Pathian Chawlhnaah Chuan I Lût Tawh Em?
Pathian Chawlhnaah Chuan I Lût Tawh Em?
“Pathian thu hi a nung a, thil a ti thei a.”—HEB. 4:12.
1. Tûn laia Pathian chawlhnaa kan luh theih dân kawng khat chu eng nge ni a, mahse, chu chu engvângin nge thil harsa tak a nih theih?
TUN laia Pathian chawlhnaa lût tûr chuan Jehova thu âwih leh a inawpna pâwl thawhpui a ngaihzia kan lo hre tawh a. Kan thu âwihna chuan Jehova hnênah a thiltum a thlen famkim kan duhzia a târ lang. Mahse, thu âwih chu a harsat hle châng a awm thei. Entîr nân, kan thil tih duh tak mai chu Jehova’n kan tih a duh lo tih kan hriat hian, a thu âwih nghâl mai chu a harsa hle thei a. Chutiang kan nih chuan mi “tihnuam” tak nih kan zir a ngai a ni. (Jak. 3:17) He thuziakah hian, engtik lai pawha thu âwih kan peih leh peih loh târ lan theihna hun remchâng min petu dinhmun ṭhenkhat chungchâng kan hmu ang.
2, 3. Jehova tihlâwm nân eng nge kan tih chhoh zêl ngai?
2 Inthlâkthlengna i neih a ngai tih Bible aṭanga i hriat hian, tihnuam taka zawm nghâl mai i inpeih em? Hei hi han ngaihtuah teh: Bible chuan Jehova’n a inawpna pâwl chhûnga hruai luh a duhte chu “hnam tinrêng thil duhzâwngte” tiin a ko va. (Hag. 2:7) A awmzia chu Pathianin dikna an ngainat avânga a ngaihhlut mite chu a thlang tihna a ni. Bible kan zir ṭan tirh chuan thil ṭha lo kan la ti deuh vek ngei mai a. Mahse, Pathian leh a Fapa kan hmangaih a, Pathian tihlâwm kan duh avângin, kan ngaihtuahna leh thiltihah inthlâkthlengna pawimawh takte chu lâwm takin kan siam a. Ṭawngṭaiin Jehova ṭanpuina kan dîl a, a ṭûl ang anga insiam ṭha tûrin ṭan kan la bawk. A tâwpah chuan baptisma changin, Jehova duhsakna kan dawng thei ta a ni.—Kolossa 1:9, 10 chhiar rawh.
3 Mi ṭha famkim kan la nih loh avângin kan nunah inthlâkthlengna kan neih chhoh leh thil dik ti tûra ṭan kan lâk chhoh zêl a la ngai a. Mahse, Jehova chuan amah tihlâwm kan tum zêl chuan ṭanpui min tiam a ni.
Inthlâkthleng A Ngaih Hunah
4. Jehova chuan insiamrem kan ngaihzia min hriattîr nân eng kawng thumte nge a hman?
4 Nuna inthlâkthlengna kan neih hmain, inthlâkna lai tûr kan hriat a ngai a. Jehova chuan hemi chungchângah kawng chi hrang hrangin min ṭanpui a ni. Ani chuan Kingdom Hall-a thusawi emaw, kan magazine-a thuziak pakhat emaw chu kan ngaihtuahna leh thiltiha dik lo awm min hriattîr nân a hmang thei a. A châng chuan thusawi emaw, thu leh hla chhuah emaw kan chhiar hnuah pawh inthlâkthleng kan ngaihna lai kan hre lo thei a, chutiang hunah chuan Jehova chuan ngilnei taka min siam ṭha tûrin kohhrana unaupa emaw, unaunu emaw chu a hmang thei a ni.—Galatia 6:1 chhiar rawh.
5. Miin min siam ṭhat hunah eng anga chhân lêt châng nge kan neih a, engvângin nge Kristian upate chuan min ṭanpui chhunzawm zêl chu an tum ang?
5 Mi ṭha famkim lo dangin min zilh hian, ngilnei takin min hrilh pawh ni se a thusawi chu pawm a harsa hle thei a ni. Mahse, Jehova chuan upate chu “thuhnuairawlh” taka min ‘tundin leh’ tum tûrin thu a pe a, chu chu ngilnei taka min siam ṭha tûrin thu a pe tihna ni. (Gal. 6:1) An ṭanpuina kan pawm chuan, Jehova tân “thil duhzâwngte,” a nih loh leh hlu tak kan ni lehzual ang. Jehova hnêna kan ṭawngṭai hian mi ṭha famkim lo kan nihzia leh thil kan tihsual ṭhinzia kan hrilh fo va. Mahse, upa pakhatin thil kan tisual tih min hrilh hian kan pawm duh lo va. A chhan leh vâng pêk kan tum emaw, kan thil tihsual chu pawi lutuk lo angin kan sawi emaw ṭhîn. Siam ṭhat min tumtu chuan min duh lo emaw, ngilnei takin min hrilh lo emaw tiin kan sawi mai thei bawk. (2 Lal. 5:11) A nih loh leh upa chuan kan hriat duh lohzâwng—kan chhûngkaw zînga mi pakhat thiltih dân, kan silhfên leh inchei dân, kan invawnfai dân tûr, a nih loh leh Jehova duh loh intihhlimna nuam kan tih tak si-te—chungchâng a sawi a ni thei. Kan thin a rim avânga kan sawi loh tûr kan sawi mai chuan, chu chuan min tilungngai theiin, min ṭanpui tumtu unaupa pawh chu a timangang thei a ni. Mahse, kan thinur a reh hnu chuan, a thusawite chu kan tâna ṭha tûr a ni tih kan pawm tlângpui ṭhîn.
6. Engtin nge Pathian thu chuan ‘thinlunga ngaihtuah leh tumte a hriat nghâl theih’?
6 He thuziak ṭanchhan Bible châng, Hebrai 4:12 chuan Pathian thuin “thil a ti thei” a ti a. A awmzia chu Pathian thu chuan mite nun thlâkthleng tûrin thiltihtheihna a nei tihna a ni. A thu chuan baptisma chan hmaa insiam ṭhat kan ngaihna laite insiam ṭha tûrin min ṭanpui a. Baptisma kan chan hnuah pawh insiam ṭha zêl tûrin min ṭanpui thei bawk. Hebrai mite hnêna a lehkha thawnah, Paula chuan Pathian thuin “nunna leh thlarau . . . phel hrang khawp hialin a chhun thei a, thinlunga ngaihtuah leh tumte hi a hre nghâl thei” tih a ziak a. (Heb. 4:12) Heta “nunna” tih hian mi dangte hmuh theih pâwn lama kan lan dân a kâwk a. “Thlarau” tih hian mi dangin an hmuh theih loh chhûng lama kan nihna a kâwk a ni. Chuvângin, Paula sawi chu hei hi a ni: Pathianin tihtîr min duhte kan hriat hian, kan thiltih chuan chhûng lama kan nihna a târ lang ang. Mi dang min hmuh dân leh chhûng lama kan nihna inan loh châng a awm em? (Matthaia 23:27, 28 chhiar rawh.) A hnuaia dinhmun i chhân lêt dân tûr hi han ngaihtuah teh.
Jehova Inawpna Pâwl Rualin Hma Sâwn Zêl Rawh
7, 8. (a) Engvângin nge Hebrai Kristian ṭhenkhat chuan Mosia Dân pêng ṭhenkhat zawm zêl chu an la duh? (b) Engvângin nge anni chuan Jehova thiltum kalhin thil an ti kan tih theih?
7 Thufingte 4:18 thu: “Mi felte kawng erawh chu chhûn ên lai tak pawha êng zual deuh deuh, êng fîm tak ang a ni,” tih hi hre lo kan awm mang meuh lo vang. A awmzia chu hun a liam ang zêlin Jehova’n kan laka a duhte chu kan hre fiah lehzual a, a lâwmzâwng thilte tih dân kan thiam lehzual tihna a ni.
8 Isua thih hnuah, Hebrai Kristian tam takte chuan Mosia Dân zawm an la duh cheu tih kan hmu tawh a. (Tirh. 21:20) Paula chuan Kristiante tân Mosia Dân zawm a ngai lo tih fiah takin a sawi tawh a; mahse, ṭhenkhat chuan an tâna Jehova duhzâwng chu an la pawm lo cheu. (Kol. 2:13-15) Mosia Dân zînga ṭhenkhat an la zawm chuan, Juda sakhuana vuantute tihduhdahna pumpelh thei tûrah an inngai pawh a ni thei ang. Mahse Paula chuan an hnênah Pathian thiltum an kalh zêl chuan Pathian chawlhnaah an lût dâwn lo tih chiang takin a hrilh a ni. * (Heb. 4:1, 2, 6; Hebrai 4:11 chhiar rawh.) Jehova pawm tlâk ni tûr chuan, kawng danga amah an biak a duh tawh a ni tih an pawm ngei a ngai a ni.
9. Bible thu kan hriatthiam dân thlâk a nih hian eng ang rilru nge kan neih ang?
9 Tûn laiah, bâwih rinawm leh fing tak chuan Bible-a kan hmuh zirtîrna a engemaw ber chu tûn hmaa kan hriatthiam dân ang lo deuhva hre thiam tûra min ṭanpui châng a nei a. Hêng inthlâkthlengna avângin kan lâwm tûr a ni, Pathianin anmahni a hmang tih min hriattîr si a. Bâwih pâwl aiawhtu Governing Body chuan thutak a engemaw ber kan hriat thiam dân thlâk emaw, tihfiah zâwk emaw ngai an tih chuan, ṭhenkhatte sawi chhiat hlawhna tûr mah ni se, chutianga tih chu an hreh lo. An ngaih pawimawh ber chu Pathian thiltum mila thiltih a ni si a. Bâwih rinawm leh fing tak chuan Bible thu ṭhenkhat kan hriatthiam dân an thlâk hian, chu chu engtin nge i chhân lêt?—Luka 5:39 chhiar rawh.
10, 11. Bible zirlai ṭhenkhat chuan kawng danga thu hril tûr an nihzia an hriat hian eng nge an tih a, an hnên aṭangin eng nge kan zir theih?
10 Entîrna dang han ngaihtuah ta ila. Kum za vêl kal ta khân, Bible Zirlaite zînga thusawi thiam tak tak ṭhenkhat chuan vântlâng hmaa an thusawi hi thu hrilh dân kawng ṭha ber niin an hria a. Mite hmaa thusawi chu nuam an ti hle-in, an thusawi avânga fak hlawh chu nuam an ti hle bawk. Mahse, Jehova mite chuan a hnuah Pathianin vântlâng thusawi mai bâkah, in tinah leh kawng danga thu hril tûrin a duh tih chiang takin an hre ta a. Mahse, thusawi thiam takte zînga ṭhenkhat chuan chutianga tih chu an duh lo. An thusawi chuan mi dang hmuhah Jehova hmangaih tak angin lantîr mahse, an thiltih chuan an hmangaih lohzia a târ lang a ni. An thiltih dân chungah Jehova chu a lâwm lo tih kan hria a. Anni chuan Pathian inawpna pâwl chu an kalsan ta a ni.—Mt. 10:1-6; Tirh. 5:42; 20:20.
11 Bible Zirlai dangte tân pawh atîrah chuan in tina thu hrilh chu a harsa zual a. Mahse anni chu Jehova inawpna pâwl chungah an rinawm a ni. A hnu lamah chuan in tina thu hrilh chu a lo awlsam chho va, Pathianin an chungah malsâwmna a vûr a ni. Tûn hmaa kan tih ngai loh thu hrilh dân hmang tûra bâwih rinawm leh fing takin min tih hunah engtin nge kan chhân lêt? Harsa ti hle mah ila an thu chu kan âwih em?
Kan Hmangaih Tak Tuemawin Jehova An Kalsan Hunah
12, 13. (a) Engvângin nge Jehova chuan ‘mi sual chu kan zîng ata hnawt chhuak’ tûra min tih? (b) Kristian nu leh pate tân eng nge harsa hle thei?
12 Jehova tilâwm tûr chuan kawng engkima thianghlim tûra a thupêkte kan zâwm tûr a ni tih kan pawm thlap a. (Tita 2:14 chhiar rawh.) Mahse, he thupêk zawm harsa tih châng kan nei mai thei. Entîr nân, Kristian rinawm nupa kawp khat fapa neih chhun chuan thutak a kalsan a ni. Pathian Jehova leh a nu leh pate nêna an inlaichînna aia “rei lo tê atân sual nawmna hlimpui” a thlan avângin, ani chu kohhran aṭanga hnawh chhuah a ni.—Heb. 11:25.
13 Chu pa nu leh pa chuan an tuar nasa hle mai! Hnawh chhuah chungchângah Bible-in “tupawh, unau hming pu siin, inngaih hmang mi emaw, mi duham emaw, milem be mi emaw, hauh hmang mi emaw, zu ruih hmang mi emaw, hlêpru mi emaw ni sela, pâwl lo tûrin in hnênah ka ziak a ni; mi chutiang hnênah chuan ei pawh ei lo tûrin” a ti tih an hria a ni. (1 Kor. 5:11, 13) Tin, “tupawh” tih ṭawngkamah hian in khata khawsa lo chhûngkaw zînga mi an tel tih an hre bawk. Mahse an fapa an hmangaih êm avângin heti hian an ngaihtuah mai thei a ni: “Kan theih ang tâwka kan fapa kan biak a ngai. Kan biak theih loh chuan Jehova hnêna kîr leh tûrin kan ṭanpui thei lo vang,” tiin. *
14, 15. Nu leh pate’n hnawh chhuah an fa biak tûr leh tûr loh chungchânga thu tlûkna an siam hunah eng nge an hriat reng ang?
14 Chutiang nu leh pate’n an tuar nasa hmuh chu a hrehawm khawp mai. An fapa chuan a thiltih thlâk tûrin duhthlanna a nei a. Mahse a thil sual tih tihzawm chu a nu leh pate leh kohhrana awm aiin a duh zâwk a ni. A nu leh pate chuan an fapa chu ṭanpui an duh a; mahse, a thiltih tum chu an thunun thei lo. Hrehawm an ti hle pawh chu hriatthiam theih tak a ni.
15 Chûng a nu leh pate chuan eng nge an tih dâwn? Jehova thupêk chiang tak chu an zâwm ang em? Chhûngkaw thil ṭûl avângin amah biak zeuh zeuh a ngaih châng chu a awm ngei ang. Mahse, an fapa chu vawi tam tak biak ngai niin an hria ang em? He mi chungchânga thu tlûkna an siam hian, Jehova’n an tih atâna a duh chu an hre reng tûr a ni a. Jehova thiltum chu a inawpna pâwl vawn thianghlim leh a theih chuan thil sual titu inlamlêttîr hi a ni. Engtin nge Kristian nu leh pate chuan Jehova duhzâwng chu an duhzâwng a ni ve tih an lantîr theih?
16, 17. Arona entîrna aṭangin eng nge kan zir theih?
16 Mosia unaupa, Arona chuan a fapa pahnihte thiltih avângin dinhmun harsa tak a tâwk a. A fapa Nadaba leh Abihua chuan Jehova hnênah mei hman loh chi an hlan avângin vân aṭanga mei lo chhuk chuan a kâng hlum ve ve a ni. Arona tawrh dân tûr chu han ngaihtuah teh. An thih miau tawh avângin inbiak theihna kawng chu a awm lo ngei mai. Mahse, Arona leh a chhûngte tâna dinhmun ti harsa lehzualtu a awm a ni. Jehova chuan Arona leh a fapa rinawmte hnênah: “[Sûnzia lantîr nân] in sam thlah suh ula, in puante pawtthlêr hek suh u, chutilochuan in thi ang a, mi zawng zawng chungah [Jehova] a thinur ang,” tiin a hrilh a ni. (Lev. 10:1-6) Kan zir tûr chu a chiang hle. Jehova kan hmangaihna chu a chunga rinawm lo chhûngkaw zînga mite kan hmangaihna aiin a sâng zâwk tûr a ni, tih hi.
17 Tûn laiah, Jehova chuan a dân zâwm lotute chu a tihlum nghâl mai ṭhîn lo. Hmangaihna lantîrin, an thil sual tih bânsan theihna hun remchâng a pe a ni. Mahse, nu leh pate’n Jehova thupêk zâwm lovin, kohhran ata hnawh chhuah an fapa emaw, fanu emaw biak chhan tûr tam tak nei angah inhre ta se, ani’n engtin nge a ngaih ang?
18, 19. Jehova chunga an rinawm zêl chuan, chhûngkuate’n eng malsâwmna nge an dawn theih?
18 Mi tam tak chuan kohhrana an kîr leh chhan chu an ṭhiante leh chhûngkaw zînga mite’n Jehova chunga an rinawm a, an biak duh miah loh vâng niin an sawi. Entîr nân, nu pakhat chuan a nun kawng thlâktîrtute zînga pakhat chu a unaupa thiltih vâng a nih thu upate a hrilh a. Hnawh chhuah a nih chhûng zawngin, a unaupa chu a rinawm a, Jehova thupêk chu a zâwm a. Chu chuan kohhrana kîr leh duhna a neihtîr a ni.
19 Chuti chu eng nge kan tih ngai ta? Kan nun kawng engkimah Jehova thu kan âwih a ngai a. Kan ṭhat famkim loh avângin harsa tih châng chu kan nei ngei ang. Mahse Jehova’n kan tih atâna a sawite chu kan tâna ṭha ber tûr a ni tih kan ring tlat tûr a ni.
“Pathian Thu Hi A Nung”
20. Eng kawng chi hnihin nge Hebrai 4:12 thu hi kan hriat thiam theih?
20 Paula’n “Pathian thu hi a nung” tih a ziah hian, Bible chungchâng a sawi lo. * Chu mi Bible bung chhûnga châng dangte chuan Pathian thutiam chungchâng a sawina a ni tih a târ lang. Paula sawi tum chu Pathian thutiamte a thleng famkim ziah tih hi a ni. Jehova chuan a thu chungchângah: “Engmah tih nei lovin ka hnênah a kîr leh lo vang,” a ti a. “Thil ti tûra ka tirhnaah chuan a hlawhtling bawk ang” tiin a sawi zawm a ni. (Is. 55:11) Chuvângin, Pathianin a thutiamte kan duh huna a thlentîr loh chuan dawhtheihna kan nei tûr a ni. Jehova chuan a thiltum tifamkim tûrin a thawk mêk tih kan hre chiang si a.—Joh. 5:17.
21. Engtin nge Hebrai 4:12 thu chuan tar lamte chu Jehova rawngbâwl zêl tûra a ṭanpui theih?
21 “Mipui tam tak” zînga mi tam takte chuan hun rei tak chhûng Jehova rawng an lo bâwl tawh a. (Thup. 7:9) Anni chuan he khawvêla an tar kûn hman an inring lo. Chuti chung pawhin, Jehova rawngbâwlnaah theih tâwp an la chhuah a ni. (Sâm 92:14) Anni chuan Pathian thu hi a nung tih leh Jehova chuan lei leh mihringte tâna a thiltum a tifamkim dâwn tih an hre bawk a ni. Pathian tân a thiltum a pawimawh êm avângin, chu mi kan ngaih pawimawh chuan ani chu a lâwm a ni. Ni sarih nî a chawlhnaah hian, Jehova’n a thutiam a tihfamkimna tûr chu engmahin a dang lo vang. Tin, a huhovin a mite chuan a thiltum an thlâwp dâwn tih a hria a ni. Chutiang chuan i thlâwp ve ang em? Pathian chawlhnaah chuan i lût ve tawh em? (w11-E 07/15)
[Footnote-te]
^ par. 8 Juda sakhaw hruaitu tam takte chuan Mosia Dân chu akip akawia zui an tum a. Mahse, Isua leia a lo kal chuan ani chu Messia a ni tih an pawm duh lo. Pathian thiltum kalhin thil an ti a ni.
^ par. 13 “Pathian Hmangaihnaah Chuan Invawng Ṭha Rawh,” (English) phêk 207-209 en rawh.
^ par. 20 Tûn laiah Pathian chuan Bible hmangin min bia a. Bible chuan nun thlâkthleng tûrin thiltihtheihna a nei a ni. Chuvângin, Hebrai 4:12 thu chu Bible sawi nân pawh a hman theih a ni.
A Tum Chu Ṭhelh Suh
• Tûn laiah Pathian chawlhnaa lût tûrin eng nge kan tih ngai?
• Bible aṭanga Pathianin kan tih atâna a duhte kan hriat hian, amah tihlâwm kan duhzia engtin nge kan lantîr?
• Eng dinhmunah nge Bible kaihhruaina zawm chu a harsat mai theih a, mahse thu âwih chu engvângin nge thil pawimawh tak a nih?
• Eng kawng chi hnihin nge Hebrai 4:12 thu hi kan hriat thiam theih?
[Zirlai Atâna Zawhnate]
[Phêk 31-naa milem]
Nu leh pate’n an tuar hle!
