Kawppui Neih leh Neih Loh Chungchânga Thurâwn Fing
Kawppui Neih leh Neih Loh Chungchânga Thurâwn Fing
“Awm dân mawi tâwka in awm theihna tûr leh, Lalpa rawng chu buai lova in bâwl theihna tûrin ka sawi . . . a ni.”—1 KOR. 7:35.
1, 2. Engvângin nge kawppui neih leh neih loh chungchânga Bible thurâwn chu hriat kan tum ang?
MIPA leh hmeichhe indâwrna aia hlimna te, beidawnna te, a nih loh leh lungngaihna te thlen thei thil dang a awm mang meuh lo. Hêng thilte kan tawn ṭhin avâng hian Pathian kaihhruaina kan mamawh a ni. Mahse, kan mamawh chhan dang pawh a awm bawk. Entîr nân, nulât tlangvâl nuam ti tak Kristian tuemaw chuan a chhûngte emaw, a ṭhiante emawin kawppui nei tûrin an tur lui nia inhriatna a nei mai thei a. Mi dang tuemaw chuan kawppui nei duh mah se, a kawppui âwm mi a hmu lo thei bawk. Ṭhenkhat chuan nupui pasal mawhphurhna la thei tûra inbuatsaihna kawngah kaihhruaina an mamawh a. Tin, kawppui nei leh nei lo Kristiante chuan mipat hmeichhiatna lamah fiahna an tâwk ve ve bawk a ni.
2 Kan mi mal hlimna mai bâkah, hêng thilte hian Pathian Jehova hmaa kan dinhmun chu a nghawng tel a. Paula chuan Korinth khuaa mite hnêna a lehkha thawn pakhatna bung 7-ah nupui pasal neih leh neih loh chungchânga kaihhruaina a pe a ni. A tum ber chu ‘awm dân mawi tâwka an awm theihna tûr leh, Lalpa rawng chu buai lova an bâwl theihna tûra’ a lehkha chhiartute chêttîr hi a ni. (1 Kor. 7:35) Hêng thu pawimawh tak chungchânga a thurâwn i ngaihtuah pah hian, nupui pasal nei emaw, nei lo emaw pawh ni la, i dinhmun chu Jehova rawng bâwl tam lehzual theihna kawng angah hmuh lo tum ang che.
Thu Tlûkna Siam Tûr Khûnkhân Tak
3, 4. (a) Mite’n kawppui nei lova awm an chhûngte a lutuka an ngaihtuahna chuan eng harsatna nge a thlen theih? (b) Engtin nge Paula fuihna chuan inneihna chungchânga thlîr dân dik nei tûrin min ṭanpui theih?
3 Kum zabi khatnaa Juda hote ang bawkin, tûn laia hnam tam tak pawhin inneihna chu thil duhawm ber angin an thlîr a. Mi an han lên rei deuh chuan an hma ngaitu ṭhiante leh chhûngte chuan kawppui nei tûra fuih an duh mai thei a. An inkawmnaah chuan kawppui tûr zawng taima deuh tûr pawhin an ti mai thei bawk. An neih âwm mi tuemaw chu an sawi hmuh thuak pawh a ni thei a. Nula leh tlangvâl chu an inhmuh theih dân fing thiam takin an ruahman pawh a ni thei. Hêng ruahmannate hian zahna te, ṭhian ṭha inṭhenna te, leh rilru natna te thlen châng a nei ṭhîn.
4 Paula chuan mi dangte chu kawppui nei tûr emaw, nei lo tûr emawin a tilui ngai lo. (1 Kor. 7:7) Nupui nei lo va Jehova rawngbâwlnaah lungawi mah se, nupui pasal nei tûra mi dangte dikna neih chu a zahsak a ni. Tûn laia Kristiante pawhin kawppui neih leh neih loh tûr chungchângah duhthlan theihna an nei a. Mi dangte’n an nawr lui tûr a ni lo.
Nupui Pasal Neih Lohna Hmang Ṭangkaiin
5, 6. Engvângin nge Paula’n kawppui nei lova awm a sawi mawi?
5 Korinth khuaa mite hnêna Paula thu sawi chhinchhiah tlâk tak chu kawppui neih loh a sawi mawi hi a ni. (1 Korinth 7:8 chhiar rawh.) Paula chuan nupui nei lo mah se, Kristianna ram hruaitute angin a neite aia thil ti ṭha zâwkah a inngai lo. Chu ai mahin, chanchin ṭha thehdarhtu kawppui nei lo mi tam takte neih theih chanvote chu a târ lang zâwk a ni. Chu chu eng nge ni?
6 Nupui pasal nei lo Kristiante chuan a neite tih theih loh tûr Jehova rawngbâwlnaa chanvote chelh tûrin an insiam rem thei tlângpui a. Paula chuan “Jentailte tirhkoh” nihna chanvo hlu tak a chang a ni. (Rom 11:13, 14) Tirhkohte bung 13 aṭanga 20-na thleng chhiar la, a missionary thawhpuite nêna hmun hrang hranga thu an hrilh a, kohhran an din laite zui ve zêl angah inchan ang che. Paula chuan a rawngbâwlnaah tûn laia mi tam takte tawh loh tûr harsatnate chu a tâwk a. (2 Kor. 11:23-27, 32, 33) Mahse, mi tam tak zirtîra a siam avânga a hlimna chuan chûng harsatnate chu tawrh manhla tak a nihtîr a ni. (1 Thes. 1:2-7, 9, 10; 2:19) Nupui nei emaw, fa nei emaw ni ta se, chûng thil zawng zawng chu a hlen chhuak thei ang em? Thei kher lo vang.
7. Kawppui nei lo Thuhretute’n Lalram tihzauh nâna an dinhmun an hman dân entîrna pe rawh.
7 Kawppui nei lo Kristian tam tak chuan an dinhmun chu Lalram tihzauhnaa inhman tam lehzual nân an hmang a. Bolivia rama awm pasal nei lo pioneer pahnih Sara-i leh Limbania-i te chu kum rei tak thu hrilh tawh lohna thingtlâng khaw pakhatah an insawn a. Chutah chuan Electric pawh a awm lo va, chu chuan harsatna a thlen em? Heti hian an sawi a ni: “Radio leh TV a awm loh avângin, mite chuan tibuaitu an nei lo va, an hunawl hnawh khahna ber chu lehkha chhiar a ni,” tiin. Chu khuaa mi ṭhenkhat chuan pioneer unaute hnênah chuan chhuah pawh chhuah chhunzawm tawh loh Jehova Thuhretute thu leh hla chhuah an neihte chu an hmuh a, chûngte chu an la chhiar reng a ni. Unaunute chuan in tin deuh thawah tuina neite an hmuh avângin an bial chhûnga in zawng zawng tlawh chhuah chu harsa an ti hle. Nu upa tawh tak pakhat chuan: “A tâwp a tâwpah chuan Jehova Thuhretute’n min rawn tlawh chhuak ta a, tâwpna a hnai tawh a nei ngei ang,” tiin unaunute chu a hrilh a. Chu khuaa mi ṭhenkhat chu kohhran inkhâwmah an rawn tel ve ta nghâl a ni.
8, 9. (a) Paula’n kawppui neih loh a sawi mawi khân eng nge a rilruah awm? (b) Kawppui nei lo Kristiante chuan eng hun remchâng nge an neih?
8 Kawppui nei Kristiante chuan thuhrilh harsatna biala chanchin ṭha an hrilh hunah rah ṭha tak an chhuah thei ngei mai. Mahse, a nei lote tâna thawh theih chanvo ṭhenkhat chu kawppui nei emaw, fa nei emaw te tân chuan thawh harsa tak a ni thei a ni. Paula chuan kohhran mite hnêna lehkha a ziah lai chuan chanchin ṭha hrilh a la ngai nasa hle tih a hria a. Amah ang bawka zirtîr siamnaa hlimna hmu vek tûrin a duh a ni. Chuvângin, kawppui nei lova Jehova rawng bâwl chu a sawi mawi a ni.
9 United State-a awm, pasal nei lo unaunu pakhat chuan heti hian a ziak a: “Ṭhenkhat chuan kawppui neih loh chu hlimna neih theih lohnaah an ngai a. Mahse, hlimna tluantling chu Jehova nêna mi mal inṭhiannaah a innghat tih ka hria. Kawppui neih loh chu inpêkna ni mah se, hman ṭangkai a nih phawt chuan thilpêk ropui tak a ni,” tiin. Hlimna hmuh chungchângah chuan: “Kawppui neih loh chu hlimna dâltu ni lovin, min petu a ni thei a. Jehova chuan a hmangaihna chu kawppui nei leh nei lote hnênah a lantîr ve ve tih ka hria,” tiin a sawi bawk. Ani chuan tûnah chuan Lalram thuchhuahtu mamawh zualna hmunah hlim takin rawng a bâwl a ni. Kawppui nei lo i nih chuan, i hun chu mi dangte hnêna thutak zirtîr nân i hmang tam lehzual thei em? Chutianga i tih chuan, kawppui neih loh chu Jehova thilpêk hlu tak angin i ngai ve mai thei asin.
Kawppui Nei Duhte Tân
10, 11. Engtin nge Jehova chuan kawppui neih duh si, neih âwm mi la hmu si lote chu a ṭanpui ṭhin?
10 Jehova chhiahhlawh rinawm tam tak chuan kum engemaw zât kawppui nei lo va an awm hnuah neih chu an duh a. Kaihhruaina an mamawh tih hre rengin, an kawppui âwm mi an hmuh theih nân Jehova ṭanpuina an dîl a ni.—1 Korinth 7:36 chhiar rawh.
11 Rilru zawng zawnga Jehova rawng i bâwlpui theih tûr mi neih i duh chuan ṭawngṭaiin Pathian hnênah thlen la. (Phil. 4:6, 7) Rei tak i nghah a ngaih pawhin lunghnual mai suh ang che. Ṭanpuitu hmangaihna Pathian chu rinchhan tlat la, i mamawh ang zêlin a ṭanpui ang che.—Heb. 13:6.
12. Kristian tuemaw chu mi tuemawin neih atâna a biak chuan, engvângin nge a pawm hmain ngun taka a ngaihtuah ang?
12 Kawppui nei duh Kristian tuemaw chu thlarau lama chak vak lo emaw, ring lotu emawin neih atân a be mai thei a. Chutiang i tawng a nih chuan, kawppui tûr thlan dik loh avânga i hrehawm tawrh tûr chu nupui pasal neih i châk avânga i hrehawm tawrh aiin a nasa zâwk hle thei tih hre reng ang che. In inneih tawh chuan, i dam chhûngin—a nuamah pawh a hrehawmah pawh—i kawppuiah phuar belhbawmin i awm a ni. (1 Kor. 7:27) Mamawh i intih avâng ringawt chuan nupui pasal nei suh ang che. Chu chuan a hnua inchhîrna a thlen thei a ni.—1 Korinth 7:39 chhiar rawh.
Inneihnain A Ken Tel Thilte Hmachhawn Tûrin Inbuatsaih Rawh
13-15. Innei tûrte chuan an inngaihzâwn lailin inneih hnua harsatna an tawn theih thil engte nge an sawi dun ang?
13 Paula chuan kawppui nei lova Jehova rawngbâwl chu sawi mawi mah se, a nei duhte chu a en hniam chuang lo. Chutih ahnêkin, thlarauva thâwk khum a thuziak chuan nupate chu inneihnain a ken tel thilte hmachhawn thei tûr leh innei nghet tûrin a ṭanpui zâwk a ni.
14 Inneih tum ṭhenkhat tân chuan inneih hnua thil awm dân tûr nia an beiseite siam danglam a ngai a. An inngaihzâwn lai chuan, an inhmangaihna chu thûk bîk riau niin an hre thei a. Anmahni chauhvin chutianga inhmangaihna chu nei niin an hria a ni. Chutiang rilru nên chuan an han innei a, an hlimna chu engmahin tibuai thei lo tûrah an ngai a ni. Chutiang ngaih dân neih chu a âwm lo hle. Tisa lama inhîpna chuan hlimna chu a thlen thei ngei mai; mahse, nupain harsatna leh buaina an tawhte chinfel nân chu mai chu a tâwk si lo.—1 Korinth 7:28 chhiar rawh. *
15 Innei thar tam tak chu thil pawimawh tak chungchânga an kawppuite’n an ngaih dân an ṭawmpui loh chuan mak an tiin, an lunghnual hial a. Sum leh hun âwl hman dân tûr te, chênna hmun tûr te, leh chhûngte tlawh ngun dân tûrte chungchângah pawh an ngaih dân a inang lo thei bawk. Tin, mi tin hian famkim lohna kan nei vek a, chu chuan mi dang thin a tiur thei bawk. Inngaihzâwn lai chuan chûng thilte chu ngaih pawimawh loh mai a awl a; mahse, inneih hnua boruak tirittu an ni thei a ni. Innei tûrte chuan harsatna an tawn theih thilte chu inneih hmain an sawi fel vek tûr a ni.
16. Engvângin nge nupate chu inneihnaa harsatnate hmachhawn dân tûrah an inlungrual a ngaih?
16 Nun hlawhtling leh hlimawm nei tûr chuan nupate chuan lungrual takin harsatnate an hmachhawn dûn tûr a ni a. An fate leh an nu leh pa tar tawhte enkawl dân tûrah pawh an inlungrual tûr a ni. Tin, chhûngkuaa harsatna lo awmte chuan anni chu a ṭhen hrang tûr a ni lo bawk. Bible fuihnate an nunpui chuan harsatna tam tak an su kiang thei ang a, an sut kian theih lohte pawh chhel takin an tuar chhuak theiin, nupa hlim tak an ni reng thei ang.—1 Kor. 7:10, 11.
17. Nupate chuan “khawvêl lam thil” engte nge lungkham an inbeisei ang?
17 Paula chuan 1 Korinth 7:32-34-ah inneihnain a ken tel thil dang pawh a sawi a ni. (Chhiar rawh.) Nupate chuan loh theih lohvin ‘khawvêl lam thilte an lungkham ṭhîn’—ei leh bâr te, silh leh fên te, chênna in te, leh thlarau lam thil ni lo thil dang dangte chu. Engvângin nge an lungkham ṭhin? Unaupa chu nupui a neih hma chuan rawngbâwlnaah a inhmang pumhlûm ṭhak pawh a ni thei a. Mahse, nupui a neih hnu chuan, a hun leh tha ṭhenkhat chu a nupui enkawl leh tihlâwm nân a hman a ngai ta a ni. Nupui tân pawh chutiang bawk chu a ni. Jehova chuan a finnain chu thil ṭûl chu a hria a. Inneihna hlawhtling nei tûr chuan nupate’n an inneih hmaa Pathian rawngbâwl nâna hun leh tha an lo hman ṭhin ṭhenkhat chu an inpêk tawn a ngai tih a hria a ni.
18. Ṭhenkhat tân inneih hnuah intihhlimna chungchângah eng ang insiam remna nge neih ngai mai thei?
18 Mahse, chu mai aia tam zir tûr a la awm. Nupate chuan an inneih hmaa Pathian rawngbâwl nâna hun leh tha an lo hman ṭhin ṭhenkhatte chu inngaihsak tawn nâna an hman si chuan, intihhlim nâna hun leh tha an lo hman ṭhin ṭhenkhatte pawh chu mi atân an hmang ve tûr a ni dâwn lâwn ni? Pasal chuan nupui a neih hmaa infiamnaa hun a hman zât ang tho a hman reng chuan a nupuiin engtin nge a ngaih ang? A nih loh leh, nupui chuan a ṭhiante nêna a tuizâwng thiltih nân hun tam tak hmang reng ta se, a pasalin engtin nge a ngaih ang? Chutiang mi kawppuia neite chu an khua a harin, an hlim lo ang a, hmangaihna dawng lo nia inhriatna an nei thuai mai ang. Nupate’n an inlaichînna tinghet tûra an tih theih apiang an tih chuan chûng thilte chu an pumpelh thei a ni.—Eph. 5:31.
Jehova Chuan Nungchang Lama Thianghlimna A Phût
19, 20. (a) Engvângin nge kawppui nei tawhte pawh nungchang ṭhat lohna lamah an fîmkhur a ngaih? (b) Nupate chu rei tak an awm hran chuan eng dinhmun derthâwng takah nge an awm?
19 Jehova chhiahhlawhte chuan nungchang lama thianghlim an tum tlat a. Ṭhenkhat chuan nungchang bawlhhlawhna pumpelh nân kawppui neih an thlang a. Mahse, inneihna chuan mipat hmeichhiatna lama bawlhhlawhna lakah min vêng kher lo. Bible hun lai chuan, khawpui kulhte chuan mite chu a chhûnga an awm chauhvin a humhim ṭhîn a. Mahse, mi chu mi sual leh suamhmangte awmna kulh pâwna a chhuah chuan suam leh thah a tâwk thei a ni. Chutiang bawkin, nupate chuan inneihna Dintuin mipat hmeichhiatna lama an tâna a ruahman dânin a huam chin chhûnga an awm chauhvin nungchang bawlhhlawhna lakah chuan an him thei a ni.
20 Paula chuan chu dânin a huam chin chu 1 Korinth 7:2-5-ah a sawifiah a. Nupui chuan a pasal nên chauh mipat hmeichhiatna a hmang thei a; chutiang bawkin pasal pawhin a nupui nên chauh a hmang thei a ni. Nupate chuan an “chan tûr tâwk,” a nih loh leh mipat hmeichhiatna lama dawng tûra dikna an neih chu an inpe ve ve tûr a ni. Mahse, nupa ṭhenkhat chu chawlh rei tak lâk vâng emaw, an hna thawh vâng emawin hun rei tak chhûng an awm hrang a, an “chan tûr tâwk” an inpe lo. “Insûm zawh loh” avânga Setana thlêmna do zo lo va, mi a uirê mai chuan a lungchhiatthlâk dân tûr chu han ngaihtuah teh. Pathian Jehova chuan an nupa dinhmun derthâwnga siam si lova chhûngkaw châwmtu, chhûngkaw lûte chu mal a sâwm ṭhîn.—Sâm 37:25.
Bible Fuihna Zawm A Hlâwknate
21. (a) Engvângin nge kawppui neih leh neih loh chungchânga thu tlûkna siam chu thil harsa tak a nih? (b) Engtin nge 1 Korinth bung 7-naa fuihna thu hian min ṭanpui theih?
21 Kawppui neih leh neih loh chungchânga thu tlûkna siam chu thil harsa berte zînga mi a ni a. Mihringte inlaichînnaa buaina tam zâwk lo chhuahna bul ber, ṭhat famkim lohna hi mi tinin kan nei a. Chuvângin, kawppui nei an ni emaw, ni lo emaw Jehova duhsakna leh malsâwmna dawngtute pawhin lunghnualna hi an pumpelh ṭhak thei lo. Mahse, 1 Korinth bung 7-a fuihna thu fing tak hi i nunpui chuan, buaina tam tak chu i pumpelh thei a. Kawppui nei emaw, nei lo emaw pawh ni la, Jehova mithmuhah chuan i “tiṭha” a ni. (1 Korinth 7:37, 38 chhiar rawh.) Pathian pawm nih chu thiltum i hlen theih zînga ropui ber a ni a. A duhsakna nên chuan, a khawvêl thara nung tûrin hma i sâwn chho zêl thei ang. Chu mi hmunah chuan tûn laia mipa leh hmeichhe inlaichînnaa lâr tak innêksâwrna chu a awm tawh lo vang. (w11-E 10/15)
[Footnote]
^ par. 14 The Secret of Family Happiness (English) bung 2, paragraph 16-19 en rawh.
Kan Chhâng Thei Em?
• Engvângin nge mi dangte chu kawppui nei tûra kan tur luih lo vang?
• Engtin nge kawppui nei lote chuan an hun an hman ṭangkai theih?
• Engtin nge inngaizâwngte chu inneih hnua harsatnate hmachhawn thei tûrin an inbuatsaih theih?
• Engvângin nge inneihna chuan mipat hmeichhiatna lama bawlhhlawhna lakah min vên kher loh?
[Zirlai Atâna Zawhnate]
[Phêk 16-naa milemte]
Rawngbâwlna tihzauh nâna an hun hmangtu nupui pasal nei lo Kristiante chuan hlimna an hmu
[Phêk 18-naa milem]
Ṭhenkhat tân inneih hnuah eng insiamremna nge neih ngai?
