhîn a. Upa pakhatin thu tlûkna zawng zawng chu siam se, a awlsam zâwkin, hun a khawh ral lo zâwk pawh a ni thei. Mahse, kum zabi khatnaa governing body tih dân zuiin, tûn laia upahote chuan Pathian Lehkha Thu aṭanga kaihhruaina zawngin zalên takin thil an sawiho a ni. An tum ber chu tualchhûng kohhran mamawh atâna Bible thu bulte hman a ni a. Chu chu upa tinte’n upa inkhâwmna atâna an inpuahchah a, Bible thu leh bâwih rinawm leh fing tak hnên aṭanga an dawn kaihhruainate an lo chhiar lâwk chuan a hlawhtling lehzual ṭhîn. Hetianga ti tûr hian hun pêk a ngai ngei mai. Kum zabi khatnaa governing body-in serh tan chungchânga ngaih dân inang lo an neih ang dinhmun a thlen hunah, Bible ṭanchhana thu tlûkna siam a nih theih nân hun tam zâwk hman leh zir bingna neih pawh a ngai mai thei a ni.—Tirh. 15:2, 6, 7, 12-14, 28.
14. Inlungrual taka upahote thawh tlânna chu i hlut em? Engvângin nge chutianga i hlut?
14 Upa pakhatin a ngaih dân mi dang pawm luihtîr emaw, theh lâr emaw a tum tlat chuan eng thil nge thleng thei? A nih loh leh, an zîng tuemaw ber chuan—kum zabi khatnaa Diotrepha angin—inrem lohna chi tuh ta se engtin nge ni ang? (3 Joh. 9, 10) Kohhran pum pui chuan a tawrh phah ngei ang. Setana chuan kum zabi khatnaa kohhran mah tihbuai a tum chuan, tûn lai kohhrana remna awm tihbuai chu a duh ngei ang tih kan chiang thei a ni. Ani chuan chungnun duhna ang chi mahni hmasialna miziate chu a chhawr ṭangkai thei a. Chuvângin, upate chuan inngaihtlâwmna an neiin, tisa pum khat anga an thawh tlân a ngai a ni. Chutianga thawk tlâng tûra upate inngaihtlâwmna chu kan va hlut tak êm!
“Zilhtute Che U Chu”
15. Upate’n unaute an zilh chhan tak chu eng nge ni?
15 Tichuan, Paula chuan upate tih tûr thil harsa tak, pawimawh tak si chu a târ lang leh a ni: berâmte zilh chu. Kristian Grik Pathian Lehkha Thu-ah chuan ‘zilh’ tia lehlin Grik thu mal chu Paula chauhvin a hmang a. Chu chu inhmêlmâkna tel lo thununna khauh tak sawina a ni thei. (Tirh. 20:31; 2 Thes. 3:15) Entîr nân, Paula chuan Korinth khuaa mite hnênah: “In zahna tûrin hêng thu hi ka ziak lo va, ka fa duh takte anga zilh tûr che uin ka ziak zâwk a ni,” tiin lehkha a thawn a. (1 Kor. 4:14) A zilh chhan tak chu mi dangte ngaihtuahna duhawm tak a neih vâng a ni.
16. Upate chuan mi dangte an zilh hunah eng nge an hriat reng ang?
16 Upate chuan mi dangte an zilh dân a pawimawhna chu an hre reng a. Ngilnei tak, hmangaihna nei tak, leh mi ṭanpui peih tak nihna hmangin Paula entawn chu an tum a ni. (1 Thessalonika 2:11, 12 chhiar rawh.) Upate chuan ‘zirtîrna dik tak kawngah chuan mi an fuih theihna tûrin thu rinawm chu an pawm tlat a ni.’—Tit. 1:5-9.
17, 18. Upa te zilhna i dawn hunah eng nge i hriat reng ang?
17 Ṭha famkim lo an nih avângin, upate chuan a hnua an inchhîrna tûr thute pawh sawi palh châng an nei ngei ang. (1 Lal. 8:45; Jak. 3:8) Tin, thlarau lam unaute tân zilhna dawn chu thil ‘lâwmawm lo leh lungchiatthlâk’ a ni tlângpui ṭhîn tih pawh an hre bawk. (Heb. 12:11) Chuvângin, upain mi tuemaw a zilh dâwn hian, ṭawngṭaina nêna a ngaihtuah fê hnuah a zilh chauh ṭhîn ngei ang. Zilhna i dawng a nih chuan, chu upain a ngaihtuahna che chu i hlut em?
18 A chhan hriat mai theih loh anga lang natna vei lo ni ta la. Tichuan, doctor-in i natna dik tak chu a hmu chhuak ta; mahse, chutiang natna i vei tih pawm chu harsa i ti hle a ni. Chu doctor chu i huat phah mai ang em? Huat phah lo vang! Zai ngai a tih che pawhin, i ṭhatna tûr a nih ringin inzai chu i duh ngei a rinawm a ni. Doctor-in a hrilhfiah dân che chuan i chungah nghawng zawng a nei ngei ang; mahse, chu mi ṭanchhan chuan thu tlûkna i siam ang em? I siam a rinawm lêm lo. Chutiang bawkin, zilhna pêk i nih dân chuan thlarau lama hma i sâwnna tûr emaw, i invên dân tûr emaw hriattîr tûra Pathian Jehova leh Isua mi hmante thu ngaihthlâk lohtîr che suh se.
Jehova Pêk Upate Ngaihlu Rawh
19, 20. Engtin nge ‘mihringte hnêna thilpêkte’ i ngaihhlutzia i lantîr theih?
19 I tân liau liauva siam thilpêk dawng ta la eng nge i tih ang? Chu chu hmang ṭangkaiin i hlutzia i lantîr ang em? ‘Mihringte hnêna thilpêkte’ chu Jehova’n Isua Krista hmanga a pêk che an ni a. Chûng thilpêkte i ngaihhlutzia i lantîr theih dân kawng khat chu an thusawite ngun taka ngaihthlâk a, nunpui tum hi a ni. Tin, inkhâwmnaa chhânna awmze nei tak pein i ngaihhlutzia i lantîr thei bawk. Thlawhhma rawngbâwlna ang chi, upate hma hruaina chu thlâwp ngei ang che. Upa tuemawin a zilhna che i lo hlâwkpui a nih chuan, engvângin nge i hriattîr loh vang? Chu bâkah, engvângin nge upate chhûngkaw chungah i lâwmzia i lantîr loh vang? Upain kohhran tâna a thawhrim theih nân a chhûngte chuan amah nêna an hun hman tûr hlu tak an pe tih hre reng ang che.
20 Ni e, kan zînga thawkrim, kan chunga hotua awm, leh min zilhtu upate ngaihhlut chhan tûr tam tak kan nei a ni. Hêng ‘mihring hnêna thilpêkte’ hi Pathian Jehova hnên aṭanga thilpêk duhawm an va ni tak êm! (w11-E 06/15)
Kan La Hria Em?
• Thessalonika khuaa Kristiante khân an zînga hotute ngaihhlut chhan tûr eng nge an neih?
• Engtin nge in kohhrana upate’n in tân an thawhrim?
• Engtin nge upate enkawlna che chu i hlâwkpui?
• Upain zilhna a pêk che chuan eng nge i hriat reng ang?
[Zirlai Atâna Zawhnate]
[Phêk 31-naa milem]
Upate’n kawng chi hrang hranga kohhran an enkawl dân chu i hlut em?
