Kum Zabi Khatna leh Tûn Laia Pathian Thlarau Kaihhruaina
Kum Zabi Khatna leh Tûn Laia Pathian Thlarau Kaihhruaina
“Chûng zawng zawng chu, thlarau hmunkhat vêk chuan . . . a thawk ṭhîn.”—1 KOR. 12:11.
1. He thuziakah hian engte nge kan ngaihtuah ang?
PENTIKOST. He thu mal hian thilthleng phûrawm tak min va hriat chhuahtîr tak êm! (Tirh. 2:1-4) Chu mi ṭuma thlarau thianghlim leih buakna chu Pathianin a chhiahhlawhte a dâwr dân inthlâkthlengna pawimawh tak chhinchhiahna a ni. Thuziak hmasaah khân, Pathian thlarauvin mi rinawm hmasate chu an tih tûr harsa leh chipchiar takte hlen chhuak tûra a ṭanpui dân ṭhenkhat kan ngaihtuah tawh a. Mahse, Kristian hun hma leh kum zabi khatnaa Pathian thlarau hnathawh dân inan lohna chu eng nge ni? Engtin nge tûn laia Kristiante’n Pathian thlarau hnathawh chu an hlâwkpui? I lo en ang u.
“Ngai Teh, Lalpa Bawinu Ka Ni”
2. Engtin nge Mari chuan thlarau thianghlim hnathawh dân a lo hmuh tawh?
2 Jerusalem pindan chungnung zau taka pêk tiam thlarau thianghlim leih buak a nih khân Mari pawh a awm ve a. (Tirh. 1:13, 14) Mahse, chu thil a thlen hma kum sawmthum chuangah Jehova thlarau hnathawh dân mak tak chu a lo hmu tawh a ni. Jehova chuan a Fapa nunna chu nula thianghlim Mari chhûlah dahin, vân aṭangin leiah a rawn sawn a. A naupai chu “thlarau thianghlim laka mi a ni.”—Mt. 1:20.
3, 4. Eng rilru put hmang nge Mari’n a lantîr a, engtin nge kan entawn theih?
3 Engvângin nge Mari chu chuti taka duhsak bîk a nih? A chungchânga Jehova duhzâwng vântirhkohvin a hrilh hnu chuan Mari chuan: “Ngai teh, Lalpa bawinu ka ni, i thu ang zêlin ka chungah thleng rawh se,” a ti a. (Lk. 1:38) Chutianga sawiin, Mari chuan Pathianin a lo hmuh diam tawh a rilru put hmang chu a târ lang a ni. A chhân lêt nghâlna chuan chu mi chungchânga Pathian duhzâwng pawm a inhuamzia a târ lang a. Ani chuan vêngchhûng mite thlîr dân tûr emaw, a pasal hual nêna an inkâr a nghawng dân tûr emaw chungchângah zawhna engmah a siam lo. Chhiahhlawh tlâwm ber anga insawiin, Mari chuan Jehova chu Pu ber anga a rin pumhlûmzia a lantîr a ni.
4 Pathian rawngbâwlnaa i mawhphurhna emaw, harsatna emawte avângin hrilhhai deuh châng i nei em? Kan zain heti hian kan inzâwt tûr a ni: ‘Jehova chuan a duhzâwng nêna inmilin thil a ching fel ang tih ka ring tlat em? Inhuamna thinlung ka lantîr tak zet em?’ tiin. Pathian chuan thinlung zawng zawnga amah ringtute leh lal a nih anga a duhzâwng pawmtute chu a thlarau thianghlim a pe ṭhîn tih ring tlat ang che.—Tirh. 5:32.
Petera Chu Thlarau Thianghlimin A Ṭanpui
5. C.E. 33 Pentikost hma khân engtin nge thlarau thianghlim chuan Petera chungah hna a thawh?
5 Mari ang bawkin, tirhkoh Petera pawhin C.E. 33 Pentikost hma khân Pathian thlarau thianghlim hnathawh ropui tak chu a tawng a. Isua chuan amah leh tirhkoh dangte chu ramhuai hnawt chhuak tûrin thu neihna a pe a ni. (Mk. 3:14-16) Bible chuan chu mi chungchâng sawi kim vek lo mah se, chu thu neihna hmangtu chu Petera a nih hmêl hle. Chu bâkah, Isua sâwmna anga Galili Tuipui chunga Petera a kal pawh khân Pathian thiltihtheihna chu a lang bawk. (Matthaia 14:25-29 chhiar rawh.) Petera chuan thil ropui tak takte ti tûra ṭanpuitu atân thlarau thianghlim a rinchhan tih a chiang hle. A hnu lawkah, chu thlarau chuan Petera leh zirtîr dangte chungah kawng chi hrang hrangin hna a la thawk dâwn a ni.
6. Petera chuan C.E. 33 Pentikost hun lai leh a hnu lamah Pathian thlarau ṭanpuinain eng nge a tih theih?
6 C.E. 33 Pentikost Kût nî khân Petera leh tirhkoh dangte chuan Jerusalem rawn tlawhtute anmahni hnam ṭawnga biak theihna thilpêk mak tak mai chu an dawng a. Chu mi hnuah, Petera chuan mipui pungkhâwmho hnêna thusawinaah hma a hruai a ni. (Tirh. 2:14-36) Ni e, thil tih thut thut chîng leh dâwihzep châng nei ṭhîn kha tûnah chuan vauna leh tihduhdahna kâr pawha thu hril tûrin huaisennain a khat ta. (Tirh. 4:18-20, 31) Tin, Pathian hriattîrnain thil a hre thei ta bawk a ni. (Tirh. 5:8, 9) Chu bâkah, mitthi hial pawh kaih thawh theihna pêk a ni bawk.—Tirh. 9:40.
7. Hriak thih a nih hnuah Petera’n Isua zirtîrna engte nge a hriat thiam tâk?
7 Pentikost hma pawh khân Petera chuan Isua zirtîr thutak tam tak chu a hre thiam a. (Mt. 16:16, 17; Joh. 6:68) Mahse, hriat chian loh ṭhenkhat erawh a nei a ni. Entîr nân, Krista chu a ni thum niah thlarauva kaihthawh a nih tûr thu a hre lo va; Lalram chu vâna awm tûr a nih thu pawh a hre hek lo. (Joh. 20:6-10; Tirh. 1:6) A tân chuan mihringte vân nunna changa kaihthawh a, vân Rama rorêltîr chu thil thar a ni a. Amah ngei chu thlarau thianghlima baptis a nih a, vân nun beiseina pêk a nih tâkah chuan, chu mi chungchânga Isua thusawi chu a hre thiam ta a ni.
8. Hriak thihte leh ‘berâm dangte’ chuan eng hriatna nge an neih?
8 Isua zirtîrte chuan tûn hmaa an hriat thiam loh thute chu thlarau thianghlim leih buak achinah chuan an hre thiam ta a. Thlarau thâwk khumin, Kristian Grik Pathian Lehkha Thu ziaktute chuan—kan hlâwkpui atân—Jehova thiltum hrang hrang ropui tak takte chu an ziak a ni. (Eph. 3:8-11, 18) Tûn laiah, thlarauva hriak thihte leh ‘berâm dangte’ chu thlarau lamah inchâwm tlângin, hêng thlarau lam thutak thuhmun chu an kîl tlâng a ni. (Joh. 10:16) Thlarau thianghlim zâra i neih Pathian Thu hriatna leh hriatthiamna chu i ngaihlu em?
Paula Chu “Thlarau Thianghlimin A Khat”
9. Paula chuan thlarau thianghlim hmangin eng nge a tih theih?
9 C.E. 33 Pentikost hnu kum khat vêlah chuan mi dang tuemaw pawhin Pathian thilpêk thlarau thianghlim chu a dawng ve a. Chu chu, a hnua Paula tia kan hriat tâk Saula hi a ni. Thlarau thianghlim chuan tûn laia kan hlâwkpui theih tûr zâwngin a chungah hna a thawk a. Bible bu 14 lai ziak tûrin a thâwk khum a ni. Petera ang bawkin, Pathian thlarau chuan Paula chu vâna thih theih lohna leh ṭawih theih lohna nun beiseina chungchâng hriat thiamna pein, fiah takin a ziahtîr a. Ani chuan thlarau thianghlim hmangin dam lote a tidam a, ramhuaite a hnawt chhuak bawk a, mitthite hial pawh a kaitho a ni. Mahse, thlarau thianghlim hmanga Paula thiltihtheihna dawn chuan thiltum pawimawh zâwk a nei a. Chu chu mak taka an dawn ni lo mah se, tûn laia Pathian chhiahhlawh zawng zawngte pawhin an tawng a ni.
10. Engtin nge thlarau thianghlim chuan Paula chu thu sawi tûra a ṭanpui?
10 ‘Thlarau thianghlima khat’ Paula chuan dawithiam pakhat chu huaisen takin a sawisêl a. Chu chuan a lo ngaithlatu Kupra lal aiawhtu chungah nghawng a va nei thui tak êm! Chu lal aiawhtu chuan “Lalpa zirtîr thu chu mak a ti hle a,” thutak a pawm ta a ni. (Tirh. 13:8-12) Paula chuan thutak sawinaa Pathian thlarau thianghlim a pawimawhzia a hre chiang hle. (Mt. 10:20) A hnuah Ephesi khaw kohhranho chu ‘thu sawitîr,’ a nih loh leh thusawi theihna pêk a nih theih nâna ṭawngṭaisak tûrin a ngên a ni.—Eph. 6:18-20.
11. Engtin nge Paula chu Pathian thlarauvin a kaihhruai?
11 Thlarau thianghlim chuan Paula chu thu a sawi theihtîr mai bâkah, hmun ṭhenkhata sawi lo tûrin a khap bawk. Missionary anga a han zin chhuah ṭan chuan Paula chu Pathian thlarauvin a kaihruai a ni. (Tirh. 13:2; Tirhkohte 16:6-10 chhiar rawh.) Tûn laiah pawh Jehova chuan thu hrilhna chu a thlarau hmangin a la kaihhruai zêl a. Paula ang bawkin, Jehova chhiahhlawh thuâwih zawng zawngte chuan huaisen tak leh ṭhahnemngai taka thu hrilh chu an tum tlat a ni. Tûn laia Pathian thlarau min kaihhruai dân chu Paula hun lai angin langsâr tawh lo mah se, a phûte’n thutak an hriat ngei theih nân Jehova’n a thlarau thianghlim a hmang reng tih kan chiang thei a ni.—Joh. 6:44.
“Hnathawh Dân Hrang Hrang”
12-14. Pathian thlarau chuan a chhiahhlawh zawng zawngte chungah inang vekin hna a thawk em? Hrilhfiah rawh.
12 Jehova’n kum zabi khatnaa hriak thihte hmanga din Kristian kohhran mal a sâwm dân chungchâng thuziak chuan tûn laia Pathian chhiahhlawh inpumpêkte tân fuihna pawimawh tak a pe em? Tehrêng mai! Chutih hun laia thlarau thilpêk mak takte chungchâng Korinth kohhranho hnêna thlarauva thâwk khum Paula thute hi chhinchhiah ang che: “Tin, thilpêk hrang hrang a awm a, thlarau erawh chu hmunkhat a ni. Rawngbâwl dân hrang hrang pawh a awm a, nimahsela Lalpa chu hmunkhat a ni. Hnathawh dân hrang hrang pawh a awm a, Pathian erawh chu hmunkhat a ni—mi zawng zawnga engkim thawktu chu,” tihte hi. (1 Kor. 12:4-6, 11) Ni e, thlarau thianghlim chuan thiltum neiin Pathian chhiahhlawh hrang hrangte chungah kawng chi hrang hrangin hna a thawk thei a. Dik takin, thlarau thianghlim chu Krista “pâwl tlêmte” leh ‘berâm dangte’ tân hmun theih a ni ve ve a ni. (Lk. 12:32; Joh. 10:16) Mahse, kohhrana mi tinte chunga a hnathawh dân erawh a inang kher lo.
13 Entîr nân, upate chu thlarau thianghlim hmanga ruat an ni a. (Tirh. 20:28) Mahse, thlarauva hriak thih zawng zawngte chu kohhran upa an ni vek kher lo. Heta ṭang hian eng thu tâwp nge kan siam theih? Pathian thlarau chuan kohhrana mi tinte chungah kawng chi hrang hrangin hna a thawk ṭhîn tih hi.
14 “Fa nihna thlarau,” a nih loh leh fa nih inhriatna nei tûra hriak thihte chunga thawktu thlarau chu Jehova’n a Fapa neih chhun thihna ata vâna thih theih lohna nun nei tûra kaihthawh nâna a hman thlarau nên a thuhmun reng a. (Rom 8:11, 15 chhiar rawh.) Jehova’n lei leh vân siam nâna a hman thlarau nên pawh a thuhmun bawk a ni. (Gen. 1:1-3) Chu thlarau thianghlim vêk hmang chuan, Jehova’n Bezalela chu biak bûk nêna inkûngkaih hna engemaw bîk tak thawk tûrin a tlintîr a, Samsona chu chakna namên lo hman ngai hna a thawhtîr bawk a; tin, Petera chu tui chungah kaltîr bawk a ni. Chuvângin, Pathian thlarau nei tih leh thlarau hnathawh dân kawng khat, thlarauva hriak thih nihna chu i hriat pawlh lo vang u. Thlarauva hriak thih chu Pathian duhthlannaah a innghat a ni.
15. Thlarau thianghlima baptisma channa chu a awm kumkhua ang em? Hrilhfiah rawh.
15 Thlarauva hriak thihna inṭan hma kum sâng tam tak—Pathianin chhiahhlawh rinawm a neih ṭantirh phat—aṭangin thlarau thianghlim chuan a chhiahhlawh rinawmte chungah kawng chi hrang hrangin hna a lo thawk tawh a ni. C.E. 33 Pentikost niah thlarau hnathawh dân kawng thar a inṭan a, mahse chu chu thil awm reng tûr a ni lo. Thlarauva baptisma channa chu a la tâwp dâwn a; mahse, Pathian mite’n chatuana a duhzâwng an tih theih nân thlarau thianghlim chuan an chungah hna a thawk chhunzawm zêl ang.
16. Pathian chhiahhlawhte chuan thlarau thianghlim zârah eng nge an tih mêk?
16 Jehova thlarau thianghlim zârah tûn lai khawvêlah hian eng thil nge thleng mêk? Thu Puan 22:17 chuan heti hian a chhâng a ni: “Thlarau leh mo chuan, ‘Lo kal rawh,’ an ti a. A hria apiangin ‘Lo kal rawh,’ ti rawh se. Tuihâl apiang lo kal rawh se; a duh apiangin nunna tui hi athlâwnin la rawh se,” tiin. Pathian thlarauvin a chêttîr avângin, tûn laia Kristiante chuan “a duh apiangin” nunna tui an dawn theih nân chu sâwmna chu an pe chhuak a. Chutah chuan hriak thih Kristiante’n hma an hruai a, berâm dangte’n an ṭawiâwm a ni. He hna an thawhnaah hian chûng pâwl pahnihte chu thlarau thianghlim thuhmunin a kaihruai ve ve a. Jehova hnêna an inpumpêkzia lantîr nân, “Pa leh Fapa leh thlarau thianghlim hmingah” baptisma an chang ve ve bawk a ni. (Mt. 28:19) Chu bâkah, an vai chuan an nuna Pathian thlarau hnathawh hnuaiah intulûtin, chu mi rah chu an lan chhuahtîr a. (Gal. 5:22, 23) Hriak thihte ang bawkin, berâm dangte pawhin Pathian thlarau chu an inkaihhruaitîr bawk. Thlarau thianghlim ṭanpuinain thianghlimna lama Jehova thil phûtte tlin thei tûrin theih tâwp an chhuah a ni.—2 Kor. 7:1; Thup. 7:9, 14.
Thlarau Thianghlim Dîl Zêl Rawh
17. Engtin nge Pathian thlarau kan neihzia kan lantîr theih?
17 Chuvângin, Pathianin beiseina a pêk che chu vân lama nunna emaw, lei lama nunna emaw pawh ni se, rinawm nghehna i vawn theih nân leh lâwmman i hmuh theih nân Jehova chuan ‘thiltihtheihna nasa tak’ a pe thei che a ni. (2 Kor. 4:7) Ram chanchin ṭha i hrilh zêl avânga nuihsawh pawh i ni mai thei. Mahse, “Krista hming avânga hau in nih chuan in eng a thâwl e; thlarau ropui tak, Pathian thlarau chu in chungah a awm si a,” tih hi hre reng ang che.—1 Pet. 4:14.
18, 19. Engtin nge Jehova chuan a thlarau thianghlim hmangin a ṭanpui ang che a, he mi chungchângah hian eng nge tih i tum tlat?
18 Thlarau thianghlim chu tih tak zeta zawngtute hnêna Pathian thilthlâwnpêk a ni a. I theihna a tihphuisui theih mai bâkah, theih tâwpa a rawng bâwl i châkna pawh a tipung thei a ni. “Ama lâwmzâwng atâna tih tum tûr leh bei tûra nangmahnia thawktu chu Pathian a ni si a.” Thlarau thianghlim ṭanpuina leh “nunna thu” chelh nghet tlat tûra theihtâwp kan chhuahna chuan ‘hlau leh khûr chunga mahni chhandamna thawk chhuak’ tûrin min ṭanpui ang.—Phil. 2:12-16.
19 Chuvângin, Pathian thlarau ring tlat chungin i chanvo chan engpawh chu theihtâwp chhuahin thawk la, i tih tûr chu thiam takin tichho la, Jehova ṭanpuina dîl ang che. (Jak. 1:5) Ani chuan a Thu hre thiam tûr te, nuna harsatna hmachhawn thei tûr te, leh chanchin ṭha hril thei tûrtea i mamawh chu a pe zêl ang che. “Dîl rawh u, tichuan an pe ang che u; zawng rawh u, tichuan in hmu ang; kik rawh u, tichuan an hawnsak ang che u,” tih a ni a, hetah hian thlarau thianghlim dawn chungchâng pawh a tel a ni. (Lk. 11:9, 13) Ni e, Pathian thlarauva kaihhruai, hmân lai leh tûn laia mi rinawm takte ang i nih ve theih nân Jehova hnênah ṭawngṭai zêl ang che. (w11-E 12/15)
Kan Hrilhfiah Thei Em?
• Mari angin, malsâwmna thlen thei rilru put hmang eng nge kan lantîr theih?
• Eng kawngin nge Paula chu Pathian thlarauvin a kaihhruai?
• Engtin nge tûn laia Pathian chhiahhlawhte chu a thlarauvin a kaihhruai?
[Zirlai Atâna Zawhnate]
[Phêk 30-naa milem]
Pathian thlarau azârah Paula chuan huaisen takin dawithiam chu a sawisêl
