Jehova Chu Ka Chanpual A Ni
Jehova Chu Ka Chanpual A Ni
“Israela thlahte zînga i chanvo leh i rochan chu keimah hi ka ni.”—NUM. 18:20.
1, 2. (a) Ram rochan chungchânga Levi-hote dinhmun chu eng nge ni? (b) Levi-hote hnênah eng thutiam nge Jehova’n a pêk?
ISRAEL mite’n Ram Tiam hmun tam tak an lâk hnuah Josua chuan ṭhumvâwra ram luah tûr insem lam chu a ngaihtuah a. Puithiam Lal Eleazara leh hnam tina an puipate nên an thawk tlâng a ni. (Num. 34:13-29) Levi-hote erawh chuan Jakoba thlah dangte angin ram rochan an nei ve lo. (Jos. 14:1-5) Engvângin nge Ram Tiamah chuan ram chan, a nih loh leh chanvo an neih ve loh? Anni chu hmaih an ni em ni?
2 Levi-hote hnêna Jehova thusawi aṭang hian a chhânna kan hmu thei a. Hmaih luih an nih lohzia târ lan nân Jehova chuan: “Israela thlahte zînga i chanvo leh i rochan chu keimah hi ka ni,” tiin anni chu a hrilh a ni. (Num. 18:20) “I rochan chu keimah hi ka ni,” tih chu thutiam thlamuanthlâk tak a va ni êm! Chu thu chu Jehova’n i hnêna a sawi ni ta se, engtin nge i awm ang? Atîrah chuan, ‘Engkimtitheia hnên aṭanga chutiang thutiam dawn chu ka phu em le?’ tiin i ngaihtuah mai thei a. ‘Tûn laia Kristian ṭha famkim lo tute tân pawh hian Jehova chu an chanvo a ni tak tak thei dâwn em ni?’ tiin i ngaihtuah mai thei bawk. Chûng zawhnate chuan nang leh i hmangaihte pawh a khawih tel che u avângin, chu Pathian ṭawngkam awmzia tak chu hriat chian i lo tum ang u. Chu chuan tûn lai Kristiante tân Jehova chu an chanvo a nih theih dân hre thiam tûrin min ṭanpui ang. Vâna nun i beisei emaw, lei paradis-a nun i beisei emaw pawh ni se, ani chu i chanpual a ni thei a ni.
Jehova’n Levi-hote Tân Ruahmanna A Siam
3. Engvângin nge Pathianin a rawngbâwl tûra Levi-hote a thlan?
3 Pathian Jehova’n Israelte hnêna Dân a pêk hma chuan, chhûngkaw lûte chu an chhûngkaw tân puithiamah an ṭang ṭhîn a. Dân a pêk tâkah chuan, hun puma puithiam ni tûr leh anmahni ṭanpuitu tûr Levi-hote a ruat ta a ni. Chu chu engtin nge a lo nih? Pathianin Aigupta fa tîrte a tihboral khân, Israel fa tîrte chu a tâna tithianghlimin, a dah hrang a. Chutah: “Levi-hote hi . . . Israel thlahte zînga fa tîr zawng zawng aiah ka hauh a ni,” tih he siamremna pawimawh tak hi a nei a ni. Chhiarpui aṭanga a lan dânin Israel fa tîrte chu Levi-hote aia an tam avângin, a khai rual nân Israel thlah dangte chuan tlanna an pe a ni. (Num. 3:11-13, 41, 46, 47) Chutiang chuan Levi-hote chuan Israelte Pathian rawng an bâwlnaa an chanvo chu an hlen chhuak thei a ni.
4, 5. (a) Levi-hote’n Jehova chanpuala an nei tih awmzia chu eng nge ni? (b) Engtin nge Pathianin Levi-hote tân ruahmanna a siam?
4 Levi-hote tân chu chanvo chuan eng awmzia nge a neih? Jehova’n an chanvo ka ni a tih hian ram rochan dawng lovin, rawngbâwlna chanvo ropui tak an dawng zâwk tihna a ni a. “LALPA puithiam” nihna chu an rochan a ni. (Jos. 18:7) Number 18:20 thu hnu leh thu hmate chuan tisa lama an retheih phah lohzia a târ lang. (Number 18:19, 21, 24 chhiar rawh.) Levi-hote chu “an rawngbâwl manah Israel rama sâwma pakhat zawng zawng” pêk tûr an ni a. Israel mite thlai thar zînga sâwma pakhat leh an ran piang zînga sâwma pakhat zêl an dawng ang. Tin, Levi-hote chuan an thil dawn aṭanga “a ṭha ber” sâwma pakhat chu puithiamte tân an pe ve leh chhâwng tûr a ni. * (Num. 18:25-29) Israel fate’n Pathian biaknaa an rawn ken “thil thianghlima thên thilhlan” pawh puithiamte hnêna pêk a ni bawk. Chutiang chuan, puithiamte chuan Jehova’n anmahni a enkawl ang tih rinna tûr chhan ṭha an nei a ni.
5 Mosia Dân chuan sâwma pakhat dang, kum tina inkhâwmpui thianghlimte neih chhûnga hman tûr atân ruahmanna a siam niin a lang. (Deut. 14:22-27) Mahse, chûng sâwma pakhatte chu thil dang atân pawh hman a ni a. Israelte chuan a kum sarihna zêlah Sabbath kum an hmang a, chu kum sarih chhûnga a kum thumna leh kum rukna tâwp zêlah, sâwma pakhat pêkte chu mi retheite leh Levi-hote tân an hmang ṭhîn. Engvângin nge Levi-hote chu a dawngtute zînga an tel ve? Israel rama ‘rochan an neih ve loh’ vâng a ni.—Deut. 14:28, 29.
6. Levi-hote chuan Israel ramah chan nei ve lo mah se, khawiah nge an khawsak ang?
6 ‘Levi-hote chuan ram chan an neih si loh chuan, khawiah nge an khawsak tâk ang?’ tiin i ngaihtuah mai thei. Pathianin ruahmanna a siamsak a. Khaw 48 leh a vêla ran tlatna tûr hmunte a pe a. Chutah chuan tual tlânna khaw paruk a tel bawk a ni. (Num. 35:6-8) Chutiang chuan, Levi-hote chuan Pathian hmun thianghlima rawng an bâwl loh chhûnga chênna tûr hmun an nei a. Pathian Jehova chuan a rawngbâwlnaa inpete tân ruahmanna ṭha tak a siam a ni. Levi-hote chuan Pathian Jehova’n a châwm thei tih leh châwm a inhuam tih rin tlatna hmangin Jehova chu an chanpual a nihzia an târ lang thei tih a chiang hle.
7. Levi-hote’n Pathian Jehova chu chanpuala nei tûrin eng nge an tih ngai?
7 Dânah chuan Israel mi sâwma pakhat pe lote hremna a tel lo va. Mahse, sâwma pakhat an pêk loh chuan puithiamte leh Levi-hote’n an tuar hle ṭhîn. Chutiang dinhmun chu Nehemia hun laiah a thleng tawh a. Mipuiin sâwma pakhat an pêk ṭhat loh avângin Levi-hote chu an rawngbâwlna kalsana lova an feh a ngai hial a ni. (Nehemia 13:10 chhiar rawh.) Chuvângin, Levi hnamte tisa lam dinhmun chu Israel hnam thlarau lama an chak leh chak lohvah a innghat chiang hle. Puithiamte leh Levi-hote tân Pathian Jehova leh anmahni châwm nâna a hmanraw hman an rin tlat a ngai a ni.
An Chanpuala Jehova Neitute
8. Levia mi Asapha buaina tawn chu sawi rawh.
8 Levi-hote chuan a hnam angin Jehova chu chanpualah an nei tûr an ni a. Mahse, Pathian laka an inpêkzia leh amah an rinchhanzia târ lan nâna mi mal anga “LALPA chu ka chanpual a ni,” tih ṭawngkam an hmang hi chhinchhiah tlâk tak a ni. (ṬH. 3:24) Chutianga titu Levi-hote zînga pakhat chu zai mi leh hla phuah thiam a ni a. Ani chu Lal Davida hun laia zaipâwl hruaitu Levia mi a ni a, Asapha chhûngkaw zînga mi ni mai thei mah se, Asapha tiin kan sawi mai ang a. (1 Chro. 6:31-43) Sâm 73-ah chuan Asapha (a nih loh pawhin a thlahte zînga pakhat) chu a ngaihtuahna a buai thu kan chhiar a. Mi suaksual nuamsa taka awmte chu îtin, heti hian a sawi hial a ni: “Athlâwn maiin a ni, ka thinlung hi ka tihfai a, ka kutte sawisêlbonaa ka sil ni,” tiin. Ani chuan a rawngbâwlna hlutzia chu a theihnghilh a nih hmêl hle a; Jehova a chanpual a nihna chu a ngaihlu lo a ni. ‘Pathian hmun thianghlima a luh’ hma chuan thlarau lama a ngaihtuahna chu a buai a ni.—Sâm 73:2, 3, 12, 13, 17.
9, 10. Engvângin nge Asapha chuan Pathian chu ‘kumkhuaa a chanvo tûr’ a tih theih?
9 Hmun thianghlima a luh hnu chuan, Asapha chuan Pathian thlîr dân zâwngin thil a thlîr ṭan ta a. Nang pawhin chutiang bawk chu i tawng ve tawh mai thei. Thlarau lama i chanvo hlu tak chu theihnghilh a, tisa lama i neih loh thilte ngaihven ṭan mai lai pawh i nei thei. Mahse, Pathian Thu zirna leh Kristian inkhâwmnaa telna hmangin thilte chu Jehova thlîr dân zâwngin i thlîr leh ta pawh a ni thei bawk. Asapha chuan mi suaksuakte’n a tâwpa an la tawn tûr chu a hmu lâwk a. Chutah a chanvo chan chu ngaihtuah lehin, Jehova’n a kut dinglama chelhin a hruai dâwn tih a hre chhuak a. Chuvângin, Asapha chuan Jehova hnênah: “Leiah pawh hian nang lo chu ka duh tumah an awm lo,” a ti thei ta a ni. (Sâm 73:23, 25) Pathian chu a chanvo, a nih loh leh a chanpual angin a sawi ta a. (Sâm 73:26 chhiar rawh.) Fakna hla phuahtu ‘tisa leh thinlung chu chau mah se,’ Pathian chu ‘kumkhuaa a chanvo tûr a ni.’ Ani chuan Jehova’n ṭhian angin a hre reng ang tih leh rinawm taka rawng a bâwlna chu a theihnghilh lo vang tih a ring tlat a ni. (Thur. 7:1) Asapha tân chuan a va thlamuanthlâk dâwn êm! Ani chu heti hian a zai a: “Kei atân erawh zawng Pathian hnaih hi a ṭha a ni: Lalpa PATHIAN chu ka inhumhimnaah ka hmang,” tiin.—Sâm 73:28.
10 Asapha’n Jehova chanpuala a neihnaah chuan Levi mi a nih avânga tisa lam châwmna a dawn mai aia tam a tel a. A sawi uar ber chu a rawngbâwlna chanvo hlu tak leh Chungnungber, Pathian Jehova nêna an inlaichînna chu a ni. (Jak. 2:21-23) Chu an inlaichînna vawng reng tûr chuan fakna hla phuahtu chuan Jehova a rin a, a chunga a innghah reng a ngai a. Pathian tehna mila a nun chuan nun lungawithlâk tak a nei ang tih a rin tlat a ngai bawk. Nang pawhin Engkimtitheia chungah chutiang bawk rin tlatna chu i nei ve thei a ni.
11. Jeremia’n eng zawhna nge a neih a, chu chu engtin nge chhân a nih?
11 Jehova chu a chanpual a ni tih hretu Levia mi dang leh chu zâwlnei Jeremia hi a ni a. Chu ṭawngkam a hman laia a sawi tum tak chu i lo ngaihtuah ang u. Jeremia chu Jerusalem bula awm Levi-hote khawpui Anathoth-a chêng a ni a. (Jer. 1:1) Ṭum khat chu: Engati nge mi felte an hrehawm laia mi suaksualte kawng chu a hmuingîl ṭhin ni? tih ngaihtuahin a rilru a buai hle a. (Jer. 12:1) Jerusalem leh Juda rama thilthlengte a hmuh vek hnuah a thil hmuhte chungchângah “phunnawi” lo thei niin a inhre lo a ni. Jeremia chuan Jehova chu a fel tih a hria a. A hnua Jehova’n hrilh lâwk tûra Jeremia a thâwk khum leh chu hrilh lâwk thu A hlen chhuah dân chuan a zawhna chhânna rin tlâk tak a pe a ni. Pathian hrilh lâwknate nêna inmilin, Jehova kaihhruaina zâwmtute chuan ‘an nunna chu lâwmman atân’ an dawng ang a, vaukhânna zâwm lotu mi suaksual hmuingîlte erawh chu an boral ang.—Jer. 21:9.
12, 13. (a) “LALPA chu ka chanpual a ni,” tia puang chhuak tûrin Jeremia chu engin nge chêttîr a, eng rilru put hmang nge a neih? (b) Engvângin nge Israel hnam zawng zawngte chuan nghah peihna rilru put hmang an neih a ngaih?
12 A hnua Jeremia’n an khaw tlu chhe hnu a han en chuan, thim zînga kal ang maiin a inhria a. Jehova’n “thi daih tawhte angin” a awmtîr tih theih a ni. (ṬH 1:1, 16; 3:6) Jeremia chuan hnam thu âwih lote chu an Pa vâna mi hnên lama hawi kîr leh tûrin a hrilh a; mahse, Pathian tâna Jerusalem leh Judai ram tihchhiat ngai khawpin an sualna chuan a lo tawng sâng hman tawh a ni. Jeremia thiam loh ni lo mah se, chu chuan a rilru a tina hle. Hrehawm a tuar chung pawhin zâwlnei chuan Pathian lainatna a hre reng a. ‘Tihboralin kan awm lo,’ a ti a ni. Dik takin, Jehova lainatna chu tûk tinin a thar zêl ṭhîn! Chuvângin Jeremia chuan: “LALPA chu ka chanpual a ni,” tiin a puang chhuak a. Zâwlnei anga Jehova rawng bâwl theihna chanvo hlu chu a nei chhunzawm zêl a ni.—Jeremia Ṭah Hla 3:22-24 chhiar rawh.
13 Israel mite chuan kum 70 chhûng ram an chân ang a. An ram chu tihram leh tihchhiatin a awm ang. (Jer. 25:11) Mahse, Jeremia’n “LALPA chu ka chanpual a ni,” a tih hian Pathian lainatna a rinngamzia a târ lang a, chu chuan ‘beiseina,’ a nih loh leh nghah peihna rilru put hmang a neihtîr a ni. Israel hnam zawng zawngte pawhin an rochan an hloh vek avângin, zâwlnei rilru put hmang ang bawk an neih ve a ngai a. Jehova chu an beisei tûr awmchhun a ni. Kum 70 hnuah chuan Pathian mite chu an rama hruai kîr leh an ni a, a rawng an bâwl leh thei ta a ni.—2 Chro. 36:20-23.
Mi Dangte Pawhin Jehova Chu Chanpualah An Nei Thei
14, 15. Levi-ho ni lote zîngah tuin nge Jehova chu a chanpualah nei a, engvângin nge?
14 Asapha leh Jeremia chu Levia hnam an ni ve ve a; mahse, anni chu Levi-hote zînga Jehova rawng bâwl tûra chanvo nei thei awmchhun an ni em? Ni lo ve! Israel lal ni tûr, tleirâwl Davida pawhin Pathian chu ‘mi nung rama a chanvo’ a ni tih a sawi a ni. (Sâm 142:1, 5 chhiar rawh.) Davida’n he hla a phuah lai hian lal in chu sawi loh in pângngaiah pawh a awm lo. Hmêlmate laka birû a, pûka a tawm lai a ni. Davida chuan a lo berah ṭum hnih chu—Adullam bul leh En-gedi thlalêra—pûkahte chuan inhumhimna a zawng a. Sâm 142-na pawh hi chûng pûkte zînga a khawi emaw bera a awm laia a phuah a nih hmêl hle.
15 Chutiang a nih chuan, Davida thah tuma vehtu chu Lal Saula a ni tihna a ni. Davida chu kal pawh mai theih lohna tûr pûkah chuan a tlân chhia a. (1 Sam. 22:1, 4) Chu hmun fianrial takah chuan, a lama ṭang, ṭanpuitu tûr ṭhian tumah awm lo angin a lang mai thei. (Sâm 142:4) Chu tih hunah tak chuan Davida chuan Pathian a au a ni.
16, 17. (a) Davida chuan beidawn chhan tûr eng nge a neih? (b) Davida chuan tu hnênah nge ṭanpuina a dîl theih?
16 Davida’n Sâm 142-na a phuah lai chuan, Saula hnên aṭanga a tlân chhiat laia tum rêng vâng pawh ni lova amah lo ṭanpuitu, Puithiam Lal Ahimeleka chunga thilthleng chu a hre tawh ngei ang a. Amah îtsîktu Lal Saula chuan Ahimeleka leh a chhûngte chu a that vek a ni. (1 Sam. 22:11, 18, 19) Davida chuan an thihna chunga mawhphurtu niah a inngai tlat a. Amah ṭanpuitu puithiam chu ama thah ang maiin a ngai a ni. Davida dinhmunah ding ta la, chutiang tho chuan i ngai ve ang em? Saula’n a ûm reng avânga chawlh hahdamna hun pawh a nei lo chuan Davida chu a tilungngai zual hle a ni.
17 Chu mi hnu lawkah Davida chuan lal ni tûra amah hriak thihtu zâwlnei Samuela thih thu a hre leh a. (1 Sam. 25:1) Chu chuan Davida beidawnna chu a tizual ngei ang. Mahse, ṭanpui dîlna tûr a hria a ni—Jehova chu. Davida chuan Levi-hote neih ang rawngbâwlna chanvo hlu chu nei lo mah se, rawngbâwlna chi dang a nei a—Pathian mite lal la ni tûra hriak thih a ni diam tawh a ni. (1 Sam. 16:1, 13) Chuvângin, Davida chuan Jehova hnêna a thinlung leihbuain, a kaihhruaina a zawng chhunzawm zêl a. Nang pawhin Pathian rawngbâwlnaa i inhman zêl chuan Ani chu i chanpual leh inhumhimna i nihtîr ve thei a, i nihtîr bawk tûr a ni.
18. Engtin nge he thuziaka kan sawiho tâk mite chuan Jehova chu chanpuala an neihzia an târ lan?
18 Hêng an chanchin kan ngaihtuah tâkte hian Jehova chu an chanpualah an nei tawh a, chu chu an rawngbâwlnaah chanvo an dawng tawh tihna a ni. Anni chuan Pathian rawng an bâwlnaah a enkawlna an rinchhan tlat a ni. Levi-hote leh Israel hnam danga mi Davida ang te chuan Pathian chu an chanpualah an nei thei a. Nang pawhin, engtin nge Jehova chu i chanpualah i neih ve theih ang? Chu mi chungchâng chu a dawta thuziakah kan sawiho vang. (w11-E 09/15)
[Footnote]
^ par. 4 Puithiamte enkawl an nih dân chungchâng hriat chian lehzual nân Insight on the Scriptures, Volume 2, phêk 684 en rawh.
Engtin Nge Kan Chhân Ang?
• Eng kawngin nge Jehova chu Levi-hote chanpual a nih?
• Asapha te, Jeremia te, leh Davida te chuan Jehova an chanpuala an neihzia târ langtu eng thil nge an tih?
• Pathian chu i chanpuala nei tûrin eng mizia nge i neih ngai?
[Zirlai Atâna Zawhnate]
[Phêk 10-naa thu lâk chhuah]
Engtin nge Jehova chu puithiamte leh Levi-hote chanpual a nih?
[Phêk 11-naa milem]
Levi-hote chuan ram rochan an nei ve lo. Jehova rawngbâwlna chanvo ropui tak an neih avângin, Ani chu chanpualah an nei
[Phêk 12-naa milem]
Jehova chu a chanpuala nei chhunzawm zêl tûrin engin nge Asapha chu ṭanpui?
