Thutak Chuan I Nun A Thlâk Thei

HE THUZIAK inzawma kan laihlan tâk Pathian chungchânga inbumna a engemaw ber chu i hre tawh emaw, chutianga zirtîrna chu i dawng tawh emaw pawh a ni thei a. Chuti chung pawhin, i thurin thlâk chu i hrehin, a bîk takin hun rei tak ata i lo rin tawh a nih phei chuan i thlâk hreh hle pawh a ni thei.

Chutiang hrehna neih chu a thiamawm tho mai. Kohhran ṭhenkhat chuan an zirtîrna leh Bible zirtîrna khaikhin chu an sawi mawi si lo va. A dangte chuan Bible hi hriat thiam harsa tak, mi tinte hriat thiam tûr a ni lo tia sawiin dâwt thu chu hum an tum bawk a ni. Mahse, Isua zirtîr a tam zâwkte chu lehkha thiam sâng pawh ni lo, mi pângngai tak an ni chung pawhin Isua thu zirtîr chu an man zung zung lehlawi si.—Tirhkohte 4:13.

Tin, rinna tla chham anga lan i duh loh avângin i thurin i bêl chiang ngam lo pawh a ni thei bawk a. Mahse, Pathianin i laka a thil beiseite hriat nâna mihringte hnêna a thuchah, Bible i bih chian avângin ani chu i chunga lungni lo tûr anga ngaih chu thil ni thei a ni em? Chu mi nêna inkalh takin, a Thu, Bible chuan: ‘Pathian duhzâwng, a ṭha leh lawm tlâk leh, ṭhat famkim chu hre fiah’ tûrin a fuih zâwk mah che a ni.—Rom 12:2.

Pathian chanchin zir chu thluak sawizawina mai a ni lo—chu chuan i nun chu a ṭha zâwk lamah a thlâk thei a ni. (Johana 8:32) Thuziak hmasa bera kan târ lan tâk Deanne-i chuan Pathian Thu rinna a lo nei tawh a. Heti hian a sawi a ni: “Bible ka zir hma chuan a Thute hi a fiah hle a ni tih ka hre ngai hauh lo. Tûnah chuan Pathian Jehova chu mize nei lo Pathian ang ni lovin, hmangaihna nei ka Pa vâna mi angin ka hre tawh a. Nun awmze dik tak ka chhar chhuak ve ta a ni,” tiin.

A hlâwkna hre mang lovin Bible i lo zir tawh pawh a ni thei a. Chutiang i nih chuan, tlâwm mai suh. Pathian chungchânga dâwt thu zirtîrna dawng reng chunga Bible hriat thiam tum chu kaihhruaina dik lo hmanga khâwl pakhat rem tum ang a ni a. A ṭhen lai chu i rem khâwm thei pawh a ni mahna; mahse, i rem khâwm kim theih loh avânga lunghnualin, rem i tum ta lo pawh a ni thei. Amaherawhchu, kaihhrauina dik i hman chuan ṭha takin i rem khâwm thei ngei ang.

Pathian chungchânga thudik zir chu i duh ang em? A thlâwna in lama Bible zirna atân in vêng chhûnga Jehova Thuhretute be pawp tûr emaw, he magazine phêk 4-naa lang address remchâng bera lehkha thawn tûr emawin kan sâwm a che. (w11-E 10/01)

[Phêk 9-naa thu lâk chhuah]

‘Pathian duhzâwng, a ṭha leh lawm tlâk leh, ṭhat famkim chu hre fiah rawh.’—ROM 12:2