Pathian Thu Aṭangin Inzir Rawh

Isua Krista Chu Tu Nge Ni?

He thuziak hian i lo ngaihtuah mai theih zawhnate zâwtin, i Bible-a a chhânna i hmuh theihna laite a târ lang a ni. Jehova Thuhretute chuan chûng chhânnate sawipui che chu an châk hle a ni.

1. Isua Krista chu tu nge ni?

Mihringte ang lo takin, Isua chu leia a lo pian hmain vânah thlarau mi angin a lo awm tawh a. (Johana 8:23) Pathian thil siam hmasak ber niin, thil dang zawng zawng siamnaah pawh a Pa a ṭanpui a ni. Pathian Jehova’n a kut ngeia a siam awmchhun a nih avângin, Fapa “mal neih chhun” tia koh a ni a. Pathian Tâna Thusawitu a nih avângin “Thu” tia koh a ni bawk.—Johana 1:1-3, 14; Thufingte 8:22, 23, 30; Kolossa 1:15, 16 chhiar rawh.

2. Engvângin nge Isua leiah a lo kal?

Pathian chuan a Fapa nunna chu vân aṭangin Juda mi nula thianghlim Mari pum chhûngah sawnin leiah a rawn tîr a. Chuvângin, Isua chuan mihring pa a nei ve lo. (Luka 1:30-35) Isua leia a lo kal chhan chu (1) Pathian chungchâng thudik zirtîr tûrin, (2) Pathian duhzâwng tihna kawnga entawn tûr siam tûrin, leh (3) “tlan nâna” a nun ṭha famkim pe tûrin a ni.—Matthaia 20:28; Johana 18:37 chhiar rawh.

3. Engvângin nge tlanna kan mamawh?

Tlanna chu mi tâng chhuah zalên nâna sum pêk hi a ni a. Thihna leh tarna te hi mihringte tâna Pathian thiltum zîngah a tel lo. Chu chu engtin nge kan sawi theih? Pathian chuan mipa hmasa Adama hnênah, Bible-in sual tia a sawi thil a tih chuan a thi ang tih a hrilh a. Adama chuan thil sual ti lo sela chuan, a thi ngai hauh lo vang. Ani chu a hnu kum zabi engemaw zât chhûng la dam zêl mah se, Pathian thu a zawm loh nî aṭang chuan a thi ṭan a ni. (Genesis 2:16, 17; 5:5) A thlahte hnênah chuan sual leh sual man thihna chu a rochun ta zêl a. Chutiang chuan, Adama avângin thihna chu khawvêlah a lo “lût” a. Chuvângin, tlanna kan lo mamawh ta a ni.—Rom 5:12; 6:23 chhiar rawh.

 4. Engvângin nge Isua a thih?

Tuin nge thihna ata kan zalên theihna tûr tlanna pe thei? Kan thih hian keimahni sual man chauh kan pe tla ṭhîn a. Ṭha famkim lo tumah hian mi dangte sual man kan pêksak thei lo.—Sâm 49:7-9 chhiar rawh.

Isua chuan mihring pa aṭanga ṭhat famkim lohna a rochun ve loh avângin, ama sual vâng ni lovin mi dangte sual tlan nân a thi a ni. Pathian chuan mihringte A hmangaihna nasa tak lantîr nân kan aia thi tûrin a Fapa a rawn tîr a. Isua pawhin a Pa thu âwih a, kan sual tlan nâna a nun pein min hmangaihzia a lantîr bawk.—Johana 3:16; Rom 5:18, 19 chhiar rawh.

5. Isua chuan tûnah eng nge a tih?

Isua chuan dam lote tidamin, mitthite kaithovin, leh mangangte ṭanpuiin thu âwih mihringte tâna a thil la tih tûrte chu a lo entîr a. (Luka 18:35-42; Johana 5:28, 29) A thih hnuah, Pathianin thlarau lam nunna pein a kaitho leh a ni. (1 Petera 3:18) Tichuan, lei chung zawng zawnga Lal anga rorêl theihna Pathian Jehova’n a pêk hma loh chuan A ding lamah a nghâk ta reng a. (Hebrai 10:12, 13) Tûnah chuan, vânah Lal niin ro a rêl tawh a, chu mi chungchâng chanchin ṭha chu he leia a hnungzuite chuan khawvêl pumah an puang chhuak a ni.—Daniela 7:13, 14; Matthaia 24:14 chhiar rawh.

Nakin lawkah Isua chuan Lal a nih anga a thu neihna chu hrehawm tawrhna leh a thlentu zawng zawngte tihtâwp nân a hmang dâwn a. Isua ringtute leh a thu âwihtu zawng zawngte chuan lei paradis-ah nun hlimawm tak an chên ang.—Sâm 37:9-11 chhiar rawh. (w11-E 03/01)

Hriat belh nân, Jehova Thuhretute tihchhuah he lehkhabu bung 4-na hi en ang che

[Phêk 31-naa milem]

Isua ringtute leh a thu âwihtu zawng zawngte chuan lei paradis-ah nun hlimawm tak an chên ang