Pathian Hnaih Rawh

Jehova’n Rilru Veizâwng A Nei Em?

A NEI a nih chuan: Kan nungchang hian Pathian rilru veizâwng a nghawng em? tih zawhna hi a lo chhuak leh a. Chu chu, kan nungchang hian Pathian rilru a tihlim emaw, a tina emaw thei em? tihna a ni. Hmân laia mi fing ṭhenkhat chuan thei lo niin an sawi a. Pathian chu tuma thunun theih loh a nih avângin rilru veizâwng nei lo tûrah an ngai tlat a ni. Mahse, Bible chuan Pathian Jehova’n rilru veizâwng a neihzia leh kan thiltihte a ngaihvenzia min hrilh thung. Sâm 78:40, 41 thu hi han ngaihtuah teh.

Sâm 78-na hi Pathianin hmân lai Israelte a dâwr dân chungchâng târ lanna a ni a. Pathian Jehova chuan anni chu Aigupta sal tânna ata a chhanchhuah hnuah amah nêna inlaichînna bîk tak nei tûrin a sâwm a ni. A dânte an zawm zêl chuan, a tân “ro thlan bîk” an ni ang tih leh a thiltum tihfamkim nân ropui takin a hmang ang tih a tiam a. Anni chuan an remti a, Dân thu a thlunpui ta a ni. An intiamna ang chuan an nung em?—Exodus 19:3-8.

Fakna hla phuahtu chuan: “Thlalêrah khân a chungah an va hel zingin, ram rovah khân amah chu an va tilungngai zing êm!” a ti a. (Châng 40) “Pathian an fiah an fiah mai a,” tiin a sawi zawm a ni. (Châng 41, C.L. Re-edited) Fakna hla phuahtuin an hel dân phung a ziah hi lo chhinchhiah teh. Chu an rilru put hmang ṭha lo tak chu Aigupta ram aṭanga chhan chhuah an nih hnu lawk, thlalêrah a lo lang ṭan a. Pathianin anmahni a enkawl theiin, enkawl a inhuam bawk tih chungchângah rinhlelhna neiin, A lakah an phunnawi a ni. (Number 14:1-4) Bible letlingtute puitu lehkhabu pakhat chuan ‘a chungah an hel’ tih hi “ṭawngkam danga sawi chuan ‘Pathian lakah an thinlung an tisak’ emaw, ‘Pathian hnênah “Aih” an ti emaw anga sawi theih’” a nih thu a târ lang a. Chuti chung pawhin, Pathian Jehova chuan a mite chu inchhîrna an lantîr phawt chuan zahngaihna nên a ngaidam zêl a. Mahse, a ngai bawkin an hel leh ṭhîn a, chutiang chu an tih ṭhin dân a ni.—Sâm 78:10-19, 38.

Chutianga a mi lê lo takte an hel apiangin engtin nge Pathian Jehova chu engtin nge a awm ṭhin? Châng 40-na chuan: ‘Amah chu an tilungngai,’ tih a sawi a. Bible lehlin dang chuan “lungngaihna tûr chhan an pe,” tiin a let chhuak a ni. Bible hrilhfiahna lehkhabu pakhat pawhin: “He thu awmzia hi fa thuâwih lo leh hel hmang tak nungchang ang maiin Hebrai-ho nungchang chuan a rilru natna a thlen tihna a ni,” tiin a hrilhfiah bawk. Naupang sual takin a nu leh pa rilru natna nasa tak a thlen ang chiahin, Israel hel hmangte pawhin “Israel-ho Mithianghlim chu an tivui,” a nih loh an tihrehawm ṭhîn a ni.—Châng 41.

He fakna hla aṭang hian eng nge kan zir theih? Jehova chuan amah betute nên inzawmna nghet a nei a, a hawisan mai mai ngai lo tih hriat chu a thlamuan thlâk a. Chutih rualin, ani chuan rilru veizâwng a nei a, kan nungchangin amah a nghawng thei hle tih hriat pawhin rilru a khawih hle bawk. Chu mi hriatna chuan engtin a nghawng che? Thil ṭha tih duhna a neihtîr che em?

Kawng sual zawh a, Jehova thinlung tihnat ai chuan, kawng dik thlangin, a thinlung kan tilâwm thei a. Chu tak chu a ni, amah betute a ngen chu: “Ka fapa, fing la, ka thinlung tilâwm rawh,” tiin. (Thufingte 27:11) A thinlung tilâwm tûr zâwnga nun aia thil hlu zâwk Jehova hnêna pêk theih engmah kan nei lo. (w11-E 07/01)

[Phêk 32-naa thu lâk chhuah]

A thinlung tilâwm tûr zâwnga nun aia thil hlu zâwk Jehova hnêna pêk theih engmah kan nei lo