Tuin Nge Pathian Chungchâng Naupangte Zirtîr Ang?

“Zirtîr chu a zirtîrtu chungah a awm lo; nimahsela mi tin an zir zawhin an zirtîrtu angin an awm ang.”—LUKA 6:40.

NU LEH PA ṭhenkhat chu Pathian chungchâng an fate zirtîr tûrin tling an inti lo va. Lehkha thiam tâwk lo leh zirtîrtu ṭha ni tûra sakhaw chungchâng hre tâwk lovah an inngai a ni thei ang. Chuvângin, he mawhphurhna pawimawh tak hi chhûngkhatte emaw, sakhaw hruaitute emaw kutah an dah ta mai ṭhîn.

Mahse, naupangte hnêna sakhaw lam leh nungchang lama thu bulte zirtîrtu atâna ṭha ber chu tu nge ni? He mi chungchânga Bible sawi hi lo ngaihtuah la, zir chîk mite thil hmuh chhuah nên hian lo khaikhin ang che.

Pa Chanvo Chu Eng Nge Ni?

Bible-in a zirtîr chu: “Pate u, in fate tithinur suh ula, Lalpa thununnaah leh zilhnaah chuan enkawl zâwk rawh u.—Ephesi 6:4.

Zir chîk mite thil hmuh chhuah: Pate’n sakhaw lama rinna nghet tak an neih chu engtin nge an hlâwkpui? Kum 2009-a chhuah, Fathers’ Religious Involvement and Early Childhood Behavior tih thuziak chuan heti hian a sawi: “Sakhaw rin inangte zînga telna chuan mi chu pa  ṭha zâwk a nihtîr thei a. Sakhuana chuan mi chu vântlâng ṭanpuina a dawntîr bâkah, nun dân tûr zirtîrna leh kaihhruaina a pe bawk,” tiin.

Bible chuan fate enkawl leh thunun kawnga pa ber chanvo pawimawhzia chu a sawi uar hle. (Thufingte 4:1; Kolossa 3:21; Hebrai 12:9) Chu fuihna chu tûn laiah a la ṭangkai reng em? Kum 2009-a Florida University thuziak pakhat chuan pate’n an fate chunga nghawng an neih dân a sawi a ni. Zir chîk mite chuan pate’n ngun taka an enkawl chhoh naupangte chuan mi khawngaihna leh mahni inhlutna an nei ṭha zâwk a. Mipa naupangte chu an nungchang a chhe lo tlângpui a, hmeichhe naupangte pawh an rilru a hrisêl zâwk tlângpui ṭhîn tih an hmu chhuak a ni. Chuvângin, Bible thurâwnte chu a la ṭangkai reng tih a chiang hle.

Nu Chanvo Chu Eng Ang Taka Pawimawh Nge?

Bible-in a zirtîr chu: “Ka fapa, i nu zirtîrna che chu hawisan suh.—Thufingte 1:8.

Zir chîk mite thil hmuh chhuah: Kum 2006 khân Handbook of Child Psychology chuan heti hian a sawi a: “A chawh rualin, ram hrang hranga nute chuan pate aiin an fate nên 65% leh 80% laiin hun an hmang tam zâwk,” tiin. Chutiang khawpa hun an hmanho tam avângin, nu ṭawngkam te, chêtzia te, leh rilru put hmangte chuan an fate ṭhan len chhohnaah nghawng thui tak a nei a ni.

Pathian chungchâng thutak an fate zirtîrnaa nu leh pa an ṭan kawp chuan thilpêk hlu tak pahnih tal an pe thei a ni. A pakhat chu naupangte chuan an dam chhûnga an hlâwkpui theih an Pa vâna mi nêna inṭhianna hun remchâng an neih theih phah a. A pahnihnaah chuan, naupangte chuan thiltum pawimawh tak thlen theih nâna nupa thawhho dân tûr chu an entîrna hmuh aṭangin an zir phah thei a ni. (Kolossa 3:18-20) Nu leh pate chu mi dangte’n ṭanpui thei mah se, Pathian chungchâng leh Pathianin chhûngkuate inkaihruai tûra a duh dân an fate zirtîr tûra mawhphurhna neitu chu anmahni hi an ni.

A nih leh engtin nge nu leh pate chuan an fate chu an zirtîr ang? Eng ang zirtîrna nge ṭangkai ber ang? (w11-E 08/01)