Jehova Chu I Chanpual I Nihtîr Em?
Jehova Chu I Chanpual I Nihtîr Em?
“A ram leh a felna chu zawng hmasa zâwk rawh u, tichuan chûng zawng zawng chu a pêk belhchhah dâwn che u nia.”—MT. 6:33.
1, 2. (a) Galatia 6:16-a “Pathian Israelte” hian tute nge a entîr? (b) Matthaia 19:28-a “Israel hnam sâwm leh hnam hnihte” hian tute nge a entîr?
BIBLE-A Israel tih hming i chhiar hian i rilruah eng nge lo lang? Israela tiha a hming thlâk tâk, Isaaka fapa Jakoba nge i ngaihtuah a, a thlah hmân lai Israel hnamte chu? Nge thlarau lam Israelte zâwk? Israel tih hi entîr neia sawi a nih chuan, vâna lal leh puithiamte ni tûra thlarau thianghlima hriak thih mi 1,44,000, “Pathian Israelte” sawina a ni tlângpui a. (Gal. 6:16; Thup. 7:4; 21:12) Mahse, Matthaia 19:28-a Israel hnam 12-te chungchâng bîk sawina hi lo ngaihtuah teh.
2 Isua chuan: “Siamtharnaah chuan, Mihring Fapa a ropuina ṭhutphaha a ṭhut hunah, nangni mi zuituteho hi, Israel hnam sâwm leh hnam hnihte chu ngaihtuahin, lalṭhutphah sâwm leh pahnihah in la ṭhu ve ang,” tiin a sawi a. Heta “Israel hnam sâwm leh hnam hnihte” hi Isua zirtîr hriak thihte rorêlna hnuaia awm tûr, lei Paradis-a chatuan nunna chang tûrte an ni. Anni chuan mi 1,44,000-te puithiam anga rawngbâwlna chu an hlâwkpui ang.
3, 4. Hriak thih mi rinawmte chuan eng entawn tûr ṭha tak nge an siam?
3 Hmân lai puithiamte leh Levi-hote angin, tûn laia hriak thihte chuan an rawngbâwlna chu chanvo ropui takah an ngai a ni. (Num. 18:20) Chûng hriak thihte chu leia rochan neih an inbeisei lo. Chu ai mahin, vâna Isua Krista nêna lal leh puithiam nih chu an inbeisei zâwk a ni. Hriak thihte vân lam dinhmun tûr sawina Thu Puan 4:10, 11-a târ lan angin, lal leh puithiam angin Jehova rawng an bâwl chhunzawm zêl ang.—Ezek. 44:28.
4 Hriak thihte chuan leia an awm laiin, Jehova chu an chanpual a ni tih târ lang zâwngin an nung a. Pathian rawngbâwl theihna an chanvo chu an dah pawimawh ber a ni. Krista tlanna inthâwina an ring a, amah chu an zui reng a, chutiang chuan ‘a kohna leh a thlanna chu an tinghet a ni.’ (2 Pet. 1:10) An mi mal dinhmun leh theihnate chu a inang lo ṭheuh va. Mahse, tlin tâwk an neihna engpawh chu Pathian rawngbâwlnaa inhman tlêm phah nân an hmang chuang lo. Pathian rawngbâwlna chu dah pawimawh ber zâwkin, an theih apiang an ti a. Lei paradis-a nun beiseina neite tân entawn tûr ṭha tak an siam a ni.
5. Engtin nge Kristian zawng zawng chuan Jehova chu an chanpual an nihtîr theih a, engvângin nge chu chu thil harsa tak a nih theih?
5 Kan beisei chu vân lam emaw, lei lam emaw pawh ni se, ‘mahni hrehawm pawisa lovin, Krista chu kan zui tûr a ni.’ (Mt. 16:24) Lei Paradis-a nun beiseitu mi maktaduai têlte chuan Pathian biain, mahni hrehawm pawisa lovin Krista an zui a ni. Anni chuan a aia tam zâwk an ti thei tih hre reng chunga tlêm tê chauh tih chu an duh tâwk lo. Mi tam tak chuan an nun titluangtlamin, pioneer an thawk hial a. Mi dangte chuan kum khat chhûnga thla engemaw zât chu pioneer an thawk bawk. Mi dang lehte chuan pioneer thawk thei lo mah se, rawngbâwlnaah theih tâwpin an inhmang a ni. Chûng mite chu hriak rimtuia Isua leihtu mahni inpe tak Mari ang an ni. Isua chuan Mari chungchângah: “Ka chungah hian thil ṭha tak a ti a . . . a tih theih tâwk a ti a ni,” tiin a sawi. (Mk. 14:6-8) Setana thunun khawvêla kan awm avângin, kan tih theih tâwk tih chu a awlsam lo thei. Mahse, theih tâwp chhuah hrâmin, Jehova kan rinchhan a ni. Chutianga kan tih theih dân kawng pali i lo en ang u.
Pathian Ram Zawng Hmasa Rawh
6. (a) Engtin nge mi nâwlpuite chuan an chanpual chu tûna nun mai hi a ni tih an târ lan? (b) Engvângin nge Davida thil thlîr dân ang neih chu a ṭhat zâwk?
6 Isua chuan a hnungzuitute chu Pathian Ram leh a felna zawng hmasa tûrin a zirtîr a. Khawvêla mite chuan mahni tâna ṭha tûr an zawng ṭhîn. An chungchângah, Bible chuan: “Anni chanvo zawng tûn dam chhûnga an neih hi a ni,” a ti. (Sâm 17:1, 13-15 chhiar rawh.) Siamtu ngaihthahin, mi tam tak chu nuamsa taka nun nân te, chhûngkaw din nân te, leh ro hnutchhiah tûr neih nân te an inhmang zo va. An chanpual chu tûna nun mai hi a ni. Kawng leh lamah chuan Davida’n Jehova nêna “hming ṭha” siam chu a ngaihsak a, a fapa pawhin mi zawng zawng hnênah chutiang ti tûrin a fuih a ni. (Thur. 7:1) Asapha angin, Davida chuan Jehova Ṭhiana neih chu mahni tâna ṭha tûr ngaihtuah aiin a ṭha zâwk hle tih a hria a. Pathian nêna lên dun chu nuam a ti a ni. Kan hunah pawh hian, Kristian tam tak chuan an pâwn lam hna thawh aiin thlarau lam thiltihte chu an dah pawimawh zâwk a ni.
7. Unaupa pakhatin Lalram a dah pawimawh zâwk avângin eng malsâwmna nge a dawn?
7 Central African Republic-a awm Jean-Claude-a hi han ngaihtuah teh. Ani chu fa pathum nei kohhran upa a ni a. A awmna ramah chuan hna hmuh a har hle a, a neite pawhin an hna an vawn reng theih nân engpawh tih an inhuam hial a ni. Ni khat chu an manager chuan Jean-Claude-a chu kâr tluana zân 6:30 aṭanga hna thawk ṭan tûrin a hrilh a. Jean-Claude-a chuan a chhûngte tisa lama a châwm bâkah, an thlarau lam pawh a enkawl a ngai bawk tih a hrilhfiah a. Kohhran ṭanpui tûra mawhphurhna a neih thu pawh a hrilh bawk a ni. Engtin nge manager chuan a chhân lêt? “Hna neih reng i duh chuan, i nupui leh i fate, leh i harsatnate pawh tiamin thil dang zawng zawng chu theihnghilh la, i nun chu i hna atân—i hna atân chauh—i pumpêk tûr a ni. I sakhua nge i duh i hna, thlang mai rawh,” tiin a hrilh a ni. Nang ni ta la eng nge i tih ang? Jean-Claude-a chuan a hna a chân pawhin Pathianin a enkawl dâwn tih a hria a. Pathian rawngbâwlnaah tih tûr tam tak a la nei tho dâwn a, Jehova chuan an chhûngkaw tisa lam mamawh a enkawlnaah a ṭanpui zêl ang tih a hre bawk. Chuvângin, a kâr leh chawlhkâr chhûnga neih inkhâwmah a tel a. Chu mi hnuah chuan, hna thawhnaa kal tûrin a insiam a, a hna a thawh zawm theih dâwn leh dâwn loh erawh zâwng a hre lo. Chutih lai chuan phone a dawng ta hlauh mai a. Manager chu a hna ata bân a nih thu leh ani erawh chuan a hna a chân loh thu a hre ta a ni.
8, 9. Jehova kan chanpual nihtîrnaah eng kawngin nge puithiamte leh Levi-hote kan entawn theih?
8 Hna chân mai hlauhawm dinhmuna ding mi ṭhenkhat chuan, ‘Ka chhûngte châwm tûra ka mawhphurhna chu engtin nge ka hlen chhuah theih ang?’ tiin an ngaihtuah mai thei. (1 Tim. 5:8) Chutiang harsatna i nei emaw, nei lo emaw pawh ni se, Pathianin amah chanpuala neitute leh a rawngbâwlna dah pawimawhtute chu a tilunghnual ngai lo tih i thiltawn aṭangin i hre tawh ngei ang. Isua’n a zirtîrte hnêna a ram chu zawng hmasa zâwk tûra a hrilh khân, “chûng zawng zawng”—ei in tûr leh silhfên tûr ang chite chu—“a pêk belhchhah dâwn che u,” tih a tiam a ni.—Mt. 6:33.
9 Ram rochan nei ve lo Levi-hote kha han ngaihtuah teh. Biakna thianghlim chu an ngaih pawimawh ber avângin, an mamawh ei leh in tûr chungchângah, “I rochan chu keimah hi ka ni,” titu Jehova an rinchhan a ngai a. (Num. 18:20) Puithiamte leh Levi-ho angin biak in tak takah rawng bâwl lo mah ila, Jehova’n kan mamawhte min pe ang tih ring tlatin, an rilru put hmang ang chu kan entawn thei a ni. Tâwpna kan hnaih telh telh rual hian, Pathianin kan mamawh min pe thei a ni tih kan rin chu a pawimawh zual deuh deuh a ni.—Thup. 13:17.
Pathian Felna Zawng Hmasa Rawh
10, 11. Engtin nge mi ṭhenkhatin hnathawh chungchângah Jehova an rinchhanzia a târ lan? Entîrna pe rawh.
10 Isua chuan a zirtîrte chu ‘Pathian felna zawng hmasa’ tûrin a fuih bawk a. (Mt. 6:33) Chu mi awmzia chu thil dik leh dik lo chungchânga mihringte tehkhâwng aia Jehova tehna dah pawimawh zâwk hi a ni. (Isaia 55:8, 9 chhiar rawh.) Mi ṭhenkhat chuan thutak an hmuh hmain vaihlo chîn leh, zûk leh hmuam hralhnaah te, indo dân zirtîrnaah te, a nih loh leh indona hmanraw siam leh hralhnaah te an inhnamhnawih ṭhîn a. Mahse, thutak an zir hnu chuan, a tam zâwk chuan an hnathawh thlâkin, Kristian baptisma chan an tlin ta a ni.—Is. 2:4; 2 Kor. 7:1; Gal. 5:14.
11 Andrew-a chu entîrna pakhat a ni. A nupui nêna Jehova chungchâng an zir chuan, a rawngbâwl chu an tum nghet tlat a. Andrew-a chuan a hna chhuan tak mai chu a bânsan a ni. Engvângin nge? A hnathawhna company chu indona nêna inzawmna nei a nih vâng leh Pathian felna dah pawimawh a tum tlat vâng a ni. Andrew-a’n hna a bânsan lai chuan fa pahnih a nei a, pawisa lâk luh erawh a nei lo, a sum neih sa lah chu thla emaw lek daih a ni si a. Mihring thlîrna aṭang chuan, ‘rochan’ nei lo angin a lang mai thei. Pathian rinchhanin hna a zawng a. Chutih hun lai an han thlîr lêt chuan, min ṭanpui thei lo tûrin Jehova kut chu a tawi lo tih an chhûngin an nemnghet thei a ni. (Is. 59:1) An nun chu dah tluangtlamin, Andrew-a leh a nupui chuan hunbi kima rawngbâwl theihna chanvo an nei hial a. Ani chuan: “Sum leh pai leh in leh lo neih lohna te, hrisêl lohna te, leh tar lam panna te avângin lungkham châng kan nei a. Mahse, Jehova chuan engtik lai pawhin min awmpui a. . . . Jehova rawngbâwl chu mihringte thiltiha ropui ber leh manhla ber a ni tih chiang takin kan sawi thei a ni,” * a ti.—Thur. 12:13.
12. Pathian tehnate dah pawimawh tûr chuan eng mizia nge neih ngai? Tualchhûng entîrna sawi rawh.
12 Isua chuan a zirtîrte hnênah: “Anṭam mu fangkhat ang rin in neih chuan, he tlâng hnênah hian, ‘Heta ṭangin sawtah sâwn va insawn rawh,’ in ti ang a, a insawn mai ang; in tân tih theih lo rêng engmah a awm lo vang,” tiin a hrilh a. (Mt. 17:20) Harsatna thlen thei tûr thil pawh ni se, Pathian tehna chu i dah pawimawh thei ang em? I theih leh theih loh i hriat chiah loh chuan, kohhrana mi dangte i be dâwn nia. An thiltawn ngaihthlâkna chuan thlarau lamah a tichak ngei ang che.
Thlarau Lama Jehova Min Châwmnate Ngaihlu Rawh
13. Jehova rawngbâwlnaa theih tâwp kan chhuah chuan eng nge kan beisei theih?
13 Jehova rawngbâwl chu i ngaihhlut hle chuan, Levi-hote ang bawkin i mamawh zawng zawng a pe dâwn che tih i chiang thei a ni. Davida kha han ngaihtuah teh. Pûka a bihrûk lai pawh khân, Pathianin a ṭanpui dâwn tih a ring tlat a. Keini pawhin tlân chhuahna kawng awm lo anga a lan hunah pawh Jehova chu kan ring tlat thei a ni. ‘Pathian hmun thianghlima a luh a,’ Asapha’n a rilru tibuaitu thil a hriat thiam tâk dân kha han ngaihtuah teh. (Sâm 73:17) Kan tân pawh thlarau lama min châwmtu Pathian lam hawi ve a ngai a. Chutiang chuan eng dinhmun hnuaiah pawh Pathian rawngbâwlna chanvo kan neih chu kan hlutzia târ langin, Jehova chu kan chanpual kan nihtîr a ni.
14, 15. Bible châng ṭhenkhat chungchânga hriatthiamna a pun hunah engtin nge kan chhân lêt ang a, engvângin nge?
14 Thlarau lam êng lo chhuahna Hnâr, Jehova’n Bible-a kan hmuh ‘Pathian thu rilte’ hriat thiamna min pêk hunah engtin nge kan chhân lêt? (1 Kor. 2:10-13) Isua’n a thu ngaithlatute hnêna: “Mihring Fapa tisa in ei a, a thisen in in bawk loh chuan, nangmahniin nunna nei hek lo che u,” tia a hrilh laia tirhkoh Petera chhân lêt dân chu kan tân entawn tûr ṭha tak a ni a. Chûng thute chu a ngial a ngana lain, zirtîr tam tak chuan: “Hei hi thu khirh tak a ni, tunge dawngsawng thei ang?” tiin, “an kal bo va.” Petera erawh chuan: “Lalpa, tu hnênah nge kan kal ang? Nangin chatuana nunna thu i nei alâwm,” a ti a ni.—Joh. 6:53, 60, 66, 68.
15 Petera chuan Isua thusawi A tisa ei leh A thisen in chungchâng chu a hre thiam chiah lo va. Mahse, ani chuan thlarau lam hriat thiamna neih nân Pathian a rinchhan a ni. Thil ṭhenkhat chungchânga thlarau lama êng a lo ên zual deuh deuh hian chu siamremna neih a nih chhan Bible hrilhfiahna chu hriatthiam i tum em? (Thuf. 4:18) Kum zabi khatnaa Beroia khuaa mite chuan “rilru lâwm takin thu” chu an pawm a, “a dik leh dik loh hriat nân ni tin Pathian Lehkhaah an zawng ṭhîn.” (Tirh. 17:11) Anmahni entawnna chuan Jehova rawng i bâwlna leh amah i chanpual i nihtîrna chanvo chu a hluttîr lehzual ang che.
Lalpaa Awm Mi Chauh Nei Rawh
16. Engtin nge 1 Korinth 7:39-a hmuh thupêk chungchângah hian Pathian chu kan chanpual kan nihtîr theih?
16 Kristiante’n Pathian thiltum rilrua an vawn a ngaihna kawng dang leh chu “Lalpaa awm mi” chauh nei tûra Bible kaihhruaina zawm hi a ni. (1 Kor. 7:39) Mi tam tak chuan Pathian pêk he zilhna thu zawm loh ai chuan nupui pasal nei lova awm an thlang a. Chûng mite chu Pathianin a ngaihsak a ni. Davida chuan mal ngawih ngawih leh ṭanpuitu nei lo anga a inhriat laiin eng nge a tih? Ani chuan: “[Pathian] hmâah ka mangan thu ka sawi a: a hmâah ka buaina ka hriattîr ṭhîn. Ka thlarau ka chhûngah a chauh lai khân,” tiin a sawi. (Sâm 142:1-3) Nupui nei lova kum sâwmbi engemaw zât Pathian rawng rinawm taka bâwl zâwlnei Jeremia pawhin chutianga inhriat châng a nei ve mai thei a. God’s Word for Us Through Jeremiah tih lehkhabu bung 8-naa sawi a entîrna zir chu i duh ve ngei ang.
17. Engtin nge unaunu nula pakhat chuan mal ngawih ngawih nia inhriat châng a neih chu a hmachhawn?
17 United States-a unaunu pakhat chuan: “Pasal nei lova awm chu ka tum ngai lo va. Ka duhzâwng tak ka hmuh phawt chuan ka nei ngei ang. Ring lotu ka nu’n ka hmuh ang ang nei mai tûra min hmin a tum chuan, ka neih fuh loh palha mawhphurtu nih a duh leh duh loh ka zâwt a ni. A hnua hna nghet nei a, mahni ka inenkawl theih tâkah chuan a lâwm a. Pasal nei tûrin min tur zui ta lo a ni,” a ti a. He unaunu hian mal ngawih ngawih nia inhriat châng a nei a. Heti hian a sawi a ni: “Jehova rinchhan ka tum tlat a. Ani chuan min phatsan ngai lo,” tiin. Ani chu engin nge Jehova rinchhan tlat tûrin ṭanpui? “Ṭawngṭaina chuan Pathian takzia leh min awmpui rengzia hre tûrin min ṭanpui a. Lei leh vâna Chungnungbera chuan min ngaihthlâk avângin, engah nge chawimawi loh leh hlim lo nia inhriatna ka neih tehlul ang?” Ani chuan “lâk aiin pêkin lukhâwng a nei zâwk” tih ring tlatin: “A lêt leh engmah beisei lovin, mi dangte tâna inpêk ka tum tlat a. ‘He mi hi ṭanpui tûrin eng nge ka tih theih?’ tih ka ngaihtuah hian, rilru chhûngril aṭanga hlimna ka nei ṭhîn,” tiin a sawi a ni. (Tirh. 20:35) Ni e, Jehova chu a chanpual a nihtîr a, a rawngbâwl theihna chanvo hlu a neih avângin a lâwm hle a ni.
18. Eng kawngin nge Jehova’n a chanvo a nihtîr theih che?
18 Eng dinhmunah pawh ding mah la, Pathian chu i chanpual i nihtîr thei a. Chutianga i tih chuan, Pathian chhiahhlawh hlim takte zînga chhiar theih i ni ang. (2 Kor. 6:16, 17) Chu chuan tûn hmaa mi dangte ang bawkin, nang pawh Jehova chanvo a nihtîr thei che a ni. (Deuteronomy 32:9, 10 chhiar rawh.) Hnam dangte zîngah Israel hnam chu Pathian chanvo a nih angin, nang pawh ata anga chhinchhiah che-in, hmangaih takin a enkawl thei che a ni.—Sâm 17:8, 9. (w11-E 09/15)
[Footnote]
^ par. 11 Awake! November 2009, phêk 12-14-na en rawh.
Engtin Nge Kan Chhân Ang?
Engtin nge Jehova chu . . .
• a Ram leh a felna zawn hmasakna hmanga i chanpual i nihtîr theih?
• thlarau lam chaw ngaihhlutna hmanga i chanpual i nihtîr theih?
• Lalpaa awm mi chauh nei tûra a thupêk zawmna hmanga i chanpual i nihtîr theih?
[Zirlai Atâna Zawhnate]
[Phêk 16-naa thu lâk chhuah]
Jehova rawngbâwlna kan dah pawimawh ber chuan ani chu kan chanpual a ni thei
[Phêk 18-naa milem]
Jeremia entawn tûr siam chuan min tichak
