Mipate Chu Thlarau Lama Hmasâwn Tûrin Ṭanpui Rawh
Mipate Chu Thlarau Lama Hmasâwn Tûrin Ṭanpui Rawh
“Tûn hnuah zawng mihring i man tawh ang.”—LK. 5:10.
1, 2. (a) Engtin nge mipate chuan Isua thu hrilhna an chhân lêt? (b) He thuziakah hian eng nge kan ngaihtuah ang?
GALILI rama thu hrila an kal kual laiin, Isua leh a zirtîrte chu hmun fianrial pan tûrin lawngah an chuang a. Mahse, mipuite chuan kêin an ûm a. Chu mi nîa kal khâwmte chu “hmeichhia leh naupang tiam lovin, patling hlîr pawh sângnga lai an ni.” (Mt. 14:21) Ṭum dangah pawh, mipui chuan Isua tihdamna dawng tûr leh a thusawi ngaithla tûrin an rawn pan a. An zîngah chuan “hmeichhia leh naupang tiam lovin, patling hlîr pawh sângli” lai an tel a ni. (Mt. 15:38) Isua zirtîrna ngaihvena lo kalte zîngah chuan mipa tam tak an tel ve ngei ang. Isua chuan mak taka sangha tam tak a mantîr hnuin a hnungzuitu Simona hnênah: “Tûn hnuah zawng mihring i man tawh ang,” a tih avângin, mi tam zâwkin an chhân lêt a beisei a ni tih a chiang hle. (Lk. 5:10) A zirtîrte chuan entîr nei tuipuiah an lênte an dêng ang a, an ‘mante’ zîngah mipa tam tak pawh an tel ve ngei ang.
2 Tûn laiah, chutiang bawkin mipate chuan kan hril Pathian thuchah chu an ngaihvenin, an chhâng lêt a. (Mt. 5:3) Mahse, mipa tam tak chuan thlarau lamah hma an sâwn hlei thei lo. Anni chu engtin nge kan ṭanpui theih ang? Isua chuan a rawngbâwlnaah mipate hmuh tum bîk hran lo mah se, a hun laia mipate ngaihven zâwng thute chu a sawi a ni. A entîrna chu hmangin, tûn laia mipate lungkham thil pathum: (1) ei zawnna te, (2) mipui ngaih dân tûr hlauhna te, leh (3) tling tâwk lo nia inhriatna te hmachhawn thei tûra kan ṭanpui theih dân i lo en ang u.
Ei Zawnna
3, 4. (a) Mipa tam takte ngaih pawimawh ber chu eng nge ni? (b) Engvângin nge mipa ṭhenkhat chuan thlarau lam thil ûm aia ei zawnna an dah pawimawh zâwk?
3 Lehkha ziaktu pakhat chuan Isua hnênah: “Zirtîrtu, i kalna apiangah ka zui ang che,” a ti a. Mahse, Isua’n “Mihring Fapa . . . chuan a lu nghahna a nei lo” tia a han hrilh chuan a rilru a thlâk a ni. Krista zirtîr a lo nih thu târ lanna a awm loh avângin, lehkha ziaktu chuan a chaw ei lehna tûr emaw, a riahna tûr emaw hriat loh chu a ngai ngam lo a ni ngei ang.—Mt. 8:19, 20.
4 Mipate chuan thlarau lam thil ûm aiin neihnunna lam an ngai pawimawh zâwk ṭhîn a. An zînga tam tak tân chuan zirna sâng ûm leh hlawh tam tak hmuh chu a pawimawh ber a ni. An ngaih dân chuan, Pathian Lehkha Thu zir leh amah nêna inlaichînna neih aṭanga neih theih hlâwknate aiin sum tam tak thawh chhuah chu a hmanhmawhthlâk zâwkin, a ṭangkai zâwk bawk a ni. Bible zirtîrna chu an duh ve pawh a ni thei; mahse, “khawvêl lungkhamnate, hausakna bumna te” chuan an duhna eng pawh chu a dîp thei a ni. (Mk. 4:18, 19) Isua’n a zirtîrte chu an thil ngaih pawimawhte siamrem tûra a ṭanpui dân i lo en ang u.
5, 6. Engin nge Andria te, Petera te, Jakoba te, leh Johana te chu thu hrilhna leh ei zawnna chungchânga an thil ngaih pawimawhte indawt dân thlâk tûra ṭanpui?
5 Andria leh a unaupa Simon Petera te chuan sangha mana an sumdâwnnaah an thawk dûn a. Chutiang bawkin, Johana leh a unaupa Jakoba chuan an pa Zebedaia nên sangha mana sumdâwnna an nei bawk. An sumdâwnna chu hlawhfa rawih ngai khawpa lian a ni. (Mk. 1:16-20) Baptistu Johana hnên aṭanga Isua chanchin an hriat chuan, Andria leh Johana chuan Messia an hmu tih an ring nghet thlap a. Andria chuan a unaupa Simon Petera a hrilh a, Johana pawhin a unaupa Jakoba a hrilh ve ngei a rinawm hle bawk. (Joh. 1:29, 35-41) A hnu thla engemaw zât chhûng chu an pali chuan Galili ram, Judai ram, leh Samari rama Isua thu hrilhnaah an zui a. A hnuah, sangha manin an sumdâwng leh a ni. Thlarau lam thil an ngaihven chung pawhin, rawngbâwl chu an thil ngaih pawimawh ber a ni lo.
6 A hnu lamah, Isua chuan Petera leh Andria chu amah zuia ‘mihring mantu’ ni tûrin a sâwm a. Engtin nge an chhân lêt? “Lênte chu kalsanin an zui ta nghâl a.” Jakoba leh Johana pawhin “lawng leh an pa chu an kalsan a, an zui ta nghâl” bawk a ni. (Mt. 4:18-22) Engin nge anni chu hunbi kima rawngbâwl tûra ṭanpui? Rilru phâwk lêk vânga thu tlûkna siam thut mai an ni em? Ni lo ve! Thla kaltate chhûng khân anni chuan Isua thusawi an ngaihthlâk a, a thilmak tihte an hmuh bâkah, felna lama a ṭhahnemngaihna an hmu a; tin, mite’n a thu hrilhna ṭha taka an chhân lêt dân pawh an hmu tawh bawk. Chuvângin, Jehova an rinna leh amah an rinchhanna chu a pung chho a ni!
7. Jehova’n a mite mamawh a pe thei tih ring tûrin engtin nge Bible zirlaite kan ṭanpui theih?
7 Jehova ring tûra kan Bible zirpuite ṭanpuina kawngah engtin nge Isua kan entawn theih? (Thuf. 3:5, 6) Kan zirtîr dân chuan kawngro a su hle. Kan zirtîr hunah, Lalram dah pawimawhtute hnêna Pathian thutiam malsâwmna nasa tak chu kan sawi uar thei a ni. (Malakia 3:10; Matthaia 6:33 chhiar rawh.) Pathian Jehova’n a mite a ṭanpui dân târ langtu Bible châng tam tak hmang thei mah ila, kan hmuh hmaih miah loh tûr chu kan entîrna siam hi a ni. Mahni thiltawn ngei hrilhna chuan zirlai chu Jehova chunga innghat tûrin nasa takin a ṭanpui thei a. Tin, kan thu leh hla chhuaha chuang thiltawn mi tichak thei takte pawh kan hrilh ve thei bawk. *
8. (a) Engvângin nge Bible zirlai tân “LALPA ṭhatzia . . . tem chhin” chu thil pawimawh tak a nih? (b) Engtin nge zirlai chu Jehova ṭhatzia tawng tûra kan ṭanpui theih?
8 Rinna nghet tak nei tûr chuan mi dangin Jehova malsâwmna an dawn dân chanchinte chhiar leh hriat mai chu a tâwk lo. Bible zirlai pawhin Jehova ṭhatzia mahniin a tawng ve tûr a ni. Fakna hla phuahtu chu: “Aw, LALPA ṭhatzia chu tem chhin teh rêng u: amaha rinna nghat mi chu a eng a thâwl e,” tiin a zai a ni. (Sâm 34:8) Engtin nge Bible zirlai chu Jehova ṭhatzia hmu tûra kan ṭanpui theih? Entîr nân, sum leh pai lama harsatna tâwk zirlai chuan meizial zûk te, pawisa khelh te, a nih loh leh a lutuka zu in ang chi a thil chîn ṭha lote bânsan a tum pawh a ni thei. (Thuf. 23:20, 21; 2 Kor. 7:1; 1 Tim. 6:10) A thil chîn ṭha lote bânsan thei tûra Pathian ṭanpuina dîl dân zirtîrna chuan Jehova ṭhatna tawng thei tûrin a ṭanpui dâwn lâwm ni? Tin, chawlhkâr tina Bible zir nân leh inkhâwm inbuatsaih nâna hun pêkna hmangin thlarau lam thilte dah pawimawh theih a ni a, chutianga ti tûra kan fuih huna a rah chhuah tûrte chu ngaihtuah bawk teh. A ṭan lâkna Jehova’n mal a sâwm tih a han hmuh chuan, a rinna chu mathei lovin a nghet sawt ngei ang!
Mipui Ngaih Dân Tûr Hlauhna
9, 10. (a) Engvângin nge Nikodema leh Arimathai khuaa Josefa chuan Isua an ngaihvenzia an tihlan ngam loh? (b) Engvângin nge tûn laia mipa ṭhenkhat chuan Krista hnung an zui hreh?
9 Ṭhiante nêksâwrna avângin mipa ṭhenkhat chuan Krista hnung chu an zui pumhlûm hreh ṭhîn a. Nikodema leh Arimathai khuaa mi Josefa chuan Juda mi dangte’n an hriat chhuaha an sawisêl leh an chunga an tih tûr chu an hlauh avângin Isua an ngaihvenna chu an tilang ngam lo a ni. (Joh. 3:1, 2; 19:38) Chu an hlauhna chu ngaihruat thil mai a ni lo. Sakhaw hruaitute’n Isua an huatna chu a nasa hle a, a tâwpah chuan amaha rinna lantîrtu apiang chu an inkhâwmna in ata an hnawt chhuak ṭhîn si a.—Joh. 9:22.
10 Tûn lai khawvêl hmun ṭhenkhatah, mipa tuemawin Pathian thu te, Bible te, a nih loh leh sakhuana te a ngaihven hle chuan, a hnathawhpui te, a ṭhiante, leh a chhûngte sawisêl a hlawh thei a. Hmun dangah chuan, sakhaw thlâk thu sawi chhuah pawh a hlauhawm hial thei a ni. Mipa tân sipai ṭang lai a ni emaw, politics-a inhnamhnawih a ni emaw, a nih loh leh khawtlâng thila inhmang tak emaw a nih chuan nêksâwrna do chu a harsa lehzual thei a. Entîr nân, German rama mipa pakhat chuan: “Nangni Thuhretute’n Bible chungchâng in sawi hi a dik a. Mahse, Thuhretu lo ni ve ta ila mi tinin an hre nghâl thuai ang a. Ka hnathawhnaa mi te, kan vêng chhûnga mi te, leh ka hmêlhriatte chuan engtin nge min ngaih ang? Chûng chu ka tuar ngam thlâwt lo,” tiin a sawi a ni.
11. Engtin nge Isua chuan a zirtîrte chu mihring hlauhna hneh tûra a ṭanpui?
11 Isua tirhkohte zîngah mi dâwihzep tumah awm lo mah se, mihring hlauhna chu an do ṭheuh a ngai a. (Mk. 14:50, 66-72) Engtin nge Isua chuan anni chu ṭhiante nêksâwrna nasa tak tuar reng chung pawha hmasâwn tûrin a ṭanpui? Isua chuan a zirtîrte chu nakina an la tawh tûr dodâlna hmachhawn thei tûra buatsaihin hma a la a. Heti hian a sawi a ni: “Mihring Fapa avânga miten an huat che u a, an tuithlâra an hau che u a, in hming a ṭha lo tiin an paih bo dêr hunah in eng a la thâwl ang,” tiin. (Lk. 6:22) Isua chuan a hnungzuitute chu “hau,” a nih loh leh sawichhiat an nih beisei tûrin a hrilh a. Sawichhiatna eng pawh chu “mihring Fapa” avânga thleng a ni. Isua chuan Pathian ṭanpuina leh chakna an rinchhan chhûng zawng Ani’n a ṭanpui dâwn tih a tiam bawk. (Lk. 12:4-12) Chu bâkah, mi tharte chu a zirtîrte nêna zalên taka inkâwm a, inṭhian tûrin a sâwm bawk a ni.—Mk. 10:29, 30.
12. Eng kawngin nge mi tharte chu mihring hlauhna hneh tûra kan ṭanpui theih?
12 Kan tân pawh Bible zirlaite chu mihring hlauhna hneh tûra ṭanpui an ngai a. Harsatna chu lo thleng tûra beisei a nih hian hmachhawn a awlsam sawt ṭhîn. (Joh. 15:19) Entîr nân, engvângin nge Bible zirlai chu a hnathawhpui leh mi dangte’n an zawh mai theih tûr zawhnate tluang tak, inâwm tak, leh Bible ṭanchhan ni bawk sia chhâng tûrin kan ṭanpui loh vang? Bible zirlai tâna ṭhian kan nih bâkah, kohhran chhûnga mi dangte pawh kan hmêlhriattîr thei a, a bîk takin an tuizâwng inang deuh tûrte chu kan hmêlhriattîr tûr a ni. A pawimawh berah chuan rilru taka ṭawngṭai ṭhîn tûrin kan zirtîr tûr a ni a. Chu chuan Pathian hnaih tûr leh Jehova chu a Inhumhimna leh a Lungpui-a siam tûrin a ṭanpui thei a ni.—Sâm 94:21-23; Jakoba 4:8 chhiar rawh.
Tling Tâwk Lo Nia Inhriatna
13. Engtin nge tling tâwk lo nia inhriatna chuan mi ṭhenkhat chu thlarau lam thil a ûm lohtîr?
13 Mipa ṭhenkhatte’n thlarau lam thil an ûm zui loh chhan chu lehkha chhiar an thiam nâl loh vâng emaw, thusawi an thiam loh vâng emaw, a nih loh leh an zahzum vâng emaw a ni thei a. Mipa ṭhenkhat chuan an ngaih dân mipui vântlâng hmaa sawi chhuah chu nuam an ti lo va. Zirna neih te, inkhâwmnaa chhânna pêk te, a nih loh leh an rinna mi dangte hnêna hrilh chhâwnte chu an tân thil harsa tak a ni thei bawk. Unaupa pakhat chuan: “Ka naupan lai chuan in tin kalnaah mi kawngkâ pan vatin, va kik ang takin ka awm a, chutah tuma min hmuh loh beiseiin ngawi rengin ka kal sawn ṭhîn. . . . In tin kal ka ngaihtuahna ringawt pawh hian min tichau ngawih ngawih a ni,” tiin a sawi.
14. Engvângin nge Isua zirtîrte chuan ramhuai man naupang chu an tihdam theih loh?
14 Ramhuai man naupang an tihdam theih loh laia Isua zirtîrte inrin tâwk loh dân tûr chu han ngaihtuah teh. A pa chu Isua hnênah lo kalin: “Ka fapa saw . . . thla em ât a ni a, a tuar nasa êm mai; vawi tam tak meiah a tlu ṭhîn a, vawi tam tak tuiah a tlu bawk ṭhîn a ni. Tin, i zirtîrte hnênah ka rawn hruai a, an tidam thei si lo” a rawn ti a. Isua chuan ramhuai chu a hnawt chhuak a, naupang chu a tidam ta a ni. Zirtîrte chuan a hnuah Isua rawn panin: “Engati nge keinin kan hnawh chhuah theih loh?” an ti a. Isua’n an hnênah: “In rin tlêm avângin. Tih tak meuhvin ka hrilh a che u, anṭam mu fangkhat ang rin in neih chuan, he tlâng hnênah hian, ‘Heta ṭangin sawtah sâwn va insawn rawh,’ in ti ang a, a insawn mai ang; in tân tih theih lo rêng engmah a awm lo vang,” tiin a chhâng a ni. (Mt. 17:14-20) Tlâng ang tluk harsatnate hmachhawn thei tûr chuan Jehova rin a ngai a. Miin hei hi theihnghilh a, mahni theihna mai a rinchhan hian eng nge lo thleng ṭhîn? Hlawhchhamna a thleng ṭhîn a, chu chuan mahni inrin tâwk lohna a neihtîr ta ṭhîn a ni.
15, 16. Engtin nge tling tâwk lo nia inhriatna nei Bible zirlai chu kan ṭanpui theih ang?
15 Tling tâwk lo nia inhriatna nei tuemaw ṭanpui dân ṭha ber chu mahni tlin lohna lam ngaihtuah lova Jehova ṭanpuina ring tûra fuih hi a ni. Petera chuan heti hian a ziak a: “A hun têah chuan a chawimawi theihna tûr che uin Pathian kut chak tak hnuaiah chuan intihnuai ula, . . . in manganna zawng zawng ama chungah nghat vek rawh u,” tiin. (1 Pet. 5:6, 7) Hetianga ti thei tûr hian Bible zirlai chu thlarau lama puitling chho tûra kan ṭanpui a ngai a. Thlarau mi tak chuan thlarau lam thilte chu a ngaihlu hle ṭhîn a. Pathian Thu, Bible ngainatna a neiin, a nunah “thlarau rah” a lantîr bawk ṭhîn. (Gal. 5:22, 23) Ani chu ṭawngṭai mi tak a ni bawk. (Phil. 4:6, 7) Chu bâkah, dinhmun engpawh leh a chanvo neih engpawh hlen tûra a mamawh huaisenna leh chakna pe tûrin Pathian a ring ṭhîn bawk a ni.—2 Timothea 1:7, 8 chhiar rawh.
16 Zirlai ṭhenkhat chuan lehkha chhiar lamah te, titina lamah te, leh thusawina lamah te hma sâwn tûrin ṭanpuina an mamawh thei a. Mi dangte chuan Pathian Jehova an hriat hmaa thil sual an lo tihte avângin Pathian rawngbâwl tlâk lova inhriatna an nei thei bawk. A enga pawh chu ni se, an mamawh tak chu hmangaih tak leh dawhthei taka kan ṭanpuina hi a ni thei. Isua chuan: “Mi chakte chuan dâktawr an ngai lo va, mi bawrhsâwmte zâwkin an ngai a ni,” tiin a sawi.—Mt. 9:12.
Mipa Tam Lehzualte Chu ‘Manin’
17, 18. (a) Engtin nge rawngbâwlnaah mipa tam lehzualte hnêna chanchin ṭha kan thlen theih? (b) A dawtah eng nge kan zir ang?
17 Bible aṭang chauhva hmuh theih chanchin lungâwithlâk ber chu mipa tam lehzualte’n an chhân lêt kan duh hle a. (2 Tim. 3:16, 17) Chuvângin, engtin nge rawngbâwlnaah mipa tam lehzualte hnêna chanchin ṭha kan thlen theih ang? Mipa a tam zâwkte ina an awm hun tlai lam te, chawlhkâr tâwp chawhnu lam te, a nih loh leh vântlâng chawlh hun tea rawngbâwlnaa telna hmangin kan thlen thei ang a. A theih hunah chuan in neitupa ngei biak pawh kan tum thei bawk a ni. A remchân hunah kan hnathawhpui mipate leh kohhrana unaunute pasal ringtu ni lote hnênah tawn chawpa thu hrilhna i nei ang u.
18 Kan mi tawh apiangte hnêna thu kan hrilh hian, ngaihhlutna neite chuan an chhâng lêt ang tih kan ring tlat thei a. Thutak ngaihventu diktakte chu dawhthei takin i ṭanpui zêl ang u. Mahse, engtin nge kohhrana baptisma chang tawh unaupate chu Pathian inawpna pâwla mawhphurhnate chelh thei tûrin kan ṭanpui theih? A dawta thuziakah kan ngaihtuah ang. (w11-E 11/15)
[Footnote]
^ par. 7 Yearbooks of Jehovah’s Witnesses leh Vênnainsâng leh Awake! magazine-a chuang nun kawng chanchinte chu en rawh.
Engtin Nge Kan Chhân Ang?
• Mipate chu thlarau lam thilte ûm tûrin eng anga ṭanpui theih nge an nih?
• Engtin nge mi tharte chu ṭhiante nêksâwrna hmachhawn thei tûra kan ṭanpui theih?
• Engin nge mi ṭhenkhat chu tling tâwk lo nia inhriatna an neihte hneh tûra ṭanpui mai thei?
[Zirlai Atâna Zawhnate]
[Phêk 25-naa milem]
Mipate hnêna chanchin ṭha thlen tûrin hun remchâng i insiam em?
[Phêk 26-naa milem]
Engtin nge Bible zirlai chu fiahnate tâwk thei tûra i buatsaih theih?
