Retheite Tâna Chanchin Ṭha

PATHIAN THU chuan: “Pachhiate chu theihnghilhin an awm fo lo vang,” tih min tiam a. (Sâm 9:18) Siamtu chungchângah Bible chuan: “I kut i phar a, thil nung zawng zawng châkna chu i tihrehsak ṭhîn,” tiin a sawi bawk a ni. (Sâm 145:16) Pathian Thua chuang he beiseina hi duhthusâm thil mai a ni lo. Pathian Engkimtitheia chuan retheihna ûmbo tûra kan mamawh chu min pe thei a ni. Mi retheite’n eng nge an mamawh?

Economics lama mithiam Africa mi pakhat chuan ram retheite tâna duhthusâm chu “thu neihna pumhlûm nei rorêltu ngilnei tak” a nih thu a sawi a. A sawi tum chu retheihna ûmbo tûr chuan thil ti tûra thiltihtheihna nei leh enkawl tûra ngilneihna nei tuemaw a ngai tih a ni. Retheih luatna chu khawvêl ramte a inrualkhai loh vâng a nih ṭhin avângin, mi zawng zawng tâna retheihna ûmbo thei tûr rorêltu khawvêl rorêltu a nih a ngai tih kan sawi belh thei ang. Chu bâkah, retheihna ûmbo thei tûr rorêltu chuan retheihna awm chhan—mihringte pianpui mahni hmasialna—a thlâk theih a ngai a ni. Chutianga rorêltu duhthusâm chu khawiah nge kan hmuh theih ang?

Pathian chuan Isua chu retheite tâna chanchin ṭha kengin a rawn tîr a. Isua’n Pathian hna pêk chungchâng chu dingin hetiang hian a chhiar a ni: “Riangvaite hnênah chanchin ṭha hril tûra mi ruat avângin Lalpa thlarau chu ka chungah a awm,” tiin.—Luka 4:16-18.

Eng Nge Chanchin Ṭha Chu?

Pathian chuan Isua chu Lal atân a ruat a. Chu chu chanchin ṭha a ni ngei mai. Ani chu retheihna ûmbotu tûr Rorêltu duhthusâm a ni, a chhan chu (1) ani chu mi zawng zawng chunga rorêltu tûr leh hma la tûra thiltihtheihna neitu; (2) mi retheite tâna khawngaihna nei taka thil titu leh anmahni enkawl tûra a hnungzuitute zirtîrtu, leh (3) retheihna awm chhan ber, kan pianpui mahni hmasialna tibo theitu a nih bawk avângin. Hêng chanchin ṭha hmêl hmang pathumte hi i lo bih chiang ang u.

1. Hnam zawng zawng chunga Isua thu neihna Pathian Thu chuan Isua chungchângah: “Rorêlna . . . a hnêna pêk a ni a, mi tin te, hnam tin te leh ṭawng tinte zawng zawng chuan a rawng an bâwl nân,” tiin a sawi. (Daniela 7:14) Mi zawng zawng chunga sawrkâr pakhat rorêlnain hlâwkna a thlen dân tûr chu i ngaihtuah thei em? Leilung hausakna inchuh avânga inbeihna leh indona a awm tawh lo vang a. Mi tin chuan inrual khai takin a hlâwkna an têl ang. Isua ngei chuan hma la tûra thiltihtheihna nei khawvêl Rorêltu a ni dâwn tih a sawi a ni: “Lei leh vâna thuneihna zawng zawng ka hnênah pêk a ni tawh,” tiin.—Matthaia 28:18.

2. Retheite chunga Isua khawngaihna Leia rawng a bâwl chhûng khân, Isua chuan mi retheite khawngaihna nei takin thil a ti a. Entîr nân, inenkawl nâna a neih zawng zawng dekral hmeichhia chuan dam inbeiseiin Isua puan a dek a. Ani chu kum 12 lai thi pût nei tawh a nih avângin a chau hle ang tih rinhlelh rual a ni lo. Dân hnuaiah chuan a deh apiang chu a tibawlhhlawh ang. Mahse, Isua chuan ngilnei takin: “Ka fanu, i rinna hi i dampui a ni e, thlamuang takin kal la, i natna ata chu lo dam hlen tawh ang che,” a ti a ni.—Marka 5:25-34.

Isua zirtîrna chuan mite rilru put hmang thlâk tûra thiltihtheihna a neih avângin anni pawhin khawngaihna nei takin thil an ti ve thei a ni. Entîr nân, Isua’n Pathian tihlâwm dân hre duhtu a chhân dân hi han ngaihtuah teh. Chu pa chuan Pathianin kan vêngte hmangaih tûrin min duh tih a hria a; mahse, Isua hnênah: “Ka vêngte chu tunge ni?” tiin a zâwt a ni.

 A chhânnaah Isua chuan Jerusalem aṭanga Jeriko lam pana zin, suamhmangte’n an rawk hnua ‘thi lek leka’ an kalsan tâk mi tuemaw chungchâng tehkhin thu lâr tak chu a sawi a. Chu mi kawnga kal puithiam pakhat chuan kawng sîr lehlamah a hêl ta mai a. Levia mi pawhin chutiang bawk chuan a ti a. “Amaherawhchu Samari rama mi tu emaw a zin kalin a awmna chu a lo thleng a, a hmuh veleh a khawngaih êm êm a.” A pemte chu tifaiin, khualbûkah a kalpui a, khualbûk vêngtu hnênah a lo enkawl nân sum a pe a ni. “Suamhmangho tâwka vêngte chu tu ber nge nia i rin?” tiin Isua chuan a zâwt a. “A khawngaihtu chu,” tiin a chhâng a ni. Chutah Isua chuan: “Nang pawh chu ang bawk chuan va ti ve rawh,” tiin a hrilh a ni.—Luka 10:25-37.

Jehova Thuhretu lo ni tate chuan chûng Isua zirtîrnate chu zirin, ṭanpui ngaite ṭanpui tûrin an rilru put hmang chu an thlâk a ni. Entîr nân, Women in Soviet Prisons tih lehkhabu ziaktu Latvia rama ziakmi nu pakhat chuan kum 1960 chho bâwr laihâwl vêla Potma camp-a a tân laia a dam loh chungchâng a ziak a ni: “Ka dam loh chhûng zawngin [Thuhretute] chuan taima takin min enkawl a. Inenkawlna ṭha zâwk beisei tûr ka nei tawh chuang lo. Jehova Thuhretute chuan khawi sakhua leh hnama mi pawh ni se, mite ṭanpui chu an tih tûrah an ngai a ni,” tiin.

Sumdâwnna a tlâk chhiat avânga Ecuador ram, Ancón khuaa Jehova Thuhretu ṭhenkhatin hna emaw, pawisa lâk luhna emaw an neih loh khân, an unau Thuhretute chuan an tâna sum hmuh dân tûr an ngaihtuah a; zâna sangha man tûra chhuak lo kîr lehte hnêna hralh atân ei tûr an siam a ni (ding lama milem). Naupangte pawh tiamin, kohhrana mi zawng zawng chuan an thawhpui a. Lawng a lo thlen hun zîng dâr li-a ei tûr lo siam fel hman tûrin zîng dâr khatah an thawk ṭan ṭhîn a. Thuhretute sum lâk luh chu an mamawh ang zêlin an insem a ni.

Chutiang thiltawnte chuan Isua entawn tûr siam leh a zirtîrnate’n ṭanpui ngaite ṭanpui tûrin mite rilru a thlâk thei tak zet tih a târ lang.

3. Mihring pianpui rilru thlâk tûra Isua thiltihtheihna Mihringte’n mahni hmasial takin thil an ti ṭhîn tih chu kan hriain, kan pawm ṭheuh va. Bible-in chu chu sual tiin a ko a ni. Tirhkoh Paula pawhin: “He dân hi ka lo hre ta; thil ṭha tih ka duh laiin sualna ka hnênah a lo awm ṭhîn,” tiin a ziak a. “He thihna taksa lakah hian tuin nge mi chhan chhuak ang? Isua Krista kan Lalpa avângin Pathian hnênah lâwmthu ka sawi a ni,” tiin a sawi zawm a ni. (Rom 7:21-25) Hetah hian Paula chuan Pathianin betu dikte chu an rochun sual lam ngaihtuahna zînga pakhat, retheihna awmtîrtu bul ber, mahni hmasialna lak ata Isua hmanga a chhanhim dân tûr a sawi a. Engtin nge chu chu a lo thlen ang?

Isua’n baptisma a chan hnu lamah, Baptistu Johana chuan mite hnênah Isua chu: “En teh u, Pathian Berâm No, khawvêl sual kalpuitu tûr saw!” tiin a hmêlhriattîr a ni. (Johana 1:29) Nakin lawkah chuan leilung hi mahni hmasial duhna pawh tiamin, sual rochun laka chhuah zalen tawh mihringte’n an luah khat ang. (Isaia 11:9) Chutih hunah, Isua chuan retheihna awmtîrtu chu a nuai bo tawh ang.

Mi zawng zawngin an mamawh ang an neih theih hun tûr ngaihtuah chu a va hlimawm tak êm! Pathian Thu chuan: “Mi tinte chu an grêp hrui hnuaiah leh an theipui kûng hnuaiah an ṭhu . . . ang a; tuman an tihlau lo vang,” tiin a sawi. (Mika 4:4) Chûng thute chuan Pathian Jehova chawimawi nâna mi tinin hna lungawithlâk leh himna an neih hun, retheihna awm tawh lohna khawvêl an chen hun chu hla thuin a hril a ni. (w11-E 06/01)