Nun Awmze Nei Tak—Tûnah leh Chatuan Thlengin

TUNAH ngei pawh hian nun awmze nei tak i nei thei a. Engtin nge? Pathian Thu, Bible-a awm thu bul finthlâk tak takte nunpuina hmangin a ni. Chûng zînga ṭhenkhat chu i lo bih chiang ang u.

BIBLE THU BUL: Lal Solomona chuan mihring tân, “Ei leh in te leh a thawhrimnaa a rilru tihnawm te aliama ṭha a lo awm lo,” tiin a ziak.—THUHRILTU 2:24.

Hna ṭha thawhna aṭanga lungawina hmu tûra siam kan ni a. Dinhmun harsa tak hnuaiah pawh taima tak leh rinawm taka thawhna aṭangin tûnah ngei pawh hian lungawina engemaw chen kan nei thei a ni.

BIBLE THU BUL: “Englo lâk aiin pêkin lukhâwng a nei zâwk.”—TIRHKOHTE 20:35.

Mi tam tak chuan mi dangte tâna thiltih—entîr nân, mi dangte’n harsatna an tawh huna ṭanpui nân an hun leh tha leh zung pêk—chu manhla an ti hle a, chu chuan nun awmze nei zâwk a neihtîr tih an hmu chhuak a. “A phute tân ṭhatna ui suh, i kuta tih theihna a awm phawt si chuan,” tiin Solomona chuan a ziak a ni.—Thufingte 3:27.

Ralph-a entîrna hi han ngaihtuah teh. A hna a bânsan hnu chuan hunbi kima Kristian rawngbâwltu a nupui chu a thawhpui ta a. An pahnih chuan rawngbâwlnaah thla tin dârkâr tam tak hmangin, mi dangte Bible zirpui tûrin an  inpe a. Ralph-a chuan heti hian a sawi: “Tlaia in kan han thlen chuan kan kum upat vâng mai ni lovin, kan Pa vâna mi rawngbâwl nâna tha leh zung kan hman avâng pawhin kan chau hle a. Mahse, chauh dân ṭha a ni tlat!” tiin. A nupui nên chuan mi dangte tâna inpêk lam hlîr an ngaihtuah avângin an hlim a ni.

BIBLE THU BUL: “Ṭhian chuan englai pawhin a hmangaih reng a, mangan nî atâna unauva piang a ni.”—THUFINGTE 17:17.

Tawrhpui kan neih hian harsatnate tawrh chu a awlsam zâwk ṭhîn. Sâp lehkha ziak mi Fransis Bacon-a chuan ṭhian ṭha nei lote tân chuan, “khawvêl hi thlalêr ang mai a ni,” tiin a ziak a. Ṭhian ṭha neihna—leh mi dang tâna ṭhian ṭha nihna—chuan i tân nun harsatnate tawrh a tiawlsam zâwk thei a; chu chu nuam tak leh lungawithlâk tak a ni thei bawk.

BIBLE THU BUL: “Pathian thu hriaa zâwmte hi mi hamṭha an ni.”—LUKA 11:28.

Pathian thutiam thlen famkimnate chen i duh chuan i tih tûr thil pawimawh tak chu Pathian thu hriaa, zawm a ni tih Isua chuan a târ lang a. A Thu, Bible hmangin Pathian Jehova chuan nun awmzia leh a thiltum hre thiam tûrin min ṭanpui a. Chu chuan mi hamṭha, a nih loh leh mi engthâwl tak min nihtîr a ni. Thuziak hmasaa kan hmuh tawh angin, Bible chuan lei atâna Pathian thiltum chu a târ lang a. He leia kan awm chhan te, hrehawm tawrhna a tam chhan te, leh kan hnên aṭanga Pathian thil beisei te chu min hrilh a ni. Chutiang Bible thutakte hriatthiamna chu nun awmze nei leh lungawithlâk tak neih nân a pawimawh hle. Bible zir nâna hun petute leh an thu zir nunpuitute chu an hlim a ni. Engvângin nge? Anni chuan min Siamtu, “Pathian hlim,” Jehova nêna inlaichînna rinawm tak an siam avângin.—1 Timothea 1:11, New World Translation.

BIBLE THU BUL: “I siamtu chu hre reng ang che, hun ṭha lo, tarchhiat hun, ‘Dam pawh nuam ka ti tawh lo,’ i tih hma hian.”—THUHRILTU 12:1, C.L. RE-EDITED.

An vânglai hian chhiatna a lo thleng thut thei tih theihnghilh ṭhîn ṭhalaite hnêna Lal Solomona thurâwn pêk chu kan za atân a pawimawh hle. I nunah Siamtu chu dah pawimawh ber rawh. Chu chuan i nunah thiltum dik tak a pe ang che. “I eiin i in ang u hmiang, naktûkah kan thi dâwn alâwm,” tih rilru put hmang chu hnâwl rawh. (1 Korinth 15:32) Thuhriltu 8:12 (C.L. Re-edited) chuan Pathian i dah hmasak chuan i tân “thil a kal tluang ang,” a ti a ni.

 Nula Wendi chuan chu mi dikzia chu a tawng a. Tleirâwl a nih laiin, chanchin ṭha hriltu mamawh zualna hmun, Dominican Republic-a an insawn theih nân a unaunu nên Spanish ṭawng an zir a. Ani chuan: “Mamawh zualna hmuna rawngbâwl tûrin thil tam tak kan chân a; mahse, hun nuam tak kan hmang tho tho. Khâng thla ruk chhûnga ka thiltihte kha eng dang nên mah ka thleng lo’ng nge! Malsâwmna kan dawnte chu kan thil chânte aiin a tam zâwk fê a ni,” tiin a sawi.

Pathian Laka Rinawmna Chuan Nun Chu Awmze Nei Tak A Nihtîr

Pathian Jehova nêna inlaichînna ṭha siamna chuan i nun awmzia chu kawng danglam bîk takin a belhchhah thei a. Engtin nge a belhchhah theih? Setana chuan Adama leh Evi chu Pathian rorêlna laka hel tûra a hruai bâkah, fiahna hnuaiah tumah an rinawm lo vang tih a sawi thawi bawk. (Joba 1:9-11; 2:4) Setana chu dawthei a nihzia i finfiah ve thei tihna a nih chu! Engtin nge? Pathian laka rinawmna te, a thu bulte zawm tlatna te, leh a chhia leh a ṭha chungchânga kan tâna thu tlûkna siam tûra Jehova dikna neih i pawmzia lantîrna te hmangin i ṭanpui thei a ni.—Thu Puan 4:10, 11.

Kawng dik zawh kan duh chuan harsatnate kan tawh a ngai thei a. Chûng harsatnate chuan nun awmze nei tak min rûk bosak ang em? Awle, hmêlma sual tak chuan kan ṭhian emaw, chhûngkaw zînga mi emaw chu a sawichhia angah han ngaihruat chhin teh. A hming humhimna chuan kan hmêlma laka hrehawm tawrhna engemaw chen min thlen a nih pawhin, chu chuan nun awmze nei kan neihna tûr min rûk bosak ang em? Rûk bosak lo rêng rêng ang! Lâwm takin a hming chu kan humhim ngei zâwk ang. Pathian laka rinawmna pawh chutiang bawk chu a ni a. Kan tûn lai dinhmun sual tak hnuaia kan rinawmna chuan Pathian thinlung a tilâwm a ni.—Thufingte 27:11.

Chatuana Nun Awmze Nei Tak Chu

A nih chuan, Pathian leh a thiltumte chungchâng zir tûra theih tâwp chhuah chu tum tlat rawh. Isua ngei chuan, “Hei hi chatuana nunna a ni, nang Pathian tak chauh leh i tirh Isua Krista hriat hi,” tiin a sawi a. (Johana 17:3) Pathianin lei atâna atîra a thiltum a tihfamkim hunah chuan, mihring rinawmte chuan an tâna atîra Pathian thiltum—lei paradis-a “chatuana nunna” chu an nei tawh ang. Chu mi hunah chuan nun chuan awmzia a nei tak zetin, a lungâwithlâk tak zet tawh ang.—Sâm 145:16.

Isua sawi chu hriatna chu khawiah nge i hmuh theih ang? Pathian thâwk khum Thu, Bible-ah i hmu thei dâwn a ni. Chu mi ti tûra ṭanpui i mamawh chuan he magazine chhuahtute hnênah lehkha thawn hreh suh ang che. Anni chuan lâwm takin Bible zirtîrna dik tak i zirnaa ṭanpuitu tûr che tuemaw an rawn tîr ang. (w11-E 07/01)