“Thlamuanna Zawng Zawng Pathian” Jehova Chu Rinchhan Rawh
“Thlamuanna Zawng Zawng Pathian” Jehova Chu Rinchhan Rawh
“Kan Lalpa Isua Krista Pathian leh Pa, khawngaihnate Pa leh thlamuanna zawng zawng Pathian chu fakin awm rawh se.”—2 KOR. 1:3.
1. Kum engzât pawh ni ila, mihringte hian eng nge kan mamawh ṭheuh?
KAN pian chhuah aṭang rêngin, thlamuanna kan mamawh nghâl a. Nausên chu thlamuan a mamawhzia min hriattîr nân a ṭap ṭhîn. Pawm a duh vâng emaw, a rilṭam vâng emaw a ni thei. Kan upat hnuah pawh thlamuanna chu kan mamawh fo. A bîk takin dinhmun harsaa kan din hunah kan mamawh lehzual a ni.
2. Jehova chuan amah rinchhantute chu a thlamuan ang tih engtin nge a tiam?
2 Chhûngkaw mite leh ṭhiante chuan engemaw chen chu min thlamuan thei ngei mai. Mahse, a châng chuan kan hrehawm tawrh chu mihringte tihven theih piah lam a ni a. Chutiang hunah chuan Pathian chauhvin thlamuanna min pe thei a ni. A Thu chuan: “LALPA chuan a kotu zawng zawngte chu a hnaih ṭhîn a. . . . An au thâwm a hria ang,” tih min tiam a ni. (Sâm 145:18, 19) Ni e, “LALPA mit chuan mi felte lam a en ṭhîn a, a beng chuan an au hre tûrin a ngaithla reng ṭhîn.” (Sâm 34:15) Mahse, Pathian ṭanpuina leh thlamuanna dawng tûr chuan, amah kan rinchhan tlat a ngai a ni. A ngaihzia chu fakna hla phuahtu Davida chuan hetianga hla sain a tilang chiang hle: “LALPA chu hnehchhiahna tuarte tân chuan kulhbîng sâng a lo ni ang a, mangan hunahte chuan kulhbîng sâng a lo ni ang; tichuan i hming hre tute chuan an ring ang che; nang zawngin, LALPA, nangmah zawngtute chu i kalsan ngai si lo,” tiin.— Sâm 9:9, 10.
3. Engtin nge Isua chuan Pathian Jehova’n a mite a hmangaihzia a târ lan?
3 Jehova betute chu atân an hlu êm êm a. An hlutzia chu Isua’n: “Chawngzawng panga dâr tangka pahnihah an hralh ṭhîn lo vem ni? nimahsela an zinga pakhat mah Pathianin a hmaih ngai si lo. In samzaite lam pawh hi chhiar vek a ni asin. Hlau suh u; chawngzawng tam tak aiin in hlu zâwk a ni,” tia a sawi khân a târ lang chiang hle a ni. (Lk. 12:6, 7) Zâwlnei Jeremia hmangin Jehova chuan Israel mite hnênah: “Hmangaih tâwp lovin ka hmangaih chia, chuvângin lainatnain ka hruai haw che,” tiin a hrilh a ni.—Jer. 31:3.
4. Engvângin nge Jehova thutiamte kan rin tlat theih?
4 Jehova leh a thutiamte thlen famkimnaa rinna neih tlatna chuan mangan laiin min thlamuan thei a. Chuvângin, “LALPA in Pathianin in chungchâng a ṭha lam a lo sawi tawh zawng zawngte kha thlâwn pakhat mah a awm lo . . . in chungah a lo thleng ta vek a, pakhat mah thlâwn a awm lo ve,” titu Josua’n Pathian a rinchhan ang bawk hian kan rinchhan ve tûr a ni. (Jos. 23:14) Chu bâkah, dinhmun harsatna kan tawrh rih a ngai a nih pawhin, “Pathian zawng a rinawm a,” a chhiahhlawh rinawmte chu a thlahthlam ngai lo vang tih kan chiang thei a ni.—1 Korinth 10:13 chhiar rawh.
5. Engvângin nge mi dangte kan thlamuan ve theih?
5 Tirhkoh Paula chuan Jehova chu “thlamuanna zawng zawng Pathian” tiin a sawi a. “Thlamuan” tih awmzia chu mi lungngaihna emaw, hrehawm tawrhna emaw va hnem hi a ni a. Chu chu a manganna leh lungchhiatna tihnêpsakna hmanga tih theih a ni. Jehova chuan chutiang chiah chuan a ti ṭhîn. (2 Korinth 1:3, 4 chhiar rawh.) Kan Pa vâna mi chu tuma thunun phâk loh leh tlâkchham rêng nei lo a nih avângin, amah hmangaihtute chu a thlamuan thei reng a ni. ‘Pathianin keimahni min thlamuanna ngei’ hmangin keini pawhin kan unaute chu an “hrehawmna zawng zawngah” kan thlamuan ve thei a ni. Hei hian mi lungngaite ṭanpui theihna kawnga Jehova chungnunzia a va târ lang chiang tak êm!
Hrehawmna Awmtîrtute Hmachhawnin
6. Hrehawmna awmtîr thei thilte sawi rawh.
6 Kan nun kawng tam takah hian thlamuan kan ngai a. Hrehawmna awmtîrtu lian ber chu kan hmangaih takte—a bîk takin, kawppuite emaw, fate emaw—thihna hi a ni. Mi dangte chuan hnam inthliarna an tawhin thlamuanna an mamawh thei a. Hrisêl lohna te, kum upatna te, retheihna te, nupa inkâra buaina te, leh khawvêl dinhmun lungchhiatthlâk takte hian thlamuan kan mamawhna chu a tizual thei bawk.
7. (a) Hrehawm kan tawh hunah, engvângin nge thlamuanna kan mamawh? (b) ‘Lungchhia leh inchhîr ngawih ngawihte’ thawi dam tûrin Jehova’n eng nge a tih theih?
7 Hrehawm kan tawrh hun chuan kan thinlung, rilru, thil veizâwng, leh tisa leh thlarau lam hrisêlna tihahdam tûrin thlamuanna kan mamawh mai thei a. Entîr nân, thinlung hi han ngaihtuah teh. Pathian Thu chuan kan thinlung hi “lungchhia leh inchhîr ngawih ngawih” thei a ni tih a hria a. (Sâm 51:17) Jehova chuan ‘lungchhiate chu a tihdam a, an hliamnate chu a tuam ṭhin’ avângin chutiang dinhmuna dingte chu a ṭanpui thei hle a ni. (Sâm 147:3) Dinhmun khirh taka kan din pawhin, ring tlat chunga Pathian hnêna kan ṭawngṭai a, a thupêkte kan zawm chuan ani chuan kan thinlung na tak pawh a tidam thei a ni.—1 Johana 3:19-22; 5:14, 15 chhiar rawh.
8. Rilru hrehawm taka kan awm hunah engtin nge Jehova’n min ṭanpui theih?
8 Fiahna hrang hrangte hian rilru hrehawmna nasa tak a thlen theih avângin kan rilru pawh hian thlamuanna a mamawh ṭhîn a. Mahni chakna mai chuan hêng fiahnate hi kan tawrh zawh a rinawm loh hle. Mahse, fakna hla phuahtu chu: “Ka rilrua ngaihtuah tam tak ka neih lai chuan i thlamuannate chuan ka nunna hi a tihlim ṭhîn,” tiin a zai a. (Sâm 94:19) Paula pawhin heti hian a ziak bawk a ni: “Engahmah mangang suh u; engkimah ṭawngṭai leh dîlin, lâwmthu hril tel zêlin, in duhnate chu Pathian hnênah hriattîrin awm zâwk rawh se. Tichuan Pathian thlamuanna, rilru rêng rênga hriat sên loh khân, in thinlung leh in ngaihtuahnate chu Krista Isuaah chuan a vênsak ang che u,” tiin. (Phil. 4:6, 7) Pathian Thu chhiar leh chhût ngunnate hian rilru hrehawmna ata min chhâwk zângkhai thei hle a ni.—2 Tim. 3:14-17.
9. Thil veizâwng dik lo kan neih hunah engin nge min ṭanpui thei?
9 A châng chuan, thil veizâwng dik lo tak nei tûr khawpa nasain kan lunghnual thei a. Pathian Lehkha Thua mawhphurhna târ lan ṭhenkhat emaw, rawngbâwlnaa chanvo ṭhenkhat emaw te chu hlen thei lovah kan inngai mai thei a ni. He mi chungchângah pawh hian Jehova chuan min ṭanpuiin, min thlamuan thei a. Entîr nân, Josua chu an hmêlma hnam chak takte hmachhawna Israel mite hruai tûra tih a nih khân, Mosia chuan Israel mite hnênah: “Chhel tak leh huai takin awm ula, ṭih suh ula, anni chu hlau hek suh u; in hnêna kala chu LALPA in Pathian a ni si a; a tithlâwn lo vang che u a, kal pawh a kalsan tawp lo vang che u,” tiin a hrilh a ni. (Deut. 31:6) Jehova ṭanpuinain Josua chuan Pathian mite chu Ram Tiamah a hruai thleng a, an hmêlma zawng zawng a hneh thei a ni. Mosia pawhin Tuipui Sen-ah chutiang bawka Pathian ṭanpuina chu a lo dawng tawh bawk.—Ex. 14:13, 14, 29-31.
10. Kan hrehawm tawrhin kan tisa lam hrisêlna a nghawng chuan, eng ṭanpuina nge kan beisei theih?
10 Kan hrehawm tawrhte chuan kan tisa lam hrisêlna pawh a nghawng thei a. Ei leh in lama fîmkhur te, a âwm tâwk chawlh hahdam leh insâwizawi te, leh invawn faina te chuan keimahniah nghawng ṭha a nei thei a ni. Bible-in kan hma lam hun tûr ṭha tak a sawite ngaihtuah chu kan hrisêlnain a ṭhat phah thei bawk. Chuvângin, hrehawmna engemaw kan tawh huna Paula thiltawn leh fuihna thute hriat rengna chuan min ṭanpui thei a ni. Ani chuan heti hian a sawi a: “Lehlam lehlama nêksâwrin kan awm a, nimahsela kan thaw a ipik si lo; mangangin kan awm a, nimahsela kan bei a dawng si lo; tihduhdahin kan awm a, nimahsela kalsanin kan awm si lo; vuak thlûkin kan awm a, nimahsela tihboralin kan awm si lo,” tiin.—2 Kor. 4:8, 9.
11. Engtin nge thlarau lama dam lohna ata chu kan dam leh theih?
11 Fiahna ṭhenkhat chuan kan thlarau lam hrisêlna a nghawng pawi thei hle a. He mi chungchângah pawh hian Jehova chu min chhan chhuaktu a ni thei a ni. A Thu chuan heti hian min tiam a: “LALPA chuan tlute zawng zawng chu a chelh reng ṭhîn a, kun ngawih ngawiha awm zawng zawngte chu a kaitho ṭhîn,” tiin. (Sâm 145:14) Thlarau lama kan dam lohna ata dam thei tûr chuan Kristian upate ṭanpuina kan zawng tûr a ni. (Jak. 5:14, 15) Chu bâkah, Bible ṭanchhan chatuan nun beiseina rilrua kan vawn rengna chuan kan rinna fiah a nih hunah min ṭanpui thei bawk.—Joh. 17:3.
Pathian Pêk Thlamuanna Entîrnate
12. Abrahama chunga Pathianin thlamuanna a lantîr dân sawi rawh.
12 Thlarauva thâwk khum fakna hla phuahtu chuan heti hian a sawi a: “I chhiahhlawh hnêna thutiam chu hre reng ang che, nangin mi beiseitîr avângin. Chu chu ka hrehawmnaah pawh ka thlamuanna a ni: i thu chuan mi tiharh ta si a,” tiin. (Sâm 119:49, 50) Tûn lai hian, Pathian Thu, Bible kan nei a, chutah chuan Pathian pêk thlamuanna entîrna tam tak a chuang a ni. Entîr nân, Jehova’n Sodom leh Gomorra a tichhe dâwn tih a hriat khân thlahtu rinawm Abrahama chuan hrehawm a ti hle a ni ngei ang. Pathian hnênah: “Mi felte chu mi sualte zîngah i tiboral ve dâwn em ni?” tiin a zâwt hial si a. Jehova chuan mi fel 50 tal pawh hmuh tûr an awm chuan Sodom chu a tichhe lo vang tih Abrahama hnênah a tiam a. Mahse, Abrahama chuan mi fel 45, 40, 30, 20, 10 chauh awm ta se engtin nge ni ang? tiin ṭum nga lai a zawh belh a ni. A zawh belh apiangin Jehova chuan Abrahama chu mi fel chutiang zât chauh a hmuh pawhin Sodom chu a zuah ang tih zaidam leh ngilnei takin a tiam zêl a. Chutah, mi fel sâwm tal pawh awm lo mah se, Jehova chuan Lota leh a fanute chu a zuah tho a ni.—Gen. 18:22-32; 19:15, 16, 26.
13. Engtin nge Hani chuan Jehova a rinchhanzia a târ lan?
13 Elkana nupui Hani chuan fa a ît êm êm a. Mahse, a ching tlat si a, chu chuan a tihrehawm hle a ni. Jehova hênah a ṭawngṭai ta a, Puithiam Lal Elia chuan: “Israelte Pathian chuan i thil dîl chu pe che rawh se,” tiin a hrilh a ni. Chu chuan Hani chu a tithlamuang hle a, “lungngai hmêl a pu ta lo va.” (1 Sam. 1:8, 17, 18) Hani chuan Jehova a rinchhan tlat a, a kutah a innghat thlap a ni. Thil awm zêl dân tûr chu hre lo mah se, chhûngrila hlimna a nei tlat a. A hun takah, Jehova’n a ṭawngṭaina chu a chhâng ta. A rai a, fapa a hring a, a hmingah Samuela a sa ta a ni.—1 Sam. 1:20.
14. Engvângin nge Davida chuan thlamuan a mamawh a, thlamuantu atân tu lam nge a hawi?
14 Pathian thlamuanna dawngtu entîrna dang pakhat leh chu hmân lai Israel Lal Davida hi a ni. Jehova chu ‘thinlung lam en zâwk ṭhîntu’ a nih angin, Israel lal ni tûra Davida a thlan pawh khân, ani chu mi dik tak leh biakna dik atâna inpe tlat a ni tih a hria a. (1 Sam. 16:7; 2 Sam. 5:10) Mahse, a hnuah Davida chuan Bat-sebi chu a uirê a, a thil sual tih thup nân a pasal a that bawk a ni. Davida chuan a thil sual tih râpthlâkzia a hriat chhuah hnuin Jehova hnênah heti hian a ṭawngṭai a ni: “I lainatna nasat avângin ka bawhchhiatnate hi thai bo vang che. Ka khawlohnate hi mi silfaisak var la, ka sual hi mi tlenfaisak ang che. Ka bawhchhiatnate hi ka hre ta si a: ka sual hi ka hmâah a awm fo ṭhîn a ni,” tiin. (Sâm 51:1-3) Davida chu a inchhîr tak zet avângin Jehova chuan a ngaidam a. Mahse, a thil sual tih nghawng chhuah ṭha lo tak chu a tawrh a ngai tho a ni. (2 Sam. 12:9-12) Chutiang ni mah se, Jehova lainatna chu a chhiahhlawh inngaitlâwm takte tân chuan thlamuanna bul ber a ni.
15. Jehova chuan Isua thih hma lawk khân eng ang ṭanpuina nge a pêk?
15 Isua pawhin leia a awm lai khân dinhmun harsa tak tak a tâwk a. Pathian chuan chûng fiahnate a tawh chu a phal a, Isua chuan Jehova rinchhan tlattu leh A lal chungnunna chawisâng tlattu mi ṭha famkim angin a rinawmna a vawng tlat a ni. Phatsan leh tihhlum a nih hmain Isua chu Jehova hnênah: “Keia thu ni lovin, nangma thu thu ni zâwk rawh se,” tiin a ṭawngṭai a. (Lk. 22:42, 43) Pathian chuan chutih laia a mamawh thlamuanna te, chakna te, leh ṭanpuina te a pe a ni.
16. Rinawmna vawngtu kan nih avânga nun chân a ngaih hunah engtin nge Jehova’n min ṭanpui theih?
16 Keini pawh Kristian rinawm tak kan nih avânga kan nun chân a ngaih chuan, Jehova’n a laka rinawm reng tûrin min ṭanpui thei a, min ṭanpui ngei bawk ang. Chu bâkah, thawhleh beiseina chuan min thlamuan bawk. Hmêlma hnuhnûng ber, thihna ‘tihbova a awm hun tûr’ pawh chu kan va nghâkhlel tak êm! (1 Kor. 15:26) Pathian chhiahhlawh rinawm thi tawhte leh mi dang thi tawhte chu a hriatrengnaah chuan an awm reng a, kaihthawh leh an ni ang. (Joh. 5:28, 29; Tirh. 24:15) Jehova tiam thawhlehna kan rin tlatna chuan tihduhdahna kan tawh hunah thlamuanna leh beiseina chiang tak min pe ṭhîn a ni.
17. Kan hmangaih takte an thihin engtin nge Jehova’n min thlamuan ṭhin?
17 Kan hmangaih thi tawh, thlâna mu mêkte tân tûna hrehawmna awmtîrtu thilte awm tawh lohna khawvêl thara nun leh beiseina a awm tih hriat chu a va thlamuanthlâk tak êm! Tin, he khawvêl suaksual tak ata dam khawchhuak Pathian chhiahhlawh, “mipui tam tak” tân pawh tho lehte lo lâwm a, anmahni zirtîr theihna chanvo neih chu a va ropui dâwn êm!—Thup. 7:9, 10.
Hnuai Lama Pathian Chatuan Bân Chu
18, 19. Engtin nge Jehova chhiahhlawhte chuan tihduhdahna an tawh huna thlamuanna an dawn?
18 Mosia chuan a hla thiltithei leh rilru hneh tak hmangin Israel mite chu heti hian a thlamuan a: “Chatuan Pathian chu i awmna a ni a, hnuai lamah chuan chatuan bân a awm,” tiin. (Deut. 33:27) A hnuah zâwlnei Samuela pawhin Israelte chu: “LALPA in zui chu pênsan chuang lo ula, in thinlung zawng zawngin LALPA rawng chu bâwl zâwk rawh u; . . . A hming ropui tak avâng hian LALPA chuan a mite chu a hawisan dâwn si lo va,” tiin a hrilh bawk a ni. (1 Sam. 12:20-22) Biakna dik kan vawn tlat chhûng chuan, ani chuan min thlahthlam ngai lo vang a. Kan mamawhna apiangah min ṭanpui zêl ang.
19 Pathian chuan hêng ni hnuhnûng hun khirh takah hian a mite mamawh ṭanpuina leh thlamuanna chu pelh hauh lovin a pe ṭhîn a. Kum zabi chuang chhûng chu khawvêl pum puia kan unaute chu Jehova rawng an bâwl avânga tihduahdah leh tân ina khung an ni. An thil tawnte chuan Jehova’n a chhiahhlawhte chu fiahna an tawn hunah a thlamuan ṭhîn tih a finfiah a ni. Entîr nân, tûn hmaa Soveit Union ni ṭhina awm kan unaupa pakhat chu a rinna avângin kum 23 chhûng lung inah a tâng a. Chuti chung pawhin, tihchak leh thlamuan a nih theih nân thlarau lam chaw pêk theih dân kawng ruahman a ni tho a ni. Ani chuan heti hian a sawi: “Khâng kum chhûng zawng khân Jehova rinchhan leh a hnên aṭanga chakna dawn dân ka zir a ni,” tiin.—1 Petera 5:6, 7 chhiar rawh.
20. Engvângin nge Jehova’n min kalsan lo vang tih kan chian theih?
20 Hma lam hunah eng thil pawh tawng mah ila, fakna hla phuahtu thlamuanna thu: “LALPA chuan a mite a paih thla dâwn si lo va,” tih hi rilruah kan vawng reng tûr a ni. (Sâm 94:14) Keimahni ngei pawhin thlamuanna chu mamawh mah ila, mi dangte thlamuan theihna chanvo ropui tak pawh kan nei bawk. A dawta thuziaka kan hmuh tûr angin, he khawvêl buai takah hian lungngaite thlamuan tûrin tih theih kan nei ve a ni. (w11-E 10/15)
Engtin Nge Kan Chhân Ang?
• Hrehawmna min thlen thei thil ṭhenkhat chu engte nge ni?
• Engtin nge Jehova’n a chhiahhlawhte a thlamuan ṭhin?
• Kan nun chân hial a ngai nih chuan, engin nge min thlamuan thei?
[Zirlai Atâna Zawhnate]
[Phêk 27-naa bâwm/milemte]
Heng Lama Min Nghawng Thei Thilte Hmachhawn Dan . . .
▪ thinlung lam Sâm 147:3; 1 Joh. 3:19-22; 5:14, 15
▪ rilru lam Sâm 94:19; Phil. 4:6, 7
▪ thil veizâwng lam Ex. 14:13, 14; Deut. 31:6
▪ tisa hrisêlna lam 2 Kor. 4:8, 9
▪ thlarau hrisêlna lam Sâm 145:14; Jak. 5:14, 15
