3 Pathian Chu Phuba Lâk Hmang A Ni—Hei Hi A Dik Em?

I lo hriat tawh mai theih chu: “Pathian chuan mite thil sual tih apiang a chhinchhiah a, chatuan hremhmun meiah paihin a thungrûl ṭhîn.”

“Pathianin mi sualte chu leilung chhiatna hmangin a hrem ṭhîn.”

Bible zirtîrna chu: Petera thawn hnih 3:9 chuan Jehova’n ‘tuma boral a duh lo va, mi zawng zawng lo sim tûrin a duh’ tih a sawi a. Kan thil tihsualte lam aiin kan ṭhatna laite chu a en zâwk a ni. “A lama rilru dik tak putute chunga a chakzia tilang tûrin khawvêl zawng zawngah LALPA mit chu a lêng ruai ruai ṭhîn a ni.”—2 Chronicles 16:9.

Hremhmun mei hi Bible zirtîrna a ni lo—chatuana innghaisak chu Pathian tân thil tenawm tak a ni a. Mi suaksualte a hremna sâng ber chu thihna hi a ni. (Jeremia 7:31; Rom 6:7) Tin, thliar bîk nei lova chhiatna thlentu leilung chhiatna ang chite chu Pathian thlentîr a ni lo; hriat lâwk loh thilte chu tu chungah pawh a thleng thei reng a ni.—Luka 13:4, 5.

Thutak hriatnain a ṭanpui dân che: Pathian chu mite thiam loh chantîr nghâl hmang ni lovin, ‘ngaihdam peih’ tak a ni tih kan hriat hian amah kan hnaih lehzual thei a. (Sâm 86:5) Mahni inthiam lohna neih vâng emaw, a hremna hlauh vâng emawa Pathian rawng kan bâwl a ngai lo. Kan rinna chu rilru put hmang ṭha ber—Jehova hmangaihna—hmangin kan tinghet chho thei zâwk a ni. Chutiang hmangaihna chu amah tihlâwm nâna theih tâwp chhuah tûra min chêttîrtu, min tithathotu chakna a ni.—Matthaia 22:35-38; 1 Johana 5:3.

Pathianin mi zawng zawng chu thil ṭha ti tûra a duh laiin, mi tam tak chuan an ti dâwn lo tih a hria a. Thil ṭha lo tih tum tlatte chunga rorêl hun a neih ngai loh chuan, dân zama kengkawh ngai si lo rorêltu ang a ni ang a, rorêl dik lohna leh hrehawm tawrhna chatuana awm phaltu a ni ang. (Thuhriltu 8:11) Pathianin suahsualna a dawh kumkhua dâwn lo tih kan hriatna chuan nakin hun beiseina nghet tak min pe a ni. Ani chuan atîra a tum anga ‘thuhnuairawlhte’n’ leia chatuana nun an chen theih nân, thilsual tih tum nghette paih bo chu min tiam a ni.—Sâm 37:10, 11, 29. * (w11-E 10/01)

[Footnote]

[Phêk 6-naa thu lâk chhuah]

Pathianin hrem hlauh vânga amah kan biak chu a duh ang em?

[Phêk 4-naa Milem Hawhtîrtu]

Engravings by Doré