Mi Zawng Zawng Mamawh Chanchin Ṭha Chu
Mi Zawng Zawng Mamawh Chanchin Ṭha Chu
“Chanchin ṭha chu . . . chhandamna tûra Pathian thiltihtheihna a ni.”—ROM 1:16.
1, 2. Engvângin nge “ram chanchin ṭha” i hrilh a, a eng chungchâng nge i sawi tam ber?
‘CHANCHIN ṭha nî tina hrilh chu nuam ka ti hle.’ He thu hi i ngaihtuah tawhin, i sawi chhuah tawh ngei a rinawm. Jehova Thuhretu inpumpêk tak i nih angin, “he ram chanchin ṭha” hrilh a pawimawhzia chu i hria a. Chu kan hnathawh chungchânga Isua hrilh lâwkna chu a ziak en lo pawhin i sawi chhuak thei ngei ang.—Mt. 24:14.
2 “Ram chanchin ṭha” i hrilh hian, Isua hna lo ṭan tawh chu i thawk zawm a ni. (Luka 4:43 chhiar rawh.) Thu hrilhnaa i sawi tam ber pakhat chu “hrehawm nasa tak” hmanga Pathianin sakhaw dik lo titâwp a, lei ata suahsualna a thenfaina, mihringte chung thua Pathian rawn inrawlh thuaina tûr chungchâng hi a ni ngei ang. (Mt. 24:21) Leia remna leh hlimna a duah theih nân Pathian Ramin Paradis a rawn din tûr chungchâng pawh i sawi tam ve ngei ang. A nihna takah chuan “ram chanchin ṭha” chu, ‘“Nangmahah chuan hnam tin malsâwmsakin an awm ang,” tia Abrahama hnêna [puan] chanchin ṭha’ zîngah a tel a ni.—Gal. 3:8.
3. Engvângin nge Paula chuan Rom mite hnêna a lehkha thawnah chanchin ṭha a sawi uar kan tih theih?
3 Mahse, chanchin ṭha zînga mite mamawh ber chu kan ngaihthah deuh a ni thei ang em? Rom mite hnêna a lehkha thawnah Paula chuan “ram” tih thu mal vawi khat chauh a hman laiin, “chanchin ṭha” tih chu vawi 12 lai a hmang a ni. (Rom 14:17 chhiar rawh.) Chu lehkhabuah chuan Paula’n chanchin ṭha zînga a eng ber nge a sawi? Engvângin nge chu chanchin ṭha chu thil pawimawh tak a nih? Kan thu hrilhna biala mite hnêna “Pathian chanchin ṭha” kan hrilh hian, engvângin nge chu chu rilrua kan vawn reng ang?—Mk. 1:14; Rom 15:15, 16; 1 Thes. 2:2.
Rom Khuaa Awmte Mamawh Chu
4. Rom khuaa a tân hmasak ṭum khân Paula’n eng chungchâng nge a hril?
4 Rom khuaa a tân hmasak ber ṭuma Paula thusawite hriat chu a bengvârthlâk hle. Juda mipuite’n an va kan chuan, ani chuan (1) ‘Pathian ram thu a hriattîr a, (2) Isua lamah anmahni a thlêm a thlêm a ni.’ Eng nge a rah chhuah? “A ṭhenin a thusawi chu an ring a, a ṭhenin an ring lo.” Chu mi hnuah, Paula chuan ‘a hnêna lût apiang a lâwm ṭhîn a. (1) Pathian ram thu a hrilh a, (2) Lal Isua Krista thu pawh . . . a zirtîr ṭhîn a ni.’ (Tirh. 28:17, 23-31) Paula’n Pathian Ram chanchin a ngaihsak tih a chiang hle. Mahse eng dang nge a la sawi pawimawh? Lalram tâna thil pawimawh tak—Pathian thiltuma Isua chanvo—chu a sawi pawimawh hle a ni.
5. Paula chuan Rom lehkha thawnah eng thil mamawh tak nge a sawi?
5 Mi tin tân Isua chanchin hriat leh amaha rinna neih chu a ngai a. Rom khuaa mite hnêna a lehkha thawnah, Paula chuan he mamawh hi a phuhru a ni. A tîr lamah chuan, ‘a Fapa chanchin ṭhaa thlarauva a rawng a bâwl ṭhin Pathian’ chungchâng a ziak a. Heti hian a ziak zawm a ni: “Chanchin ṭha chu ka zahpui si lo va; tupawh a ring apiangte tân chhandamna tûra Pathian thiltihtheihna a ni si a,” tiin. A hnuah, ‘Pathianin, a chanchin ṭha sawi anga mihringte thurûk Isua Krista hmanga a ngaihtuah nî’ chungchâng a sawi leh a. Tin, “Jerusalem khua leh a vêl ram aṭangin Illurikon ram thlengin, Krista chanchin ṭha chu ram tinah ka hril kim tawh,” tiin a sawi bawk. * (Rom 1:9, 10, 16; 2:13-16; 15:18, 19) Paula’n Rom mite hnêna Isua Krista chanchin a sawi uar chhan chu eng nge nia i rin?
6, 7. Rom ram kohhran lo din ṭan dân leh kohhran mite chungchângah eng nge kan sawi theih?
6 Rom khuaa kohhran din ṭan a nih dân chu kan hre lo va. C.E. 33 Pentikost nia awm ve Judate leh saphunte chu Kristiana inletin Rom-ah an lêt leh a ni thei ang em? (Tirh. 2:10) A nih loh leh Kristian sumdâwng leh zin vâk vêlte’n thutak chu Rom khuaah an theh darh a ni thei ang em? Engpawh ni ta se, Paula’n lehkha thawn a ziah hun, C.E. 56 vêlah chuan kohhran din a nihna chu a rei tawh ang reng a ni. (Rom 1:8) Rom kohhran chu eng ang mite hmanga din nge a nih?
7 Ṭhenkhat chu Juda mi an ni a. Paula chuan Andronika leh Junia te chu “ka chipui” tiin chibai a bûk a, a chipui Juda mite a sawina a ni ngei ang. Rom khuaa puan in siamtu Akuila leh a nupui Priskilli te pawh Juda mi an ni ve bawk. (Rom 4:1; 9:3, 4; 16:3, 4, 7; Tirh. 18:2) Mahse, Paula’n chibai a bûk unau tam takte chu Jentail an nih hmêl hle. Ṭhenkhat phei chu “Kaisara chhûngte” an ni a, chu chu Kaisara chhiahhlawh leh a khâwn bâwl upa tênau deuhte pawh an ni thei ang.—Phil. 4:22; Rom 1:6; 11:13.
8. Rom khuaa mite’n eng dinhmun khirh tak nge an hmachhawn?
8 Rom khuaa Kristian zawng zawngte chuan dinhmun khirh tak an hmachhawn ṭheuh va, chu chu keini pawhin kan hmachhawn ve a ni. Paula chuan heti hian a sawi: “Mi zawng zawngin thil an tisual tawh vek a, Pathian ropuina an chang zo ta lo,” tiin. (Rom 3:23) Paula’n lehkha a thawnte tân sual nei an ni tih leh chu dinhmun hmachhawn thei tûra Pathian thil hman ring tûr an ni tih pawm a ngai a ni.
Sual Neih Inhriat A Ngai
9. Paula chuan chanchin ṭha avânga neih theih eng nge a târ lan?
9 Rom mite hnêna a lehkha thawn bul ṭanna lamah Paula chuan a sawi fo ṭhin chanchin ṭhain rah chhuah ropui tak a neih theih chu hetiang hian a sawi lang a ni: “Chanchin ṭha chu ka zahpui si lo va; tupawh a ring apiangte tân chhandamna tûra Pathian thiltihtheihna a ni si a; atîrin Juda mi tân a ni a, tin, Grik mi tân pawh a lo ni leh a,” tiin. Ni e, chanchin ṭha avângin chhandamna chu neih theih a ni. Mahse, chu mi nei tûr chuan Habakuka 2:4-a târ lan thu pawimawh tak: “Mi fel erawh chu a rinnain a nung ang,” tih nêna inremin rinna neih a ngai a ni. (Rom 1:16, 17; Gal. 3:11; Heb. 10:38) A nih leh, engtin nge chhandamna thlen thei chu chanchin ṭha leh “mi zawng zawngin thil an tisual tawh vek” tih chu a inkûngkaih?
10, 11. Engvângin nge Rom 3:23 thu hi mi ṭhenkhat tân mak lo mah se, mi dang tân thilmak tak a nih?
10 Miin chhandamna neihtîr thei rinna a neih hmain, sual a nei tih a pawm phawt a ngai a. Hei hi Pathiana rinna neia seiliante leh Bible hre ve deuh nualte tân chuan thil thar a ni hauh lo vang. (Thuhriltu 7:20 chhiar rawh.) An pawm emaw, pawm lo emaw a lo berah pawh Paula’n: “Mi zawng zawngin thil an tisual tawh vek,” tia a sawi awmzia chu an hria a ni. (Rom 3:23) Chuti chung pawhin, kan rawngbâwlnaah he thu hre thiam lote pawh kan tawng ve ṭeuh thei bawk.
11 Ram ṭhenkhatah chuan, mite chu sual nei saa piang, sual rochung an ni tih ngaih dân nei tûra enkawl chhoh an ni lo. Tuemaw chuan thil a tisualin, mize duhawm lote a nei a; tin, thil sualte pawh a ti ve ṭhîn tih a inhria pawh a ni thei. Tin, mi dangte pawh amah ang bawk an ni tih a hmu ve ṭhîn thei bawk. Chuti chung pawhin, a lo seilen dân avângin amah leh mi dangte chutianga an awm chhan chu a hre thiam chiah lo thei a ni. A nihna takah chuan ṭawng ṭhenkhatah, mi chu sual nei anga i sawi chuan mi dangte tân ani chu thil sual ti emaw, dân ṭhenkhat bawhchhia emaw anga ngaih theih a ni a. Chutiang dinhmuna seilian tân chuan Paula sawi tum ang chi mi sual nia inhriatna neih chu a harsa ngei ang.
12. Engvângin nge mi tam takin sual nei vek kan ni tih an rin loh?
12 Kristianna ramahte pawh, mi tam tak chuan sual nei an ni tih an pawm lo. Engvângin nge? Biak ina inkhâwm châng an nei chung pawhin, Bible-a chuang Adama leh Evi chanchin hi thawnthu phuahchawp mai angin an ngai a ni. Mi dangte chu sakhaw ngaihsak lo chhûngkua leh khawtlânga seilian an ni a. Anni chuan Pathian a awm tih an ringhlel a, chuvângin Chungnung Bera’n mihringte tân nungchang lamah tehna a siam a, chu tehnate mila nun loh chu sual a ni tih an hre thiam lo. Thu danga sawi chuan, anni chu Paula’n kum zabi khatnaa “beiseina rêng nei lo,” leh ‘khawvêla Pathian lova awm’ a sawite ang chu an ni.—Eph. 2:12.
13, 14. (a) Pathian a awm tih leh sual nei an ni tih ring lotute’n chhuanlam tûr an neih loh chhan pakhat chu eng nge ni? (b) Chutianga rin lohna chuan mi tam tak chu khawi lamah nge a hruai?
13 Rom mite hnêna a lehkha thawnah Paula chuan chutiang mite’n chutih lai leh tûn laiah pawh chhuanlam tûr an neih loh chhan pahnih a târ lang a. A chhan hmasa zâwk chu thil siamte’n Siamtu a awm a ni tih a hriattîrna hi a ni. (Rom 1:19, 20 chhiar rawh.) Hei hi Rom khua aṭanga Hebrai mite hnêna a lehkha thawna Paula thusawi: “In tin hian satu a nei ṭheuh ṭhîn a; nimahsela, engkim dintu erawh chu Pathian a ni,” tih nên hian a inrem a ni. (Heb. 3:4, Baptist Mid-Mission) Chutiang chhût dân aṭang chuan lei leh vân dintu—Siamtu—a awm tih a lang a ni.
14 Chuvângin Paula chuan Rom mite hnêna a lehkha thawnah hmân lai Israelte pawh tiamin nunna nei lo milem betu tupawhin “chhuanlam tûr” an nei lo tia sawi theih chhan ṭha tak a nei a. Dân pângngai anga mipat hmeichhiatna hmang lo va, neih inang inkawpte pawhin “chhuanlam tûr” an nei lo. (Rom 1:22-27) Paula chuan ‘Judate leh Grikte chu sual bâwiha awm vek’ an ni tiin dik takin thu tâwp a siam a ni.—Rom 3:9.
Min ‘Hriatpuitu’
15. Mi tinin eng nge an neih a, chu chuan anni chu engtin nge a nghawng?
15 Rom lehkha thawn chuan mite’n sual nei an nihzia leh chu dinhmun khirh tak aṭanga tlân chhuah an mamawhzia an hriat chhan tûr dang a târ lang a. Hmân lai Israelte hnêna Pathian pêk dân chungchângah, Paula chuan: “Tupawh Dân neia thil tisual chu, Dâna rorêlin a awm ang,” tiin a ziak a. (Rom 2:12) A thil chhût dân chu chhunzawmin, Paula chuan Pathian dân pêk hre lo hnam tin chi tin zînga mite chuan “thinlung pianpuia Dân thilte” an tih fo dân a kawhhmuh a ni. Engvângin nge chûng mite chuan chhûngkhat inngaih te, tualthah te, leh rûkrûk te chu an khap? Paula chuan a chhan a târ lang a ni: Chhia leh ṭha hriatna an nei, tiin.—Rom 2:13-16 chhiar rawh.
16. Engvângin nge chhia leh ṭha hriatna neih chu sual pumpelhna a nih chuan loh?
16 Nimahsela, chhûng lam aṭanga hriatpuitu anga hnathawk chhia leh ṭha hriatna neih avâng maiin miin a kaihhruaina a zui ngei dâwn tihna a ni chuang lo tih i hmu tawh mai thei a. Hmân lai Israelte chanchin chuan chu mi dikzia chu a târ lang. Anni chuan Pathian pêk chhia leh ṭha hriatna leh rûkrûk leh inngaihna laka vaukhânna dân thupêk chiang tak an nei chung pawhin, an chhia leh ṭha hriatna leh Jehova Dân kalhin thil an ti fo ṭhîn. (Rom 2:21-23) Anni chuan a lêt hnihin mawh an phur a, chuvângin mi sual, Pathian tehna leh a duhzâwng tlin zo lote an ni. Hei hian anmahni Siamtu nêna an inlaichînna chu nasa takin a tichhia a ni.—Lev. 19:11; 20:10; Rom 3:20.
17. Rom mite tâna ziak lehkhabu-ah eng ang fuihna nge kan hmuh?
17 Rom lehkha thawn aṭanga kan lo ngaihtuah tawhte chuan keimahni pawh tiamin Engkimtitheia hmaa mihringte dinhmun chhiatzia chu a târ lang ngei mai. Amaherawhchu, Paula chuan a thusawi a titâwp mai lo. Davida thusawi Sâm 32:1, 2-a kan hmuh chu la chhâwngin, ani chuan: “An bawhchhiatnate ngaihdama awm leh, an sualte khuha awm chu an eng a thâwl e, Lalpan khawlohna neia a ruat loh chu a eng a thâwl e,” tiin a ziak a ni. (Rom 4:7, 8) Ni e, Pathian chuan dân ang thlapa sual ngaihdamna tûr kawng chu a ruahman a ni.
Isua Chungchânga Innghat Chanchin Ṭha
18, 19. (a) Paul chuan Rom mite hnênah chanchin ṭha zînga a eng ber nge a sawi? (b) Lalram malsâwmnate dawng tûrin eng nge kan pawm ngai?
18 “Chu chu chanchin ṭha a va ni tak êm!” tiin i chhâng lêt mai thei. Chanchin ṭha zawng a ni tak meuh mai a, chu chuan Paula’n Rom lehkha thawna a târ lan chanchin ṭha hmêlhmang dangah min hruai thleng a ni. Kan târ lan tâk angin, Paula chuan heti hian a ziak a ni: “Chanchin ṭha chu ka zahpui si lo va; . . . chhandamna tûra Pathian thiltihtheihna a ni,” tiin.—Rom 1:15, 16.
19 Chu chanchin ṭha chu Pathian thiltum hlen chhuahnaa Isua chanvo neihah a innghat tlat a ni. Paula chuan ‘chanchin ṭha sawi anga mihringte thurûk Isua Krista hmanga [Pathianin] a ngaihtuah nî’ chu a thlîr reng a ni. (Rom 2:13-16) Chutianga a sawi avângin, ‘Krista leh Pathian ram,’ a nih loh leh Lalram hmanga Pathian thiltih tûr chu a sawi nêp tihna a ni lo. (Eph. 5:5) Mahse, Pathian Rama kan nun a, a malsâwmnate kan chen theih nân, (1) Pathian mit hmuha mi sual kan nihzia leh (2) kan sualte ngaihdam nâna Isua Krista kan rin a ṭûlzia kan pawm a ngai tih min kawhhmuh a ni. Miin hêng Pathian thiltumte a hriatthiam a, a pawm bawk a, chu miin beiseina a pêkte a hmuh thiam hunah chuan, “Chu chu chanchin ṭha a va ni tak êm!” tiin dik takin a sawi thei tawh ang.
20, 21. Rawngbâwlnaah Rom lehkha thawna sawi uar chanchin ṭha hi engvângin nge rilrua kan dah reng ang a, chu chuan eng nge a rah chhuah theih?
20 Kan Kristian rawngbâwlnaah he mi chungchânga chanchin ṭha hi rilruah kan vawng reng tûr a ni a. Isua chanchin sawiin, Paula chuan Isaia thu: “Tupawh amah ring apiang an mualpho lo vang,” tih chu a la chhâwng a ni. (Rom 10:11; Is. 28:16) Bible-in sual chungchâng a sawi hretute tân chuan Isua chanchin bulpuite chu a mak kher lo vang. Mahse, mi dangte tân chuan thil thar, an hnam dâna an hriat loh leh an rin loh tlângpui a ni thei a ni. Chutiang mite’n Pathian leh Bible an rawn rin tâkah chuan, Isua chanvo kan hrilhfiah a ngai ang. A dawta thuziak chuan Rom bung 5-nain he mi chungchânga chanchin ṭha a sawi dân chu min hrilhfiah ang a. Chu chu rawngbâwlnaah ṭangkai i ti hle ngei ang.
21 Rom lehkha thawna sawi nawn fo chanchin ṭha hre thiam tûra mi rilru ṭhate ṭanpui chu thil manhla tak a ni. Chu chanchin ṭha chu “tupawh a ring apiangte tân chhandamna tûra Pathian thiltihtheihna a ni si a.” (Rom 1:16) Chutiang chuan, lâwmman kan dawn bâkah, Rom 10:15-a kan hmuh Paula thu lâk chhuah: “Thil ṭha chanchin lâwmawm thlentute ke chu a va mawi êm!” tih mi dangte’n an pawm pawh kan hmu bawk ang.—Is. 52:7. (w11-E 06/15)
[Footnote]
^ par. 5 Hetiang ṭawngkam hi thlarauva thâwk khum lehkhabu dangah pawh a lang a ni.—Mk. 1:1; 1 Kor. 9:12; Phil. 1:27, 28.
Kan Hre Chhuak Em?
• Rom mite tâna ziak lehkhabu-ah eng chungchânga chanchin ṭha nge târ lan a nih?
• Mi dangte chu eng thil nge hre thiam tûra kan ṭanpui ngai?
• Engtin nge “Krista chanchin ṭha” chu kan tân leh mi dangte tân malsâwmna a nih theih?
[Zirlai Atâna Zawhnate]
[Phêk 16-naa thu lâk chhuah]
Rom lehkha thawna sawi uar chanchin ṭhaah chuan Pathian thiltuma Isua chanvo chelh pawimawh tak a tel
[Phêk 17-naa milem]
Thihna thlen thei hmêlhemna pawi tak—sual—nei sain kan piang vek!
