Pathian Thu Atangin Inzir Rawh

Engvângin Nge Pathianin Sual leh Hrehawm Tawrhna Awm A Phal?

He thuziak hian i lo ngaihtuah mai theih zawhnate zâwtin, i Bible-a a chhânna i hmuh theihna laite a târ lang a. Jehova Thuhretute chuan chûng chhânnate sawipui che chu an châk hle a ni.

1. Engtin nge sual a lo awm ṭan?

Setana’n dâwt hmasa ber a sawi khân leiah sual a lo awm ṭan a. Setana chu sual sa rênga siam a ni lo. Vântirhkoh ṭha famkima siam a ni a; mahse, “thutakah a awm [“nghet,” NW] lo” a ni. (Johana 8:44) Ani chuan Pathian chauhvin a dawn tûr chibai bûkna chu dawn a châk tlat a. Hmeichhe hmasa ber Evi chu dâwt hrilhin, Pathian thu aia ama thu âwih tûrin a hmin ta a ni. Adama pawhin Evi thu zâwmin, Pathian thu a âwih lo ve ta a. A thu tlûkna siam chuan natna leh thihna a thlen ta a ni.—Genesis 3:1-6, 17-19 chhiar rawh.

Setana’n Pathian thu âwih lo tûra Evi a thlêm khân, Pathian lalchungnunna laka hel ang tluk a ni. Mi tam zâwkte pawhin Setana thu zâwmin, Pathian chu Rorêltu atân an thlang lo va. Chutiang chuan Setana chu “he khawvel lal” a lo ni ta a ni.—Johana 14:30; Thu Puan 12:9 chhiar rawh.

2. Pathian thil siam chu a ṭha tâwk lo vem ni?

Pathian siam mihring leh vântirhkohte chuan A thil phûtte zâwm tûrin theihna ṭha famkim an nei a ni. (Deuteronomy 32:4, 5) Pathian chuan thil ṭha emaw, ṭha lo emaw thlang thei tûra zalênna neiin min siam a. Chu zalênna chuan mahni duh thu rênga Pathian kan hmangaihzia târ lan theihna hun min pe a ni.—Jakoba 1:13-15; 1 Johana 5:3 chhiar rawh.

3. Engvângin nge Pathianin hrehawm tawrhna awm a phal?

Jehova chuan a lal chungnunna do zâwnga helna chu hun engemaw chhûng a tuar a. Engvângin nge? A tel lova inawpnain ṭhatna a thlen lohzia târ lan nân a ni. (Jeremia 10:23) Mihringte chanchin inṭan aṭanga kum 6,000 hnu chuan, thu buai chu chinfel a ni ta a. Khawvêl rorêltute chuan indona te, dân bawhchhiatna te, rorêl dik lohna te, leh natna te an tireh thei lo a ni.— Thuhriltu 7:29; 8:9; Rom 9:17 chhiar rawh.

Chu mi nêna inkalh takin, an rorêltu atâna Pathian pawmtute chuan hlâwkna nasa tak an hmu a ni. (Isaia 48:17, 18) Nakin lawkah Jehova chuan he khawvêl sawrkâr zawng zawngte hi a titâwp vek ang a. A rorêlna hnuaia awm thlangtute chauhvin lei hi an luah ang.—Isaia 2:3, 4; 11:9; Daniela 2:44 chhiar rawh.

 4. Pathian dawhtheihna chuan eng hun remchâng nge min pêk?

Setana chuan mi tumahin rinawm takin Pathian thu an âwih lo vang a ti a. Pathian dawhtheihna chuan A rorêlna nge mihringte rorêlna kan pawm tih târ lanna hun ṭha tak min pe ṭheuh va. Kan nun dân hmangin kan thlan lam chu kan târ lang a ni.—Joba 1:8-11; Thufingte 27:11 chhiar rawh.

5. Engtin nge Rorêltu atâna Pathian kan thlan?

Pathian thu Bible ṭanchhan biakna dik kan zawn chhuah a, kan zawm hian Rorêltu atân Pathian kan thlang tihna a ni a. (Johana 4:23) Isua angin, politics leh indonaah kan tel lo bawk a ni.—Johana 17:14 chhiar rawh.

Setana chuan a thiltihtheihna chu nungchang bawlhhlawh leh thil chîn hlauhawmte chawi lâr nân a hmang a. Chûng thil chînte kan hnâwl chuan kan ṭhiante leh chhûngkhatte’n min nuihzatin, min dodâl ngei ang. (1 Petera 4:3, 4) Chuvângin, duhthlanna kan siam a ngai a. Pathian hmangaihtute kan kâwm ang em? A dân thu fing leh duhawm takte hi kan zâwm ang em? Chutianga kan tih chuan Setana’n Pathian thu tuma’n an zâwm lo vang a tih chu dâwt a nihzia kan finfiah ang.—1 Korinth 6:9, 10; 15:33 chhiar rawh. (w11-E 05/01)

Hriat tam lehzual nân Jehova Thuhretute tihchhuah BIBLE ZIRTIRNA Dik Tak Chu ENG NGE NI? he lehkhabu bung 11-na hi en ang che.

[Phêk 22-naa milem]

Adama chuan duh thlanna sual a siam

[Phêk 23-naa milem]

Kan duh thlanna siam chuan kan Rorêltu atâna Pathian kan duh leh duh loh a târ lang