Mipat Hmeichhiatna Chungchânga Zawhna Sâwmte Chhânna

1 Eden huana Adama leh Evi thil sual tih kha mipat hmeichhiatna hi a ni em?

▪ A chhânna: Mi tam tak chuan Eden huana thei ei thiang lo khân mipat hmeichhiatna a entîr niin an ngai a. Mahse, Bible-in chutiang chuan a zirtîr lo.

Han ngaihtuah teh: Evi a siam hma pawh khân, Pathian chuan Adama hnênah “a chhia leh a ṭha hriatna thing rah” chu ei lo tûrin thu a lo pe diam tawh a. (Genesis 2:15-18) Chutih lai chuan Adama chu amah chauhva a awm avângin, chu khapna chuan mipat hmeichhiatna a kâwk thei lo. Chu bâkah, Pathian chuan Adama leh Evi hnênah: “Chi tam tak thlaha lo pungin, leilung hi luah khat ula,” tiin thupêk chiang tak a pe bawk. (Genesis 1:28) Hmangaihna Pathian chuan nupa hmasa ber chu mipat hmeichhiatna tel lova tih theih loh tûr ‘chi tam tak thlah’ tûra thu a pêk hnuah, a thupêk an zawm avângin a tihlum leh si ang em ni?—1 Johana 4:8.

Chu mai bâkah, a pasal awm loh hlânin a ni, Evi chuan “a rah [ei phal loh] ṭhenkhat chu a lo va, a ei” ni. “Tin, a pasal a pe ve a, a ni pawhin a ei ve ta a.”—Genesis 3:6.

A tâwp berah chuan, Adama leh Evi’n mipat hmeichhiatna hmang a, fate an neih khân Pathianin an ni chu a hau lo. (Genesis 4:1, 2) Chuvângin, Adama leh Evi thei ei chu mipat hmeichhiatna entîrtu ni lovin, thei rah tak tak a ni tih a chiang hle.

2 Bible hian mipat hmeichhiatna hman aṭanga hlimna hmuh a khap em?

▪ A chhânna: Bible bu hmasa ber chuan mihringte ‘mipa leh hmeichhiaa’ siamtu chu Pathian ngei a nihzia a târ lang a. Pathian chuan a thil siamte chu “ṭha a ti êm êm a.” (Genesis 1:27, 31) A hnuah, Pathianin Bible ziaktu pakhat chu pasalte hnêna: “I tleirâwl lai nupuiah chuan hlim rawh. . . . Englai pawhin a ṭâng chhûng chuan tilungawi fo che sela,” tih ziak tûrin a thâwk khum a ni. (Thufingte 5:18, 19) Hêng thute aṭang hian Bible-in mipat hmeichhiatna hman aṭanga hlimna hmuh a khap niin a lang em?

 Pathianin serh chu inthlah chhâwn nân mai bâkah, nupate’n an pahniha hlimna thlen tûr zâwnga an inhmangaihna leh inngainatna lantîr nân a siam a ni tih a chiang hle. Chu chuan inlaichînna nghet tak nei nupate tisa lam leh rilru lam mamawh chu a phuhru thei a ni.

3 Dân anga innei si lova nupa anga khawsak dun hi Bible-in a pawm em?

▪ A chhânna: Bible chuan “inngaite leh uirête chu Pathianin a ngaihtuah dâwn” tih chiang takin a sawi a. (Hebrai 13:4) Inngai sawi nâna hman Grik thu mal por·neiʹa tih chuan a huam zau hle a, innei lote’n serh an hman khaw lohna a kâwk a ni. * Chuvângin, inneih tum ngei ngeite pawh ni se, inneih hmaa nupa anga khawsak dun chu Pathian mithmuhah a dik lo a ni.

Inneih tumte chu inhmangaih hle pawh ni se, an inneih hma chu mipat hmeichhiatna hmang lo tûrin Pathian chuan a khap a ni. Hmangaihna nei theia min siamtu chu Pathian a ni a. A mize chungnung ber pawh hmangaihna a ni. Chuvângin, a dawta thuziakin a târ lan tûr angin, nupa inkâr chauhva mipat hmeichhiatna hman phal chhan tûr ṭha tak a nei a ni.

4 Nupui pakhat aia tam neih a thiang em?

▪ A chhânna: Pathian chuan tûn hmain hun eng emawti chhûng chu mipa tân nupui pakhat aia tam neih a lo phal a. (Genesis 4:19; 16:1-4; 29:18–30:24) Mahse, chu chîn dân chu ama din a ni lo. Adama tân nupui pakhat chauh a lo pe zâwk a ni.

Pathian chuan atîra A ruahman dân, mipa tâna nupui pakhat neih chu din ṭha leh tûrin Isua hnênah thu neihna a pe a. (Johana 8:28) Inneihna chungchâng an zawh khân, Isua chuan: “Atîr ata an siamtu khân hmeichhia leh mipaa a siam leh, ‘He mi avâng hian mipain a nu leh a pa a kalsan ang a, a nupui a vuan ang; tichuan an pahnih chuan tisa pum khat an lo ni tawh ang,’ a ti tih in chhiar lo vem ni?” tiin a chhâng a ni.—Matthaia 19:4, 5.

A hnuah Isua tirhkohte zînga pakhat chu: “Mipain nupui bîk nei ṭheuh sela, hmeichhia pawhin pasal bîk nei ṭheuh rawh se,” tia ziak tûrin Pathianin a thâwk khum a. (1 Korinth 7:2) Bible  chuan Kristian kohhrana mawhphurhna changtute chu nupui nei a nih chuan, “nupui pakhat nei” an ni tûr a ni tih a sawi bawk.—1 Timothea 3:2, 12.

5 Nupate tân nau pai lo tûra invênna hman a sual em?

▪ A chhânna: Isua chuan a hnungzuitute chu fa nei tûrin thu a pe lo va. A zirtîrte pawhin chutiang lam hawiin kaihhruaina chu an pe rêng rêng lo. Bible-ah hian nau pai lo tûra invênna hman khap a nih thu chiang taka sawina khawiah mah a lang lo.

Chuvângin, fa neih tûr leh neih loh tûr chungchânga thu tlûkna siam tûrin nupate chuan zalênna an nei a. An fa neih duh zât leh neih duh hun pawh an thlang thei bawk. Nupate’n naute tihtlâkna tel lo invênna hman an duh chuan, chu chu anmahni duhthlanna leh mawhphurhna a ni a, tuman an chung thu an rêlsak tûr a ni lo. *—Rom 14:4, 10-13.

6 Nau tihtlâk hi a sual em?

▪ A chhânna: Nunna hi Pathian tân thil hlu tak a ni a, ani chuan pum chhûnga naute insiam ṭantîr tê pawh hi mi nung angin a thlîr a ni. (Sâm 139:16) Nau la piang lo tihlumtu chu a thiltih avânga a chunga phuba lâk a ni ang tih Pathian chuan a sawi. Chuvângin, Pathian mithmuhah chuan nau la piang lo tihhlum chu tual thahna a ni.—Exodus 20:13; 21:22, 23.

A nih leh, nupate chuan nau hrin dâwn hunah pakhat zâwk chauh dam chhuah theihna tûr dinhmun khirh tak tâwk ta se, engtin nge ni ang? Chutih hunah chuan nupate chuan tu nunna zâwk nge an chhanhim ang tih chungchângah thu tlûkna an siam a ngai ang. *

7 Bible-in inṭhen a phal em?

▪ A chhânna: Bible-in inṭhen hi a phal ngei mai a. Mahse, Isua chuan inṭhen theih dân kawng khat chauh a awm tih a târ lang a ni: “Tlangvâl ngaih [innei si lo va mipat hmeichhiatna hman] vâng ni lova, nupui maa mi dang nei apiang chu, a uirê a ni,” tiin.—Matthaia 19:9.

Pathian chuan vervêk tak leh inbumna hmanga inṭhen chu a hua a. Chhan ho tê tê avânga an kawppuite kalsantu, a bîk takin mi dang neih duh avânga kalsantute chungthu chu amah ngeiin a ngaihtuah ang.—Malakia 2:13-16; Marka 10:9.

8 Pathianin mawngkawhurna hi a pawm em?

 ▪ A chhânna: Bible chuan inngaihna a dem chiang hle a, chutah chuan mawngkawhurna pawh a tel a ni. (Rom 1:26, 27; Galatia 5:19-21) Pathianin chutiang nun dân a duh lohzia chiang taka a sawi rualin, Bible chuan “Pathianin khawvêl a hmangaih êm êm a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zâwk nân,” tih pawh a sawi bawk a ni.—Johana 3:16.

Kristian dikte chuan mawngkawhurna chu pawmzam lo mah se, mi zawng zawng hnênah Kristian ngilneihna an lantîr a ni. (Matthaia 7:12) Pathian chuan “mi zawng zawng chawimawi” tûrin min duh a. Chuvângin, Kristian dikte chuan mawngkawhurte chu an hmusit chuang lo.—1 Petera 2:17.

9 Phone sex, “sexting,” a nih loh leh cybersex te hian dik lohna a nei em?

▪ A chhânna: Phone sex tihah hian inâwm lo taka phone aṭanga mipat hmeichhiatna lam hawi thute sawi emaw, ngaihthlâk emaw a tel a. “Sexting” tihah hian châkna titho thei milem leh thute phone hmanga mi dangte hnêna thawn chhuah a tel a. Tin, cybersex tihah hian Internet kal tlanga mipat hmeichhiatna lama indâwr tawnna a tel a ni.

Bible chuan hetiang chi tûn laia thil chîn tharte chungchâng hi a sawi fak lo va. Mahse, he thu erawh a sawi a ni: “Mi thianghlimte tiha mawi âwm rêngin, inngaih leh bawlhhawh zawng zawng, duhâmna nên in zîngan lam pawh lamin awm suh se; zahmawh te, thu lawi lo sawi te, [zahmawh lam] fiamthute pawh, chûng chu a mawi lo a ni,” tiin. (Ephesi 5:3, 4) Phone sex te, “sexting” te, leh cybersex ang chite chuan mipat hmeichhiatna chungchâng thlîr dân vei herh a chawi lârin, mite chu innei si lo va mipat hmeichhiatna hmang tûrin a fuih a. Chûng chuan an châknate thunun tûra ṭanpui ai chuan hmasial taka châkna tihpuitlin chu a chawi lâr zâwk a ni.

10 Bible-in inhrawt hi engtin nge a thlîr?

▪ A chhânna: Bible chuan inhrawt—mipat hmeichhiatna lama châkna leh a vâwrtâwp thleng tûra mahni inkhalh—chungchâng hi tlang takin a sawi fak lo va. Mahse, Pathian Thu chuan Kristiante chu: “Chutichuan in taksa pêng leia awmte hi tihlum rawh u, inngaihna te, bawlhhlawhna te, hurna te, . . . hi,” tiin thu a pe a ni.—Kolossa 3:5.

Inhrawtna chuan mipat hmeichhiatna lama ngaih dân vei herh leh hmasial taka mahni châkna phuhrûkna ringawt ngaihtuahna a awmtîr a. He chîn dân bânsan tuma theih tâwp chhuahtute chu Pathianin a ‘thiltihtheihna nasa tak’ a pe thei tih Bible chuan min tiam a ni.—2 Korinth 4:7; Philippi 4:13. (w11-E 11/01)

[Footnote-te]