Intlânsiaknaah Chhel Takin Tlân Rawh
Intlânsiaknaah Chhel Takin Tlân Rawh
“Kan hmaa intlânsiakna tûr awmah hian chhel takin i tlân zêl ang u.”—HEB. 12:1, 2.
1, 2. Tirhkoh Paula’n Kristian nun kawng chu eng nên nge a tehkhin?
KUM tinin, hmun tam takah marathon intlânsiakna neih a ni ṭhîn a. Intlânsiakna lama mi hmingthangte chu tum pakhat neiin an intlânsiak ṭhîn—hnehna chan chu. Intlânsiaknaa tel mi hnawlpuite tum chu a hniam zâwk hret a. An tân chuan a tâwp thlenga tlân ringawt pawh hi chapopuina tham a tling a ni.
2 Bible chuan Kristian nun kawng chu intlânsiakna nên a tehkhin a. Tirhkoh Paula chuan chu chu hmân lai Korinth khuaa a Kristian unaute hnênah a hrilh a ni: “Intlânsiakhote chu an zain an tlân a, nimahsela pakhat chauhvin lâwmman a hmu ṭhîn tih ien hre lo vem ni? In hmuh theih nân chutiang takin tlân rawh u,” tiin a ziak a ni.—1 Kor. 9:24.
3. Engvângin nge Paula chuan intlânsiaknaah pakhat chauhvin lâwmman a hmu ṭhîn a tih?
3 Paula chuan chûng Kristiante zînga pakhat chauhvin nunna lâwmman a hmu ang a, a dang zawngte chu a thlâwna tlân ang an ni a tihna a ni em? Ni lo ve! Intlânsiaknaa telte chuan chak ber nih tum rânin theih tâwpa inzirin an bei a. Paula chuan a Kristian unaute chu chatuan nunna neih tuma hma an lâknaah chutiang taka bei tûrin a duh a ni. Chutianga an tih chuan nunna lâwmman dawn chu an beisei thei a ni. Ni e, Kristian intlâksiaknaah chuan a tâwp thlenga tlân zawng zawngin lâwmman an hmu ang.
4. Kan hmaa awm intlânsiakna chungchângah eng nge kan ngaihtuah ang?
4 Chûng thute chu tûn laia nunna atâna intlânsiak zawng zawngte tân mi fuih thei tak a nih bâkah, ngaihtuahna tithui thei tak a ni. Engvângin nge? Lâwmman chu—vâna nun a ni emaw, lei Paradis-a nun a ni emaw—tehkhin rual lohva hlu a nih vâng a ni. Intlânsiakna chu a thuiin, a hautak a; harsatnate leh mi lapêng thei thil tam tak a awm bawkin, a kawng chu a hlauhawm bawk a ni. (Mt. 7:13,14) Lungchhiatthlâk takin, ṭhenkhat chuan vuaichain, an tlâwmsan, a nih loh leh kawngah chuan an tlu hial a ni. Nunna atâna intlânsiaknaah eng harsatnate leh hlauhawmte nge awm? Engtin nge chûng chu i pumpelh theih? Lâwmman hmu tûra a tâwp thlenga tlân tûrin eng nge i tih theih?
Lâwmman Hmuh Nân Chhelna A Ngai
5. Hebrai 12:1, 2-a chhinchhiah angin Paula’n intlânsiakna chungchângah eng nge a sawi?
5 Paula chuan Jerusalem leh Judai rama Hebrai Kristiante hnêna a lehkha thawnah, intlânsiaknaa telte chungchâng chu a sawi leh a. (Hebrai 12:1, 2 chhiar rawh.) Ani chuan Kristiante chu intlânsiaknaa an tlân chhunzawm zêl a ngaih chhan leh a tâwp thlenga tlân tûra an tih ngai chu a sawi a ni. Paula’n Hebrai Kristiante hnêna lehkha thawn a ziah chhan leh an tih atâna a duhte kan bih chiang phawt ang a. Tichuan, zir tûr kan neihte pawh kan bih chiang bawk ang.
6. Sakhaw hruaitute chuan Kristiante chungah eng nge tih an tum?
6 Kum zabi khatnaa Kristiante, a bîk takin Jerusalem leh Judai rama awmte chuan fiahna leh harsatna tam tak an tawng a. Mipuite chunga nasa taka thunei, Juda sakhaw hruaitute nêksâwrna nasa tak an tawng a ni. A hmain, chûng hruaitute chuan Isua Krista chu mite heltîrtu anga puhin, dân bawhchhetu angin an lo tihlum tawh a. An dodâlna chu tihtâwp mai an tum lo. Tirhkohte bu-ah chuan C.E. 33 Pentikost hnuaa Kristiante chunga thil thleng kan hmu thei a. Chûng sakhaw hruaitute chuan Kristiante chu an thu hrilhna bânsantîr tumin vawi tam tak an bei a ni. Chu chuan Kristian rinawmte nun chu a tiharsa hle.—Tirh. 4:1-3; 5:17, 18; 6:8-12; 7:59; 8:1, 3.
7. Tirhkoh Paula’n lehkha a thawn Kristiante khân eng hun khirh tak nge an tawn?
7 Chûng Kristiante harsatna dang leh chu Juda kal hmang tâwp hma lawka chêng an nih vâng a ni. Isua chuan an hnênah Juda hnam rinawm lote chunga chhiatna lo thleng tûr chungchâng a hrilh a. Tâwpna a thlen hma lawka thil thleng tûr chu hrilhin, dam khawchhuah nâna an tih tûr kaihhruaina chiang tak a pe bawk a ni. (Luka 21:20-22 chhiar rawh.) Chuti a nih chuan eng nge an tih tâk ang? Isua chuan: “Fîmkhur rawh u, chutilochuan ei puar lutuk nên, zu ruih nên, dam chhûng khawsak ngaihtuah nên, in rilru a khat lutuk hlauh ang a, chu mi nî chuan thang âwk angin thâwklehkhatan in chungah a lo thleng phut ang,” tiin a vaukhân a ni.—Lk. 21:34.
8. Engin nge Kristian ṭhenkhat chu Pathian rawngbâwlnaa vuaicha emaw, tlâwmsan emaw tîr thei?
8 Hebrai mite hnêna Paula lehkha thawn chu Isua’n chu vaukhânna a pêk hnu kum 30 dâwna ziah a ni a. Chûng kum chhûngte chuan Kristiante chungah eng nge thleng? Ṭhenkhat chu nêksâwrna leh nî tin nuna kuaipêngtu thilte lakah tlâwmin, anmahni tichaktu tûr thlarau lama hmasâwnna an nei lo a ni. (Heb. 5:11-14) Mi dangte chuan an chhehvêla awm Juda mi nâwlpuite anga awm mai chu a awlsam zâwk an ring niin a lang. Tihah chuan, chûng Judate chuan Pathian an hlamchhiah ṭhak lo va; a Dânte chu engemaw chen an zâwm tho a ni. Kristian dangte chu Mosia Dân leh thu rochhiahte zawm tlat sawi mawitu kohhrana mite hneh emaw, tihhlauh emawin an awm a ni. Paula chuan a Kristian unaute thlarau lama harhvâng tûr leh intlânsiaknaa chhel taka tel tûra ṭanpuitu tûr eng nge a sawi ang?
9, 10. (a) Hebrai bung 10-na tâwp dâwn lamah Paula fuihna thu eng nge kan hmuh? (b) Engvângin nge Paula chuan hmân laia Jehova chhiahhlawhte rinna thiltih chungchâng chu a ziah?
9 Pathian thâwk khumna hnuaia Paula’n Hebrai Kristiante tihchak a tum dân hriat chu a châkawm hle. A lehkha thawn bung 10-naah Paula’n Dân thu chu “thil ṭha, lo awm tûrte anpui” a ni tih a sawi a, Krista tlanna inthawina hlutna chu a târ lang chiang hle. Chu bung tâwp lamah chuan, Paula chuan a lehkha chhiartute chu: “Pathian duhzâwng in tih hnuin thiltiam chu in hmuh theih nân chhelna in ngai asin. Rei lo tê achinah lo kal tûra chu a lo kal dâwn si a, rei a rial tawh lo vang,” tiin a fuih a ni.—Heb. 10:1, 36, 37.
10 Hebrai bung 11-ah chuan Paula’n Pathian rinna dik chungchâng thiam takin a hrilhfiah a. Chu chu hmân laia rinna lantîrtu a hmei a pate entîrna hmangin a târ lang a ni. Chu chu ṭûl lo taka thusawi lai kalsanna a ni em? Ni lo ve. Tirhkoh chuan a unaute’n rinna lantîr tûrin huaisen taka thiltih leh chhelna neih a ngaihzia an hriat a ṭûl tih a hria a. Jehova chhiahhlawh chûng hmân laia mi rinawmte entîrna ṭha tak chuan Hebrai mite chu fiahna leh harsatna an tawhte tuar chhuak thei tûrin a tichak ang. Chutianga tûn hmaa mi rinawmte rinna avânga thiltihte a sawi hnuah, Paula chuan “Chutichuan chhûmpui nasa tak ang thlîrtuten min hual vêl avâng hian, min tihnawk apiang leh sual keimahnia bet tlat chu i dah ve ang u, . . . kan hmaa intlânsiakna tûr awmah hian chhel takin i tlân zêl ang u,” tiin a sawi thei a ni.—Heb. 12:1, 2.
‘Chhûmpui Ang Thlîrtute’
11. ‘Chhûmpui nasa tak ang thlîrtute’ chungchâng kan ngaihtuah hian eng nge kan hriat reng ang?
11 Paul chuan Kristian hun hmaa Jehova chhiahhlawhte chu ‘min hual vêltu chhûmpui nasa tak ang thlîrtute’ angin a sawi a. Anni chu an thih thlengin an rinawm a, an entîrna chuan Kristiante chu dinhmun hrehawm tak hnuaiah pawh Jehova lakah an rinawm reng thei tih a târ lang. ‘Chhûmpui ang thlîrtute’ chu an intlânsiakna hlen tawh intlânsiak mi an ni a. An entîrna siam chuan mi dangte chu tlân zêl tûrin a fuih ang. Intlânsiaknaa kan tel laiin chutiang mite’n min thlîrin tlân zêl tûrin min fuih a ni tih kan hriat chuan theih tâwp kan chhuah ve ngei ang. Chuvângin, Hebrai Kristiante tân hun kal tawha Jehova chhiahhlawhte entîrna siam ngaihtuah chu a ngai a ni. Chu chuan huaisenna pein, ‘chhel taka tlân zêl a,’ intlânsiakna an hlen theihzia a hriattîr thei si a. Chutiang chu kan tân pawh a ni ve thei a ni.
12. Paula sawi mite rinna aṭangin eng nge kan zir theih?
12 Paula sawi mi rinawm tam takte dinhmun chu kan dinhmun nên a inang a. Entîr nân, Nova chu Tuilêt hma khawvêl tâwpna lamah khân a chêng a. Keini pawh he khawvêl kalhmang tâwpna lamah kan chêng a ni. Abrahama leh Sari chu biakna dik ûm tûr leh Jehova thutiam thlen famkimna nghâk tûrin an in leh lo kalsan tûra hrilh an ni. Keini pawh mahni inphatsan a, Jehova pawm nihna leh kan tâna malsâwmna a dahte dawng tûra fuih kan ni. Mosia chuan thlalêr hmun hlauhawm tak kal tlangin Ram Tiam lam a pan a. Keini pawhin he khawvêl suaksual taka awmin thutiam khawvêl thar chu kan nghâk mêk a ni. Chûng mite thiltawn, an hlawhtlinna leh an hlawhchhamna te, an chakna leh chak lohna te chuan kan ngaihtuah ngun an phu tak zet a ni.—Rom 15:4; 1 Kor. 10:11.
An Hlawhtling—Engtin Nge?
13. Nova chuan eng harsatna nge a tawn a, engin nge hmachhawn thei tûra ṭanpui?
13 Jehova chhiahhlawh chûng mite chu an intlânsiaknaa chhel tûr leh hlawhtling tûrin engin nge ṭanpui? Nova chungchâng Paula ziah hi han chhinchhiah teh. (Hebrai 11:7 chhiar rawh.) ‘Tisa zawng zawng tiboral tûra leia tui tihlêt’ chu Nova tân “thil lo la lang lote” a ni. (Gen. 6:17) Chu chu a hmaa thil la thleng ngai miah lo a ni a. Chuti chung chuan, Nova chuan thil âwihawm lo leh thil ni thei lo angin a ngai mai lo. Engvângin nge? Ani chuan Jehova’n a sawi apiang chu a ti ngei ang tih a rin vâng a ni. Nova chuan a thiltih tûr chu harsa lutuk angin a ngai lo va. Chu ai mah chuan, Pathian thupêk “ang ngei chuan a ti ta a.” (Gen. 6:22) Nova thiltih tûr zawng zawng—lawng tuk te, nungcha hruai khâwm te, lawng chhûnga mihring leh ran chaw tûr chhêk khâwl te, vaukhânna thu hrilh te, leh a chhûngkaw thlarau lam tihchak te—ngaihtuah chuan Pathian thupêk ‘ang ngeia’ tih chu thil awlsam a ni lo. Mahse, Nova rinna leh chhelna chuan amah leh a chhûngte tân nunna leh malsâwmna a rah chhuak a ni.
14. Eng ang dinhmun hnuaiah nge Abrahama leh Sari’n rinna an lantîr a, chu mi aṭangin eng nge kan zir theih?
14 Paula’n ‘min hual vêltu chhûmpui nasa tak ang thlîrtu’ a sawite zîngah Abrahama leh Sari an tel a. Ur khuaa an nun pângngai chu an kalsan a, an hma bâk chu a chiang lo hle a ni. Anni chu hun khirh tak hnuaia rinna nghet leh thu âwihna lantîrna kawnga entawn tûr ṭha an ni a. Biakna dik atâna Abrahama inpêkna zawng zawngte avângin ani chu “ringtu zawng zawng pa” tia inâwm taka koh a ni. (Rom 4:11) Paula thuziak chhiartute chuan Abrahama nun kawng chu an hriat hle avângin, ani chuan a pawimawh lai chauh a sawi a. Nimahsela, zir atâna Paula târ lan chuan thil a ti thei hle: “[Abrahama leh a chhûngte pawh tiamin] chûng zawng zawngte chu rinna neiin an thi ta a, thiltiamte chu chang lovin; nimahsela chûng chu hla tak aṭanga hmuin chibai an lo bûk tawh a, leiah hian mikhual leh khualzin mai an ni tih an inhriattîr tawh bawk.” (Heb. 11:13) Pathian an rinna leh amah nêna an inlaichînna chuan chhel taka tlân tûrin a ṭanpui tih a chiang hle.
15. Engvângin nge Mosia’n Pathian mite nêna hrehawm tawrh chu a thlan?
15 Jehova chhiahhlawh ‘chhûmpui ang thlîrtute’ zînga entawn tûr dang leh chu Mosia hi a ni a. Ani chuan nun hausa tak leh nuam tak chu kalsanin, “Pathian mite nêna tihduhdah tuar a thlang ta zâwk a.” Engin nge chutianga chêttîr? Paula’n heti hian a chhâng a ni: “Lâwmman pêk tûr chu a thlîr ṭhin avângin . . . Hmuh theih lohva chu a hmuh avângin a tuar ṭan ṭan a ni,” tiin. (Hebrai 11:24-27 chhiar rawh.) “Rei lo tê atân sual nawmna” chuan Mosia rilru a la pêng lo. Pathian leh a thutiamte a tâna a tak êm avângin, huaisenna leh chhelna nasa tak a lantîr a. Israelte chu Aigupta aṭanga Ram Tiam-ah hah pawh hre lo khawpin a hruai ṭâng ṭâng a ni.
16. Ram Tiam-a luhtîr phal a nih loh khân, engvângin nge Mosia chu a lungnih loh loh?
16 Abrahama angin, Mosia chuan Pathian thutiamte thlen famkimna chu a dam chhûngin a hmu hman lo va. Israelte Ram Tiam-a an luh dâwn khân, Pathianin Mosia hnênah: “Ram chu i han hmu ang a; nimahsela Israela thlahte ka pêk ramah chuan i lût lo vang,” tiin a hrilh a ni. A chhan chu, mipuite helna avânga thinur a, Arona nên ‘Meriba tuia Israel thlahte zînga Pathian chunga an lo sual tawh vâng’ a ni. (Deut. 32:51, 52) Mosia chu a lungni lo emaw, a thinur emaw em? Hnai lo ve. Israela mite chunga a malsâwmna thusawi chu hêng thute hmangin a khâr a ni: “I nihlawh e, aw, Israel, nang ang rêng tunge awm, LALPA chhandam mite? Nangmah puitu phaw, i ropuina khandaih a ni!” tiin.—Deut. 33:29.
Kan Zir Tûr Chu
17, 18. (a) Nunna atâna intlânsiaknaah, ‘chhûmpui ang thlîrtute’ hnên aṭangin eng nge kan zir theih? (b) A dawta thuziakah eng nge kan sawiho vang?
17 ‘Min hual vêltu chhûmpui nasa tak ang thlîrtute’ zînga mi ṭhenkhatte nun kawng kan han enna aṭangin, kan intlânsiakna hlen tûr chuan Pathian leh a thutiamte kan rin tlat a ngai tih a chiang hle. (Heb. 11:6) Rinna hi kan nun khawi emaw laia lo bei tel ve mai mai a ni thei lo; a pawimawh lai ber a nih a ngai a ni. Rinna nei lote ang lo takin, Jehova mite chuan tûn dinhmun piah lam chu kan hmu thei a. ‘Hmuh theih lohva’ chu kan hmuh theih avângin, chhel takin kan tlân a ni.—2 Kor. 5:7.
18 Rinna nun chu thil awlsam a ni lo. Nimahsela, hlawhtling takin chu intlânsiakna chu kan hlen thei a ni. A dawta thuziakah, ṭanpuitu dang kan neih chungchâng chu kan hmu ang. (w11-E 09/15)
Kan Hrilhfiah Thei Em?
• Engvângin nge Paula chuan hmân laia ‘chhûmpui ang thlîrtute’ chanchin a ziah ṭeuh?
• Engtin nge ‘min hual vêltu chhûmpui ang thlîrtute’ mitthlana chuan chhel taka tlân tûra min ṭanpui theih?
• Nova te, Abrahama te, Sari te, leh Mosia te ang thlîrtute chanchin ngaihtuahna aṭangin eng nge kan zir?
[Zirlai Atâna Zawhnate]
[Phêk 22-naa milem]
Abrahama leh Sari chuan Ur khuaa an nun nuam tak chu kalsan an inhuam
