Khawvêl Awptu Dik Tak Chu Tu Nge Ni?

MI SUAL pâwl hotute chu i hmu ngai lo pawh a ni thei. I hmuh ngai loh avâng maiin anni chu an awm lo tihna a ni em? Anni chuan an nihna an thup thiam hle a, tân in aṭang pawhin an hote chu an thunun thei hial a ni. Chanchinbu-a lang ṭhîn dân bawhchhiatnate zînga ṭhenkhat, ruihhlo avânga indona te, nawhchi inzawrh luihtîrna te, leh mihring tawlh rua sumdâwnnate hian a titu a awm tih leh an thiltih ṭha lo takin min nghawng nasat dân min hriattîr a. Mihringte chunga chhiatna an thlentîrte aṭang hian mi sual pâwl hotu an awm tih kan hre thei a ni.

Pathian Thu, Bible chuan Setana chu a awm tak tak a, mi sual pâwl hotu lû thiltithei tak angin “dâwt thilmak tinrêng” leh “fel lohna bumna tinrêng” chu a duhzâwng tihpuitlin nân a hmang tih a târ lang. Bible chuan ani chu “êng tirhkohvah a insiam chawp . . . ṭhîn” tih a sawi a ni. (2 Thessalonika 2:9, 10; 2 Korinth 11:14) Diabola a awm tih chu chhiatna a thlentîrte aṭangin kan hre thei bawk. Chuti chung pawhin, mi tam tak chuan hmuh theih loh thlarau thil siam suaksual tak a awm tih chu rin harsa an ti hle. Diabola chungchâng Bible sawi dân kan bih chian hmain, Diabola hi a awm tak tak a ni tih rin lohtîrtu ngaih dân dik lo leh buaina ṭhenkhat i lo en hmasa ang u.

▪ “Engtin nge hmangaihna Pathianin Diabola a siam theih?” Bible chuan Pathian chu mi ṭha leh famkim nia a sawi avângin, mi ṭha lo, mi chhiatna duh, leh mi suaksual tak a siam anga ngaih chu thil inkalh tak niin a lang. Thu dik tak erawh chu hei hi a ni: Pathianin chutiang mi a siam thu Bible-in a sawi lo, tih hi. Chutih ahnêkin Pathian chungchângah: “Lungpuia chu, a thiltih a fel famkim; A awm dân zawng zawng chu dân a ni: Pathian rinawm, khawlohna nei lo, fel leh ṭha a ni,” tiin a sawi zâwk a ni.—Deuteronomy 32:4; Sâm 5:4.

Kan ngaihtuah tûr chu Pathian thil siam mi ṭha famkimte’n thil ṭha mai bâkah, thil ṭha lo pawh an tih theih leh theih loh hi a ni. Pathian chuan a thil siamte chu robot ang maia siam lovin, zalên taka duh thlan theihna—mahnia duh thlan theihna—a pe a. Chuvângin, finna nei thil siam ṭha famkimte chuan thil ṭha emaw, thil ṭha lo emaw ti tûrin duh thlan theihna an nei a ni. Chutianga duh thlan theihna an neih loh chuan, an thiltih chuan hlutna engmah a nei lo vang.

Chuvângin, Pathian chuan a thil siamte hnênah an hman a phal loh tûr zalên taka duh thlan theihna a pêk chu a rinawm lo hle. Isua chuan Diabola chungchânga: “Thutakah a awm [“nghet,” New World Translation] lo,” a tih khân zalên taka duhthlan theihna a hman khaw loh thu a sawi a. (Johana 8:44) He thu aṭang hian Diabola lo ni ta chu atîrah chuan thlarau thil siam ṭha famkim, atîra ‘thutaka awm nghet’ ṭhîn a ni tih a chiang hle. * Pathian Jehova chuan a thil siamte chu a hmangaih a, a rin bawk avângin zalên taka duhthlan theihna a pe a ni.—“ Thil Siam Ṭha Famkim Chuan Ṭhat Famkimna A Hloh Thei Em?” tih bâwm phêk 6-naa awm chu en rawh.

▪ “Diabola chu Pathian chhiahhlawh a ni” Bible-a  Joba bu-in he ngaih dân hi a pe niin ṭhenkhat chuan an ngai a. Bible hrilhfiahna pakhat sawi dân chuan, ‘leia Diabola vâk vêl’ anga sawina hian hmân laia Persia ram tâna enthlatu, hmun tina kala an lalber hnêna chanchin thlen ṭhîntute hnathawh a kâwk a. (Joba 1:7) Mahse, Diabola chu Pathian tâna enthlatu a nih tak tak chuan, engvângin nge ‘leia a vah vêlna’ aṭanga lo kal a nihzia a hrilhfiah a ngaih ang? Pathian lam ṭang anga târ lan ahnêkin, Joba lehkhabua thuziak chuan Diabola chu Setana tiin a ko va, a awmzia chu “Dodâltu” tihna a ni; chu chuan Pathian Hmêlma lian ber a nihzia a târ lang chiang zâwk a ni. (Joba 1:6) Chuti a nih chuan, Diabola chu Pathian rawngbâwltu a ni tih ngaih dân hi khawi aṭanga lo chhuak nge ni ta ang?

C.E. kum zabi khatna daih tawhah khân, Juda lehkhabu apocryphal-te chuan Diabola chu Pathian nêna innghîrnghona nei a; mahse, a tâwpa A thu âwih ta tho angin a târ lang a. Thilthleng chanchin ziaktu J. B. Russell-a chuan a lehkhabu Mephistopheles tihah chuan Protestant Reformer Martin Luther-a’n Diabola chu Pathian hmanrua, “a huan enkawlna tuthlawh emaw, thing buk hlawi mâmna hmanraw dang emaw anga a ngaih” thu a sawi a. A sawi zawm dân chuan “tuthlawh chuan hnim thlawhfai chu nuam a ti a,” mahse Pathian kut chak tak hnuaiah a awm reng a, chutiang chuan Pathian duhzâwng a tifamkim tih ngaih dân Luther-a chuan a nei a ni. He Luther-a zirtîrna—a hnua French theologian John Calvin-a  pawm tâk—hian ringtu tam takte a tilungni lo hle a. Engtin nge hmangaihna Pathian chuan suahsualna awm a phal mai ni lovin, a awmtîr hial theih chu le? (Jakoba 1:13) He thurin leh kum zabi 20-naa thil râpthlâk tak tak thlengte avângin mi tam tak chuan Pathian leh Diabola a awm a ni tih an rin loh phah a ni.

▪ “Diabola chu mi awm tak tak lo, rilrua sual lam ngaihtuahna mai hi a ni” Diabola chu rilrua sual lam ngaihtuahna mai nia ngaih dâwn chuan, chu chuan Bible châng ṭhenkhat chu hriat thiam theih miah loh deuhthawin a siam ang. Entîr nân, Joba 2:3-6-ah hian Pathian chuan tu nge a biak? Joba rilrua sual lam ngaihtuahna nge a biak a, mahni a inbe zâwk? Chu bâkah, Pathian chuan Joba felna a fak hnu lawkah sual lam ngaihtuahna chu a fiahtîr ang em? Pathianin chutiang rilru pu tûra rin chu, ani chu “fel lohna rêng rêng” nei lo ang ni lovin, Mi rilru herh tak anga puhna tluk a ni ang. (Sâm 92:15) Chu mi nêna inkalh takin, Pathian chuan Joba chunga chhiatna thlen tûrin ‘kut a thawh’ duh lo. Diabola chu rilrua sual lam ngaihtuahna mai emaw, Pathian mize ṭha lo lam emaw ni lovin, Pathian Hmêlmaa insiam thlarau thil siam pakhat a ni zâwk tih a chiang hle.

Khawvêl Awptu Dik Tak Chu Tu Nge Ni?

Mi tam tak chuan Diabola a awm tih rin chu a hmân lai tawh niin an hria a. Amaherawhchu, Diabola awm lo anga ngaih dâwn chuan suahsualna nasa takte a awm chhan hrilhfiahna lungawithlâk tak a awm thei lo. A nihna takah chuan, Diabola awm lo anga ngaihna chuan mi tam tak chu Pathian leh a nungchang tehna zawng zawngte a hnâwltîr a ni.

Kum zabi 19-naa hla phuah thiam Charles-Pierre Baudelaire-a chuan: “Diabola ngamthlêmna suaksual ber chu amah a awm lo tih ring tûra mite thlêm thlûk hi a ni,” tiin a ziak a. Diabola chuan a nihna thupin, Pathian a awm a ni tih chungchângah rinhlelhna a chawk chhuak a ni. Diabola a awm si loh chuan, chu chuan suahsualna zawng zawngte hi Pathian awmtîr angah a lantîr ang em? Chu tak chu a ni lâwm ni, Diabola’n mite rin atâna a duh chu?

Mi sual pâwl hotu ang bawkin, Diabola chuan a thiltum tihhlawhtlin nân a nihna a thup tlat a. Eng nge a thiltum chu? Bible chuan heti hian a chhâng a ni: “Krista, Pathian anpui, a ropuizia chanchin ṭha êng chuan anmahni a chhun ên theih lohna tûrin chûngahte chuan he khawvêl pathian hian ring lote rilru a tidel ta,” tiin.—2 Korinth 4:4.

Zawhna pawimawh tak pakhat a la awm: Suahsualna leh hrehawm tawrhna zawng zawngte awmtîrtu, he a rûka engkim thununtu chungah hian Pathianin eng nge a tih dâwn? tih hi. Chu mi chungchâng chu a dawta thuziakah ngaihtuah a ni ang. (w11-E 09/01)

[Footnote]

[Phêk 5-naa thu lâk chhuah]

Diabola chu Pathian chhiahhlawh nge a nih a, Pathian dodâltu zâwk?

[Phêk 6-naa bâwm/milem]

 Thil Siam Ṭha Famkim Chuan Ṭhat Famkimna A Hloh Thei Em?

Thil siam finna neite hnêna Pathian pêk ṭhat famkimna chu tiam chin nei lo a ni lo. Adama pawh ṭha famkima siam ni mah se, Siamtuin a chunga a kham ramri chu a pêl thei lo. Entîr nân, ani chuan a sawhkhâwk tuar si lovin bawlhhlawh, lung nawi, leh thing te chu a ei thei lo. Tin, lei hîpna dân pawisa lovin khâm sâng tak aṭangin zuang thla ta se, a thih loh vêk pawhin a inhliam nasa hle ngei ang.

Chutiang bawkin, mihring emaw, vântirhkoh emaw pawh ni se, thil siam ṭha famkim tumah hian a sawhkhâwk tuar lovin nungchang lama Pathian ramri kham chu an pêl thei lo. Chuvângin, finna nei thil siamte’n zalên taka duh thlan theihna an neih chu an hman sual chuan, khaw lohnaah leh sualnaah awlsam takin an tlu lût mai ṭhîn a ni.—Genesis 1:29; Matthaia 4:4.