“Nangma Hriatnaah Innghat Suh”
“Nangma Hriatnaah Innghat Suh”
“I thinlung zawng zawngin LALPA ring la, nangma hriatnaah innghat suh.”—THUF. 3:5.
1, 2. (a) Eng dinhmunte nge kan hmachhawn mai theih? (b) Dinhmun manganthlâk tak kan tawh hunah te, thu tlûkna pawimawh tak kan siam dâwn hunah te, a nih loh leh thlêmna kan do hunahte tu chungah nge kan innghah ang a, engvângin nge?
CYNTHIA-I * hnathawhna pu chuan a company pêng ṭhenkhat chu khârin, a hnathawktute chu a bân nual tawh a. Cynthia-i chuan nakin lawka bântîr a nih ve a inring a ni. A hna chu chân ta se eng nge a tih tâk ang? A bill-te chu engtin nge an pêk tâk ang? Kristian unaunu Pamela-i chu Lalram thuchhuahtu mamawh zualna hmuna pêm a duh a; mahse, a pêm tûr a ni em? Tlangvâl Samuel-a chuan lungkham dang a nei thung a. A naupan lai aṭangin saruak lem leh thuziakte chu a lo hmu fo tawh ṭhîn a. Tûnah chuan kum 20 chho bâwr mi niin, a thil chîn ṭha lova kîr leh tûra thlêmna nasa tak a tâwk a ni. Engtin nge chu chu a do theih ang?
2 Dinhmun manganthlâk tak i tawh hunah te, thu tlûkna pawimawh tak i siam dâwn hunah te, a nih loh leh thlêmna i do hunahte tu chungah nge i innghah? Mahni chungah chauh i innghat nge ni a, ‘I rit phurh chu LALPA chungah i nghat’ zâwk? (Sâm 55:22) Bible chuan: “LALPA mit chuan mi felte lam a en ṭhîn a, a beng chuan an au hre tûrin a ngaithla reng ṭhîn,” a ti. (Sâm 34:15) Chuti chu, kan thinlung zawng zawnga Jehova kan rin a, mahni hriatnaa kan innghah lo chu a va pawimawh tehrêng êm!—Thuf. 3:5.
3. (a) Jehova rinnaah chuan eng nge tel? (b) Engvângin nge ṭhenkhat chu mahni hriatnaa an innghah mai theih?
3 Thinlung zawng zawnga Jehova rinnaah chuan a kawng leh a duhzâwng mila thiltih a tel a. Chutianga tih dân kawng pawimawh ber chu englai pawha ṭawngṭaia amah pan reng leh tih tak zeta a kaihhruaina dîl hi a ni. Mahse, mi tam tak tân chuan Jehova rin pumhlûm chu a harsa a. Entîr nân, Kristian unaunu Lynn-i chuan: “Jehova rin pumhlûm chu harsa ka tih reng ṭhin a ni,” a ti. Engvângin nge? Ani chuan: “Ka pa nên inzawmna rêng kan nei lo va, ka nu lahin rilru lam leh taksa lamah min enkawl bawk si lo. Chuvângin, mahnia inenkawl chu ka zir hma hle,” tiin a sawi. Lynn-i seilen dân chuan a tân tuemaw rin pumhlûm chu a tiharsa a ni. Mi mal theihna leh hlawhtlinna pawhin mi chu mahni a inrinchhantîr thei bawk. Upa tuemaw chuan ṭawngṭaia Pathian pan hmasa lo va, mahni thiltawn rinchhanin kohhran nêna inkûngkaih thilte chu a enkawl ṭan mai thei a ni.
4. He thuziakah hian eng nge kan sawiho vang?
4 Jehova chuan kan ṭawngṭaina mila nung tûr leh a duhzâwng mila thil ti tûra theih tâwp kan chhuah min beisei a. Chuti chu, harsatnate Jehova kan chinfeltîr hun tûr leh mahnia chinfel hun tûr chu engtin nge kan hriat hran theih ang? Thu tlûkna kan siam hunah eng angin nge kan fîmkhur ang? Thlêmnate do kan tum laiin engvângin nge ṭawngṭai a pawimawh? Bible-a entîrnate ngaihtuahna hmangin hêng zawhna pathumte hi kan sawiho ang.
Mangan Hunah
5, 6. Assuria lalin a vau khân engtin nge Hezekia chuan a chhân lêt?
5 Juda Lal Hezekia chungchângah Bible chuan: “LALPA chu a vuan tlat a, amah a zui chu a bâng duh lo va, a thupêk LALPAN Mosia a pêkte chu a zâwm a,” a ti. Ni e, “ani chuan LALPA Israelte Pathian chu a ring” a ni. (2 Lal. 18:5, 6) Assuria ram lal Senakeriba’n Rabsakea ruala a palaite sipai tam tak nêna Jerusalema a tirh khân, Hezekia chuan engtin nge a chhân lêt? Assuria sipai rual chak tak chuan Judai rama khaw kulh neite chu an la nual tawh a, an Lal Senakeriba chuan Jerusalem pawh lâk a tum mêk a ni. Hezekia chu Jehova inah kalin, heti hian a ṭawngṭai a ni: “Aw LALPA kan Pathian, nang, nangmah chauh hi LALPA Pathian i ni tih leilung luah ram zawng zawng hian an hriat theih nân a lakah hian min chhandam ngei ngei ang che,” tiin.—2 Lal. 19:14-19.
6 Hezekia chuan a ṭawngṭaina milin thil a ti a. Ṭawngṭai tûra biak ina a kal hma pawhin, mite chu Rabsakea chona chhâng lêt lo tûrin a hrilh a ni. Tin, Isaia hnêna palai tîrin, a thurâwn a zawng bawk. (2 Lal. 18:36; 19:1,2) Hezekia chuan a tih tûr ang takin thil a ti a ni. He mi ṭum hian Jehova duhzâwng kalhin Aigupta emaw, ṭhenawm hnam dang emawte ṭanpuina zawnga chinfel a tum lo. Mahni hriatnaa innghah ai chuan Hezekia chuan Jehova a ring a. Jehova vântirhkohvin Senakeriba mi 1,85,000 a tihhlum hnu chuan, Senakeriba chu “a lêt leh a,” Ninevi khuaah chuan a kîr leh ta a ni.—2 Lal. 19:35, 36.
7. Hani leh Jona ṭawngṭaina aṭangin eng thlamuanna nge kan hmuh theih?
7 Levia mi Elkana nupui Hani pawhin fa a neih theih loh avânga a mangan khân, Jehova chu a rinchhan a. (1 Sam. 1:9-11, 18) Zâwlnei Jona chu: “Ka hrehawmna avângin LALPA chu ka ko va, anin mi chhâng a; Seol kawchhûng aṭangin ka au va, nangin ka aw i hria a,” tia a ṭawngṭai hnuah sangha lian kawchhûng aṭanga chhâk chhuahin a awm a ni. (Jon. 2:1, 2, 10) Eng ang harsatna dinhmunah pawh ding mah ila, Jehova hnêna ‘khawngaihna kan dîl’ thei hi a va thlamuanthlâk tak êm!—Sâm 55:1, 16 chhiar rawh.
8, 9. Hezekia te, Hani te, leh Jona te chuan an ṭawngṭainaah eng nge an sawi a, chuta ṭang chuan eng nge kan zir theih?
8 Hezekia te, Hani te, leh Jona te entîrna chuan mangan laia kan ṭawngṭai huna kan hriat reng tûr pawimawh tak pakhat min zirtîr bawk a. An pathum hian dinhmun khirh avângin hrehawm an ti ṭheuh a ni. Mahse, an ṭawngṭaina chuan mahni leh an buainate chauh an ngaihtuah lo tih a târ lang. Pathian hming te, a biakna te, leh a duhzâwng tihte chu an ngai pawimawh ber a ni. Hezekia chu Jehova hming sawichhiat a nih vânga rilru hrehawm a ni a. Hani chuan a ît êm êm fapa pêk a nih chuan Silo khua biak bûka rawngbâwl tûra pêk a tiam a. Tin, Jona chuan: “Thu ka tiam tawh chu ka hlen ang,” a ti bawk.—Jon. 2:9.
9 Dinhmun khirh tak ata chhan chhuahna kan dîl hian, kan dîl chhan kan inbih chian chu a finthlâk a. Kan ngaihtuah chu buaina ata fihlîm ngawr ngawr nge ni a, Jehova leh a thiltum chu kan ngaihtuah tel zâwk? Hrehawm kan tawrh hian mahni buaina ringawt ngaihtuah a, thlarau lam thil ngaih pawimawh loh zâwk chu a awl hle. Pathian hnêna ṭanpuina dîla kan ṭawngṭai hian Jehova, a hming tihthianghlimna, leh a lalchungnunna thiam chantîrna chu rilruah i dah tlat ang u. Chutianga tihna chuan, kan beisei anga thil a awm loh pawha rilru put hmang ṭha nei reng tûrin min ṭanpui thei a. A châng chuan kan buaina chu la bo nghâl lo mah se, chhel taka tuar thei tûra chakna min pein kan ṭawngṭaina chu a chhâng thei a ni.—Isaia 40:29; Philippi 4:13 chhiar rawh.
Thu Tlûkna Siam Hunah
10, 11. Jehosaphata’n hmachhawn ngaihna a hriat loh dinhmun a tawn khân eng nge a tih?
10 Nuna thu tlûkna pawimawh takte chu engtin nge i siam ṭhin? Thu tlûkna i siam hnuah Jehova malsâwmna dîlin i ṭawngṭai chauh vem? Moab-ho leh Ammon-ho inzawmkhâwmin beih an tum laia Juda lal Jehosaphata thiltih hi han ngaihtuah teh. Judate tân chuan beih lêt theih rual an ni lo va. Jehosaphata chuan eng nge a tih tâk ang?
11 Bible chuan: “Jehosaphata chuan a hlau va, LALPA zawng tûrin a inpe a,” tih a sawi a. Judai ram zawng zawngah chaw nghei tûrin thu a chhuah a, ‘LALPA ṭanpuina zawng tûrin’ mite a khâwm a ni. Tichuan, Juda-ho leh Jerusalem-ho pungkhâwm zînga dingin a ṭawngṭai a. Chutah chuan hêng thute hi a tel a ni: “Aw kan Pathian, an chungah ro i rêl dâwn lâwm ni? Mi chu zozai, mi rawn bei tûra lo thawkte chu lo han bei thei ziazâng kan ni si lo va; a tih ngaihna rêng rêng kan hre bawk hek lo, i lam kan lo hawi mai zâwk a ni e,” tih hi. Pathian dik chuan Jehosaphata ṭawngṭaina chu a ngaithla a, mak tak maiin a chhan chhuak ta a ni. (2 Chro. 20:3-12, 17) Thu tlûkna kan siam hunah, a bîk takin kan thlarau lam nghawng thei thilahte phei chuan mahni hriatnaa innghah aiin Jehova kan rinchhan zâwk tûr a ni dawn lâwm ni?
12, 13. Thu tlûkna siam kawngah Lal Davida’n eng entawn tûr nge a siam?
12 Buaina chinfel awlsam hmêl tak—tûn hmaa kan lo tawn tawh avânga chinfel mai theih kan inrin—tawng ta ila engtin nge kan tih ang? Lal Davida chanchin thuziak chuan he mi chungchângah hriatthiamna min pe a ni. Amalek mite’n Ziklag khua an beih khân Davida nupui fanaute leh a mite nupui fanaute chu an lâksak a. Davida chuan Jehova a râwn a ni: “Chûngho chu [ka ûm ang em?, New World Translation] ûm ila ka la ûmpha ang em le?” tiin. Jehova chuan: “Um rawh, i ûmpha ngei ngei ang a, i chhanchhuak vek ngei ngei ang,” tiin a chhâng a. Tichuan, Davida chu a kal chhuak a, “Amalek miten an lâk zawng zawng chu a la leh vek” ta a ni.—1 Sam. 30:7-9, 18-20.
13 Amalek-hovin an beih hnu deuh chuan, Philistia-hovin an rawn bei leh a. Davida chuan Jehova a râwn leh a, a chhânna chiang tak a dawng a ni. Pathian chuan: “Han chho rawh; Philistia mite chu i kutah ka pe ngei ngei dâwn a ni,” tiin a hrilh a. (2 Sam. 5:18, 19) Chu mi hnu lawk chuan, Philistia-ho chu Davida bei tûrin an rawn thawk leh a. Chu mi ṭum chuan eng nge a tih dâwn? Ani chuan: ‘Hetiang dinhmun hi ṭum hnih lai ka lo tawng tawh a. Ka lo tih tawh ṭhin angin Pathian hmêlmate chu ka han bei teh ang,’ tiin a ngaihtuah thei reng a ni. Chutiang chuan a ti dâwn nge ni a, Jehova kaihhruaina a zawng leh zâwk dâwn? Davida chu tûn hmaa a thiltawnah a innghat lo va. Ṭawngṭaiin Jehova a râwn leh a ni. Chutianga a tih avângin a va lâwm dâwn êm! Chu mi ṭum chuan kaihhruaina dang daih a dawng ta si a. (2 Sam. 5:22, 23) Tûn hmaa kan lo tawn tawh ṭhin dinhmun leh harsatna pawh tâwk mah ila, tûn hmaa kan thiltawn ringawt rinchhan lo tûrin kan fîmkhur tûr a ni.—Jeremia 10:23 chhiar rawh.
14. Josua leh Israel upate’n Gibeon mite an dâwr dân aṭangin eng nge kan zir theih?
14 Ṭha famkim lo kan nih avângin kan vai hian—thiltawn ngah upate tân pawh—thu tlûkna kan siam hunah Jehova kaihhruaina zawng hmaih lo tûrin kan fîmkhur tûr a ni. Gibeon mite’n ram hla tak aṭanga lo kal anga insiam a, finrâwl chhuaha an rawn pan laia Mosia thlâktu Josua leh Israel upate chhân dân hi lo ngaihtuah teh. Josua leh mi dangte chuan Jehova râwn lovin, an thuin Gibeon mite chu remna thu an tlunpui a. Jehova chuan an inremna siam chu thlâwp tho mah se, a kaihhruaina an zawn lohna chanchin chu Bible-ah kan hlâwkpui atân a lo chhinchhiahtîr a ni.—Jos. 9:3-6, 14, 15.
Thlêmna Do Hrâm Kan Tum Hunah
15. Thlêmna do huna ṭawngṭai a pawimawh chhan hrilhfiah rawh.
15 Keimahnia “sualna dân” a beh tlat avângin, sual lam âwn kan duhna chu kan do hrâm hrâm a ngai a. (Rom 7:21-25) Chu chu kan do hneh theih thil a ni. Engtin nge? Isua chuan a hnungzuitute hnênah thlêmna do thei tûra ṭawngṭai a pawimawh tih a hrilh a. (Luka 22:40 chhiar rawh.) Pathian hnêna kan ṭawngṭai hnuah pawh châkna ṭha lo emaw, ngaihtuahna ṭha lo emaw kan la neih fo chuan, chu mi hmachhawn thei tûrin ‘Pathian hnênah finna kan dîl’ zawm zêl a ngai a ni. Ani chuan ‘mi zawng zawng hnênah hau lo leh ui lovin a pe ṭhîn’ tih thutiam kan nei si a. (Jak. 1:5) Jakoba chuan: “In zîngah [thlarau lama] damlo an awm em? Kohhran upa kohtîr sela, anin Lalpa hminga hriak hnawihin a chungah ṭawngṭai rawh se; tin, rinnaa ṭawngṭaina chuan damlo chu a chhandam ang,” tiin a ziak bawk.—Jak. 5:14, 15.
16, 17. Thlêmna do thei tûra ṭanpuina kan zawn hian, engtik huna ṭawngṭai nge ṭangkai ber ang?
16 Thlêmna do huna ṭawngṭai chu a pawimawh ngei mai; mahse, a hun dik taka ṭawngṭai a pawimawhzia kan hriat a ngai a ni. Thufingte 7:6-23-a târ lan tlangvâl chungchâng hi han ngaihtuah teh. Ani chu tlai thim thet thetah hmeichhe ṭha lo awmna kawtthlêrah a kal a. Chu hmeichhe ṭawngkam thiamna chuan a thlêm thlûk a, a infak mawina chuan a hruai bo avângin, bâwng a talhtu lam pana kal ang maiin, chu nu chu a zui ta a ni. Tlangvâl chu engvângin eng chu mi hmuna a va kal? Ani chu mi mâwl, “hriatna nei lo” a ni a, châkna ṭha lo a neih chu a do ve ṭâng ṭâng pawh a ni thei ngei ang. (Thuf. 7:7) Eng huna ṭawngṭai nge a hlâwkpui ber dâwn? Thlêmna a tawh chhûnga do thei tûra ṭawngṭai chu a hlu ngei mai. Mahse, a tâna ṭawngṭai hun ṭha ber tûr chu, chu mi kawtthlêra kal duhna a neih ṭan hun hi a ni.
17 Tûn laiah, tuemaw chuan saruak lem leh thuziakte en loh chu a tum nasa pawh a ni thei. Mahse, châkna tichhuak thei milem leh video-te awmna tih a hriat reng Internet site-te chu en ta se, engtin nge ni ang? A dinhmun chu Thufingte bung 7-a târ lan tlangvâl nên a inang reng dâwn lâwm ni? Zawh ṭan atâna kawng hlauhawm a va ni êm! Saruak lem leh thuziakte en tûra thlêmna do thei tûrin, mi chuan Internet-a chu kawng a zawh ṭan hmain ṭawngṭaia Jehova ṭanpuina a dîl a ngai a ni.
18, 19. (a) Engvângin nge thlêmna do chu thil harsa tak a nih theih a, engtin nge chu harsatna chu hmachhawn theih? (b) Eng nge i tum tlat chu?
18 Thlêmna do zawh emaw, thil chîn ṭha lote sim emaw chu a awlsam lo. Tirhkoh Paula chuan: “Tisa hian thlarau dona lam a châk ṭhîn a, thlarau pawhin tisa dona lam a châk bawk si ṭhîn,” tiin a ziak a. Chuvângin, ‘thil tih kan tumte chu kan ti thei lo’ ṭhîn a ni. (Gal. 5:17) Chu harsatna hmachhawn thei tûr chuan ngaihtuahna ṭha lo emaw, thlêmna emaw kan rilrua a rawn lut veleh tih tak zeta kan ṭawngṭai a, chu mi mila thil kan tih chu a ngai a ni. “Mihring tuar theih ang chauh lo chu thlêmna rêng rêng [kan] chungah a thleng ngai lo.” Chuvângin, a ṭanpuinain Jehova chungah kan rinawm reng thei a ni.—1 Kor. 10:13.
19 Dinhmun khirh tak kan tawng emaw, thu tlûkna pawimawh tak kan siam a ngai emaw, a nih loh leh thlêmna do theih kan tum emaw a nih pawhin Jehova chuan thilpêk ropui tak—ṭawngṭai theihna hlu tak chuy—min pe a. Chu mi hmang chuan amah kan rinchhanzia kan târ lang a ni. Min kaihruai a, min tichaktu Pathian thlarau thianghlim pawh kan dîl chhunzawm zêl tûr a ni bawk. (Lk. 11:9-13) Chuvângin, mahni hriatnaa innghat lovin Jehova chu i rinchhan tlat zâwk ang u. (w11-E 11/15)
[Footnote]
^ par. 1 Hmingte chu thlâk a ni.
Kan Hre Chhuak Em?
• Hezekia te, Hani te, leh Jona te hnên aṭangin Jehova rinchhan chungchâng eng nge kan zir?
• Engtin nge Davida leh Josua entîrna chuan thu tlûkna siam huna fîmkhur a pawimawhzia a târ lan?
• Thlêmna chungchângah eng hunah nge kan ṭawngṭai ang?
[Zirlai Atâna Zawhnate]
[Phêk 13-naa milem]
Thlêmna kan do hian eng huna ṭawngṭai nge ṭangkai ber ang?
