Jehova Mi Hriat I Ni Em?
Jehova Mi Hriat I Ni Em?
“Lalpa chuan ama tate chu a hria.”—2 TIM. 2:19.
1, 2. (a) Isua’n eng nge a ngaih pawimawh? (b) Eng zawhnate nge kan ngaihtuah ang?
NI KHAT chu Pharisai pakhatin Isua hnênah: “Dân thuah chuan eng thupêk hi nge ropui ber?” tiin a zâwt a. “Lalpa i Pathian chu i thinlung zawng zawngin, i thlarau zawng zawngin i rilru zawng zawngin i hmangaih tûr a ni,” tiin a chhâng a ni. (Mt. 22:35-37) Isua chuan vâna a Pa chu a hmangaih êm êm a, chûng thute mil chuan a nung tak zet a ni. Ani chuan Jehova laka a dinhmun pawh a ngai pawimawh hle a, chu chu rinawm taka nungin a târ lang a. Chuvângin, a thih hma lawk chuan Pathianin A thu zâwmtu mi rinawm tak anga a hriat thu a sawi thei a. Chutiang chuan Jehova hmangaihnaah a invawng reng a ni.—Joh. 15:10.
2 Tûn laia mi tam takte chu Pathian hmangaih niin an inchhâl a. Keini pawh Pathian hmangaihtute zîngah kan intelh ve ngei ang. Mahse, thil ngaihtuah tûr pawimawh tak chu: Pathian mi hriat ka ni em? Engtin nge Jehova’n min thlîr? Pathian ta anga hriat ka ni em? tih hi a ni. (2 Tim. 2: 19) Lei leh vâna Chungnungber nêna inlaichînna hnai tak kan nei thei tih hriat chu a va ropui tak êm!
3. Engvângin nge ṭhenkhatin Jehova ta ni thei lo anga an inrin a, chutiang ngaihtuahna do tûrin engin nge min ṭanpui ang?
3 Mahse, Jehova hmangaih tak zettu mi ṭhenkhat chuan Ani’n a ṭhazâwngin anmahni a hre thei tih rin chu harsa an ti a. Ṭhenkhat chuan tlâktlai lo nia inhriatna an neih avângin Jehova ta nih theih an inring lo bawk. Mahse, Pathian chuan kawng dang daiha min thlîr avângin kan va lâwm tak êm! (1 Sam. 16:7) Tirhkoh Paula chuan a Kristian unaute hnênah: “Tupawhin Pathian a hmangaih chuan chu mi ngei chu ama hriat a ni,” tiin a hrilh a. (1 Kor. 8:3) Pathian i hmangaihna chu ama mi hriat nih nâna thil pawimawh tak a ni. Hêngte hi ngaihtuah rawh: Engvângin nge he magazine hi i chhiar? Engvângin nge i thinlung, i rilru, leh i chakna zawng zawnga Jehova rawngbâwl i tum tlat? Pathian hnêna inpumpêk a, baptisma chang i nih chuan, engin nge chutianga tihtîr che? Bible chuan thinlung entu Jehova’n mi duhawmte chu ama lamah a hîp tih min hrilh a. (Hagaia 2:7; Johana 6:44 chhiar rawh.) Chuvângin, Jehova’n a hîp che avânga a rawng bâwl i ni tiin thu tâwp i siam thei a ni. Ani chuan a lama a hîp tawhte chu a chunga an rinawm chhûng chuan a thlahthlam ngai lo vang. Pathian chuan anni chu hlu tak angin a thlîr a, a hmangaih êm êm a ni.—Sâm 94:14.
4. Engvângin nge Pathian mi hriat kan nihna chu kan ngaihtuah reng ang?
4 Pathian Jehova’n a lama min hîp tawh chuan, a hmangaihnaa invawn ṭhat reng chu kan ngai pawimawh tûr a ni a. (Juda 20, 21 chhiar rawh.) Bible chuan Pathian kan tawlh bosan a, kan bânsan theihzia a târ lang tih hre reng rawh. (Heb. 2:1; 3:12, 13) Entîr nân, 2 Timothea 2:19-a thu hi a sawi hma chiahin, tirhkoh Paula chuan Humenaia leh Phileta te chu a sawi lang a. Chûng mite pahnih chu Jehova ta lo ni tawh ṭhîn, thutak kal pênsan ta an nih hmêl a. (2 Tim. 2:16-18) Pathian mi hriat lo ni tawh ṭhîn, a hmaa an neih ṭhin thlarau lam ênga awm zui ta lo Galatia kohhrana mi ṭhenkhat pawh hi ngaihtuah bawk teh. (Gal. 4:9) Pathian laka kan dinhmun hlu tak hi i ngainêp ngai lo vang u.
5. (a) Pathianin a hlut mizia ṭhenkhat chu engte nge ni? (b) Tute entîrna nge kan bih chian ang?
5 Jehova’n a hlut bîk mize ṭhenkhat a awm a. (Sâm 15:1-5; 1 Pet. 3:4) Chûng miziate zînga pahnih chu rinna leh inngaihtlâwmna a ni. Pathianin chûng miziate a duh tih hriat nân mi pahnihte entîrna siam chu kan bih chiang ang a. Pathian mi hriat nia inngai mi chapo tak pakhat, Pathianin a hnâwl tâk chanchin pawh kan en bawk ang. Chûng entîrnate aṭang chuan thil hlu tak kan zir thei a ni.
Ringtute Pa Chu
6. (a) Abrahama chuan Jehova thutiam engahte nge rinna a lantîr? (b) Jehova’n Abrahama chu eng angin nge a hriat?
6 Abrahama chuan “LALPA chu a ring a. “Ringtu zawng zawng pa” tia koh hial a ni. (Gen. 15:6; Rom 4:11) Rinnain, Abrahama chuan ram hla taka kal tûrin a in leh lote, a ṭhiante, leh a thil neihte a kalsan a. (Gen. 12:1-4; Heb. 11:8-10) Kum tam tak a liam hnu pawhin a rinna chu a la chak tho va. Chu chu Jehova thupêk zâwm a, a fapa ‘Isaaka hlan’ a inhuam khân a lang a ni. (Heb. 11:17-19) Abrahama chuan Jehova thutiamah rinna a lantîr avângin mi duhawm bîk tak angin Pathian chuan a thlîr a; Abrahama chu a hre chiang hle a ni. (Genesis 18:19 chhiar rawh.) Jehova chuan Abrahama chu a awm tih a hre mai a ni lo; ṭhian angin a hlut a ni.—Jak. 2:22, 23.
7. Jehova thutiamte thlen famkimna chungchângah eng nge chhinchhiah tlâk a, Abrahama chu engtin nge a nghawng?
7 Abrahama chuan a dam chhûngin a hnêna tiam ram rochan a dawng lo tih chu chhinchhiah tlâk tak a ni a. Ani chuan a thlahte ‘tuifinriat kama ṭiau vaivut zâta’ an pung pawh a hmu hek lo. (Gen. 22:17, 18) Chûng thutiamte chu a dam chhûngin thleng famkim lo mah se, Abrahama chuan Jehova a rinna nghet tak chu a vawng reng a. Ani chuan Pathianin thu a sawi tawh chuan, a thlen famkimtîr ngei ang tih a hria a ni. Ni e, Abrahama chu a rinna milin a nung a ni. (Hebrai 11:13 chhiar rawh.) Jehova’n Abrahama anga rinna nei mi niin min hre ve em?
Jehova Nghah Chu Rinna Chhinchhiahna A Ni
8. Ṭhenkhatin eng thilte thlen famkimna nge hmuh an châk?
8 Thil engemaw chu a thlen famkimna hmuh kan châk mai thei a. Inneih te, fa neih te, leh hrisêlna ṭha neih châknate chu thil pângngai leh inâwm tak a ni a. Mahse, mi tam tak tân chuan chûng châknate zînga pakhat emaw, a aia tam emaw chu a thleng famkim lo mai thei a ni. Chu chu kan chunga thleng a nih chuan, chu dinhmun kan hmachhawn dân chu kan rinna chak dân târ lanna a ni thei a ni.
9, 10. (a) Engtin nge ṭhenkhat chuan an thil duhzâwng thlen famkimtîr an tum? (b) Pathian thutiamte thlen famkimna chungchâng hi engtin nge i ngaih?
9 Pathian finna nêna inkalh zâwnga chûng kan thil duhte thlen famkimna hmuh tum chu âtthlâk tak, thlarau lama chhiatna thlen thei thil a ni ang. Entîr nân, ṭhenkhat chuan Jehova fuihna nêna inkalh hrisêlna lama inenkawlna an thlang a. Ṭhenkhat dang chuan an chhûngte kalsanin emaw, kohhran inkhâwmte ṭhulhin emaw hna an thawk bawk. Ring lotu tuemaw nêna inngaihzâwn chungchâng hi engtin nge ni ang? Kristianin chutiang nun kawng chu a zawh chuan, Jehova mi hriat nih a tum tak zet em? Abrahama khân a hnêna Pathian thutiam kha nghâk peih lo ta se, Pathian chuan engtin nge a ngaih ang? Abrahama chuan mahni thua thil tiin, inbêngbêl leh ta se, engtin nge ni ang? Jehova nghâk lovin, mahni hming thanna zawn tum ta se, engtin nge ni ang? (Genesis 11:4 nên khaikhin rawh.) Jehova’n duh taka a hriat mi a ni zawm zêl thei ang em?
10 Eng thil thlen famkimna nge hmuh i châk? I châkna ṭhate tihrehsak che tiamtu, Jehova nghâk tûrin i rinna chu a chak tâwk em? (Sâm 145:16) Abrahama hun lai ang bawk khân, Pathian thutiam ṭhenkhatte chu kan duh anga hmain a thleng famkim lo mai thei a. Mahse, Jehova chuan Abrahama neih ang rinna kan neih a, chu mi mila thil kan tih chu a ngaihlu a ni. Chutianga tih chu kan tân a tâwpa hlâwkna tûr a ni si a.—Heb. 11:6.
Inngaihtlâwmna leh Chapona Inan Lohna
11. Kora’n eng chanvote nge a chelh a, chu chuan Pathian laka a rilru put hmang eng nge a târ lan?
11 Jehova ruahmanna leh thu tlûkna siamte zahna lantîr chungchângah Mosia leh Kora chu an inang lo hle a. An chhân lêt dân chuan Jehova’n anmahni a thlîr dân chu nasa takin a nghawng a ni. Kora chu Kohatha thlah Levia mi a ni a, chanvo hlu tam tak a chelh a ni. Ani chuan Tuipui Sen-a Israel hnam chhan chhuahna a hmuin, Sinai Tlânga Israel thu âwih lo fate chunga Jehova rorêlna pawh a thlâwp a; tin, thuthlung bâwm sawnnaah pawh chanvo a neih ve ngei a rinawm. (Ex. 32:26-29; Num. 3:30, 31) Ani chu kum tam tak chhûng Jehova laka a rinawm avângin Israel mi tam takin an zah phah hle niin a lang.
12. Phêk 31-a târ lan angin, Kora chapona chuan Pathian mi hriat a nihna chu engtin nge a nghawng?
12 Amaherawhchu, Israel hnamin Ram Tiam an pan lai chuan Kora chuan Pathian thil ruahman dânah thil fel lo a awm niin a hre ta a. Israel hnama hruaitu dang 250-te chuan Kora chu thlâwpin thil awm dân chu siam ṭhat an tum a ni. Kora leh chûng mite chuan Pathian nêna an inlaichînna chu nghet hle niin an hria a ni ngei ang. Mosia hnênah chuan: “In induh êm mai, mipuite chu an thianghlim ṭheuh si a, LALPA pawh an zîngah a awm si a,” tiin an hrilh a. (Num. 16:1-3) A lutuka mahni inrinna an neiin, an va chapo tehlul êm! Mosia chuan an hnênah: ‘LALPAN a tate chu a tilang ang,’ tiin a hrilh a ni. (Number 16:5 chhiar rawh.) A tûk tlai lamah chuan, Kora leh helnaa a lam ṭang zawng zawngte chu an boral ta vek a ni.—Num. 16:31-35.
13, 14. Eng kawngin nge Mosia’n a inngaihtlâwmzia a târ lan?
13 Chu mi nêna inkalh takin, Mosia chu “lei chunga mihring zawng zawnga zaidam lâwtlak a ni a.” (Num. 12:3) A zaidamna leh a inngaihtlâwmna chu Jehova kaihhruaina zawm tum tlatna hmangin a tar lang a ni. (Ex. 7:6; 40:16) Mosia’n Jehova kawngte chu a sawisêl ṭhin thu emaw, a kaihhruainate zawm a ngaih avânga a nin ṭhin thu emaw târ lanna engmah a awm lo. Entîr nân, Jehova chuan biak bûk sak dân tûr chungchângah, a la zai rawng leh biak bûk puan zâr beng neih zât tûr thlengin kaihhruaina chipchiar tak a pe a ni. (Ex. 26:1-6) Pathian inawpna pâwla hotuin kaihhruaina chipchiar tak a pe ṭhîn che a nih chuan nin châng i nei mai thei. Mahse, Jehova chu hotu ṭha famkim, a chhiahhlawhte ring a, an hnêna phal taka mawhphurhna hlân chhâwng ṭhîntu a ni a. Chipchiar taka kaihhruaina a pêk hian chhan ṭha tak neia pe a ni ṭhîn. Mahse, Mosia chuan Jehova’n amah ring tâwk lo emaw, a thiamna leh zalênna neih hmantîr phal lo emaw ang hrima kaihhruaina chipchiar a pêk pawhin a ning lo tih hi lo chhinchhiah rawh. Nin ahnêkin, Mosia chuan a hna thawktute chu Pathian kaihhruaina “ang chiah zêlin” a tihtîr a ni. (Ex. 39:32) Inngaihtlâwmna a va ni êm! Mosia chuan Jehova hna a ni tih a hria a, chu hna thawh zawh nâna hmanrua mai a ni tih a inhre bawk a ni.
14 Mosia inngaihtlâwmna chu amah mi mal taka nghawngtu dinhmun duhawm lo a hmachhawn lai khân a lang bawk. Ṭum khat chu, Mosia’n phunnawi hmangte a dâwrnaah insûmtheihna a hlohva, Pathian a chawimawi ta lo va. Chuvângin, Jehova chuan Ram Tiama a mite hruai lûttu atân a hman dâwn loh thu a hrilh a ni. (Num. 20:2-12) Amah leh a unaupa Arona chuan Israel mite phunnawina chu kum tam tak an tuar tawh a. Tûnah, chu mi ṭuma Mosia thil pakhat tihsual avâng mai chuan rei tak a lo nghah tawh chu a tawng thei dâwn ta lo a nih chu! Mosia chuan engtin nge a chhân lêt? A lunghnualna chu hriatthiamawm tak a nih laiin, Jehova thu tlûkna siam chu inngaitlâwm takin a pawm a. Jehova chu dik lohna nei lo, Pathian fel a ni tih a hria a ni. (Deut. 3:25-27; 32:4) Mosia chungchâng i ngaihtuah hian ani chu Jehova mi hriatte zînga mi angin i hmu a ni lâwm ni?—Exodus 33:12, 13 chhiar rawh.
Jehova Laka Intulût Tûrin Inngaihtlâwmna A Ngai
15. Mi chapo Kora thiltih aṭangin eng nge kan zir theih?
15 Khawvêl pum huap Kristian kohhrana insiamremna leh hmahruaitute thu tlûkna siam kan chhân lêt dân chuan Jehova mi hriat kan nihnaah kawngro a sû a ni. Kora leh a ṭhiante chu a lutuka inrinna te, chapona te, leh rinna tlâkchhamna te avângin Pathian lak ata an inla hrang a. Kora chuan Mosia chu tar ve mai, mahni duh ang anga thu tlûkna siam ṭhîn niin a ngai a; mahse, Israel hnam kaihruaitu chu Jehova a ni tih a theihnghilh a ni. Chuvângin Jehova mi hmante chungah rinawmna a lantîr lo. Ani chuan hriatthiamna chiang lehzual neih nân emaw, a ṭûl a nih chuan siamrem nân emaw Jehova nghâk ta se a finthlâk zâwk tûr. A tâwpah Kora chuan a chapona thiltih avângin rinawm taka a rawngbâwlna chu engmah lovah a chantîr ta!
16. Inngaihtlâwmna kawnga Mosia entawn tûr siam zuina chuan engtin nge Jehova mi hriat kan nihna chu a khawih theih?
16 Chu thuziak chu tûn lai kohhrana upate leh mi dangte tân vaukhânna pawimawh tak a ni a. Jehova nghâk a, hotua ruatte kaihhruaina zui tûr chuan inngaihtlâwm a ngai a ni. Mosia angin inngaihtlâwmna leh zaidamna kan lantîr ve em? Kan zînga hruaitute dinhmun chu kan pawm theiin, kaihhruaina kan dawnte chu kan zui thei em? Lunghnualna kan tawn hunah kan mi mal rilru veizâwng chu kan thunun em? Chutianga kan tih chuan Jehova’n duh taka a mi hriatte zînga mi kan ni ve ang a. Kan inngaihtlâwmna leh kan intukluhna chuan a lakah mi duhawm tak min nihtîr ang.
Jehova Chuan A Tate A Hria
17, 18. Engin nge Jehova ta ni reng tûrin min ṭanpui thei?
17 Jehova’n a lama a hîpte leh duhawm tak anga a hriatte ngaihtuah chu a ṭangkai hle a. Abrahama leh Mosia chu keimahni ang bawka ṭha famkim lo leh tlin lohna nei an ni a. Mahse, Jehova’n ata anga a hriat mite an ni. Kora entîrna erawh chuan Jehova laka kan inlâk hran chuan a pawmna nêna a mi hriat nihna kan hloh theihzia a târ lang thung. Hetiang hian kan inzâwt tûr a ni: ‘Engtin nge Jehova’n min thlîr? Bible-a hêng entîrnate aṭang hian eng nge ka zir theih?’ tiin.
18 Jehova’n a lama a hîp mi rinawmte chu ata angin a thlîr tih hriatna aṭangin thlamuanna nasa tak i nei thei a. Rinna te, inngaihtlâwmna te, leh kan Pathian laka mi duhawm tak min nihtîr thei mize dangte nei chhunzawm zêl ang che. Jehova mi hriat nihna chu tûn nuna lungawina min petu leh nakina malsâwmna ropui tak min thlentu tûr chanvo hlu tak a ni tih hnial rual a ni lo.—Sâm 37:18. (w11-E 09/15)
Kan Hre Chhuak Em?
• Jehova lakah eng dinhmun hlu tak nge i neih theih?
• Engtin nge Abrahama rinna chu i entawn theih?
• Kora leh Mosia chungchâng aṭangin eng nge kan zir theih?
[Zirlai Atâna Zawhnate]
[Phêk 29-naa milem]
Abrahama angin, Jehova’n a thutiamte a hlen famkim vek dâwn tih rinna kan nei em?
[Phêk 31-naa milem]
Kora chuan kaihhruaina hnuaia inngaitlâwm taka intukluh chu a duh lo
[Phêk 32-naa milem]
Kaihhruaina hnuaia inngaitlâwm taka intulût mi niin Jehova’n a hria che em?
