“In Hmuh Theih Nân . . . Tlân Rawh U”
“In Hmuh Theih Nân . . . Tlân Rawh U”
“In hmuh theih nân chutiang takin tlân rawh u.”—1 KOR. 9:24.
1, 2. (a) Hebrai Kristiante fuih nân Paula’n eng nge a hman? (b) Pathian chhiahhlawhte chu eng ti tûra fuih nge an nih?
TIRHKOH Paula chuan Hebrai Kristiante hnêna a lehkha thawnah anmahni fuih nân mitthlaa hmuh theih tûr ṭawngkam thiltithei tak a hmang a ni. Nunna atâna intlânsiaknaah an mal ṭan lo tih a hriattîr a. An chhehvêlah chuan ‘chhûmpui nasa tak ang thlîrtu,’ intlânsiaknaa hlawhtling taka lo tlân tawhte an awm a ni. Chûng mite rinawmna thiltih leh ṭan an lo lâknate rilrua hriat rengna chuan Hebrai Kristiante chu intlânsiaknaa tlân zêl tûr leh châwl mai lo tûrin a ṭanpui a ni.
2 A hmaa thuziakah khân, ‘chhûmpui nasa tak ang thlîrtute’ zînga mi ṭhenkhatte nun kawng chu kan lo ngaihtuah tawh a. Pathian an rinna nasa tak chuan anni chu dam chhûnga a laka rinawm tûrin a ṭanpui a, intlânsiaknaah a tâwp thlengin an tlân a ni. An hlawhtlinna aṭangin zir tûr kan nei thei a. Chu thuziaka kan hriat tawh angin, Paula chuan keimahni pawh tiamin a rawngbâwlpuite chu he fuihna hi a pe a ni: “Min tihnawk apiang leh sual keimahnia bet tlat chu i dah ve ang u, . . . kan hmaa intlânsiakna tûr awmah hian chhel takin i tlân zêl ang u,” tiin.—Heb. 12:1, 2.
3. Paula’n Grik intlânsiaknaa telte chungchâng a sawi aṭangin Kristiante’n eng nge an zir theih?
3 Chutih hun laia intihsiakna thilthleng lâr takte zînga pakhat, kea intlânsiakna chungchângah Backgrounds of Early Christianity tih lehkhabu chuan “Grik mite chu saruakin an insawizawi a, an intihsiak ṭhîn” * tih min hrilh a. Chutiang hunah chuan, intlânsiaknaa telte chuan anmahni tivuaicha thei thil rit emaw, phurrit emaw engpawh chu an hlîp ṭhîn a ni. Chutianga tlân chu âwm lo leh mawi lo angin kan ngai mai thei; mahse, an tum ber chu lâwmman dawn a nih avângin chutiangin an tlân an ni. Paula chuan nunna atâna intlânsiaknaa lâwmman hmu tûrin a telte chuan anmahni tiṭhuanawp thei thil engpawh chu an dah bo a pawimawh tih a sawi a. Chutih laia Kristiante tân chu chu fuihna ṭha tak a ni a, tûn laia keini tân pawh a ni. Nunna atâna kan intlânsiaknaa min tiṭhuanawp thei min tihnawktu leh phurritte chu engte nge ni?
‘Min Tihnawktu Apiang Dahin’
4. Nova hun laia mite chu eng thilahte nge an inhambuai?
4 Paula chuan ‘min tihnawktu apiang dah’ tûrin min fuih a. Chutah chuan kan tlânnaa rilru zawng zawng pêkna leh theih tâwp chhuahna laka min dang thei thil engpawh a tel a ni. Min tihnawktu thilte chu eng nge ni ang? Paula târ lan entîrnate zînga pakhat, Nova chungchâng kan ngaihtuah chuan Isua thusawi: “Nova dam laia thil awmzia ang khân, Mihring Fapa a lo kal leh nîte chuan a awm bawk ang,” tih chu kan hre chhuak a ni. (Lk. 17:26) Isua chuan lo thleng tûr chhiatna nasa tak chungchâng ngawr ngawr ni lovin; mite nun dân a sawi a ni. (Matthaia 24:37-39 chhiar rawh.) Nova hun laia mi nâwlpuite chuan Pathian tihlâwm chu sawi loh, ngaihsakna pawh an lantîr lo. Engin nge anni chu tibuai? Thil lian tham a ni hran lo. Nuna thil pangngai tak ei leh bâr, leh nupui pasal neihte hian a tibuai a. An buaina ber chu Isua sawi angin “engmah an hre [duh] lo,” a ni.
5. Hlawhtling taka intlânsiakna hlen tûrin engin nge min ṭanpui thei?
5 Nova leh a chhûngte angin, nî tin thiltih tûr tam tak kan nei a. Ei kan zawn a ngaih bâkah, mahni inenkawl leh chhûngte enkawl a ngai bawk. Chu chuan kan hun, leh tha leh zung tam tak a la thei a. A bîk takin sum leh pai lama harsatna kan tawh hunah, nuna thil mamawh atâna lungkhamna neih chu a awl hle. Inpumpêk Kristiante kan nih angin, theocratic mawhphurhna pawimawh tak kan nei bawk a. Rawngbâwlnaah kan tel a, Kristian inkhâwmna atâna inpuahchahin, kan tel bawk a, mahnia inzirna leh chhûngkuaa Pathian biakna neiin thlarau lamah kan intichak a ni. Nova chuan Pathian rawng a bâwlnaah chûng zawng zawng chu a tih ngai mah se, Pathian thupêk “ang ngei chuan a ti” a ni. (Gen. 6:22) Ni e, Kristian intlânsiakna hlen tûr chuan min tihnawk thei thil dah bo leh ṭûl lo taka phurrit insiamna kan pumpelh chu a ngai a ni.
6, 7. Isua fuihna eng nge kan rilrua kan vawn tlat ang?
6 Paula’n ‘min tihnawk apiang’ dah tûr a tih awmzia chu eng nge ni? Mawhphurhna kan neih piangte chu kan hlamchhiah ṭhak thei lo ngei mai. He mi chungchângah hian, Isua thusawi: “‘Engnge kan ei ang?’ emaw, ‘Engnge kan in ang?’ emaw ‘Eng sinin nge kan awm ang?’ emaw tih, lungkham suh u, Jentailten chûng zawng zawng chu an zawng ṭhîn a ni. Chûng zawng zawng chu in mamawh tih in Pa vâna mi’n a hre reng a ni,” tih hi hre reng rawh. (Mt. 6:31, 32) Isua chuan thil pângngai anga ngaih eiin, leh silhfên ang chite pawh a nihna tûr ang taka hman a nih loh chuan phurrit emaw, min titlutu emawah a chang thei a tihna a ni.
7 Isua thusawi: “Chûng zawng zawng chu in mamawh tih in Pa vâna mi’n a hre reng a ni,” tih hi han ngaihtuah teh. Hei hi kan Pa vâna mi, Jehova’n min enkawl nân a tih tûr a ti ang tihna a ni. A tihchian nân, “chûng zawng zawng” chu kan mi mal duhzâwng leh duh dân lakah chuan a danglam mai thei a. Chuti chung chuan ‘Jentailte zawn ṭhin chûng zawng zawngte’ chu lungkham lo tûra hrilh kan ni. Engvângin nge? A hnuah Isua’n a thu ngaithlatute chu: “Fîmkhur rawh u, chutilochuan ei puar lutuk nên, zu ruih nên, dam chhûng khawsak ngaihtuah nên, in rilru a khat lutuk hlauh ang a, chu mi nî chuan thang âwk angin thâwklehkhatan in chungah a lo thleng phut ang,” tiin thurâwn a pe a ni.—Lk. 21:34.
8. Engvângin nge tûnah hian ‘min tihnawk thei apiang kan dah ang?’
8 Intlânsiakna tâwpna chu kan thleng ṭêp tawh a. Chutih laia min tihnawk thei thil intihbuaitîr chu a va lungchhiatthlâk dâwn êm! Chuvângin, tirhkoh Paula thurâwn: “Pathian ngaihsakna ni lungawina tel zawngin hlâwkna nasa tak a ni,” tih nunpui hi a finthlâk hle. (1 Tim. 6:6) Paula fuihna thu hriat rengna chuan lâwmman dawn chu a tiawlsam zual ngei ang.
“Sual Keimahnia Bet Tlat Chu”
9, 10. (a) “Sual keimahnia bet tlat” tih hian eng nge a kawh? (b) Engtin nge kan invehbuaitîr theih?
9 “Min tihnawk apiang” a sawi bâkah, Paula chuan “sual keimahnia bet tlat” dah ṭhat pawh a sawi a ni. Atîra Greek ṭawngah, chu chu “awlsam taka min chingchivêt ṭhîntu sual” tia sawi a ni a, Bible-ah he mi chângah chauh hian a lang a ni. Chu chu eng nge ni thei ang? Bible scholar pakhat, Albert Barnes-a chuan chutih hun laia intlânsiaknaa telte’n ke pên tiharsa thei thawmhnaw hâk loh hrâm an tum ṭhin thu a sawi a. Chutiang bawkin Kristiante’n an intlânsiakna chu thil engmah an intihbuaitîr tûr a nih loh thu a sawi bawk. Kristian chu engmah a invehbuaitîr tûr a ni lo, chu chu a rinna a chauhtîr tûr a ni lo tihna a ni. A nih leh engtin nge Kristian chuan a rinna a chauhtîr theih?
10 Kristian chuan zan khat thil thuin a rinna a hloh mai lo. Chu chu zawi zawia lo awm a ni a, a châng phei chuan hriat chhuah a har hle a ni. Paula chuan atîr lama a lehkha thawnah, “tawlh bo” leh “rin lohna thinlung sual” neih a hlauhawmzia a vaukhân a. (Heb. 2:1; 3:12) Intlânsiaknaa tel chu a thawmhnaw hâkin a ke a vehbuai chuan, a tlu tlângpui ṭhîn a. Chuvângin, ani chuan thawmhnaw dik lo a thlan chuan a tlu thei tih a hre tûr a ni. Engin nge chu thil hlauhawm chu ngaihthahtîr thei? Fîmkhur lohna te, a lutuka mahni inrinna te, a nih loh leh rilru la pêngtu thil ṭhenkhat te hi a ngaihthahtîrtu chu a ni thei. Paula fuihna aṭangin eng nge kan zir theih?
11. Engin nge rinna min hlohtîr thei?
11 Kristianin a rinna a hloh chuan, chu chu thil eng emaw tih a thlan avânga lo awm a ni tih kan hre reng tûr a ni. “Sual keimahnia bet tlat” chungchângah scholar dang pakhat chuan kan dinhmun tawn te, kan ṭhian kawm te, leh kan châkna ṭha lote hian keimahniah nghawng nasa tak a nei thei a. Chûngte chuan kan rinna a tichak lo theiin, min hlohtîr hial thei tih a sawi a ni.—Mt. 13:3-9.
12. Rinna kan hloh loh nân eng vaukhânnate nge kan zawm ang?
12 Kum kal ta chhûngte khân, bawi rinawm leh fing pâwl chuan kan thil en leh ngaihthlâkte’n kan ngaihtuah dân leh kan châkzâwngte a nghawng avângin, chûngte chu fîmkhûr taka thlang tûrin min vaukhân a. Sum leh pai, leh thilte ûm avânga invehbuai a hlauhawmzia chungchângah min vaukhân bawk. Khawvêl intihhlimna mi hîp thei takte emaw, thil thar chhuak zut zut reng maite emaw tihbuaiin kan awm thei a ni. Chûng zilhnate chu a lutuk anga kan ngaih emaw, rinna chak tak kan neih avânga mahni tân ni lo, mi dang tân chauhva hlauhawm ang emawa kan ngaih chuan kan tisual hle ang. Setana khawvêl chuan min vêtbuaitu hriatthiam har takte leh min bum thei tak thilte chu intlânsiaknaa min tihbuai nân a hmang a ni. Ṭhenkhat chuan fîmkhur lohna te, a lutuka mahni inrinna te, leh min tibuai thei thilte avângin an rinna an hloh va, chûng thilte chuan nunna lâwmman kan beiseina chu a khawih pawi thei a ni.—1 Joh. 2:15-17.
13. Engtin nge min nghawng thei thil hlauhawm takte lakah kan invên theih ang?
13 Nî tin mai hian khawvêl lam thiltum te, hlutna te, leh ngaihtuahnate chawilârtu mite hual vêlin kan awm a. (Ephesi 2:1, 2 chhiar rawh.) Mahse, min nghawng nasat leh nasat loh chu keimahni-ah, chûng thilte kan chhân lêt dânah chuan a innghat a ni. Paula’n ‘boruak’ tia a sawi hi thihna thlen thei a ni a. Chuvângin, chûng thilte’n min tihbuai, a nih loh leh min dîp ral avânga intlânsiakna kan tâwpsan loh nân kan fîmkhur reng tûr a ni. Engin nge tlân reng tûrin min ṭanpui ang? Isua chu intlânsiakna hlenna kawnga entawn tûr ṭha ber a ni a, amah kan entawn thei a ni. (Heb. 12:1, 2) Paula entîrna pawh kan nei a, ani chuan Kristian intlânsiaknaa tlân ve anga inchhiarin, a unaute chu amah entawn tûrin a fuih a ni.—1 Kor. 11:1; Phil. 3:14.
Lâwmman “In Hmuh Theih” Dân
14. Paula’n a intlânsiakna chu eng angin nge a thlîr?
14 Paula’n a intlânsiakna chu eng angin nge a thlîr? Ephesi khuaa upate hnêna a lehkha thawn hnuhnûng berah: “Ka tlânsiakna kawng ka hmabâk hlen . . . tûr, Lalpa Isua hnênah kha mi rawngbâwl hna ka hmuh kha thawk zo phawt ila, ka nun pawh thlâkhlelh tlâkah ka ruat lo ve,” a ti a. (Tirh. 20:24) Intlânsiakna a hlen theih nân a nunna pawh tiamin engkim chân a inhuam a ni. Intlânsiakna a hlen loh palh hlauh chuan chanchin ṭha avânga a beihna leh a thawhrimna zawng zawng chu a thlâwn mai a ni ang. Mahse, ani chu intlânsiaknaa lâwmman hmu ngei tûra inngai, a lutuka mahni inrinna nei erawh a ni lo. (Philippi 3:12, 13 chhiar rawh.) A nun tâwp dâwn lamah chauh inrin tâwkna engemaw chen neiin heti hian a sawi a ni: “Intihsiakna ṭha chu ka bei zo tawh a, ka tlânsiakna kawng ka hlen tawh a, rinna chu ka vawng reng tawh a ni,” tiin.—2 Tim. 4:7.
15. Paula’n intlânsiaknaa tel a unaute chu eng fuihna nge a pêk?
15 Chu bâkah, Paula chuan a Kristian unaute’n an intlânsiakna chu kawng laka chawlhsan lova, an hlen chhuak ngei hmuh chu a châk hle a. Entîr nân, Philippi khuaa Kristiante chu an chhandamna hmu tûra thawkrim tûrin a fuih a ni. Anni chuan “nunna thu” an chelh ngheh tlat a ngai a. “Athlâwna tlân ka nih loh va, athlâwna thawk rim ka nih hek loh avângin Krista niah chuan chhuan tûr ka nei thei ang,” tiin a sawi zawm a ni. (Phil. 2:14-16) Korinth khuaa Kristiante pawh chu: “[Lâwmman] in hmuh theih nân chutiang takin tlân rawh u,” tiin a fuih bawk.—1 Kor. 9:24.
16. Engvângin nge lâwmman chu kan rilruah a chian hle ang?
16 Marathon ang chi, intlânsiakna thui takah chuan a tâwpna hmuh theih a ni ṭhîn lo. Chuti chung pawhin, intlânsiaknaa tel chuan kawng tluanin a tâwpna rîn chu a ngaihtuah reng ṭhîn a. A tâwp a thleng ṭêp tawh tih a hriat chuan a tum a ruh lehzual sauh ṭhîn. Kristiante intlânsiakna pawh chutiang bawk chu a ni. Lâwmman chu kan rilruah a chiang tûr a ni a. Chu chuan a tâwp thlenga tlân a, lâwmman hmuh tum ngei tûrin min ṭanpui ang.
17. Engtin nge rinna chuan lâwmman thlîr reng tûra min ṭanpui?
17 “Rinna hi thil beiseite awm ngeia hriatna, thil hmuh lohte hriatfiahna a ni,” tiin Paula chuan a ziak a. (Heb. 11:1) Abrahama leh Sari chu an nun nuam tak kalsan inhuamin, “mikhual leh khualzin” ang maiin an awm a ni. Engin nge anni chu ṭanpui? ‘[Pathian thutiam thlen famkimna chu] hla tak aṭanga an hmuh’ vâng a ni. Mosia chuan “sual nawmna” leh “Aigupta ram rote” chu a hnâwl a. Chutianga ti tûrin engtin nge rinna leh chakna a neih? “Lâwmman pêk tûr chu a thlîr ṭhin” vâng a ni. (Heb. 11:8-13, 24-26) Paula chuan hêng mite chanchin a sawinaa “rinnain” tia a ṭan zêl pawh hi hriatthiamawm tak a ni. Rinna chuan anni chu fiahna leh harsatna an tawh mêkte piah lam thlîr a, Pathianin an tâna thil a tihsak mêkte leh a la tih tûrte hmu tûrin a ṭanpui a ni.
18. “Sual keimahnia bet tlat” dah bo tûrin eng thil pawimawh tak nge kan tih ang?
18 Hebrai bung 11-a târ lan mite rinna chu ngaihtuah ngun a, an entawn tûr siam kan zui chuan rinna kan nei theiin, “sual keimahnia bet tlat” chu kan dah bo ve thei a ni. (Heb. 12:1, 2) Tin, rinna nei mite nêna inkâwm khâwmin, ‘hmangaih leh thil ṭha tiha inchawk tho tûrin kan inngaihtuah tawn’ thei bawk.—Heb. 10:24.
19. Engvângin nge intlânsiaknaa kan tlân chhunzawm zêl chu thil pawimawh tak a nih?
19 Kan intlânsiakna chu kan hlen lek lek tawh a. A tâwpna rîn hmu pha tawh reng ang kan ni. Rinna leh Jehova ṭanpuinain, “min tihnawk apiang leh sual keimahnia bet tlat” chu kan dah bo ve thei a ni. Ni e, lâwmman—kan Pathian leh Pa, Jehova tiam malsâwmnate—chu kan hmuh theih nân chutiang takin kan tlân thei a ni. (w11-E 09/15)
[Footnote]
^ par. 3 Chu chuan hmân laia Juda mite chu a tithinur a. 2 Maccabees tih lehkhabu sawi dânin Puithiam Lal kalpêng Jason-a’n Grik mite neih anga Jerusalema insawizawina hmun (gymnasium) sak a rawtna chuan inhnialna nasa tak a tichhuak a ni.—2 Macc. 4:7-17.
Kan La Hria Em?
• “Min tihnawk apiang” dah bonaah eng nge tel?
• Engin nge Kristian chu a rinna hlohtîr thei?
• Engvângin nge lâwmman chu kan ngaihtuah reng ang?
[Zirlai Atâna Zawhnate]
[Phêk 26-naa milem]
“Sual keimahnia bet tlat” chu eng nge ni a, engtin nge chu chuan min vehbuai theih?
