Nun Hian Awmzia A Nei Meuh Em Le?

“NUN hian awmzia a nei meuh em le?” He zawhna hi mi tam takin an zâwt tawh a. Eng ang zâwng pawhin thlîr mah se, mi tam tak chuan an nunah Austria mi, thluak leh hriatna thazâm lam doctor Viktor E. Frankl-a sawi “awmze nei lo leh ruak ngawt nia inhriatna” an nei chu a lungchhiatthlâk hle.

Engvângin nge mi tam takin chutianga inhriatna an neih? A chhan pakhat chu khawvêla mi maktaduai tam takte hi rin phâk bâka dinhmun chhia leh lungchhiatthlâk taka an din vâng a ni a. Anni chuan nî tin mai hian retheihna te, natna te, tharum thawhna te, leh inawpbehnate an tâwk a ni. Hmân lai mi Joba’n mihringte hrehawm tawrhna a sawi angin nun chu “buainaa khat” a ni tak meuh va. (Joba 14:1) An tum ber chu a tûk atâna dam khawchhuah hrâm hrâm hi a ni ringawt mai a ni.

Mi dang tam tak chu an hausa thawkhat a. Lungawina neih nâna an mamawh apiang nei zêl thei ang an ni. Mahse, an lungawi chuang lo. Eng nge a chhan? A chhan chu “lungngaihna,”—rin loh taka sum leh pai lama tlâk chhiatna emaw, fate boralna emaw ang chi chânna râpthlâk tak—hian an beiseina leh duhthusâm neihte a tihkhaw loh leh ṭhin vâng a ni.—Sâm 90:10.

Nun “awmze nei lo leh ruak ngawt” nia inhriatna tizualtu thil dang pawh a la awm. Chu chu eng nge ni? Dam chhûng hun a tâwi lutuk hi a ni. Mi tam tak tân chuan mi thiam leh thiltithei tak takte an dam rei ṭhîn lo hi hriat thiam a harsa hle a. Tuma pumpelh theih loh thil râpthlâk tak chu an hre thiam thei lo: Chhiatna râpthlâk ber pawh pumpelh mah ila, engtik nîah emaw chuan thihnain min nang chîng ṭhîn, tih hi.—Thuhriltu 3:19, 20.

Nun Hian Awmzia A Nei Ngai Dâwn Lo Em Ni?

Hmân lai Israel Lal Solomona chuan thil awm dân chu a khaikhâwm ṭha hle. A hun laia mite’n tûn laia kan tih ang bawka an thiamna leh theihnate chu lo neih nân te, in sak nân te, leh an chhûngte enkawl nân tea hmanga an  thawhrimzia chu a lo hmu tawh a. Chuvângin, hetiang deuh hian a zâwt a ni: ‘Chûng zawng zawng chuan a tâwpah eng nge a rah chhuah?’ tiin. Mite thiltih zawng zawng chu “ho tak vek a ni a, thli man tum ang mai a ni,” tih thu tâwp a siam a ni.—Thuhriltu 2:17, C.L. Re-edited.

Mahse, Lal Solomona chuan mihring thiltih zawng zawng hi ‘ho tak leh thli man tum ang mai’ a ni reng dâwn niin a hria em? Hre lo ve. He famkim lohna khawvêla nun inher chhuah ṭhin dân a sawina mai a ni. Pathian thâwk khum Thu chuan hetiang hi a ni reng dâwn lo tih rin ngamna tûr chhan a pe thei che.

Engtin nge chutiang rin ngamna chu i neih theih? Khawngaihin a dawta thuziak pahnihte hi chhiar ang che. Chûng chuan nun hi awmze nei meuh lova a lan chhan te, chu dinhmun siam ṭhat a nih dân tûr te, leh tûn la la pawha nun awmze nei tak i neih theih dânte hre thiam tûrin a ṭanpui thei ang che. (w11-E 07/01)