Remna Ûm Rawh
Remna Ûm Rawh
“Inremna tûr . . . thilte chu i ûm ang u.”—ROM 14:19.
1, 2. Engvângin nge Jehova Thuhretute inkârah remna a awm?
TUN lai khawvêlah hian remna dik tak hmuh a har hle a. Hnam khat leh ṭawng chi khat hmangte pawh an sakhaw vawn te, politics ṭan lam te, leh an dinhmun te avângin an inṭhen hrang fo a ni. Chu mi nêna inkalh takin, Jehova mite chu “hnam tin zînga mi te, chi tin zînga mi te, mi tin zînga mi te, ṭawng tin zînga mi te” an ni chung pawhin an inpumkhat a ni.—Thup. 7:9.
2 Kan zînga remna awm hi tihpalh thil thua lo awm mai a ni lo. A lo awm chhan bul ber chu kan sualte khuh bo nâna a thisen chhuahtu Pathian Fapa kan rinna zâra ‘Pathian nên kan inrem’ vâng a ni a. (Rom 5:1; Eph. 1:7) Chu bâkah, Pathian dik chuan a chhiahhlawh rinawmte hnênah thlarau thianghlim a pe bawk a, chu thlarau rah pêngte zîngah chuan remna a tel a ni. (Gal. 5:22) Remna leh lungrualna kan neih chhan dang leh chu ‘khawvêla mi kan nih loh’ vâng a ni. (Joh. 15:19.) Politics-ah ṭan lam neih ai chuan tualdâwihin kan awm zâwk a. ‘Kan khandaihte leilehna hmâwr zumahte kan chher tawh’ avângin tualchhûng emaw, khawvêl huap emawa indonaah te kan tel ve lo.—Is. 2:4.
3. Inrem taka kan awm theih avângin eng nge kan tih theih phah a, he thuziakah hian eng nge kan sawiho vang?
3 Inrem taka kan awm theihna hi unaute chunga thil ṭha lo tih duh lohna mai aiin a thûk a. Kan lawina Jehova Thuhretute kohhrana mite chu ṭawng hrang hmang leh hnam hrang hrang ni mah ila, kan “inhmangaih” tawn a ni. (Joh. 15:17) Kan inremna chuan ‘mi zawng zawng chunga thil ṭha ti tûrin, rinna chhûngte zînga mi chunga ti deuh ber’ thei tûrin min siam a ni. (Gal. 6:10) Pathian Jehova leh unaute nêna kan inremna, he thlarau lam paradis hi a hlu hle a, kan vênghim tlat tûr a ni. Chuvângin, kohhrana remna kan ûm zêl theih dân i lo bih chiang ang u.
Thil Kan Tihsual Hunah
4. Mi tuemaw kan tihlungnih loh hunah remna ûm tûrin eng nge kan tih theih?
4 Zirtîr Jakoba chuan: “Kan zain thil tam tak kan tisual fo ṭhîn. A thusawia tisual ngai lo mi chu, mi puitling a ni a, a taksa pum pawh vêng thei mi a ni,” tiin a ziak a. (Jak. 3:2.) Chuvângin, unaute inkârah inrem lohna leh inhriat thiam lohna chu a chhuak ngei dâwn a ni. (Phil. 4:2, 3) Mahse, mi mal inkâra harsatnate chu kohhrana remna tibuai lova chinfel theih a ni. Entîr nân, mi tuemaw kan tilungni lo tih kan hriat huna kan tih tûr hi ngaihtuah ang che.—Matthaia 5:23, 24 chhiar rawh.
5. Miin kan chunga thil an tihsual hunah engtin nge remna kan ûm theih?
5 A nih leh, miin kan chungah thil lian tham vak lo tisual ta se engtin nge ni ang? Min rawn pan a, thupha rawn chawi tûrin kan beisei tûr a ni em? Korinth thawn khat 13:5 (C.L. Re-edited) chuan: ‘Hmangaihnain thil sual a hre reng ngai lo,’ a ti a. Chuvângin, miin kan rilru an tihnat chuan ngaidam a, theihnghilhna hmangin remna kan ûm a, chu chu ‘thil sual tih hriat reng loh’ hi a ni. (Kolossa 3:13 chhiar rawh.) Nî tina kan thil tihsual lian tham lêm lote chu hetianga chinfel a ṭha ber a ni; chu chuan unaute nêna inlaichînna muanawm tak bâkah rilru hahdamna min pe si a. Thufing pakhat chuan: “Bawhchhiatna haider chu . . . ropuina a ni,” tiin a sawi.—Thuf. 19:11.
6. Lungnih lohna kan tuar dam thei ngang lo a nih chuan eng nge kan tih ang?
6 A nih leh, kan lungnih lohna chu kan tuar dam thei ngang lo a nih chuan engtin nge ni ang? A ngaithla duh apiang hnêna hrilh darh mai chu a finthlâk lo hle. Chutianga inrêlna chuan kohhrana remna tihchhiat bâk engmah hlen chhuah a nei lo. Inrem taka thil chingfel tûrin eng nge kan tih ngai? Matthaia 18:15 chuan heti hian min hrilh a ni: “I unauvin i chungah thil tisual sela, kal la, amah leh nangmah chauhva hriatah a sualnaah chuan zilh ang che; a ngaihthlâk che chuan i unau chu i hneh a ni tawh ang,” tiin. Matthaia 18:15-17 thu chu sual lian tham chungchânga hman tûr ni mah se, châng 15-naa thu bulte rilrua vawng rengin, min tilungni lotu chu zahngai taka panin, remna siam leh chu kan tum tûr a ni. *
7. Engvângin nge inrem lohna chu kan chinfel vat ang?
7 Tirhkoh Paula chuan: “Thinrim ula, sual erawh chu sual suh u; in thinur chu niin tlâkpui suh se; Diabola chu hmun kian hek suh u,” tiin a ziak a. (Eph. 4:26, 27) Isua pawhin: “I khingpui chu kalkawnga in kal dun laiin rem thuai rawh,” a ti. (Mt. 5:25) Chuti chu remna ûm tûr chuan harsatnate chinfel vat a ngai tihna a ni. Engvâng nge? Chutianga tihna chuan inrem lohnate chu hliam enkawl loh avânga a pûn ang maia a zual chhoh loh nân a vêng a ni. Chapona te, thîkna te, a nih loh leh sum leh pai duh lutukna te chu inrem lohnate a lo chhuah vêleha chinfel loh phah nân i hmang lo vang u.—Jak. 4:1-6.
Buaina Chu Mi Tam Tak Kaihhnawih A Nih Chuan
8, 9. (a) Kum zabi khatna Rom khaw kohhranah eng chungchânga thlîr dân inang lo nge chhuak? (b) Chu buaina chungchângah chuan Paula’n Rom Kristiante chu engtin nge a zilh?
8 A châng chuan kohhrana inrem lohna chuan mi pahnih aia tam a kaihhnawih thei a. Chutiang chu Paula’n thlarauva thâwk khum lehkha a thawnna Rom khuaa Kristiante zîngah a thleng a. Chuta Juda leh Jentail Kristiante inkârah buaina a chhuak a ni. Chu kohhran chhûnga mi ṭhenkhat chuan chhia leh ṭha hriatna chak lo, a nih loh leh zîm lutuk neite chu an hmusit a. Anni chuan mahni ngaih dân liau liau ṭanchhanin mi dang chungthu chu dik lo takin an rêl a ni. Chu kohhran hnênah chuan Paula’n eng thurâwn nge a pêk?—Rom 14:1-6.
9 Paula chuan chu buainaa telte chu a zilh ve ve a. Mosia Dân hnuaiah an awm tawh lo tih inhretute chu an unaute hmusit lo tûrin a hrilh a ni. (Rom 14:2, 10) Chutianga hmuhsitna chuan Dân hnuaia ei phal loh thilte ei la hreh ringtute chu a titlu thei a. Paula chuan anni chu: “I englo ei vângin Pathian hnathawh tichhe suh. . . . I unau tlûkna tûr a nih chuan sa ei loh te, uain in loh te, thil engpawh tih loh a ṭha,” tiin a fuih a ni. (Rom 14:14, 15, 20, 21) Chutih rualin, chhia leh ṭha hriatna zîm zâwk neite pawh chu an aia thlîr dân zau zâwk neite mi rinawm lo anga ngai lo tûrin a zilh bawk. (Rom 14:13) ‘An zînga tumah hi inngaihhlut tâwk aliama inngaihlu lo’ tûrin a fuih a ni. (Rom 12:3) Chu thu buai chungchânga lehlam lehlama mite a zilh hnuah, Paula chuan: “Chutichuan inremna tûr leh intihsâwt tawnna tûr thilte chu i ûm ang u,” tiin a ziak a ni.—Rom 14:19.
10. Kum zabi khatnaa Rom kohhran ang bawkin, tûn laiah pawh inrem lohna chingfel tûrin eng nge tih ngai?
10 Rom kohhran chuan Paula zilhna chu pawmin, a ṭûl angin a insiam ṭha tih kan chiang thei a ni. Tûn laiah pawh, kan unaute nêna inrem lohna kan neih chuan, inngaitlâwm taka Bible zilhna thu zâwmin, buainate kan chingfel ve tûr a ni dâwn lâwm ni? Rom Kristiante ang bawkin, tûn laiah pawh “inngeih” taka awm tûr chuan buaina neitute tân insiam ṭhat ve ve a ngai a ni.—Mk. 9:50.
Ṭanpuina Pêk Dâwn Hunah
11. Kristian tuemawin a unau nêna an buaina avânga upa a biak duh chuan, upa tân eng anga fîmkhur tûr nge ni?
11 Kristian tuemawin a chhûngte emaw, unaute emaw nêna an harsatna chungchângah upa biak chu duh ta se engtin nge ni ang? Thufingte 21:13 chuan: “Mi rethei au thâwma beng chhu ngawng chu, ani pawh a au vang a, nimahsela ngaihthlâksak a ni bîk lo vang,” tiin a sawi a. Chuvângin, upa chuan ‘a beng a chhu ngawng’ hauh lo vang. Nimahsela, thufing dang pakhat chuan heti hian min vaukhân a ni: “Thubuai sawi hmasatu chu thiam hlein a lang ṭhîn, a rawn chhâl lêt an awm hma chu,” tiin. (Thuf. 18:17, C.L. Re-edited) Upa chuan ṭha takin a ngaihthlâksak ang a; mahse, a sawi hmasatu lama ṭang lo tûrin a fîmkhur tûr a ni. Thil awm dân a ngaihthlâk hnuah, a mi hêka chu a biak tawh leh tawh loh a zâwt ang. Tin, upa chuan thu buai thlen hmasatu chu remna ûm tûra a tih theih Pathian Lehkha Thu-a lang rahbite chu a sawipui thei bawk ang.
12. Thu buai lehlam chauh ngaihthlâk hnua thu tâwp siam nghâl mai a hlauhawmzia târ langtu entîrnate sawi rawh.
12 Thu buai lehlam chauh hriata hma lâk nghâl a hlauhawmzia târ langtu thiltawn pathum Bible-ah a chuang a. Potiphara chuan Josefa’n pâwngsual tum anga sawitu a nupui chu a ring a. Thinur takin Josefa chu tân inah a khung a ni. (Gen. 39:19, 20) A pu, Mephibosetha chu Davida hmêlmate lama ṭang anga sawitu Ziba thusawi chu Lal Davida chuan a ring a: “Ngai teh, Mephibosetha thil neih zawng zawng chu i ta vek a ni ta,” tiin a chhâng lêt nghâl a ni. (2 Sam. 16:4; 19:25-27) Lal Artezerzia hnênah chuan Judate’n Jerusalem kulh an sa ṭha a, Persia lakah hel an tum tih hriattîr a ni a. Chu thu dik lo chu ringin, lal chuan Jerusalem sak ṭhatna chu titâwp tûrin thu a pe a. Chuvângin, Judate chuan Pathian biak in sakna chu an bânsan a ni. (Ezr. 4:11-13, 23, 24) Kristian upate chuan Timothea hnêna Paula’n thil engkim hriat vek hmaa thu tlûkna siam lo tûra a fuihna chu an zâwm a ni.—1 Timothea 5:21 chhiar rawh.
13, 14. (a) Mi dangte buaina chungchângah eng nge kan hriat kim loh ṭhin? (b) Unaute thu buai dik taka rêlsak thei tûrin engin nge upate chu ṭanpui?
13 Buaina neite thusawi ngaihthlâk ve ve hnuah pawh, “tupawhin thil eng emaw hriaa a inrin chuan a hriat tûr ang chu a la hre lo,” tih kan hriat reng a pawimawh a ni. (1 Kor. 8:2) Chu buaina thlen hmaa thilthleng zawng zawngte chu kan hre vek tak zet em? Buaina neitute tûn hma lam nun chu kan hre vek em? Rorêl tûra tih an nih hian upate tân dâwt thu te, vervêk taka thiltih te, a nih loh leh khual thu thang lêng vêl mai maite inbumtîr loh chu a va pawimawh tak êm! Rorêltu atâna Pathian mi thlan Isua Krista chuan dik takin ro a rêl a. Ani chuan ‘a mita a hmuh angin ro a rêl lo va, a benga a hriat angin a zilhhau hek lo.’ (Is. 11:3, 4) Chutih ahnêkin, Isua chu Jehova thlarauvin a kaihruai zâwk a ni. Chutiang bawkin, Kristian upate pawhin Pathian thlarau thianghlim kaihhruaina chu an hlâwkpui a ni.
14 Upate chuan an unaute thu buai an rem hmain Jehova thlarau kaihhruaina dîla an ṭawngṭai a ngai a, Pathian Thu leh bâwih rinawm leh fing tihchhuah thu leh hlate râwna thlarau kaihhruaina an rinchhan chu a ṭûl a ni.—Mt. 24:45.
Engpawh Huama Remna Ûm Tûr A Ni Em?
15. Thil sual lian tak tih kan hriat chuan engtikah nge upate kan hriattîr ang?
15 Kristian kan nih angin, remna ûm tûra fuih kan ni a. Mahse, Bible chuan: “Chung lam aṭanga finna lo chhuak erawh chu atîrin a thianghlim phawt a, chu mi hnuah chuan inrem a duh a,” tiin a sawi bawk. (Jak. 3:17) Inremna aiin thianghlimna—nungchang lama Pathian tehna thianghlimte mila nun leh a thil phût felte tlin chu—a pawimawh zâwk tihna a ni. Kristian tu pawhin a unauvin thil sual lian tak a ti tih a hriat chuan upate hnêna inpuang tûrin a fuih tûr a ni a. (1 Kor. 6:9; Jak. 5:14-16) A inpuan duh loh chuan, a sualna hretu chuan upate hnênah a hriattîr tûr a ni. Thil sual titu nêna inrem duh avânga upate a hriattîr loh chuan ani pawh thil sual titu lama ṭang a ni ang.—Lev. 5:1; Thufingte 29:24 chhiar rawh.
16. Jehua leh Lal Jorama intawhna aṭangin eng nge kan zir theih?
16 Jehua telna thuziak chuan inremna aia Pathian felna a pawimawh zâwkzia a târ lang a. Pathian chuan Lal Ahaba chhûngkaw chunga A rorêlna thlentîr tûrin Jehua chu a tîr a. Ahaba leh Jezebeli te fapa Lal suaksual Jorama chu Jehua tâwk tûrin a tawlailîrin a lo kal a, a hnênah: “Ṭha lam thu em ni le, Jehu?” a ti a. Engtin nge Jehua’n a chhân lêt? “I nu Jezebeli hian uirê leh dawi a chîn nasat chhûng hian ṭha lam thu eng nge awm thei ang?” tiin a chhâng a ni. (2 Lal. 9:22) Tichuan, Jehua chuan Jorama lungah thalin a kâp ta a ni. Chutianga Jehua’n hma a la ang bawkin, upate pawhin remna siam duh vâng maiin duh rêng vânga thil sual titute chu an en liam mai tûr a ni lo. Kohhranin Pathian nêna inremna a neih chhunzawm theih nân thil sual ti inlamlêt duh lote chu an hnawt chhuak tûr a ni.—1 Kor. 5:1, 2, 11-13.
17. Remna ûmna kawngah Kristian zawng zawngin eng chanvo nge an neih vek?
17 Unaute inkâra buaina tam zâwk chu judicial action lâk a ngaihna thil sual lian tham a ni ṭhîn lo. Chuvângin, hmangaihna nêna unaute thil tihsual khuh bo mai chu a va ṭha tak êm! “Bawhchhiatna thuptu chuan inhmangaihna a zawng a, thil sawi sawi hmang chuan ṭhian bulte a tiṭhen ṭhîn,” tiin Pathian Thu chuan a sawi. (Thuf. 17:9) Chu thu zawmna chuan kohhrana inremna awmtîr tûr leh Jehova nêna inlaichînna ṭha nei reng tûrin min ṭanpui ang.—Mt. 6:14, 15.
Remna Ûm Chuan Malsâwmna A Thlen
18, 19. Remna ûmna chuan eng malsâwmna nge a thlen?
18 ‘Inremna tûr thilte’ kan ûmna chuan malsâwmna nasa tak min dawntîr a. A kawngte kan entawn hian Jehova nêna mi mal inlaichînna ṭha tak kan nei a, kohhran chhûngah remna leh inlungrualna kan awmtîr a ni. Chu chuan “remna chanchin ṭha” kan hrilhnate nêna inremna kan ûm theih dân kawngte hmu thiam tûrin min ṭanpui bawk. (Eph. 6:15) Chutiang chuan, ‘mi zawng zawng chunga zaidam a, sual chunga dawhthei’ tûrin kan inbuatsaih ṭha lehzual a ni.—2 Tim. 2:24.
19 Tin, “mi felte leh fel lote thawhlehna a awm” dâwn tih Bible chuan a sawi a. (Tirh. 24:15) Pathian Jehova’n mi hrang hrang—khawvêl hmun hrang hrang leh hun hrang hranga awm—mi maktaduai têlte a kaitho dâwn tihna a ni. An zîngah chuan “leilung pian tirh ata,” a nih loh leh mihring chanchin inṭan tirha mite pawh an tel ang. (Lk. 11:50, 51) Tho lehte hnêna remna kawng thu zirtîr chu chanvo ropui tak a ni ngei ang. Chutih hunah chuan remna siamtu ni tûra tûna zirtîrna kan dawnte hi kan va ṭangkaipui dâwn tak êm! (w11-E 08/15)
[Footnote]
^ par. 6 Insawi chhiatna leh inbumna ang chi sual lian thamte chinfel dân chungchânga Bible kaihhruaina hriat nân,Vênnainsâng October 15, 1999, (English) phêk 17-22-na en rawh.
Eng Nge Kan Zir?
• Tuemaw kan tihlungnih loh chuan remna ûm tûrin eng nge kan tih theih?
• Miin kan chunga thil an tihsual hunah remna ûm tûrin eng nge kan tih theih?
• Engvângin nge mi dangte buainaa ṭan lam neih chu a finthlâk loh?
• Engpawh huama remna kan ûm loh chhan tûr sawifiah rawh.
[Zirlai Atâna Zawhnate]
[Phêk 25-naa milemte]
Jehova chuan thinlung taka mi dang ngaidamtute chu a hmangaih
