Engvângin Nge Pathian Thlarau Kan Inkaihhruaitîr Ang?
Engvângin Nge Pathian Thlarau Kan Inkaihhruaitîr Ang?
“Ka Pathian i ni si a: i thlarau chu a ṭha a ni . . . mi hruai ang che.”—SAM 143:10.
1. Hmuh theih loh chaknain mi a kaihhruai theih dân entîrna sawi rawh.
ZIN kawng i hriat theih nân chhim leh hmâr kâwktu, compass i hmang tawh ngai em? Compass chu hmâr lam chauh kâwk rengtu thîr zum tê nei hmanraw mâwlmang tak a ni a. Chu compass-a thîr zum tê chu hmuh theih loh thîrhîpthei chaknain a thunun a. Kum zabi tam tak chhûng chu mite chuan tui leh khawmuala an zin kawng an hriat theih nân compass an lo hmang tawh a ni.
2, 3. (a) Kum chhiarsên loh kal taah khân Jehova’n eng chakna thiltithei tak nge a lo hman? (b) Engvângin nge tûn laiah hmuh theih loh Pathian thlarau chu kan nun kaihruai zêl tûra kan beisei ang?
2 Min kaihruaitu atâna pawimawh lehzual hmuh theih loh chakna dang pawh a awm a. Chu chu eng nge ni? Bible-a châng lang hmasa ber pahniha hmuh theih hi a ni. Kum chhiarsên loh kal taa Jehova thil siam chungchângah Genesis chuan: “Atîrin Pathianin lei leh vân a siam a,” tiin a sawi a. Thuziak chuan: “Pathian thlarau chuan tui chungte chu a awp reng a,” tiin a sawi belh a ni. (Gen. 1:1, 2) Pathian chuan thil siam nân a thlarau thianghlim—a chakna chevêl reng—a hmang a ni tih a chiang hle. Keini pawh Jehova’n thil zawng zawng siam nâna a thlarau a hman azâra lo awm kan nih avângin a chungah bat kan nei a ni.—Job. 33:4; Sâm 104:30.
3 Nunna thaw nei, mi nung kan nih angin, Pathian thlarau chu kan nun kaihruai zêl tûrin kan beisei tûr a ni em? Kan beisei tûr a ni tih Pathian Fapa, Isua ngei chuan a hria a ni, a zirtîrte hnênah: “Thlarau . . . chuan thutak zawng zawngah chuan a hruai lût ang che u,” tiin a sawi si a. (Joh. 16:13) He thlarau nihna hi eng angin nge kan hriat thiam ang a, engvângin nge a kaihhruaia awm chu kan duh ang?
Thlarau Thianghlim Nihphung Chu
4, 5. (a) Engtin nge Trinity ring hote’n thlarau thianghlim chungchângah eng ngaih dân dik lo nge an neih? (b) Engtin nge thlarau thianghlim nihphung dik tak chu i hrilhfiah ang?
4 Rawngbâwlnaa i mi tawh ṭhenkhat chuan thlarau thianghlim chungchângah Bible mil lo ngaih dân an neih a rinawm a. Trinity ringtute chuan thlarau chu Pa Pathian nên an intluk tih ngaih dân dik lo an nei a ni. (1 Kor. 8:6) Mahse, Trinity rin dân chu Pathian Lehkha Thu nên a inkalh tih a hriat theih a ni.
5 Chuti chu, thlarau thianghlim nihphung dik tak chu eng nge ni? Genesis 1:2-a hman Hebrai thu mal ruʹach tih chu “thlarau” tiha lehlin a ni a, “thli” tih leh hmuh theih loh chakna che vêl reng sawina thu dang pawha lehlin theih a ni bawk. (Genesis 3:8; 8:1 khaikhin rawh.) Hmuh theih loh a ni chung pawha thliin thil a tihtheih ang chiahin, hmuh theih loh leh ruangâm nei lo thlarau thianghlim pawhin thil a tithei a ni. Chu thlarau chu Pathianin a duhzâwng hlen chhuah nâna mi emaw, thil emaw hnêna a pêk chhuah leh a hman a chakna hi a ni. Pe Chhuaktu thianghlim, Pathian Engkimtitheia hnên aṭanga chutiang chakna mak tak a lo chhuak chu rin harsa a ni em? Ni lo ve!—Isaia 40:12, 13 chhiar rawh.
6. Davida’n Jehova hnênah eng thil pawimawh tak nge a ngen?
6 Jehova chuan a thlarau chu kan nun kaihruai tûrin a hmang zêl thei em? Fakna hla phuahtu Davida hnênah heti hian a tiam a ni: “Fing taka awmtîr chein i kalna tûr kawng chu ka entîr . . . ang che,” tiin. (Sâm 32:8) Chu chu Davida’n a duh em? Duh e, Jehova hnênah: “I duhzâwng tih mi zirtîr ang che; ka Pathian i ni si a: i thlarau chu a ṭha a ni; . . . mi hruai ang che,” tiin a ngên si a. (Sâm 143:10) Keini pawhin chutiang bawka Pathian thlarau inkaihhruaitîr châkna leh duhna chu kan nei ve tûr a ni. Engvângin nge? A chhan pali lo ngaihtuah ta ila.
Mahni Inkaihruai Tûrin Kan Tling Lo
7, 8. (a) Engvângin nge Pathian tel lova mahni kan inkaihhruai theih loh? (b) He khawvêl suaksual takah hian mahnia kawng inzawn chawp kan ngam loh chhan sawi rawh.
7 A hmasa berin, Pathian thlarau inkaihhruaitîr kan duh chhan tûr chu mahni kan inkaihhruai theih loh vâng a ni. “Kaihruai” tih awmzia chu “kawng kawhhmuh emaw, kawng zawh tûr hrilh emaw,” tihna a ni a. Mahse, Jehova chuan mahni inkaihruai thei tûrin min siam lo va, a bîk takin kan ṭhat famkim loh avâng hian kan inkaihruai thei lo lehzual a ni. A zâwlnei Jeremia chuan heti hian a ziak a: “Aw LALPA, mihring awm dân chu, mahni thu mai a ni lo tih ka hre ta: tungchhova kal mihringah hian, a pheikhai hruai tûr a awm lo,” tiin. (Jer. 10:23) Engvângin nge? Jehova chuan Jeremia kal tlangin a chhan min hrilh a ni: “Thinlung hi thil zawng zawng aiin bumhmang ber, chhe lailet dêr a ni a; tuin nge hre thiam thei ang?” tiin.—Jer. 17:9; Mt. 15:19.
8 Thiltawn nei lo tuemaw chu kaihruaitu ṭha leh compass pawh nei lova ram pilril taka kaltîr chu a âtthlâk hle lo vang maw? Ramhnuai hrehawm taka dam khawchhuah dân leh a kalna tûr kawng zawn hmuh dân a hriat loh avângin, dinhmun hlauhawm takah a ding a ni. Chutiang bawkin, he khawvêl suaksual takah hian kawng dik kawhhmuhtu Pathian tel lova mahni pheikhai hruai theia inringtu chu dinhmun hlauhawm takah a ding a ni. Hlawhtling taka he khawvêl pal tlang theih dân kawng awmchhun chu Davida’n Jehova hnêna: “Ka ke pênte hi i kawng zawh tûrin chelh tlat la, tichuan ka tawlh thlu dâwn lo nia,” tia a ngen anga ngen ve hi a ni. (Sâm 17:5; 23:3, Mizo-English Parallel Bible) Engtin nge chutiang kaihhruaina chu dawn theih a nih?
9. Phêk 23-naa târ lan angin, engtin nge Pathian thlarau chu min kaihruaitu ṭha tak a nih theih?
9 Kan inngaihtlâwm a, Jehova rinchhan kan inhuam chuan, kan ke pênte hruai tûrin a thlarau thianghlim min pe ngei ang. Engtin nge chu thlarau chuan min ṭanpui ang? Isua chuan a zirtîrte hnênah heti hian a hrilhfiah a ni: “Thlamuantu, thlarau thianghlim, Pain ka hminga a rawn tirh tûr khân, chu mi chuan engkim a zirtîr ang che u a, in hnêna ka sawi zawng zawng a hriat chhuahtîr leh ang che u,” tiin. (Joh. 14:26) Krista thusawi zawng zawng pawh tiamin, Pathian Thu ngun taka kan zir ziah chuan, thlarau thianghlim chuan Jehova finna thûk tak kan hriat thiamna a tipung ang a, chu chuan a duhzâwng zui tlat tûrin min ṭanpui ang. (1 Kor. 2:10) Chu bâkah, kan nun kawngah beisei loh thil engpawh lo thleng mah se, thlarau chuan kalna tûr kawng min kawhhmuh ang a. Kan hriat tawh sa Bible thu bulte chu min hriat chhuahtîr lehin, a dawta kan ke pên leh tûr atâna kan hman theih dân hre thiam tûrin min ṭanpui bawk ang.
Isua Chu Pathian Thlarauvin A Kaihruai
10, 11. Pathian Fapa neih chhun chuan thlarau thianghlim lakah beiseina eng nge a neih a, eng nge a tawn?
10 Pathian thlarau inkaihhruaitîr kan duh chhan tûr a pahnihna chu Pathianin a Fapa ngei pawh chu mi hmanga a kaihhruai vâng a ni. Leia a rawn kal hma pawhin, Pathian Fapa mal neihchhun chuan he hrilh lâwk thu: “LALPA thlarau—finna leh hriat theihna thlarau, remruatna leh chakna thlarau, hriatna leh LALPA ṭihna thlarau chu—a chungah a fu ang,” tih hi a hre tawh a. (Is. 11:2) He leia harsatna hrang hrang a tawh laia Pathian thlarau ṭanpuina dawn a duh dân tûr chu han ngaihtuah teh!
11 Jehova thu chu a thleng dik ta chiah a. Chanchin ṭha ziak chuan Isua baptisma a chan hnu lawka thilthleng chungchâng chu heti hian a sawi a ni: “Isua chu thlarau thianghlimin a khat a, Jordan lui aṭangin a kîr leh a, . . . thlalêrah . . . thlarau hruaiin a awm a,” tiin. (Lk. 4:1, 2) Chu mi hmuna Isua’n chaw nghei a, ṭawngṭai leh chhût nguna a awm lai chuan Jehova chuan a Fapa chu a thil la tawn tûrte chungchângah kaihhruaina pein, a hrilhfiah ngei a rinawm. Pathian chakna che vêl reng, a thlarau chuan Isua rilru leh thinlungah hna thawkin, a ngaihtuahna leh thu tlûkna siamte chu a kaihruai a. Chuvângin, a dinhmun tawh apiangah a tih tûr chu a hria a, a Pain ti tûra a duh tak chu a ti ṭhîn a ni.
12. Engvângin nge Pathian thlarau kaihhruaina dîl chu a pawimawh?
12 Isua chuan ama nun ngeia Pathian thlarau hnathawh a hlutzia hriain, a zirtîrte hnênah thlarau thianghlim dîl leh a kaihhruaia awm a pawimawhzia a hriattîr a ni. (Luka 11:9-13 chhiar rawh.) Engvângin nge chutianga tih chu kan tân a pawimawh êm êm? Chu chuan Krista rilru ang pu thei tûra kan ngaihtuahna a tihdanglam theih vâng a ni. (Rom 12:2; 1 Kor. 2:16) Pathian thlarau kan inkaihhruaitîr chuan Krista rilru ang kan pu theiin, a entîrna kan zui thei bawk ang.—1 Pet. 2:21.
Khawvêl Thlarau Chuan Min Hruai Bo Vang
13. Khawvêl thlarau chu eng nge ni a, chu chuan eng nge a awmtîr?
13 Pathian thlarau inkaihhruaitîr kan duh chhan tûr a pathumna chu hei hi a ni: A tel lo chuan tûn lai mi tam zâwkte thununtu thlarau bawlhhlawh hruai bova kan awm theih avângin. Khawvêl chuan thlarau thianghlim kalh zâwng kawng min zawhtîr tûrin chakna thiltithei tak leh mi hneh thei tak a nei a. Mite chu Krista rilru ang neihtîr ahnêkin, khawvêl awptu Setana thinlung leh thiltih ang zui ve tûrin a chêttîr zâwk a ni. (Ephesi 2:1-3; Tita 3:3 chhiar rawh.) Mi chu khawvêl thlarau laka a tlâwm a, tisa thiltihte a chîn hian chu chuan Pathian rama luh theih lohna rah lungchhiatthlâk tak a chhuah ṭhîn.—Gal. 5:19-21.
14, 15. Engtin nge khawvêl thlarau kan do hlawhtlin theih?
14 Jehova chuan khawvêl thlarau do tûrin min thuam a. Tirhkoh Paula chuan: “Lalpaah leh a chakna thahruiah chuan thiltihtheihna neiin lo awm rawh u . . . ni ṭha lovah chuan in do zawhna . . . tûrin,” a ti. (Eph. 6:10, 13) Jehova chuan a thlarau hmangin Setana min hruai bo tumna do thei tûrin min tichak a ni. (Thup. 12:9) Khawvêl thlarau chu a chak hle a, chu chu kan pumpelh pumhlûm ṭhak thei lo. Mahse, chu chuan min tichhe ngei ngei dâwn tihna a ni kher lo. Thlarau thianghlim chu a chak zâwk daih a, chu chuan min ṭanpui ngei ang!
15 Kum zabi khatnaa Kristianna kalsantute chungchâng sawiin, tirhkoh Petera chuan: “Kawng dik chu an kalsan a, an vâk bo ta a,” tiin a sawi. (2 Pet. 2:15) ‘Khawvêl thlarau ni lova, thlarau, Pathian hnêna mi kan hmuh zâwk’ avângin kan va lâwm tak êm! (1 Kor. 2:12) Thlarau thianghlim kaihhruaia awmin leh thlarau lam kawng dik kan zawh reng theih nâna Jehova ruahmanna siam zawng zawng hmang ṭangkai vekin, he khawvêl thlarau suaksual tak hi kan do hlawhtling thei a ni.—Gal. 5:16.
Thlarau Thianghlim Chuan Rah Ṭha A Chhuah Ṭhîn
16. Thlarau thianghlim chuan keimahniah eng rah nge a chhuah theih?
16 Pathian thlarau inkaihhruaitîr kan duh chhan tûr a palina chu a kaihhruaia awmte nunah rah ṭha a chhuah ṭhin vâng a ni. (Galatia 5:22, 23 chhiar rawh.) Kan zîngah hmangaihna neih lehzual te, hlim lehzual te, leh inrem lehzual te duh lo tu nge awm ang? Dawhtheihna te, ngilneihna te, leh ṭhatnate ngah tak ni duh lo tu nge awm ang? Rinna te, thuhnuairawhna te, leh insûmtheihnate neih lehzual chu hlâwkpui lo tu nge awm ang? Pathian thlarau chuan keimahni leh kan chênpuite leh kan rawngbâwlpuite hlâwkpui tûr mize ṭhate keimahniah a rah chhuak ṭhîn. Pathian thlarau rah chu kan lan chhuahtîr tûr zât bithliah chin leh phal chin a awm loh avângin, thlarau rah lantîrna chuan tâwp chin a nei lo vang.
17. Engtin nge thlarau rah pêng a engemaw ber chu kan neih lehzual theih ang?
17 Kan ṭawngkam leh thiltihte’n thlarau thianghlimin min kaihruai tih a târ lan leh lan loh te, a rah kan lanchhuahtîr leh tîr lohte hre tûra inenfiah reng chu a finthlâk a ni. (2 Kor. 13:5a; Gal. 5:25) Thlarau rah pêng ṭhenkhat neih kan ngai tih kan inhriat chuan, chu miziate lantîr theih nân thlarau thianghlim mila kan nun lehzual a ngai a ni. Chu chu Bible leh kan Kristian thu leh hla chhuaha târ lan thlarau rah pêng tinte zirna hmangin kan ti thei a. Chutiang chuan, kan nî tin nuna a rah lan chhuahtîr dân leh neih belh zêl dân tûr kan hre thei a ni. * Keimahni nun leh kan Kristian unaute nuna Pathian thlarau hnathawh rah chhuahte kan hmuh hian, chu mi kan inkaihhruaitîr chhan tûr chu kan hmu chiang hle a ni.
Pathian Thlarau Hnuaiah I Intulût Em?
18. Engtin nge Pathian thlarau kaihhruaina chhân lêt kawngah Isua chu kan tân entawn tûr ṭha tak a nih?
18 Lei leh vân siamnaa Pathian “mi themthiam” a nih angin, Isua chuan mihringte’n compass an hman huna an rinchhan chakna chungchâng chu a hre chiang hle a. (Thuf. 8:30; Joh. 1:3) Mahse, he leia a awm lai khân amah kaihruaitu atân chu chakna a hman thu Bible-ah târ lan a ni lo va, chakna thiltithei tak Pathian thlarau thianghlim a dawn thu erawh târ lan a ni. Ani chuan thlarau thianghlim inkaihhruaitîr chu a duh a, chu thlarauvin thil engemaw ti tûra a duh hunah a kaihhruaina angin a ti ṭhîn. (Mk. 1:12, 13; Lk. 4:14) Chutiang mi chu i ni ve em?
19. Thlarau thianghlim kan nun kaihhruaitîr tûrin eng nge kan tih ngai?
19 Pathian thlarau thianghlim chuan tûn laiah pawh a kaihhruaia awm duhte rilru leh thinlungah hna a la thawk reng a ni. Engtin nge thlarau thianghlim chu kawng dika i inkaihhruaitîr theih? Thlarau pe tûr che leh a kaihhruaina hnuaia intulût tûra ṭanpui tûr chein Jehova hnênah ṭawngṭai reng rawh. (Ephesi 3:14-16 chhiar rawh.) Tichuan, thlarau thianghlim hmanga ziah—Pathian Thu, Bible-a chuang fuihnate zawngin i ṭawngṭaina nêna inmil chuan thil ti ang che. (2 Tim. 3:16, 17) Bible-a fuihna thu fing takte chu zâwm la, thlarau thianghlim kaihhruaina chu phûr takin chhâng lêt ang che. He khawvêl suaksual takah hian Jehova’n ṭha takin a kaihruai thei che tih ring tlat chungin thil ti ang che. (w11-E 12/15)
[Footnote]
^ par. 17 Thlarau rah pêng tinte chungchâng sawiho nân hêngte hi en rawh: w07 8/1 p. 18; w03 1/1 p. 22-21; w02 1/1 p. 25-26; w01 11/1 p. 14-15; w03 7/1 p. 5-6; w01 1/1 p. 16-17; w03 4/1 p. 11, p. 14-16; w03 10/1 p. 22-24.
A Thu Pawimawhte Kan Hria Em?
• Engtin nge thlarau thianghlim chuan kan nun a kaihhruai theih?
• Pathian thlarau inkaihhruaitîr kan duh chhan tûr kawng lite chu eng nge ni?
• Thlarau thianghlim kaihhruaina hlâwkpui pumhlûm tûrin eng nge kan tih ngai?
[Zirlai Atâna Zawhnate]
[Phêk 21-naa milem]
Pathian thlarau chu thil ti tûra Isua chêttîrtu a ni
[Phêk 23-naa milem]
Pathian thlarau chuan a kaihhruaia awm duhte rilru leh thinlung a chêttîr ṭhîn
