Naupangte’n Pathian Chungchâng An Zir Tûr A Ni Em?

“Inhuatna min neihtîr tûr tâwka tam sakhua chu kan nei a, inhmangaihna min neihtîr tûr tâwk erawh kan nei lo.”—JONATHAN SWIFT, ENGLISH AUTHOR.

KHING thute khi Swift-a’n kum zabi 18-na daih tawha a sawi mah ni se, tûn laia mi tam tak chuan an pawmpui hle a ni. Dik takin, mi ṭhenkhat chuan nu leh pate’n Pathian chungchâng an fate zirtîr tûrin dikna an nei tûr a ni lo an ti a. Sakhaw mi tak chhûngkua aṭanga seilian naupangte chu mi vânduai tak angah an ngai a ni.

Nang eng nge i ngaih dân? A hnuaia thuahte hian eng hi nge dik i tih ber?

● Nu leh pate’n Pathian chungchâng an fate an zirtîr tûr a ni lo.

● Nu leh pate chuan an fate chu an len hunah chauh sakhaw lam thil an sawipui tûr a ni.

● Nu leh pate chuan Pathian chungchânga an rin dân chu an fate hnênah an la naupan laiin an hlân chhâwng tûr a ni a. Mahse, an lo puitlin hnu chuan, mahnia chhût ve tûrin an fuih tûr a ni.

● Naupangte chuan engmah sawi buai lovin nu leh pate sakhua an zâwm mai tûr a ni.

Sakhuana Hian Naupangte Chungah Chhiatna A Thlen Em?

Fate hmangaih tak nu leh pa tumahin an fate tihnat chu an duh lo vang. Mahse, thil nihphung dik tak chuan Pathian chungchâng naupangte’n an zir tûr a ni lo titute ṭanfung chu a thlâwp em? Zir chîk mite chuan nu leh pate sakhaw rinnain an fate chunga nghawng a neih dân chu kum sâwmbi engemaw zât ngun takin an zir tawh a. An thu tlûkna chu eng nge ni?

Zir chîk mite chuan sakhuana hian nghawng ṭha lo neih ai mahin, naupang ṭhan lennaah a ṭha lamin a ṭanpui zâwk tih an hmu chhuak a. Kum 2008-a Social Science Research * chanchinbu-a report chuan heti hian a târ lang: “Sakhuana hian nu leh pa leh fate inkâra inzawmna a tinghet,” tiin. “Sakhuana leh thlarau lam thil chu naupang tam takte nuna thil pawimawh tak a niin, chhûngkaw inlaichînna ṭha neih nân a ṭul a ni,” a ti bawk. Chu an thil hmuh chhuah chu Isua Krista thusawi: “Mahni thlarau lam mamawh hriate chu an eng a thâwl e,” tih nêna a inmil dân hi lo chhinchhiah ang che.—Matthaia 5:3, New World Translation.

A nih leh naupangte chuan an ṭhan len hunah chauh Pathian leh sakhaw chungchâng an zir tûr a ni tih ngaih dân chu engtin nge ni ang? Chu ngaih dân chuan he thudik hi a en khûm a ni: Naupang rilru chu bucket ruak, chhûn khah ngai ang a ni tih hi. Dik takin, nu leh pate chuan duh an thlan a ngai a ni: Nungchang lama thu bulte leh thurin ṭha nia an ngaihte hmangin in lamah chu “bucket” chu an chhûng khat dâwn nge, naupang rilru leh thinlung chu pâwn lam mite ngaih dân chi hrang hranga tihkhah an phal zâwk dâwn?, tih chu.

Thurûk Chu Eng Nge Ni?

Sakhuana chuan inthliar bîkna leh inhuatna min neihtîr thei khawpin thil a ti thei tih thilthleng chanchin chuan a târ lang a. Engtin nge nu leh pate chuan Jonathan Swift-a thusawi ang hi an pumpelh theih ang? Engtin nge an fate hnênah mi dangte hmangaihtîr thei rinna chu an zirtîr theih?

Hêng zawhna pathumte chhânna aṭang hian a hriat theih a ni: (1) Naupangte chuan eng nge an zir ang? (2) Tuin nge anni chu zirtîr ang? (3) Eng ang zirtîrna nge ṭangkai ber? (w11-E 08/01)

[Footnote]