Pathian Thu Aṭangin Inzir Rawh

Pathian Chu Tu Nge Ni?

He thuziak hian i lo ngaihtuah mai theih zawhnate zâwtin, i Bible-a a chhânna i hmuh theihna laite a târ lang a ni. Jehova Thuhretute chuan chûng chhânnate sawipui che chu an châk hle a ni.

1. Pathian chu tu nge ni?

Pathian dik chu thil zawng zawng Siamtu hi a ni a. Bible chuan ani chu “chatuana Lal,” tiin a ko va; awm ṭan hun a nei lo va, tâwp hun a nei hek lo vang tihna a ni. (Jeremia 10:10) Pathian chu nunna Hnâr a nih avângin, amah chauh chibai kan bûk tûr a ni.—Thu Puan 4:11 chhiar rawh.

2. Pathian chu eng ang nge a nih?

Pathian chu he leia chêng nunna nei thil siamte aia sâng zâwk Thlarau a nih avângin tuman englai mahin an hmu ngai lo. (Johana 1:18; 4:24) Pathian mizia chu a thil siam aṭangin a hmuh theih a. Entîr nân, thei leh pangpâr chi hrang hrang, pianze inang lo tak takte kan ngaihtuah hian Pathian hmangaihna leh finna kan hmu thei a ni. Lei leh vân zau tak mai pawh hian Pathian thiltihtheihzia min hriattîr bawk.—Rom 1:20 chhiar rawh.

Pathian mizia chu Bible aṭangin kan hmu tam lehzual thei a. Entîr nân, Bible chuan a duhzâwng leh a duh lohzâwng te, mite a cheibâwl dân te, leh dinhmun azir zêla a thiltih dânte min hrilh a ni.—Sâm 103:7-10 chhiar rawh.

3. Pathianin hming a nei em?

Isua chuan: “Kan Pa vâna mi, i hming zahawm rawh se,” a ti a. (Matthaia 6:9) Pathian chuan nihna tam tak nei mah se, hming erawh pakhat chauh a nei a ni. Chu hming chu ṭawng hman azirin a lam dân a dang a, Mizo ṭawng chuan “Jehova” tih a ni a, “Yahweh” tih châng pawh a awm bawk.—Sâm 83:18 chhiar rawh.

Bible tam takah Pathian hming chu paih bo va, Lalpa emaw, Pathian emawa thlâk a ni a. Mahse, Bible ziah a nih lai chuan a hming chu vawi 7,000 dâwn lai a chuang a ni. Isua chuan mite hnêna Pathian thu a hrilhnaah Pathian hming chu hmangin a hriattîr ṭhîn a. Mite chu Pathian hre tûrin a ṭanpui ṭhîn a ni.—Johana 17:26 chhiar rawh.

 4. Pathian Jehova chuan min ngaihsak em?

Jehova chuan kan ṭawngṭainate amah ngeia ngaithlain, min ngaihsakzia a lantîr a ni. (Sâm 65:2) A nih leh, hrehawm tawrhna tam takte hian Pathianin min ngaihsak lo tih a hril em? Mi ṭhenkhat chuan Pathianin min fiah nân hrehawm min tawrhtîr niin an sawi a; mahse, chu chu a dik lo. “Pathian chuan thil suaksual . . . a ti teuh lo vang,” tiin Bible-in a sawi si a.—Joba 34:10; Jakoba 1:13 chhiar rawh.

Pathian chuan mihringte chu zalên taka duhthlan theihna pein a chawimawi a. Pathian rawngbawl tûra zalên taka duh thlan theihna kan nei hi kan ngaihlu hle a ni lâwm ni? (Josua 24:15) Hrehawm tawrhna a tam chhan chu mi tam takin mi dangte chunga thil ṭha lo tih an thlan vâng a ni a. Chûng thilte chuan Jehova thinlung a tina êm êm a ni.—Genesis 6:5, 6 chhiar rawh.

Nakin lawkah, Jehova chuan hrehawm tawrhna leh a awmtîrtute chu Isua a paih botîr dâwn a. Chu mi hma zawng chuan Jehova tân hrehawm tawrhnate awm rih phal chhan tûr ṭha tak a awm a ni. He thuziak chhunzawmna lo la chhuak tûrah hian Pathianin hrehawm tawrhna awm a phal chhan chu sawifiah a ni ang.—Isaia 11:4 chhiar rawh.

5. Pathianin eng ti tûrin nge min duh?

Pathian Jehova chuan amah hria a, hmangaih theihna neiin min siam a. A chungchâng thutak hre tûrin min duh a ni. (1 Timothea 2:4) Bible kan zir chuan, Pathian chu Ṭhian angin kan hre thei ang.—Thufingte 2:4, 5 chhiar rawh.

Jehova chu nunna min petu a nih avângin, mi dang zawng aiin kan hmangaih zâwk tûr a ni a. Amah kan hmangaihna chu ṭawngṭaia amah biak leh ti tûra min duhte tihna hmangin kan lantîr thei a ni. (Thufingte 15:8) Jehova chuan mite chu hmangaihna nêna cheibâwl tûrin min ti a ni.—Marka 12:29, 30; 1 Johana 5:3 chhiar rawh. (w11-E 02/01)

Hriat tam lehzual nân Jehova Thuhretute tihchhuah BIBLE ZIRTIRNA Dik Tak Chu ENG NGE NI? he lehkhabu bung 1-na hi en ang che.

[Phêk 29-naa milem]

Hrehawm tawrhna awmtîr phal nachhan tûr ṭha a awm thei ang em?