Eng Nge Naupangte’n Pathian Chungchâng An Zir Ang?
Eng Nge Naupangte’n Pathian Chungchâng An Zir Ang?
“Pathian Lehkha Thu zawng zawng hi Pathian thâwk khuma pêk a ni a, zirtîr kawngah te, thiam loh chantîr kawngah te, zilh kawngah te, felna zirtîr kawngah te a sâwt bawk a ni.”—2 TIMOTHEA 3:16.
NAUPANGTE chu Pathian chungchâng thutak zirtîr an ngai a. Khawi aṭangin nge chu thutak chu an zir theih ang? Khawvêla sakhaw lehkhabu zah kai ber Bible aṭangin an zir thei a ni.
Bible chu Pathian hnên aṭanga lehkha thawn ang a ni a. Chu lehkhaah chuan Pathianin a miziate a târ lang a, a fate zawng zawng, a pui a pangte tân nungchang lama kaihhruaina a pe bawk a ni. Bible-a chuang zirtîrna ṭhenkhatte leh chûngte aṭanga naupangte pawhin an zir theih thilte lo en ta ila.
Hêng entîrnate’n a târ lan tawh angin, Bible-a zir tûr awmte chuan naupangte chu lâwm nachâng hria, mite zahthiam tak, leh khawngaihna nei mi puitling ni tûrin a ṭanpui thei a ni. Mahse, hêng thute hi tuin nge naupangte chu zirtîr ang? (w11-E 08/01)
Pathianin a chungchâng eng nge kan hriat a duh?
▪ Bible-in a zirtîr chu: “Nangmah chauh hi JEHOVA hming pu, leilung zawng zawng chunga Chungnungber i nih an hriat theih nân.”—Sâm 83:18.
Zir tûr: Pathian chu tak nei lo, chakna thahrui mai a ni lo va, Mi tak tak, hming bil danglam bîk tak nei a ni.
▪ Bible-in a zirtîr chu: “LALPA chuan thinlung a en ṭhîn a, rilrua suangtuah zawng zawngte hi a hre vek a ni; amah i zawn chuan i hmu ang a, i hawisan erawh chuan kumkhuain a thlauthla ang che.”—1 Chronicles 28:9.
Zir tûr: Pathian Jehova chuan naupangte pawh tiamin, kan za hian min ngaihsak vek a. (Sâm 10:14; 146:9) A chungchâng kan zir a duh a ni.
▪ Bible-in a zirtîr chu: “Fahrah . . . in tirethei tûr a ni lo. Anmahni chu in tihretheih vaih a, mi rawn auh phawt chuan, an mi auhna aw chu ka lo ngaithla ngei ang.”—Exodus 22:22-24.
Zir tûr: Pathian Jehova chuan naupangte ṭawngṭaina pawh a ngaithla a. Ani chu engtik lai pawhin kan be thei a, kan thinlung chhûnga kan vei leh ngaihtuahnate kan hrilh thei a ni.
▪ Bible-in a zirtîr chu: “Pathian an fiah a, Israel-ho Mi Thianghlim chu an tivui ṭhîn.”—Sâm 78:41.
Zir tûr: Kan ṭawngkam leh thiltih chuan Pathian Jehova rilru a khawih a; chuvângin, kan ṭawng hma leh thil kan tih hmain ngun takin kan ngaihtuah tûr a ni.
Hnam dangte chu engtin nge kan cheibâwl ang?
▪ Bible-in a zirtîr chu: “Pathianin mi duhsak bîk a nei lo tih dik takin ka hria e; nimahsela hnam tin zîngah tupawh amah ṭiha fel taka ti apiang a lâwmzâwng mi an ni ṭhîn.”—Tirhkohte 10:34, 35.
Zir tûr: Pathianin mi chi tin rêng a pawm si chuan, an vun rawng emaw, an hmêl lan dân emaw a danglam vâng maiin kan en hrang tûr a ni lo.
▪ Bible-in a zirtîr chu: “In thinlungah Krista chu Lalah ruat rawh u; nangmahnia awm in beisei chhan zâwt apiang che u chhâng tûrin inpeih sa fo ang che u, nimahsela thuhnuairawlh tak leh ṭih dêk chungin.”—1 Petera 3:15.
Zir tûr: Sakhaw chungchâng kan sawiho hunah kan ngaih dân chu rintâwkna nei tak, thinrim si lovin kan sawi tûr a ni a. Kan sakhaw pawm ang pawm lo tute chungah pawh zahna kan lantîr tûr a ni.
Engtin nge chhûngkaw zînga mite kan cheibâwl ang?
▪ Bible-in a zirtîr chu: “Naupangte u, engkimah in nu leh in pate thu zâwm rawh u, chu chu Lalpaah chuan a lâwmawm si a.”—Kolossa 3:20.
Zir tûr: Nu leh pa thu zâwm naupangte chuan an nu leh pate mai bâkah Pathian tihlâwm an duhzia an lantîr a ni.
▪ Bible-in a zirtîr chu: “Tupawhin tu chungah pawh thupawi nei ang ula indawh tawnin inngaidam tawn ula; Lalpa chuan a ngaidam che u ang tak khân ngaidam ve rawh u.”—Kolossa 3:13.
Zir tûr: Kan chhûngkaw zînga mite pawh tiamin, mi dangte chuan min tihlungnih loh châng an nei ang. Mahse, Pathian ngaihdamna chan kan duh chuan mi dangte pawh kan ngaidam ve tûr a ni.—Matthaia 6:14, 15.
Engvângin nge thudik kan sawi a, mi ngilnei tak kan nih ang?
▪ Bible-in a zirtîr chu: “Dâwt sawi bânin, mahni ṭhenawm hnênah thu dik tak sawi ṭheuh rawh u.”—Ephesi 4:25.
Zir tûr: Thu dik tak kan sawi hian Pathian kan entawn a, amah kan tilâwm a ni. Dâwt sawi kan chîn chuan Pathian hmêlma, “dâwt pa,” Diabola ang kan ni.—Johana 8:44; Tita 1:2.
▪ Bible-in a zirtîr chu: “Thil engkim miin in chunga an tiha in duh tûr ang apiang chu, mi chungah pawh ti ve rawh u.”—Matthaia 7:12.
Zir tûr: Kan chhûngte leh tual chhûnga mi dangte rilru, ngaihtuahna leh mamawhte chu kan ngaih pawimawhsak tûr a ni. Mi dangte chungah ‘lainatna’ kan lantîr chuan, chutiang bawk chuan min chhâng lêt tlângpui ṭhîn.—1 Petera 3:8; Luka 6:38.