Retheih Lutukna—Eng Ang Chiah Nge A Nih?

RETHEIH lutuk—chaw ei tûr te, tui in tûr te, mei tuah tûr te, chênna tûr in te, hrisêlna lam inenkawlna te, leh zirna te neih tâwk loh—chu nun atân a hlauhawm a. Chu chuan mi vaibêlchhe khat, India rama mi chêng zât ang vêl chu a nghawng a ni. Mahse, Europe Khaw Thlang Lam leh America Hmar Lama chêng mi tam zâwkte chuan mi rethei lutuk an hre ngai lo. Chuvângin, chutiang mi ṭhenkhat chanchin chu i lo en ang u.

Mbarushimana chu a nupui leh a fa panga-te nên Africa khawmualpui Rwanda ramah an chêng a. A fa parukna chu malaria avângin a boral a ni. Ani chuan: “Ka pa chuan a ram chu kan unau ruk hnêna min sem a ngai a. Ka chan chu a têt tham êm avângin ka nupui fanaute nên khaw danga kan pêm a ngai hial a ni. Kan nupa chuan lung leh balu phurin kan inhlawh ṭhîn. Kan in chuan tukverh a nei lo va. Police station-a tuichhunchhuah aṭangin tui kan chawi ṭhîn. Ni khatah vawi khat chauh chaw kan ei tlângpui ṭhîn a, hna thawh tûr a awm loh châng phei chuan ni lêngin kan nghei ṭhîn. Chutiang hunah chuan ka lêng chhuak daih zêl—ka fate rilṭâm ṭap thâwm ka ngaihthlâk hreh avângin,” tiin a sawi.

Victor-a leh Carmen-i te chu pheikhawk chhe siam an ni a. An fa pangate nên Bolivia rama khaw pakhat fâl takah an chêng a ni. Lei in chhe tawh tak, a chung rangva pawp thluah mai leh current pawh awm lo chu an luah a. An khuaa school-ah pawh naupang an tam êm avângin Victor-a chuan a fanu chu a luh ve theih nân dawhkân a siamsak a ngai a ni. Chaw chhumna tûr leh tui in tûr chhuan so nâna thing fawm tûrin an nupa chuan mêl ruk (10 km) laia hla kea an kal a ngai bawk. Carmen-i chuan: “Ek in kan nei lo va, inthiar tûrin inbual nân leh bawlhhlawh paih nâna hman lui chu kan pan ṭhîn. Kan fate chu an na deuh reng mai a ni,” tiin a sawi.

Francisco-a leh Ilídia-i chu Mozambique rama thingtlâng khaw pakhatah an chêng a. An fa pangate zînga pakhat chu damdawi in lamin an admit duh loh avângin malaria-in a boral a ni. Anni chuan an huan te tak têah an thla thum daih tûr buh leh kâwlbahra an chîng a. Francisco-a chuan: “Ruah a sûr ṭhat loh emaw, miin min rûksak emaw châng hian in sakna tûr dâp siamin ka  hralh a, sum tlêm azâwng ka hmu ve thei a. Chutah dârkâr hnih kal ram hnuai aṭangin kan nupain thing tuah tûr kan phur a. Phur khat chu kan tuah atân kan dah a, phur khat dang chu kan hralh ṭhîn a ni,” tiin a sawi.

Mi hausa tawntâw vaibêlchhe tam tak an awm laia khawvêl mi 7 zêla 1 chu Mbarushimana te, Victor-a te, leh Francisco-a te anga rethei an nih avângin mi tam tak chuan thil dik lo leh fel lo engemaw tak a awm niin an hria a. Ṭhenkhat chuan siam ṭhat tumin hma an la bawk. A dawta thuziakah chûng mite hma lâkna leh an beiseina chu kan hmu ang. (w11-E 06/01)

 [Phêk 2, 3-naa milem]

Carmen-i’n a fate pahnih nêna tui an chawi lai