Bible Tehnate Milin Engvângin Nge Kan Nun Ang?

MIPAT hmeichhiatna chungchânga Bible thlîr dân hi a hmân lai tawhin, ṭul lo taka inkhuahkhirhna a ni em? Ni lo ve. Chutih ahnêkin, mipat hmeichhiatna chungchânga Bible thlîr dân chuan a hnuaia mite hi pumpelh tûrin min ṭanpui thei zâwk a ni:

▪ Mipat hmeichhiatna lama inkaichhâwn theih natna te

▪ Sâwn paina te

▪ Inṭhennain a thlen rilru natna te

▪ Mahni inthiam lohna te

▪ Mi dangte châkna hrîk thlâkna hmanrua mai nia inhriat avânga tlâk tlai lo intihna te

Min Siamtu, Pathian Jehova * chuan a thilpêkte hlimpui tûr leh ṭangkaipui tûrin min duh a. Pathian chu ‘kan ṭhatna tûra keimahni min zirtîrtu’ a ni. (Isaia 48:17) Chuvângin, mipat hmeichhiatna chungchânga Bible kaihhruaina zâwmtute chuan a hnuaia mite hi an nei thei a ni:

▪ Pathian duhsakna te

▪ Rilru thlamuanna te

▪ Chhûngkaw inlaichînna ṭha lehzual te

▪ Hming ṭhatna te

▪ A âwm tâwka mahni inhlutna te

A nih leh, tûnah hian nungchang lama Bible tehnate mila nung ni lo ta la, engtin nge ni ang? I nun dân chu thlâk danglam theih a ni em? Pathian chuan tûn hmaa i nun dân chungah mawh a phurhtîr che ang em?

Hei hi ngaihtuah teh: Kum zabi khatnaa Kristian ṭhenkhat chu tûn hmaa inngaih hmangte, uirête, leh mawngkawhurte an ni a. Mahse, anni chuan an nun dân an thlâk a, Pathianin a ngaidam a ni. (1 Korinth 6:9-11) Tûn laiah pawh, khawvêl puma mi sâng tam takte chuan chutiang bawka inthlâk thlengna chu an siam a. Anni chuan inphalraina nun bânsan a, Bible tehnate  mila an nun tâk avângin a hlâwkna an têl a ni. Entîr nân, thuziak ṭan tirha kan sawi tâk Sarah-i thiltawn kha ngaihtuah ang che.

“Ka Hahdam Nghâl Ta Huai Mai”

Sarah-i chuan duh duha a tâlnain a thlâkhlelh êm êm zalênna leh lungawina a pe lo tih a hmu chhuak a. Heti hian a sawi a ni: “Ka chhia leh ṭha hriatna a chawlawl zo tawh niin ka hria. Ka zak hle a, naupai mai emaw, natna râpthlâk tak vei mai emaw chu ka hlau hle. Pathian a awm tih ka rinna chu ka hloh ngai lo, ka nun dân chuan a rilru a tina tih pawh ka hria. Mi bawlhhlawh tak nia inhriatna ka nei a, chu chuan min ei chhe zo a ni,” tiin.

A tâwpah chuan Sarah-i chuan a nun thlâkthleng tûrin chakna a nei ta a. Jehova Thuhretu a nu leh pate hnênah ṭanpuina a ngên a ni. Tualchhûng kohhrana Kristian upate hnênah pawh ṭanpuina a dîl bawk a. “Ka nu leh pate leh kohhran upate ngilneihna leh hmangaihna chu mak ka ti êm êm a, ka hahdam nghâl ta huai mai a ni,” tiin a sawi.

Tûnah Sarah-i chuan fa pahnih a nei tawh a. Heti hian a sawi: “Ka fate hnênah chuan ka duhthlanna siam chungchâng chu tlang takin ka hrilh a. Pathian tehnate ngaih pawimawh lohnain min nghawng dân chu an hriatthiam ka duh a ni. Mipat hmeichhiatna chungchânga Pathian tehnate mila nun chu tisa lam, rilru lam, leh ngaihtuahna lama a ṭangkaizia hre thiam tûra ṭanpui chu ka tum ber a. Pathian chuan kan intihhrehawm a duh loh avângin nungchang lama tehna min pe a ni tih ka hre chiang hle,” tiin.

Nang pawhin, Pathian kaihhruaina duhawm tak zui chu i hlâwkpui ve thei a. Bible chuan he thutiam hi min pe a ni: “LALPA thununna thu chu a dik a, thinlung a tilâwm ṭhîn: LALPA thupêk chu a thianghlim a, mitte a tivâr ṭhîn. . . . Chûng zawm chu lâwmman nasa tak neihna a ni ṭhîn,” tih hi.—Sâm 19:8, 11. * (w11-E 11/01)

[Footnote-te]

[Phêk 8-naa thu lâk chhuah]

Bible tehna ngaihthahtute chuan rilru natna an thlen ṭhîn

[Phêk 8-naa thu lâk chhuah]

Bible tehna mila nungte chuan chhia leh ṭha hriatna thiang leh chhûngkaw inlaichînna nghet lehzual an nei