Jehova Vaukhânna Thu Chiang Takte Chu I Zâwm Ang Em?
Jehova Vaukhânna Thu Chiang Takte Chu I Zâwm Ang Em?
“Hei hi kawng a nih hi, tah hian kal rawh u.”—IS. 30:21.
1, 2. Eng nge Setana’n tih a tum tlat a, engtin nge Bible-in min ṭanpui?
KAWNG kawhhmuhna dik lo chuan a hruai sual thei che mai ni lovin, a hlauhawm thei a ni. I ṭhian tuemaw chuan mi sual pakhatin mite kawng botîr a duh avânga kawng kawhhmuhna hawi zâwng a thlâk thu a hrilh che angah han inchan teh. Chu a vaukhânna thu chu i ngai pawimawh ngei ang.
2 Bible chuan boralna kawng leh chatuana nunna kawng a awm thu a sawi a. Boralna kawnga mi tam tak an kal thu a sawi bawk. Setana chuan mi sualpa angin anni chu a bum a, keini pawh mi bum a tum reng a ni. (Thup. 12:9) Thuziak hmasaa thil hlauhawm kan sawi tâkte kha chatuan nunna kawng kan pênsanna tûra Setana thil hman a ni a. (Mt. 7:13, 14) Chutih rualin, kan ṭhian Pathian Jehova chuan Setana bumna lakah min vaukhân tih kan zir ve bawk. Tûnah chuan min bum nâna Setana thil hman dang pathum leh chûngte pumpelh tûra Bible-in min ṭanpui dân kan sawi ang. Bible kan chhiar hian, Jehova chu kan hnunga kal a: “Hei hi kawng a nih hi, tah hian kal rawh u,” tia min hrilh angin kan mitthla thei a ni. (Is. 30:21) Chûng vaukhânna thu chiang takte kan zir hian Jehova thusawite zawm chu kan tum nghet lehzual ang.
“Zirtîrtu Derte” Zui Suh
3, 4. (a) Engvângin nge zirtîrtu derte chu tui awm lohna tuichhunchhuah ang an nih? (b) Zirtîrtu derte chu khawi aṭanga lo chhuak nge an nih a, eng nge an duh?
3 I zin kawngah thlalêr ram paltlang ngai angah han inchan la. Hla taka awm tuichhunchhuah chu i hmu a, i tuihâl tihreh tumin i pan vang vang a ni. Mahse, i han thlen chuan tui rêng a lo awm si lo. I va beidawng tak êm! Zirtîrtu derte chu tui awm lohna tuichhunchhuah ang an ni a. Thutak tui hmuh tuma va pantute chu an beidawng hle ang. Pathian Jehova chuan tirhkoh Paula leh Petera hmangin zirtîrtu derte chungchângah min vaukhân a ni. (Tirhkohte 20:29, 30; 2 Petera 2:1-3 chhiar rawh.) Chûng zirtîrtu derte chu tute nge ni? An lo chhuahna leh mite an bum dân chu Paula leh Petera te thusawi aṭangin kan hre thei a ni.
4 Paula chuan Ephesi kohhran upate hnênah: “In zînga mi ngei pawh hi . . . thu hran sawi in lo la awm ang,” tiin a sawi a. Petera pawhin kohhran ṭhenkhat hnêna a lehkha thawnah: “In zîngah pawh zirtîrtu derte an la awm ang,” tih a ziak bawk. Chuvângin, zirtîrtu derte chu kohhran chhûng aṭangin an lo chhuak thei ang. Chûng mite chu kalpêngte an ni. * Anni chuan eng nge an duh? Paula chuan Jehova inawpna pâwl an chhuahsan ruala ‘zirtîrhote an hnêna pakaitîr’ an duh thu a sawi. Heta Paula’n zirtîrhote a tih hi Isua Krista zirtîrte an ni a. Hêng zirtîrtu derte hi zirtîr siam tûrin kohhran pâwnah an chhuak lo. Kohhran chhûnga zirtîrte lâk pên, a nih loh leh rûk chhuah chu an tum zâwk a ni. Isua chuan chûng kalpêngte chu berâm seh chîng chinghniate ang an nih thu a sawi a. Kohhran mite rinna tihchhiat leh thutak kalsantîr chu an duh a ni.—Mt. 7:15; 2 Tim. 2:18.
5. Zirtîrtu derte chuan engtin nge mite an bum?
5 Engtin nge zirtîrtu derte chuan mite an bum? Fing vervêk takin an bum a. Dân lo anga sumdâwngtute’n ram chhûnga thil an tawlh rûk angin, kalpêngte chuan kohhran chhûngah an ngaih dân chu “arûkin” an luhpui a ni. Anni chuan lehkha pawimawh lem siamtu mi sual angin, an ngaih dân dik lote a dik anga a lan theih nân ‘dâwt thu’ an hmang a. Anni chuan zirtîrna dik lo chu theh darhin, an ngaih dân mil tûrin “Pathian Lehkha Thu . . . an ngai kawi” a ni. (2 Pet. 2:1, 3, 13; 3:16) Kalpêngte chuan kan ṭhatna tûr an duh lo tih a chiang hle a, anmahni kan zui chuan, chatuan nunna kawng kan kalsan ang.
6. Zirtîrtu derte chungchângah eng vaukhânna thu chiang tak nge Bible-in min pêk?
6 Engtin nge zirtîrtu derte laka kan invên theih ang? Bible chuan chûng mite chu “hawisan” tûr an nihzia sawiin kan tih tûr chiah chu min hrilh a ni. (Rom 16:17; 2 Johana 9-11 chhiar rawh.) A awmzia chu an lak ata kan inlahrang tûr tihna a ni. Bible vaukhânna chu natna kai chhâwn theih vei tuemaw bula awm lo tûra doctor min vaukhânna ang a ni a. Chu natna chu i kai chuan i thi dâwn tih doctor chuan a hria a ni. A vaukhânna chu a chiang hle a, a sawi ang chuan i ti ngei ang. Bible chuan kalpêngte chu mi “â” tia kovin, mi dangte chu anmahni ngaihtuah ang ṭâwmpui tûra siam nân an zirtîrna chu an hmang a ti. (1 Tim. 6:3, 4) Jehova chu kan sawi tâk doctor ṭha tak ang chu a ni. Zirtîrtu derte lak ata inlahrang tûrin min hrilh chiang a. A vaukhânna chu zawm kan tum tlat reng tûr a ni.
7, 8. (a) Zirtîrtu derte hawisan tûrin eng nge kan tih ngai? (b) Engvângin nge zirtîrtu derte hawisan chu i tum tlat ang?
7 Zirtîrtu derte laka inlahrang tûrin eng nge kan tih ngai? Chûng mite chu kan be lo vang a, kan inah kan lâwm lût hek lo vang. Tin, an lehkhabute chhiar lovin, TV-ah te kan en lo vang a, Internet-a an thil ziahte kan chhiar loh bâkah, an thuziakte chungchâng kan ngaih dân pawh kan ziak lang lo vang. Engvângin nge anni chu hawisan kan tum tlat? A chhan bul ber chu “thutak Pathian” kan hmangaih vâng a ni. Chuvângin, Pathian Thu-a thutak kalhzâwng zirtîrna dik lote ngaihthlâk chu kan duh lo. (Sâm 31:5; Joh. 17:17) Tin, Jehova’n thutak ropui takte min zirtîr nâna a hman a inawpna pâwl pawh kan hmangaih bawk a. Jehova hming leh a awmzia te, he lei tâna a thiltum te, kan thih hnua kan chunga thilthleng te, leh thawhleh beiseina te chungchâng min zirtîrtu chu Jehova inawpna pâwl hi a ni. Hêngte leh thutak dangte i zir tirha i hlimzia kha i la hre reng em? Zirtîrtu derte dâwt thu chuan chûng thutak zirtîrtu che inawpna pâwl chu dotîr che suh se.—Joh. 6:66-69.
8 Zirtîrtu derte chuan eng thu pawh sawi mah se, anni chu kan zui hauh lo vang! Tui awm lohna tuichhunchhuah ang mite thusawi ngaihthlâk chhan tûr kan nei lo. A ngaithlatute chu an la beidawng ngei dâwn si a. Jehova leh a inawpna pâwl chunga rinawm chu kan tum tlat a ni. Chu pâwl chuan min tibeidawng ngai lo; Pathian Thu aṭangin thutak tui fîm tak chu hnianghnâr takin min pe reng zâwk a ni.—Is. 55:1-3; Mt. 24:45-47.
“Thawnthu Mai Mai” Zui Suh
9, 10. Paula’n Timothea hnênah thawnthu mai maite chungchângah eng vaukhânna nge a pêk a, Paula’n eng chungchâng nge a ngaihtuah mai theih? (Footnote en tel rawh.)
9 Kawng dik lo lam kâwk tûra kawng kawhhmuhna herh danglam chuan min bum thei a. Kawng dik lo lam a kâwk tih awlsam taka hriat theih châng awm mah se, hriat harsat châng pawh a awm thei a ni. Setana dâwt thu pawh chutiang bawk chu a ni a. Kan fîmkhur loh chuan a dâwt thu ṭhenkhat chuan min bum thei a ni. Tirhkoh Paula chuan chûng dâwt thute chungchângah min vaukhân a, “thawnthu mai mai” tiin a ko a ni. (1 Timothea 1:3, 4 chhiar rawh.) Chatuana nunna kawng kan zawh reng theih nân chûng thawnthu mai maite nihna leh kan hawisan theih dân tûr kan hriat a ngai a ni.
10 Thawnthu mai maite chungchânga Paula vaukhânna chu Kristian upa, Timothea hnêna a lehkha thawn pakhatnaah kan hmu a. Paula chuan Timothea chu kohhran vawng thianghlim tûr leh a unaute Jehova laka rinawm tûra ṭanpui tûrin a hrilh a ni. (1 Tim. 1:18, 19) Paula hman Grik thu mal hi dâwt emaw, thawnthu phuahchawp emaw tihna a ni a. The International Standard Bible Encyclopaedia sawi dân chuan thawnthu mai mai chu thil tak tak nêna inzawmna nei lo sakhaw lam thawnthu a ni. Paula chuan hmân lai mite phuahchawp leh mi dangte hriat châkna neihtîr thei sakhaw lam dâwt thute chungchâng a ngaihtuah pawh a ni thei ang. * Paula’n chûng thawnthute hlauhawm a tih chhan chu “inhnialna mai mai a thlen” vâng a ni. Chu chu chutiang thawnthu ngaihventute’n thil dik lote chungchângah zawhna nei ṭanin, a chhânna hmuh tumin hun an hmang zo ṭhîn tihna a ni a. Setana chuan chûng thawnthu phuahchawpte leh sakhaw lama dâwt thute chu thil pawimawh ber theihnghilh tûra mite siam nân a hmang a ni. Paula sawi tum chu a chiang hle: Thawnthu mai maite chu ngaihsak suh!
11. Engtin nge Setana’n mite bum nân sakhaw dik lo a hman a, eng vaukhânna thu nge kan ngaih pawimawh ang?
11 Mi fîmkhur lote bum thei thawnthu mai mai ṭhenkhat chu engte nge ni? Kan beng ‘thutak lama min chhutngawntîr thei,’ a nih loh leh thutak ngaithlâkna min tâwptîr thei sakhaw zirtîrna engpawh hi thawnthu mai mai chu a ni kan ti thei ang. (2 Tim. 4:3, 4) Setana chu a fing vervêk hle a. Mite bum nân sakhaw dik lo a hmang a ni. Chuvângin, Bible chuan “êng tirhkohvah” a insiam chawp ṭhîn tih a sawi. (2 Kor. 11:14) Entîr nân, Kristianna rama sakhuate chuan Krista zui anga inchhâl siin Trinity leh hremhmun meidîl ang chi dâwt thute an zirtîr a. Mihringte’n thih hnua dam chhunzawm zêl thil engemaw nei angin an zirtîr bawk. Mi tam tak chuan Krismas leh Easter hian Pathian a tihlâwm an ring a; mahse, hêng huna mite thiltih chu biakna dik lo aṭanga lo kal vek a ni. Sakhaw dik lo ata inlahrang a, ‘thil bawlhhlawh rêng rêng dek lo’ tûra Pathian vaukhânna kan ngaih pawimawh phawt chuan thawnthu mai maiin min bum lo vang.—2 Kor. 6:14-17.
12, 13. (a) Setana’n eng dâwt thu nge a tihchhuah a, chûngte chungchânga thudik chu eng nge ni? (b) Setana’n thawnthu mai maite hmanga min bum kan duh loh chuan eng nge kan tih ang?
12 Setana chuan mi fîmkhur lote bum thei dâwt dang pawh a tichhuak a. A dâwt thu pathum i lo sawiho ang u. I duh apiang i ti thei; thil dik leh dik lo chungchângah mahniin thutlûkna insiam rawh. He dâwt thu hi TV-ah te, film-ah te, magazine-ah te, leh Internet-ah te kan hriat fo avângin, chutianga ngaihtuah a, khawvêl ngaihtuahna bawlhhlawh tak zui ve mai chu a awlsam hle. Mahse, thil dik leh dik lo min hrilh tûrin Pathian kan mamawh tih hi thu dik tak zâwk chu a ni. (Jer. 10:23) Pathian hi lei chungchângah a rawn inrawlh ngai lo vang. He ngaih dân hian mite chu vawiin atân chauh a ngaihtuahtîr a. Hma lam hun emaw, Pathian tihlâwm emaw chu an ngaihtuah lo. An ngaihtuah angin kan ngaihtuah ṭan thei a, Pathian rawng kan bâwlnaah ‘thatchhia leh rah lovin’ kan lo awm thei a ni. (2 Pet. 1:8) Jehova nî a lo thleng thuai dâwn tih hi thu dik a ni a, chu mi kan rinzia chu kan nun dânin kan lantîr tûr a ni. (Mt. 24:44) Pathianin a ngaihsak lo che. Setana chuan Pathian hmangaihna dawng tlâk lo nia inhriatna kan neih chu a duh a. He a dâwt thu kan rin chuan Jehova rawngbâwlna kan bânsan thei a ni. Thu dik chu hei zâwk hi a ni: Jehova chuan a chhiahhlawh tinte chu a hmangaihin, a tân an pawimawh vek a ni, tih hi.—Mt. 10:29-31.
13 Setana khawvêla mite ngaihtuah anga ngaihtuah lo tûrin kan fîmkhur reng tûr a ni a. A châng chuan an thil sawi leh ngaihtuah dânte chu dik hle niin a lang thei a. Mahse, Setana chuan min bum a duh a, amah ang rênga mi bum thiam tumah an awm lo tih hre reng ang che. Setana’n thawnthu mai maia min bum kan duh loh chuan Bible-a vaukhânna thute hi kan ngaihsak tûr a ni.—2 Pet. 1:16.
“Setana” Zui Suh
14. Hmeithai la naupang deuh ṭhenkhatte hnênah Paula’n eng vaukhânna nge a pêk a, engvângin nge chu vaukhânna kan ngaihsak ṭheuh a ngaih?
14 Kawng kawhhmuhnaah: “Setana Zuina Kawng” tih inziak angah han chan teh. Kristian tumahin chu kawhhmuhna chu an zui duh hauh lo vang. Mahse, Kristian dikte pawhin “Setana” an zui ṭan thei a. A nih theih dân chu Paula’n min vaukhân a ni. (1 Timothea 5:11-15 chhiar rawh.) Ani chuan chutih laia kohhrana hmeithai la naupang deuh ṭhenkhatte chungchâng ziak mah se, a thusawi aṭangin kan inzir ṭheuh thei a ni. Chûng hmeithaite chuan Setana an zui tih rêng an inhre lo; mahse, an thiltih leh an titi chuan an zui tih a târ lang si. Engtin nge kan hriat loh hlâna Setana zui chu kan pumpelh theih ang? Tûnah chuan mi dang chanchin a ṭha lo lam sawi a, inrêl chhiat chungchâng Paula vaukhânna thu kan sawiho vang.
15. Setana thiltum hi eng nge ni a, a duhzâwng kan tih nân eng thilte nge a hman?
15 Setana chuan kan thurinte kan sawi chhuah chu a duh lo va. Kan chanchin ṭha hrilh chu bânsan tûrin min duh a ni. (Thup. 12:17) Chu mi atân hun khawhralna thil emaw, inṭhenna awmtîr thei thil emaw kan tih chu a duh a. Setana thil tih dân Paula sawi chu chhinchhiah teh. “Lêng lâwr . . . thatchhiat.” Tûn themthiamna hunah hian, e-mail pawimawh lo emaw, dik hlel emawte thawna kan hun leh mi dangte hun hlu tak khawhral chu a awlsam hle. “Kamtam.” Kamtamna chuan inhauna thlentu insawi chhiatna a thlen ṭhîn. (Thuf. 26:20) An hria emaw, hre lo emaw sawichhetu chuan Diabol-Setana a entawn a ni. * “Mite thiltih rêlsak . . . chîng.” Mite’n an mi mal thil an tih dân tûr hrilh hi kan tih tûr a ni lo. Chutiang hun khawhralna leh buaina thlentu miziate chuan Lalram chanchin hrilh tûra Pathian hna min pêk kan thawhna ata min la pêng thei a ni. Jehova hna phusa taka kan thawh loh chuan Setana kan zui ṭan tihna a ni—ṭan lam nei lova awm theih a ni si lo va.—Mt. 12:30.
16. Setana zui kan duh loh chuan eng nge kan tih ang?
16 Bible thu sawite kan ngaihsak chuan Setana kan zui lo vang. Paula chuan min ṭanpui thei thil ṭhenkhat a sawi a ni. ‘Lalpa hna ṭhahnemngai takin thawk rawh.’ (1 Kor. 15:58) Jehova tâna kan thawhrim hian, thil pawimawh lote leh kan tâna hlauhawm thilte tih nân hun kan nei lo vang. (Mt. 6:33) Mi “siam ṭha” thei thute sawi rawh. (Eph. 4:29) Mi rêl chîng lo la, inrêlna thu ngaithla suh. * I unaute ring la, zah thiam rawh. Chutianga i tih chuan an chungchâng a ṭha lam hlîr i sawi ang. ‘Mahni hna ṭheuh neih’ tum tlat rawh. (1 Thes. 4:11) Mite chu an sawi duh loh leh mi dangte hriat atâna an duh loh mi mal thilte zâwt si lovin i ngaihsakzia lantîr rawh. Chu bâkah, mahnia thu tlûkna siam ngai thilahte hian mi dang tân thu tlûkna kan siamsak tûr a ni lo bawk.—Gal. 6:5.
17. (a) Engvângin nge Jehova’n vaukhânna kan sawi tâkte min pêk? (b) Eng nge tih kan tum tlat ang?
17 Pathian Jehova’n kan zui loh tûr chiang taka min hrilh avângin kan va lâwm tak êm! Vaukhânna kan sawi tâkte min pêk chhan chu min hmangaih vâng a ni tih kan hre reng tûr a ni. Setana bum leh tihnata kan awm chu a duh lo. Jehova’n thlang tûra min duh kawng chu zîm hle mah se, chatuan nunna kawng awmchhun a ni. (Mt. 7:14) Chuvângin: “Hei hi kawng a nih hi, tah hian kal rawh u,” tia min hrilhna ngaih pawimawh chu kan tum tlat tûr a ni.—Is. 30:21. (w11-E 07/15)
[Footnote-te]
^ par. 4 Kalpênna chu biakna dik laka helna leh kalsanna a ni.
^ par. 10 Mi ṭhenkhatin Bible bute zînga mi nia an ngaih Tobit, a nih loh leh Tobias lehkhabu hi Paula hun laia thawnthu mai mai hmuh theihte zînga mi a ni a. Krista hma kum zabi thumna vêla ziak a ni. Thurin dik lo leh mitdawivaih thawnthu hlîrin a khat a. Thawnthu âwih awm lo takte chu thilthleng dik tak angin a sawi a ni.—Insight on the Scriptures, Volume 1, phêk 122-na en rawh.
^ par. 15 “Diabola” sawi nâna hman Grik thu mal chu di·aʹbo·los a ni a, “sawichhetu” tihna a ni. He thu mal hi sawichhetu bul ber Setana nihna sawi nâna hman a ni.—Joh. 8:44; Thup. 12:9, 10.
^ par. 16 “ Ar Hmul Thli Len Darh Chu” tih bâwm en rawh.
Kan Chhânna Eng Nge?
A hnuaia Bible chânga vaukhânnate i ngaihsakzia engtin nge i lantîr theih?
• 2 Petera 2:1-3
• 1 Timothea 1:3, 4
• 1 Timothea 5:11-15
[Zirlai Atâna Zawhnate]
[Phêk 19-naa bâwm/milemte]
Ar Hmul Thli Len Darh
Inrêl chhiatnain a thlen theih thil târ langtu hmân lai Judate thawnthu pakhat a awm a. Kawng hrang hranga sawi a ni a, a nih dân tlângpui chu hetiang hi a ni.
Pa pakhat chuan an khuaa mi fing ber chu a sawi chhe char char a. A hnuah, a thiltih dik lohzia hriain mi fing hnênah ngaihdam a dîl a, siam ṭhat nâna a ṭûl ang ang tih a inhuam thu a hrilh bawk a. Mi fing chuan thil pakhat tihsak a lo ngên a: Ar hmul nêma khat lukham la a, zai ṭet a, ar hmulte thli len darhtîr tûrin. Mi rêl chînga chuan a ngaihna hre lo mah se, a sawi anga a tih hnuah mi fing hnênah chuan a va kal a.
“Tûnah chuan min ngaidam tawh ang chu maw?” a ti a.
Mi fing chuan: “Kal la, ar hmul darh tawh kha va chhar khâwm leh phawt rawh,” a lo ti a.
“Engtin nge ka tih theih ang? Thliin a lên darh vek tawh alâwm.”
“Ar hmul lâk khâwm leh a harsat ang bawkin, i thusawiin a thlen chhiatna siam ṭhat chu a harsa hle tawh a ni.”
A zirtîr chu a chiang hle. Kan thu sawi tawh chu lâk lêt theih a ni lo va, siam ṭhat theih pawh a ni ṭhîn lo. Chuvângin, mi dang kan rêl hmain, kan ṭawngkam chu ar hmul thli len darh ang a ni tih hriat reng chu a finthlâk a ni.
[Phêk 16-naa milem]
Engtin nge mi ṭhenkhatin kalpêngte an ina an sâwm theih?
